Uga Carana gelah Meriah Kapndu Erlajar Pustaka janah Datndu Gunana?

MAINKEN

ARUS ipinpin Josua kalak Israel ku Taneh Perjanjin. Enda pasti seh kel serana. Tapi, ipegegehi ras ipetetap Jahwe ukurna alu ngataken, “Tetaplah ukurndu, teklah.” IkatakenNa man Josua maka adi ibacana ras ipatuhina Undang-Undang Dibata, banci ibanna keputusen si mehuli ras banci ia berhasil.—Josua 1:7, 8.

Kita nggeluh bas “masa si sulit si dem kiniseran,” emaka geluhta pe banci saja mesera. (2 Timotius 3:1) Adi berhasil ateta bagi Josua, perlu siikutken pedah si ibereken Jahwe. Perlu sibaca Pustaka alu ratur janah kai si nggo sipelajari e sipake guna erban keputusen si mehuli.

Tapi piga-piga arah kita banci saja la itehna cara erlajar Pustaka, ntah pe la meriah akapna erlajar. Tapi erlajar Pustaka seh kel pentingna. Sanga ipelajarindu kari kotak “ Cubaken Cara Enda,” banci kari tehndu carana gelah meriah kapndu erlajar ras erguna man bandu.

Nina pemasmur, ‘Bahan maka kuerti dingen kupatuhi undang-undangNdu, sebap meriah ukurku i bas matuhisa.’ (Masmur 119:35) Kam pe banci kang meriah kapndu erlajar Kata Dibata. Janah sanga terus kam erlajar Pustaka banci kari datndu permata rohani si mejile.

Aminna pe la kam minpin sada bangsa bagi Josua, pasti lit masalahndu. Emaka bagi Josua, pelajari ras patuhilah Kata Dibata. Adi lakokenndu, pasti banci ibanndu keputusen si mehuli ras banci kam berhasil.

CUBAKEN CARA ENDA

Ertoto ope erlajar. Kerina si lit bas Pustaka perukuren Jahwe kap, janah itulis guna kepentingenta. Emaka sanga ibacandu Pustaka, pindolah penampat Jahwe gelah iangkandu kai si ipelajarindu, janah gunaken e i bas erban keputusen si mehuli bas geluhndu.—Esra 7:10.
Sungkuni dirindu sanga ibacandu Pustaka ntah buku-buku si isina arah Pustaka nari. Contohna, ‘Kai si kupelajari kerna Jahwe bas bagin enda? Kai hubungenna ras tema Pustaka? Uga caraku nggunakenca i bas nampati kalak si deban?’
Ukuri kai si ipelajarindu. Ngadi kentisik, ukuri kai si ibacandu. Sungkuni dirindu, ‘Uga perasanku mbacasa? Engkai maka bage perasanku? Kai hubungenna ras si pernah terjadi man bangku, ras si terjadi gundari, ntah pe kai si terjadi man bangku bas masa depan? Uga aku banci makeken patoken ras pedah Pustaka enda i bas geluhku?’ (Jop 23:5; Masmur 49:4) Sanga ipelajarindu, banci nge ijelaskenndu ngkai maka ilarang Jahwe umatNa ngelakoken perbahanen tertentu. Ntah pe ukuri kai akibatna adi ilakokenna kai si ilarang Dibata.—Ulangen 32:28, 29.
Bayangken kejadinna. Contohna, banci nge ibayangkenndu kai saja si terjadi sanga Jusup idayaken senina-seninana ku kalak Ismael? (Kejadin 37:18-28) Kai si inenndu, si ibegindu, ras si ianggehndu? Bayangken kam si jadi kalak e. Kai si iukurina ras si igejapkenna? Adi bage si ilakokenndu, melala kel datndu manpaatna.
Gunaken alat-alat si nampati i bas erlajar si nggo isikapken organisasi. Enda banci erban reh riahna kapndu erlajar. Pelajari carana nggunaken alat-alat e adi nggo lit i bas bahasandu, arah Internet ntah pe tercetak. Adi la tehndu nggunakenca, ula kam mela mindo penampat kalak. Contohna, Indeks Publikasi Menara Pengawal ntah pe Panduan Riset untuk Saksi-Saksi Yehuwa banci nampati kam i bas mpelajari sada topik tertentu ras njelasken ayat-ayat Pustaka. Gunaken lampiran i bas Kitab Suci Terjemahan Dunia Baru adi lit i bas bahasa si banci iangkaindu. I bas lampiran enda lit keterangen si erguna kerna ingan sada daerah, uruten peristiwa, berat ras ukuren, bage pe si debanna.
Ban kesimpulenna. Enda nampati kam nginget kai si nggo ipelajarindu. Reh mantapna ka adi iceritakenndu man kalak si deban kai si nggo ipelajarindu. Lit nge si ipelajarindu e si banci ipesehndu sanga kam erberita? Alu ngelakokenca, banci ingetndu intina, janah kalak si deban pe banci datna manpaat arah kai si ipelajarindu.