KERINA kalak atena ermeriah ukur. Tapi bas wari-wari pendungi enda, tiap kalak lit masalahna si mesera akapna ngadapisa. (2 Timotius 3:1) Piga-piga kalak lanai ermeriah ukur perban la adil perbahanen kalak man bana, sakit, lanai lit dahinna, ntah pe perban mate kalak si keleng kel atena. Lit ka si lanai ermeriah ukur perban kejadin si erban ia kuatir ntah pe sedih. Umat Jahwe pe banci kang kecewa, dungna lanai ermeriah ukur. Adi bage si terjadi man bandu, uga nge carana gelah banci kam ermeriah ukur mulihi?

Guna njawap penungkunen e, perlu sieteh lebe kai kin keriahen ukur situhu-tuhu e janah uga carana tetap ermeriah ukur amin gia lit masalahta. Kenca si e, sibahas ka kari uga carana tetap ermeriah ukur janah uga gelah lebih ermeriah ukur.

Ermeriah ukur la seri ras perasan meriah saja. Cuba ukuri enda: Kalak si mabuk banci lalap tawa. Tapi kenca sadar ia, mulihken ka ingetna melala kepeken masalahna. Keriahen ukurna kentisik ngenca janah e labo keriahen situhu-tuhu.​—Kuan-kuanen 14:13.

Selain si e, keriahen ukur eme perasan bas pusuhta nari sanga lit si mehuli si terjadi ntah pe lit si man arapenken. Janah mehuli ntah pe lang keadanta, meriah ukurta. (1 Tesalonika 1:6) Banci jadi lit siakap si la pas tapi tetap kita ermeriah ukur. Contohna, rasul-rasul ipekpeki perban erberita kerna Jesus. Tapi, “itadingken rasul-rasul sidang e alu ukur meriah sabap metunggung iakap Dibata ia ikut ngenanami penggombangi kalak gelar Jesus.” (Perbahanen Rasul-Rasul 5:41) Labo perban ipekpeki maka kalak e ermeriah ukur tapi perban banci tetap setia man Dibata.

Labo tubuhta nari kita nggo ermeriah ukur ntah pe reh bage-bage saja. Engkai maka bage? Perban keriahen situhu-tuhu eme sipat si ihasilken kesah si badia. Isampati kesah si badia kita gelah terus reh ulina sipat-sipatta, termasuk keriahen ukur. (Epesus 4:24; Galati 5:22) Janah adi ermeriah ukur kita, reh nukahna siakap ngadapi masalahta.

Ate Jahwe si mehuli min si terjadi bas doni enda, labo si la mehuli bagi gundari. Tapi amin gia jahat perbahanen manusia, enda labo erban Jahwe lanai ermeriah ukur. Nina Pustaka, “Gegeh ras keriahen ndemi [inganNa].” (1 Kronika 16:27) Janah perbahanen mehuli umatNa erban Dibata ermeriah ukur.​—Kuan-kuanen 27:11.

Siusahaken ngusih Jahwe sanga tetap kita ermeriah ukur amin gia la bagi siarapken si terjadi. Asangken kuatir, siingetlah kai si mehuli si lit bas kita gundari, janah alu  sabar sitimai si terulin bas wari si pepagi. *—Nen keterangen tambahen.

Mbue contoh i bas Pustaka kerna kalak si tetap ermeriah ukur amin gia melala masalahna. Tetap Abraham ermeriah ukur amin gia ngadapi bahaya bage pe sanga lit masalahna iban kalak. (Kejadin 12:10-20; 14:8-16; 16:4, 5; 20:1-18; 21:8, 9) Uga carana? Alu ngukuri arapen kerna doni si mbaru i bas pemerentahen Mesias. (Kejadin 22:15-18; Heber 11:10) Nina Jesus, “Bapandu, Abraham, ermeriah ukur nimai waringku.” (Johanes 8:56) Siusih Abraham adi siukuri keriahen si banci sinanami pagi.​—Roma 8:21.

Paulus ras Silas pe paguh kinitekenna janah tetap kalak e ermeriah ukur amin gia melala masalahna. Contohna, kenca kalak e ipekpeki janah ipenjaraken, ‘ertoto kalak e dingen rende muji Dibata.’ (Perbahanen Rasul-Rasul 16:23-25) Banci kalak e megenggeng perban terus iukurina janji Jahwe kerna wari si pepagi. Janah itehna maka penderitan si iadapina e perban ngikutken Kristus. Siusih Paulus ras Silas adi siinget hasil si mehuli perban ngelayani Dibata alu setia.​—Pilipi 1:12-14.

Gundari pe, mbue contoh arah turang seninata si tetap ermeriah ukur amin gia ngadapi masalah. Contohna, bulan November 2013, terjadi Topan Super Haiyan bas Filipina janah lebih 1.000 rumah Saksi-Saksi Jahwe si hancur. Nina George, si hancur kel rumahna i kota Tacloban, “Bas bencana si bage rupa pe, turang senina ermeriah ukur. Lanai kuteh ngatakenca uga riahna kuakap.” Adi siukuri kai si nggo ilakoken Jahwe man banta janah ngata bujur kita man baNa, tetap kita ermeriah ukur amin gia mberat kel masalahta. Kai ka si ibereken Jahwe man banta si erban kita ermeriah ukur?

Alasen si mbelinna kel si erban kita ermeriah ukur eme hubungenta ras Jahwe. Banci sitandai Raja alam semesta enda. Ia me Bapakta, Dibata, bage pe Temanta!​—Masmur 71:17, 18.

Ngata bujur ka kita man Jahwe si mereken kegeluhen man banta janah banci ngenanami kesenangen nggeluh. (Pengerana 3:12, 13) Perban Dibata si narik kita, banci siteh kai sura-suraNa banta janah siteh uga carana ndalani geluh enda. (Kolose 1:9, 10) Tapi, nterem kalak la tehna kai tujun nggeluh. Gelah siteh kai bedana, ikataken Paulus, “‘Kai si langa pernah iidah ntah pe ibegi manusia, kai si langa pernah iukuri manusia, e kal me si enggo isikapken Dibata man kalak si erkeleng ate man baNa.’ E me kerina si enggo ipetangkas Dibata man banta arah kesahNa.” (1 Korinti 2:9, 10) Meteh sura-sura Jahwe erban meriah ukurta.

Melala kel si nggo ilakoken Jahwe man banta. IampuniNa dosa-dosata. (1 Johanes 2:12) IberekenNa man banta arapen nggeluh bas doni si mbaru, si lanai ndekah terjadi. (Roma 12:12) Gundari pe, ibere Jahwe kita teman si radu kita nembah Ia. (Masmur 133:1) IlindungiNa ka kita arah Setan bage pe malekat-malekat jahat. (Masmur 91:11) Adi terus siukuri kerina pasu-pasu si ibereken Jahwe e, pasti reh riahna ukurta.​—Pilipi 4:4.

Banci nge kalak Kristen si nggo ermeriah ukur lebih ermeriah ukur ka? Nina Jesus, “Si enda kukataken man bandu gelah inanamindu keriahenku janah gelah tuhu-tuhu kal meriah ukurndu.” (Johanes 15:11) Enda mbuktiken maka banci kita lalap lebih ermeriah ukur. Banci sibandingken keriahen ukurta bagi api. Adi reh lasna ateta api e  arus sitambahi kayuna. Ingetlah: Kesah si badia banci erban kita ermeriah ukur. Emaka adi lebih ermeriah ukur ateta perlu sipindo kesah si badia. Arus ka siukuri isi Pustaka, si lit perban kesah si badia.​—Masmur 1:1, 2; Lukas 11:13.

Si banci ka erban kita lebih ermeriah ukur eme ngelakoken pendahin si erban Jahwe senang. (Masmur 35:27; 112:1) Engkai? Ikataken Pustaka maka kita iciptaken guna ‘mbiar man Dibata dingen patuh man peratenNa, sabap guna si e saja me manusia iciptaken.’ (Pengerana 12:13) Kita iciptaken guna ngelakoken kai si ipindo Dibata. Emaka sanga silayani Jahwe, pasti meriah kel ukurta. *—Nen keterangen tambahen.

Sanga siusahaken gelah lebih ermeriah ukur, melala sidat gunana. Contohna, reh riahna ukur Jahwe ngidah kita adi terus silayani Ia alu ermeriah ukur amin gia lit masalahta. (Ulangen 16:15; 1 Tesalonika 5:16-18) Bage ka pe, adi tuhu-tuhu kita ermeriah ukur, labo siban ndarami erta si pentingna bas geluhta. Tapi, sidarami cara gelah melala si banci silakoken guna Kerajan Dibata. (Matius 13:44) Sanga siidah hasil si mehuli arah pengorbanenta man Jahwe, pasti reh riahna ukurta, puas siakap, janah kalak si deban pe reh riahna akapna.​—Perbahanen Rasul-Rasul 20:35; Pilipi 1:3-5.

Adi lebih ermeriah ukur kita, banci kita reh sehatna. Nina Pustaka, “Keriahen desken tambar.” (Kuan-kuanen 17:22) Sekalak peneliti si mpelajari kerna kesehaten bas University of Nebraska i Amerika Serikat setuju ia kai si ikataken Pustaka. Nina, “Adi meriah janah puas akapndu gundari, mbelin kemungkinenna reh sehatna kam pagi.”

Amin gia kita nggeluh bas jaman si melala masalah, banci kita tuhu-tuhu ermeriah ukur adi sialoken kesah si badia alu ertoto, erlajar, ras ngukuri Kata Dibata. Banci ka kita lebih ermeriah ukur adi siukuri kerina si mehuli si ibereken Jahwe man banta gundari, siusih kiniteken kalak si deban, janah siusahaken ngelakoken kai si ipindo Jahwe. Alu bage sigejapken me kai si ikataken Masmur 64:11, nina, “E maka kerina kalak benar ermeriah ukur, i bas [Jahwe]. Ku Ia me cicio.”