1. Kai si iarapken kerina kalak?

UGA perasanndu adi kalak si itandaindu ras si ihormatindu la ingetna gelarndu, janah si parahna, la iergaina kam? Pasti kitik kel ukurndu. Engkai? Perban ialoken kalak ateta kita. Tapi labo ateta terjeng itandai saja. Ateta min ietehna jelma si uga kita ras kai si nggo silakoken.​—Bilangen 11:16; Jop 31:6.

2, 3. Kai akibatna adi la kita hati-hati kerna sura-surata gelah iergai kalak? (Nen gambar pemena artikel.)

² Tapi adi la kita hati-hati, sura-surata gelah iergai kalak banci bahaya. Doni si ikuasai Setan enda banci ibanna kita merhat jadi kalak si terkenal ras kalak si penting. Adi e si terjadi, lanai siergai Bapakta si i surga eme Dibata Jahwe, janah lanai sisembah Ia bagi si iarapkenNa.​—Ketangkasen 4:11.

³ I bas jaman Jesus, piga-piga peminpin agama salah perukurenna kerna uga carana gelah iergai. Ipersingeti  Jesus murid-muridna, “Hati-hatilah nandangi ahli-ahli Undang-Undang Musa si meriah akapna erdalan ku jah ku je make jubah ras iperkuanken alu mehamat i bas ingan si nterem jelma, janah merhat ia kundul i ingan si mehulina i bas ingan-ingan pulung kalak Jahudi bage pe bas ingan si mehamat i acara man-man.” Nina ka, “Ialoken kalak enda pagi ukumen si terkeleken.” (Lukas 20:46, 47, cataten i teruh) Tapi ipuji Jesus diberu si mbalu si mesera e si mereken dua sen logam si seh kel sitikna, padahal banci jadi ise pe la lit si mperdiateken kai si ilakoken diberu e. (Lukas 21:1-4) Jelas me, perukuren Jesus kerna uga carana gelah iergai, beda kel ras kalak si deban. Pelajaren enda banci nampati kita gelah benar carata rukur kerna ise si pentingna nandai ras ngergai kita.

4. Ise atendu si nandai ras si ngergai kam? Engkai?

⁴ Ise atendu si nandai ras si ngergai kam? Nterem kalak atena iperdiateken, emaka iusahakenna gelah meganjang sekolahna, berhasil bas bisnis, ntah pe jadi kalak si terkenal. Ijelasken Paulus ertina sanga nina, “Gundari, kenca itandai kena Dibata, ntah pe ulin ikataken nggo itandai Dibata kena, ngkai maka mulihi ikutken kena perukuren ras cara nggeluh si sia-sia bage pe si la erguna? Engkai maka mulihken ate kena jadi budakna?” (Galati 4:9) Luar biasa kel banci itandai Dibata, Penguasa si Meganjangna! Itandai Jahwe kita, ikelengiNa, janah ateNa rembak kita ras Ia. Iciptaken Jahwe kita gelah banci jadi temanNa.​—Pengerana 12:13, 14.

5. Kai si arus silakoken gelah itandai Jahwe kita?

⁵ Siteh Musa e teman Jahwe. Sanga mindo Musa man Jahwe, “Turikenlah man bangku sura-suraNdu,” ijawap Jahwe, “Bagi si ipindondu, bage me Kubahan sabap Kutandai kam tuhu-tuhu janah ngena ateKu kam.” (Keluaren 33:12-17) Jahwe pe banci nandai kita sekalak-sekalak. Tapi, kai si arus silakoken gelah jadi teman Jahwe? Arus sikelengi Ia janah sibereken geluhta man baNa.​—Baca 1 Korinti 8:3.

6, 7. Kai si banci erban kita lanai jadi teman Jahwe?

⁶ Tapi, perlu sijaga hubungenta si meherga ras Bapakta si i surga. Bali bagi kalak Kristen si pertama i Galati, lanai kita nggit iperbudak “perukuren ras cara nggeluh si sia-sia bage pe si la erguna” arah doni enda. Contohna eme jadi kalak si sukses ras terkenal. (Galati 4:9) Kalak Kristen i Galati nggo nandai Dibata, janah Dibata pe nggo nandai kalak e. Tapi nina Paulus kalak e nggo “mulihken” ku cara nggeluh si sia-sia. Tempa-tempa bagenda nina Paulus, ‘Engkai maka mulihken kena iperbudak cara nggeluh si bodoh ras si la erguna?’

⁷ Banci nge si bage terjadi banta? Banci. Bagi Paulus, sanga nggo siteh kebenaren, lanai kita nggit terkenal ras sukses i bas doni si ikuasai Setan. (Baca Pilipi 3:7, 8.) Mungkin nggo sitadingken sekolah si meganjang, pendahin  si mejile, ntah kesempaten ndatken melala sen. Selain si e, mungkin lit bakatta i bas musik ntah pe olahraga si banci erban kita jadi kalak si terkenal ntah pe bayak. Tapi situlak kerina kesempaten e. (Heber 11:24-27) Bodoh kel adi sempat kita menyesal perban situlak kerina e, janah siakap ulin geluhta adi siayaki kerinana! Adi bage perukurenta banci kita mulihken ku cara nggeluh doni enda, cara nggeluh si “sia-sia bage pe si la erguna.” *—Nen keterangen tambahen.

8. Kai si banci mpebelin tekadta gelah itandai ras iergai Jahwe?

⁸ Adi mbelin kel tekadta gelah itandai ras iergai Jahwe, pasti lanai ateta itandai ras iergai doni enda. Tapi, uga carana? Perlu siukuri dua hal si penting. Pertama, lalap iergai Jahwe kalak si setia ngelayani Ia. (Baca Heber 6:10; 11:6) Meherga kel iakap Jahwe umatNa si setia, emaka “la adil” akapNa adi la iperdiatekenNa kalak e. Lalap itandai Jahwe “kalak si jadi jangNa.” (2 Timotius 2:19) ‘Itegu-tegu ras ikawaliNa kalak benar’ janah itehNa cara nelamatken kalak e.​—Masmur 1:6; 2 Petrus 2:9.

9. Bereken contoh uga cara Jahwe ncidahken ngena ateNa man umatNa.

⁹ Mon-mon, icidahken Jahwe ngena ateNa man umatNa alu cara si istimewa. (2 Kronika 20:20, 29) Contohna, ukuri kerna cara Jahwe nelamatken umatNa i bas Lawit Merah sanga iayak-ayaki tentera Paro si hebat kalak e. (Keluaren 14:21-30; Masmur 106:9-11) Luar biasa kel kejadin enda. Enggo 40 tahun pe e terjadi, terus denga inget kalak. (Josua 2:9-11) Perban lanai ndekah kita iserang Gog arah Magog, tuhu-tuhu mpegegehi kel adi siinget uga Jahwe ngkelengi umatNa si mbarenda janah ipakeNa kuasaNa nelamatken kalak e. (Esekiel 38:8-12) Meriah kel ukurta paksa si e, perban nggo siusahaken gelah ngena ate Dibata kita, labo ngena ate doni enda.

10. Kai si peduaken si perlu siukuri?

¹⁰ Si peduaken si perlu siukuri eme banci saja iergai Jahwe kita alu cara si la sisangka-sangka. Adi lit kalak si ngelakoken si mehuli gelah ipuji saja ngenca atena, labo iupahi Jahwe ia. Engkai? Perban bagi nina Jesus, adi nggo ipuji kalak ia, nggo datna upahna. (Baca Matius 6:1-5.) Tapi adi lit kalak nggo ngelakoken kai si mehuli janah la iergai, iperdiateken Jahwe nge kalak si bage. Perban Jahwe “ngenen i bas ingan si terbuni” nari. IperdiatekenNa kai si ilakoken kalak e, iupahiNa, ntah pe ipasu-pasuNa. Janah mon-mon iupahi Jahwe umatNa alu cara si la isangka-sangka. Mari sibahas piga-piga contohna.

11. Kai si ilakoken Jahwe guna ngergai Maria?

¹¹ Ipilih Jahwe sekalak diberu si nguda denga janah meteruk ukur jadi nande Jesus, Anak Dibata. Maria tading i bas kuta si kitik eme Nasaret, ndauh arah Jerusalem nari ras rumah pertoton si mejile. (Baca Lukas 1:26-33.) Engkai maka Maria si ipilih Jahwe? Ikataken malekat Gabriel man Maria maka “jadi kel ate Dibata” ia. Arah kai si ikataken Maria man kade-kadena eme Elisabet, teridah maka rembak kel ia ras Jahwe. (Lukas 1:46-55) Iperdiateken Jahwe Maria, janah idahNa setia kel Maria e man baNa, emaka ipasu-pasuNa Maria alu cara si la isangka-sangkana.

12, 13. (a) Uga Jesus iergai sanga ia lahir? (b) Uga Jesus iergai sanga ibaba Maria ia ku rumah pertoton?

¹² Sanga Jesus lahir, man ise ikataken Jahwe kerna kelahiren Jesus? Labo man pejabat ntah pe penguasa penting i Jerusalem ras Betlehem. Tapi, isuruhNa malekat-malekatNa njumpai permakan si meteruk rukur si sangana mpermakani biri-biri i darat Betlehem. (Lukas 2:8-14) Kenca si e, ijumpai permakan-permakan e me bayi si mbaru lahir ndai. (Lukas 2:15-17) Sengget kel Maria ras Jusup sanga idahna Jesus ihormati alu cara si bage. Beda kel cara Jahwe ras cara Iblis. Sanga isuruh Setan ahli-ahli bintang njumpai Jesus ras orang tuana, kerina kalak i Jerusalem meteh adi Jesus nggo lahir, janah enda erbanca terjadi melala masalah. (Matius 2:3) Akibatna, nterem anak si la ersalah ibunuh.​—Matius 2:16.

¹³ Undang-Undang Jahwe man kalak Israel ngataken maka 40 wari kenca sekalak diberu ngelahirken anak dilaki, arus iberekenna persembahen man Jahwe. Emaka berkat me Maria, Jusup, ras Jesus arah Betlehem nari ku rumah pertoton i Jerusalem si dauhna kira-kira siwah kilometer. (Lukas 2:22- 24) I bas dalan, banci saja tersungkun-sungkun Maria, lit ntah lang perbahanen si istimewa si ilakoken imam-imam man Jesus kari. Jesus ihormati alu cara si la isangka-sangka Maria. Ipilih Jahwe dua kalak guna ngumumken maka Jesus pagi jadi Mesias si ijanjiken, ntah pe Kristus. Kalak e eme Simeon, “kalak si benar ras bujur” bage pe Hanna, sekalak nabi si diberu, si umurna 84 tahun janah ia nggo mbalu.​—Lukas 2:25-38.

14. Kai upah si ibereken Jahwe man Maria?

¹⁴ Terus nge iergai Jahwe Maria perban setia ia mpebelin ras ngerawat Jesus? Ue. Ipastiken Dibata gelah piga-piga perbahanen Maria ras kai si ikatakenna icatat i bas Pustaka. Sanga telu setengah tahun dekahna Jesus erberita, banci jadi Maria la ikut. Mungkin perban ia nggo mbalu, arus ia tading i Nasaret. Emaka la igejapkenna pengalamen si luar biasa si igejapken kalak si deban. Tapi sanga Jesus mate lit Maria i je. (Johanes 19:26) I bas wari Pentakosta, ikut Maria ras murid-murid Jesus ngaloken kesah si badia i Jerusalem. (Perbahanen Rasul-Rasul 1:13, 14) Banci jadi ia pe ikut ipilih ku surga radu ras murid si debanna. Adi bage kin, lit kesempatenna ras Jesus seh rasa lalap i surga. Perban ia setia, idatna upah si luar biasa kel!

15. Kai si ilakoken Jahwe guna ncidahken ngena ateNa man Jesus sanga Jesus i doni?

¹⁵ La iarapken Jesus gelah ia ihormati peminpin agama ntah pe peminpin politik. Tapi lit telu kali Jahwe ngerana surga nari, tujunna gelah iteh Jesus maka keleng ate Jahwe ia. Pasti semangat kel Jesus megisa! Kenca Jesus iperidiken i Lau Jordan, ngerana Jahwe, “Enda me AnakKu si Kukelengi, ia me si ngena ateKu.” (Matius 3:17) Banci saja la lit kalak si deban si megi sora e selain Johanes Peridiken. Tapi, kira-kira setahun ope  Jesus mate, lit telu rasulna si megi Jahwe ngerana man Jesus, “Enda me AnakKu, si Kukelengi. Ia me si ngena ateKu. Begikenlah ia.” (Matius 17:5) Janah, piga-piga wari ope Jesus mate, ngerana ka Jahwe mulihi surga nari man AnakNa.​—Johanes 12:28.

16, 17. Kai si ilakoken Jahwe guna ngergai Jesus alu cara si la isangka-sangka?

¹⁶ Iteh Jesus maka ikataken kalak pagi ihinana Dibata janah itehna ka maka ipemelaken pagi ia sanga ia mate. Tapi ertoto ia gelah sura-sura Dibata si jadi labo sura-surana. (Matius 26:39, 42) “Ngasup ia megenggeng i tiang siksan, la kapna mela,” perban Bapakna atena si ngergai ia, labo doni enda. (Heber 12:2) Kai si ilakoken Jahwe guna ngergai Jesus?

¹⁷ Sanga Jesus i doni, ertoto ia gelah imuliaken ka ia bagi sanga ia i surga ras Bapakna. (Johanes 17:5) La pernah ikataken Pustaka maka iarapken Jesus lebihen asa si e. La pernah iarapkenna upah si istimewa perban nggo ilakokenna kai si ipindo Jahwe sanga ia i doni. Tapi kai si ilakoken Jahwe? IergaiNa Jesus alu cara si la isangka-sangka. Sanga Jahwe mpekeke Jesus, ibereNa man Jesus ‘keduduken i surga si terganjangen asangken si mbarenda.’ IberekenNa ka man Jesus kegeluhen si la banci mate, enda lenga pernah ialoken ise pe! * (Nen keterangen tambahen.) (Pilipi 2:9; 1 Timotius 6:16) Tuhu-tuhu luar biasa kel cara Jahwe ngergai kesetian Jesus!

18. Kai si arus silakoken gelah ngena ate Jahwe kita, labo ngena ate doni enda?

¹⁸ Kai si arus silakoken gelah ngena ate Jahwe kita, labo ngena ate doni enda? Arus siukuri maka lalap iergai Jahwe umatNa si setia janah rusur iupahiNa kalak e alu cara si la isangka-sangka. Lenga siteh uga cara Jahwe ngupahi kita bas masa depan, mbayangkenca saja ngenca kita banci! Gundari siadapi denga melala masalah ras tentangen i bas doni si jahat enda, tapi bene nge pagi e kerina. Emaka kerina pengergan bas doni enda pe, bene ka nge pagi. (1 Johanes 2:17) Tapi, Bapakta si perkeleng, Jahwe, la pernah ilupakenNa kerja kerasta ras kekelengenta man baNa, perban Jahwe “labo la adil.” (Heber 6:10) Pasti icidahkenNa ngena ateNa man banta alu cara si la pernah sibayangken!