1, 2. Kai si isedari sekalak turang senina kerna dirina? Dungna kai si ilakokenna?

NGUDA denga mbarenda Robert iperidiken, tapi labo penting kel akapna kerina si nggo ipelajarina bas Pustaka. Nina, “Labo pernah kulakoken kai si salah, tapi kerina si kulakoken rutinitas saja. Tempa-tempa ndeher aku ras Jahwe, reh aku ku kerina perpulungen janah piga-piga kali i bas setahun merintis ekstra kang aku. Tapi lit si kurang.”

² La iteh Robert kai si kurang bas ia seh asa ia erjabu. Ibanna permainen ras diberuna. Sisungkun-sungkunen kalak e kerna Pustaka. Mbue pemeteh diberuna e kerna Pustaka janah gampang kapna njawapsa. Tapi Robert, rusuren la itehna kai jawapenna dungna mela kapna. Nina, “Bagi kalak motu kuakap aku. Emaka rukur aku, ‘Uga aku banci ngajari diberuku ndeher ras Dibata adi la kuban perubahen?’” Dungna banna perubahen. Nina, “Rajin aku erlajar Pustaka, dungna reh jelasna kuakap kai si kuteki. Lit me pemetehku janah si pentingna reh deherna aku ras Jahwe.”

3. (a) Pelajaren kai si banci sidat arah pengalamen Robert? (b) Kai telu penungkunen si penting si man bahasenta bas artikel enda?

 ³ Banci sidat pelajaren penting arah pengalamen Robert enda. Banci jadi lit pemetehta kerna Pustaka janah ratur kita reh ku perpulungen bage pe erberita, tapi enda labo mis erban kita ndeher ras Dibata. Ntah pe banci jadi nggo erusaha kita ndeher ras Ia, tapi sanga sipereksa dirita siteh me maka perlu siban perubahen. (Pilipi 3:16) Bas artikel enda sijawap kari telu penungkunen penting: (1) Kai si banci nampati kita guna meteh ndeher ntah lang kita ras Dibata? (2) Uga carana gelah reh deherna kita ras Dibata? (3) Kai gunana ndeher ras Dibata tep-tep wari?

4. Ise si perlu ndalanken nasehat bas Epesus 4:23, 24?

⁴ Sanga mulai silayani Dibata, siban me perubahen bas geluhta. Tapi kenca iperidiken pe terus denga arus siban perubahen. Ikataken man banta gelah ‘pusuh peraten ras perukurenta kerina arus ipelimbarui.’ I bas bahasa Junani, kata “ipelimbarui” ertina sada proses si la erngadi-ngadi. Emaka pusuh ras perukurenta arus terus siperubahi. (Epesus 4:23, 24) Perban kita la sempurna, perlu terus siban perubahen. Amin gia nggo ertahun-tahun kita ngelayani Jahwe, perlu terus sipegegehi hubungenta ras Ia.​—Pilipi 3:12, 13.

5. Penungkunen kai si banci nampati kita meteh uga deherna kita ras Dibata?

⁵ La soal kita nguda ntah pe metua, perlu sipereksa dirita alu jujur. Banci sisungkuni banta, ‘Kugejapken nge maka reh deherna aku ras Dibata? Enggo nge aku bali bagi Kristus? Kai nge si teridah i bas aku arah perbahanenku sanga perpulungen? Arah kai si kucakapken, kai nge cita-cita rohaniku? Kai nge si teridah i bas aku arah caraku erlajar Pustaka, penampilenku, bage pe caraku ngaloken nasehat? Uga nge reaksiku sanga lit godan? Enggo nge sue sipat-sipatku bagi si ipindo bas Pustaka?’ (Epesus 4:13) Arah penungkunen enda banci sieteh uga deherna kita ras Dibata.

6. Kai ka si banci nampati kita gelah sieteh ndeher ntah lang kita ras Dibata?

⁶ Mon-mon perlu sisungkun kalak si deban gelah siteh ndeher ntah lang kita ras Dibata. Ikataken Paulus maka kalak si la ndeher ras Dibata la ietehna maka kegeluhenna erban Dibata la senang. Tapi kalak si ndeher ras Dibata ietehna maka la senang Dibata ngidah kalak si ngukurken dirina saja. (1 Korinti 2:14-16; 3:1-3) Pertua si lit perukuren Kristus bas ia minter  iperdiatekenna adi lit turang seninana si nggo mulai ndauh arah Dibata, janah iusahakenna nampatisa. Adi isampati pertua kita, sialoken nge penampatna janah nggit kita robah? Adi sialoken, sibuktiken maka tuhu-tuhu ndeher ateta ras Dibata.​—Pengerana 7:5, 9.

7. Ja nari sieteh maka labo bias pemeteh kerna Pustaka si erban kalak ndeher ras Dibata?

⁷ Labo bias pemetehta kerna Pustaka erban kita ndeher ras Dibata. Melala kel pemeteh Raja Salomo kerna Jahwe, janah lit itulis bas Pustaka kerna kata-katana. Tapi dungna, reh dauhna ia ras Jahwe, janah lanai ia setia. (1 Raja-Raja 4:29, 30; 11:4-6) Emaka, selain pemeteh kerna Pustaka, kai ka nge si perlu? Perlu terus sipegegehi kinitekenta. (Kolose 2:6, 7) Uga carana?

8, 9. (a) Kai si banci silakoken gelah paguh kinitekenta? (b) Kai nge tujunta sanga kita erlajar janah ngukurisa? (Nen gambar pemena artikel.)

⁸ I bas abad si pemena, iiahken Paulus kalak Kristen gelah ‘maju ku pelajaren-pelajaren si terbagesen kerna kegeluhen Kristen.’ (Heber 6:1) Uga carata ndalanken nasehat enda? Sada cara si penting eme mpelajari buku Cara Agar Tetap Dikasihi Allah. Alu bage siteh me uga nggunaken pedah Pustaka bas kegeluhenta. Adi nggo dung pelajarindu buku e, lit ka baca-bacan si deban si banci pelajarindu gelah reh paguhna kinitekenndu. (Kolose 1:23) Perlu ka siukuri kai si sangana sipelajari janah pindo penampat Jahwe gelah sieteh uga ndalankenca.

⁹ Sanga erlajar kita janah siukuri e, tujunta arusna erban Jahwe senang janah patuh man baNa. (Masmur 40:9; 119:97) Perlu ka situlak kai pe si banci erban kita lanai ndeher ras Dibata.​—Titus 2:11, 12.

10. Kai si erban anak muda reh deherna ras Dibata?

¹⁰ Kam anak muda, lit nge cita-cita rohanindu? Sekalak turang senina si ngelayani i Betel rusur ngerana- ngerana ras anak muda si iperidiken  bas kebaktin wilayah janah isungkunna kalak e kerna cita-cita rohanina. Banci idah turang senina e maka nterem si nggo iukurina kai pagi si ilakokenna guna ngelayani Jahwe. Piga-piga lit si atena ngelayani sepenuh waktu ntah pe pindah ku daerah si merluken terbuen perberita. Tapi lit piga-piga anak muda la ietehna njawap penungkunen e. Mungkin banci jadi la pentingsa akapna cita-cita rohani. Adi kam anak muda, sungkuni bandu, ‘Perban orang tuaku nge maka aku lawes ku perpulungen ras erberita? Ntah perban ndeher nge aku ras Dibata?’ Payo, kerina kita la soal nguda ntah metua arus lit cita-cita rohanita. Enda erban kita reh deherna ras Dibata.​—Pengerana 12:1, 13.

11. (a) Kai si perlu silakoken gelah ndeher ras Dibata? (b) Contoh kai si lit bas Pustaka si banci siusih?

¹¹ Kenca siteh kai si perlu iperubahi bas dirita, sibanlah perubahen. Enda penting kel sebap pengaruhna erban kita nggeluh ntah mate. (Roma 8:6-8) La iarapken Jahwe gelah kita sempurna, janah ibereNa kesah si badia guna nampati kita. Tapi perlu kel siusahaken. Turang seninanta John Barr, salah sada anggota Badan Pinpinen, ikomentarina Lukas 13:24, nina, “Nterem si gagal perban perkisat janah la nggit erusaha.” Perlu kita bagi Jakup,  si la nyerah ngasa datna pasu-pasu sanga erbebe ras malekat. (Kejadin 32:26-28) Amin gia meriah siakap erlajar Pustaka, ula min bagi mbaca novel siban. Perlu siusahaken kel ndarami kebenaren-kebenaren si meherga si banci nampati kita.

12, 13. (a) Kai si banci nampati kita ndalanken pedah bas Pilipi 2:5? (b) Uga contoh Petrus bage pe pedahna nampati kita? (c) Kai si banci ilakokenndu gelah reh deherna ras Dibata? (Nen kotak  “Kai si Banci Ilakokenndu gelah Reh Deherna ras Dibata.”)

¹² Sanga siusahaken ndeher ras Dibata, isampati kesah si badia kita ngubah carata rukur. Reh dekahna, siteh me uga cara Kristus rukur. (Pilipi 2:5) Banci isampati kesah si badia kita mpedauh sura-sura si salah janah ngusahaken sipat-sipat si ngena ate Dibata. (Galati 5:16, 22, 23) Adi sadar kita maka nggo mulai siutamaken erta ntah pe kesenangen, ula kita nyerah. Arus sipindo kesah si badia man Jahwe gelah sampatiNa kita ngutamaken kai si benar. (Lukas 11:13) Ingetlah rasul Petrus. Labo lalap bagi Kristus carana rukur. (Matius 16:22, 23; Lukas 22:34, 54-62; Galati 2:11-14) Tapi la ia nyerah, janah isampati Jahwe ia. Reh dekahna, ieteh Petrus me uga cara Kristus rukur. Janah kita pe banci bage.

¹³ Kenca e ikataken Petrus sipat-sipat si banci nampati kita. (Baca 2 Petrus 1:5-8.) Perlu siusahaken gelah banci sikuasai dirita, megenggeng, sikeleng-kelengen, bage pe sipat-sipat si mehuli si deban. Banci sisungkuni banta tiap wari, ‘Sendah, sipat si apai nge si kuusahaken si nampati aku ndeher ras Dibata?’

14. Adi ndeher kita ras Dibata, kai pengaruhna ku kegeluhenta?

¹⁴ Adi bagi Kristus carata rukur, enda mpengaruhi perbahanenta bas ingan erdahin ntah pe bas sekolah, pengerananta, bage pe carata erban keputusen tiap wari. Arah keputusenta teridah me maka siusahaken ngusih Kristus. Perban ndeher kita ras Dibata, la sipeturut kai pe erban kita ndauh ras Dibata. Janah banci silawan godan. Sope erban keputusen, siukuri lebe janah sisungkuni banta, ‘Pedah Pustaka si apai si banci nampati aku? Kai si ilakoken Kristus bas situasi si bagenda? Kai nge si erban Jahwe senang?’ Perlu sibiasaken rukur alu cara si bage. Emaka mari sibahas piga-piga situasina. Tiap situasi, sidarami pedah Pustaka si banci nampati kita erban keputusen.

15, 16. Uga cara rukur bagi Kristus nampati kita erban keputusen kerna (a) milih teman geluh? (b) milih teman?

¹⁵ Milih teman geluh. Pedahna lit bas 2 Korinti 6:14, 15. (Baca.) Jelas kel ikataken Paulus maka la seri cara rukur bage pe perbahanen kalak si ndeher ras Dibata ras si lang. Uga pedah enda nampati kam bas milih teman geluh?

¹⁶ Milih teman-teman. Pedahna lit bas 1 Korinti 15:33. (Baca.) Kalak si ndeher ras Dibata la nggit erteman ras kalak si erban kinitekenna lemah. Ukuri uga carandu ndalanken pedah enda bas erbage situasi. Contohna, uga pedah enda nampati kam erban keputusen  kerna media sosial? Uga pedah enda nampati kam erban keputusen kerna main game online ras kalak si la itandaindu?

17-19. Adi ndeher kam ras Dibata, uga e nampati kam (a) mpedauh kegiaten si la erguna? (b) ndatken cita-cita si mehuli? (c) sanga la sicocoken?

¹⁷ Kegiaten si erban kita ndauh arah Dibata. Lit persinget bas Heber 6:1. (Baca.) Kai “perbahanen-perbahanen si la erguna” si ula silakoken? Kegiaten si la erguna enda erban kita ndauh arah Dibata. Persinget kerna perbahanen si la erguna e banci nampati kita njawap penungkunen enda, ‘Erguna ntah sia-sia nge kegiaten enda? Cocok nge kuikuti bisnis enda? Engkai maka la perlu kuikuti kelompok si ngusahaken ngubah keadan doni enda?’

¹⁸ Cita-cita rohani. I bas Khotbah i Deleng, ibere Jesus pedah si mejile kerna cita-cita. (Matius 6:33) Kalak si ndeher ras Dibata ipelebena Kerajan Dibata bas geluhna. Pedah e nampati kita njawap penungkunen enda, ‘Kenca tamat SMA, kuliah nge aku? Kualoken nge pendahin si la cocok man kalak Kristen?’

¹⁹ La sicocoken. Nasehat Paulus man kalak Kristen i Roma nampati kita sanga kita la sicocoken. (Roma 12:18) Siusih min Kristus, siusahaken gelah ‘meriah ras kerina kalak.’ Uga nge reaksita sanga la sicocoken ras kalak si deban? Mesera nge siakap ngaloken pendapat sekalak jelma? Ntah itandai kalak nge kita kalak si ngusahaken perdamen?’​—Jakup 3:18.

20. Engkai maka terus atendu reh deherna ras Dibata?

²⁰ Arah contoh-contoh enda banci siidah uga pedah Pustaka nampati kita erban keputusen si mbuktiken maka kita itegu-tegu kesah si badia. Adi ndeher kita ras Dibata meriah janah puas siakap. Ikataken Robert, si iceritaken ndai, “Kenca nggo reh deherna aku ras Jahwe, nggo reh ulina aku man diberuku ras anak-anakku. Puas janah meriah kuakap.” Melala kel gunana adi terus siusahaken ndeher ras Jahwe. Reh riahna siakap gundari, janah bas wari si pepagi sidat me “kegeluhen situhu-tuhu.”​—1 Timotius 6:19.