1, 2. (a) Engkai maka mehuli kel tetap rembak ras Jahwe? (b) Kai kari sibahas bas pelajaren enda?

MEHULI kel adi tetap kita rembak ras Jahwe. Ia si hebatna, si pentarna, ras si perkelengna! Pasti lalap ateta setia man baNa janah erpihak ku Ia. (Masmur 96:4-6) Tapi lit piga-piga kalak si nembah Dibata dungna lanai setia.

² I bas pelajaren enda, sibahas kari piga-piga kalak si ngataken maka erpihak ia ku Jahwe, tapi ilakokenna kai si segat ate Jahwe. Lit pelajaren si penting si banci sidat arah kalak e, enda nampati kita tetap setia man Jahwe.

3. (a) Engkai maka isampati Jahwe Kain gelah ertobat? (b) Kai si ikataken Dibata man Kain?

³ Contohna Kain. La isembahna dibata palsu, tapi la ngena ate Jahwe ia. Engkai? Idah Jahwe maka jahat perukuren Kain. (1 Johanes 3:12) Ipersingeti Jahwe Kain, ‘Adi mehuli perbahanenndu, tentu cirem kam. Tapi erkiteken perbahanenndu jahat, dosa nimai i lebe-lebe pintun. Ikuasaina atena kam, tapi kam arus naluken ia.’ (Kejadin 4:6, 7) Jelas kel kata-kata Jahwe e, adi ertobat Kain  janah erpihak ku Dibata, Dibata pe erpihak ku Kain.

4. Kai si ilakoken Kain sanga lit kesempatenna ialoken Jahwe mulihi?

⁴ Adi iubah Kain perukurenna, pasti ialoken Jahwe ia mulihi. La ibegiken Kain Dibata, dungna perukuren si salah ras sura-sura si mentingken bana me si erban ia ngelakoken kai si salah. (Jakup 1:14, 15) Sanga Kain kitik denga, mungkin la pernah ibayangkenna maka ilawanna pagi Jahwe. Tapi dungna la ibegikenna persinget Dibata, ilawanna Dibata, janah ibunuhna agina!

5. Perukuren si uga si banci erban kita lanai ngena ate Jahwe?

⁵ Bagi Kain, lit kalak Kristen si ngaku nembah Jahwe tapi situhuna ilakokenna kai si segat ate Jahwe. (Judas 11) Mungkin rajin ia erberita janah ratur reh ku perpulungen. Tapi ipediatna lit lalap perukuren si salah i bas dirina. Contohna, ibayangkenna hubungen seks si salah, merangap, ntah pe ate segat. (1 Johanes 2:15-17; 3:15) Perukuren si bage banci erban ia ngelakoken dosa. Kalak si deban mungkin la itehna kai si lit bas ukurta bage pe perbahanenta, tapi Jahwe itehNa. ItehNa adi la kita tuhu-tuhu erpihak ku Ia.​—Baca Jeremia 17:9, 10.

6. Kai si ilakoken Jahwe guna nampati kita naluken sura-sura si salah?

⁶ Sanga silakoken kesalahen pe, la mis itadingken Jahwe kita. Adi nandangi silakoken kai si banci mbahayaken kita, ipersingeti Jahwe kita, “Mulihlah ku Aku, maka Aku mulih ku kam.” (Maleaki 3:7) Iteh Jahwe lit kelemahenta, janah itehNa erjuang kita ngelawanca. Tapi ateNa tetap kita erpihak ku Ia janah silawan kai si la mehuli. (Jesaya 55:7) Adi patuh kita, erjanji Ia nampati kita janah iberekenNa gegeh guna naluken sura-sura si salah.​—Kejadin 4:7.

7. Engkai maka Salomo lanai jadi teman Jahwe?

⁷ Sanga Salomo nguda denga, rembak ia ras Jahwe. Iban Dibata me Salomo jadi kalak si seh kel pentarna janah ibereNa tugas si penting guna mbangun rumah pertoton si mejile i Jerusalem. Tapi dungna lanai ia jadi teman Jahwe. (1 Raja-Raja 3:12; 11:1, 2) Nina Undang-Undang Dibata, raja la banci ‘melala ndeharana, sabap e banci erbahanca ia nadingken Jahwe.’ (Ulangen 17:17) La ipatuhi Salomo undang-undang e. Lit 700 diberuna ras 300 gundikna! (1 Raja-Raja 11:3) Enterem arah diberuna e labo kalak Israel janah isembahna Dibata palsu. Emaka lit sada nari perentah Dibata si la ipatuhi Salomo, iempoina diberu-diberu si labo kalak Israel.​—Ulangen 7:3, 4.

8. Kai perbahanen jahat si ilakoken Salomo?

⁸ Reh dekahna, lanai keleng ate Salomo undang-undang Jahwe. Dungna ilakokenna kai si jahat. Ibangunna ingan persembahen man dewi Astarte ras dewa Kemos, kenca si e ia ras diberu-diberuna nembah dewa-dewa palsu e. Janah ibangunna ka ingan persembahen i datas gunung, pas i lebe-lebe Jerusalem, ingan rumah  pertoton Jahwe si pernah ibangunna! (1 Raja-Raja 11:5-8; 2 Raja-Raja 23:13) Banci saja itipu Salomo dirina alu erpengakap maka labo Jahwe merawa aminna pe ilakokenna kai si jahat, adi iberekenna denga persembahen ku rumah pertoton.

9. Kai akibatna sanga la ibegiken Salomo persinget Dibata?

⁹ Tapi labo sepele akap Jahwe dosa e. Nina Pustaka, ‘La iikutken Salomo kata Jahwe, tapi nilah ia i bas Jahwe nari. Emaka nembeh ate Jahwe man Salomo.’ Iusahaken Dibata nampati Salomo. Jahwe ‘ncidahken diriNa man Salomo dua kali janah nggo ipedahkenNa man bana ula nembah dibata-dibata si deban, tapi la ikutken Salomo kata Jahwe.’ Akibatna, lanai ngena ate Jahwe ia janah lanai isampatiNa. Kerajan Israel pe nggo terbagi dua, sada kerajan nari ngenca si iperentah keturunen Salomo. Selain si e, iadapi kalak e masalah ratusen tahun dekahna.​—1 Raja-Raja 11:9-13.

10. Kai si banci erbanca lanai kita erteman ras Jahwe?

¹⁰ Adi erteman kita ras kalak si la ngangkai ras la ngergai perentah Dibata, banci ipengaruhina carata rukur, janah banci mbahayaken hubungenta ras Jahwe. Kalak e banci saja turang seninata bas runggun, tapi la ia rembak ras Jahwe. Ntah banci  saja keluargata, tetanggata, teman sada dahin, ntah pe teman sekolah si la nembah Jahwe. Adi rusur kita erteman ras kalak si la ngergai patoken Jahwe, banci ipengaruhina kita, janah akibatna lanai kita erteman ras Jahwe.

11. Kai si banci nampati kita milih teman?

¹¹ Baca 1 Korinti 15:33. Nterem kalak lit sipat-sipat si mehuli bas ia. Janah kalak si la nembah Jahwe pe labo lalap ilakokenna kai si la mehuli. Mungkin itandaindu piga-piga kalak si bage. Mehuli nge erteman ras kalak e? Cuba ukurindu, kai nge pengaruhna man hubungenndu ras Jahwe? Banci nge ibanna kam reh rembakna ras Dibata? Kai nge si pentingna iakap kalak e? Kai nge si icakapkenna? Kerna penampilen, sen, HP, tablet, komputer, ras hiburen nge si rusur icakapkenna? Rusur nge ipandangina kalak si deban? Rusur nge si la mehuli si ibanna jadi jagar-jagar? Nina Jesus, “Sebap kai si ibelasken rehna i bas pusuh nari.” (Matius 12:34) Adi isadarindu temanndu banci mbahayaken hubungenndu ras Jahwe, banlah tindaken! Batasi hubungenndu ras ia, janah adi perlu, ulanai erteman ras ia.​—Kuan-kuanen 13:20.

12. (a) Kai si ikataken Jahwe man kalak Israel kenca kalak e ndarat Mesir nari? (b) Kai nina kalak Israel sanga isuruh Dibata kalak e tetap setia?

¹² Lit ka si banci sipelajari arah kai si terjadi kenca ibebasken Jahwe kalak Israel i bas Mesir nari. Sanga kalak e pulung i lebe-lebe Gunung Sinai, icidahken Jahwe diriNa alu cara si luar biasa! Idah kalak e embun si mbiring, kilat, ras asap, janah ibegina sora lenggur ras sora terompet si megang. (Keluaren 19:16-19) Ibegi kalak e ikataken Jahwe maka Ia me ‘Dibata si percemburu.’ Emaka kalak Israel arus nembah Ia saja. Erjanji Jahwe maka setia Ia man kalak si ngkelengi Ia ras si patuh man perentahNa. (Baca Keluaren 20:1-6.) Ikataken Jahwe man kalak Israel maka adi tetap kalak e erpihak ku Jahwe, Jahwe pe erpihak ka ku kalak e. Adi kam lit i bas jelma si nterem e, uga nge perasanndu sanga ibegindu kata-kata Jahwe? Mungkin jawapenndu seri bagi kalak Israel, si ngataken, “Kerina si ikataken [Jahwe] nggit kami ngelakokenca.” (Keluaren 24:3) Tapi la ndekah kenca si e, kalak Israel lanai setia man Dibata. Kai kin si ilakoken kalak e?

13. Kai si erbanca kalak Israel lanai setia?

¹³ Mbiar kalak Israel sanga idahna kuasa Dibata si luar biasa, emaka nangkih Musa ku Gunung Sinai janah ngerana ia man Jahwe guna kalak e. (Keluaren 20:18-21) Tapi Musa la mulih-mulih ku perkemahen. Lanai lit peminpin kalak Israel. Tempa-tempa kalak e nggo terjebak i taneh mesawang. Kai si ilakoken kalak e? Perban belinen pengarapen kalak e man Musa asangken man Dibata, emaka mbiar kalak e. Nina man Harun, “La sieteh ntah kai enggo jadi man Musa, kalak si minpin kita ndarat i Mesir nari; emaka  bahanlah sada dibata si man sembahen, guna minpin kita.”​—Keluaren 32:1, 2.

14. (a) Engkai banci ikataken maka itipu kalak Israel dirina? (b) Kai si ilakoken Jahwe man kalak e?

¹⁴ Iteh kalak Israel maka salah nembah berhala. (Keluaren 20:3-5) Tapi kepeken mis sembahna berhala! Aminna pe lanai ipatuhi kalak e perentah Jahwe, iakap kalak e erpihak denga ia man Jahwe. Tuhu-tuhu itipuna dirina. Sanga isembah kalak e anak lembu emas, ikataken Harun ka e ‘pesta guna kemulian Jahwe’! Kai si ilakoken Jahwe? IkatakenNa man Musa maka kalak e ‘enggo erdosa janah nulak Ia’ janah lanai ikutkenna kai si ‘ipedahken Jahwe.’ Merawa kel Jahwe janah ikernepkenNa ateNa kerina bangsa e.​—Keluaren 32:5-10.

15, 16. Kai buktina Musa ras Harun erpihak ku Jahwe? (Nen gambar pemena artikel.)

¹⁵ Tapi, Jahwe e Dibata si perkuah. La surung ikernepkenNa bangsa e. IberekenNa kesempaten man kalak e erpihak ku Ia. (Keluaren 32:14) Sanga idah Musa kalak Israel ersurak, rende, ras landek-landek i lebe-lebe berhala, ihancurkenna anak lembu emas e seh jadi tepung. Kenca si e, nina Musa alu sora megang, “Ise si arah [Jahwe] reh ku jenda!” Emaka “kerina suku Lewi pulung sekelewet” Musa.​—Keluaren 32:17-20, 26.

¹⁶ Aminna pe nggo iban Harun anak lembu emas, dungna ertobat ia, janah ikut ia ras kalak Lewi erpihak ku Jahwe. Ibuktiken kalak e maka ia la erpihak ku kalak si erdosa ndai. Benar kel si ilakoken kalak e, perban bas wari e lit ribun kalak si nembah anak lembu emas ibunuh. Tapi kalak si erpihak ku Jahwe iselamatken, janah erjanji Dibata masu-masu kalak e.​—Keluaren 32:27-29.

17. Pelajaren kai si banci sidat arah kai si itulis Paulus kerna anak lembu emas?

¹⁷ Kai pelajarenna man banta? Nina rasul Paulus, “Kerina e jadi pelajaren man banta,” emaka ula pernah ‘sisembah berhala.’ Ijelasken Paulus maka kai si terjadi e “itulis guna jadi persinget man banta si nggeluh i bas wari-wari pendungi enda. Kalak si erpengakap maka ia paguh pertedisna, hati-hatilah maka ula ia ndabuh.” (1 Korinti 10:6, 7, 11, 12) Bagi si ikataken Paulus, kalak si nembah Jahwe pe banci ikut-ikuten ngelakoken kai si salah. Tapi banci saja iakapna ngena denga ate Jahwe ia. Adi lit kalak si atena jadi teman Jahwe ntah pe ngaku setia man Jahwe, labo ertina nggo pasti ngena ate Jahwe ia.​—1 Korinti 10:1-5.

18. (a) Kai si banci erban kita ndauh bas Jahwe nari? (b) Kai akibatna?

¹⁸ Sanga la mis nusur Musa bas Gunung Sinai nari bagi si iarapken kalak  Israel, mbiar kalak e. Kita pe banci ka bage. Adi kalak jahat la mis ikernepken bagi si nggo siarapken sedekah enda, kita pe banci ka mbiar. Banci saja mulai siakap janji Jahwe kerna Pardis ndekah denga terjadi, ntah pe la mungkin siakap terjadi. Banci saja mulai siukuri kai si meriah saja siakap, labo si meriah iakap Jahwe. Adi la kita hati-hati, alu manjar-anjar banci kita ndauh arah Jahwe nari janah dungna silakoken kai si jahat, si sedekah enda la siakap mungkin silakoken.

19. (a) Kai si arus lalap siinget? (b) Engkai maka bage? Jelasken.

¹⁹ Isuruh Jahwe gelah tuhu-tuhu patuh kita man baNa janah nembah Ia saja. (Keluaren 20:5) Engkai maka isuruhNa kita bage? Perban keleng ateNa kita. Adi la silakoken kai si ipindo Jahwe, silakoken me kai si ipindo Setan, janah enda banci mbahayaken kita. Nina Paulus, “La kena banci minem i bas calung Jahwe nari janah i bas calung malekat-malekat jahat nari, ntah pe man i bas ‘meja Jahwe’ nari janah man i bas meja malekat-malekat jahat nari.”​—1 Korinti 10:21.

20. Kai si ilakoken Jahwe guna nampati kita aminna pe nggo siban kesalahen?

²⁰ Lit kesempaten Kain, Salomo, ras kalak Israel guna ertobat ntah pe robah. (Perbahanen Rasul-Rasul 3:19) Jelas me, labo mis itadingken Jahwe manusia amin pe nggo ersalah ia. Ingetlah uga Ia nggo ngampuni Harun. Gundari, perban keleng ate Jahwe kita, ibereNa persinget guna ngelindungi kita arah kai si salah. IgunakenNa Pustaka, buku-bukuta, ntah pe turang seninata bas runggun. Adi siikutken persinget Jahwe e, pasti mekuah ateNa kita.

21. Kai si arus silakoken adi iuji kesetianta man Jahwe?

²¹ Lit tujunna ngkai maka icidahken Dibata lias ateNa si mbelin. (2 Korinti 6:1) Ibereken Dibata kesempaten man banta guna ‘nulak si la ngena ateNa, nulak sura-sura doni.’ (Baca Titus 2:11-14.) I bas doni enda, lalap nge lit si nguji kesetianta man Jahwe. Ertekadlah gelah tetap kita bas pihak Jahwe, janah siinget maka arus ‘sihormati Jahwe janah Ia saja sisembah,’ ras ‘setia kita man baNa’!​—Ulangen 10:20.