1. Engkai banci sikataken kerinana jang Jahwe? (Nen gambar pemena artikel.)

KERINANA jang Jahwe! “Langit si meganjangna kal pe [Jahwe] empuna. Doni ras kerina isina pe [Jahwe] kap empuna.” (Ulangen 10:14; Ketangkasen 4:11) Perban Jahwe si nciptaken manusia, kerina kita jangNa. (Masmur 100:3) Tapi arah kerina manusia, ipilih Dibata piga-piga kalak jadi jangNa alu cara si luar biasa.

2. Menurut Pustaka, ise saja si jadi umat Jahwe?

² Contohna, ijelasken bas Masmur 135 maka kalak Israel si nembah Jahwe alu setia igelari “sikerajangenNa.” (Masmur 135:4) Ikataken nabi Hosea ka, maka lit pagi kalak si labo kalak Israel jadi umat Jahwe. (Hosea 2:23) Kai si ikataken Hosea e terjadi sanga mulai ipilih Jahwe si labo kalak Israel guna merentah ras Kristus i surga. (Perbahanen Rasul-Rasul 10:45; Roma 9:23-26) Kalak si ipilih alu kesah si badia igelari “bangsa si badia.”  Kalak enda “umat Dibata si istimewa.” (1 Petrus 2:9, 10) Tapi uga kerna kalak Kristen si setia si arapenna nggeluh rasa lalap i doni? Igelari Jahwe kalak e “bangsaKu.”​—Jesaya 65:21.

3. (a) Ise si rembak ras Jahwe gundari? (b) Kai kari sibahas bas pelajaren enda?

³ Gundari “rarasen si kitik,” si arapenna nggeluh si rasa lalap i surga, ras ‘biri-biri si deban,’ si arapenna nggeluh si rasa lalap i doni, ras-ras nembah Jahwe selaku “sada rarasen.” (Lukas 12:32; Johanes 10:16) Ngata bujur kel ateta man Jahwe perban nggo rembak kita ras Ia. I bas pelajaren enda sibahas kari uga carana ngata bujur man Jahwe perban hubungen si istimewa enda.

4. (a) Uga carana ngata bujur man Jahwe? (b) Kai si ilakoken Jesus guna ngata bujur man Jahwe?

⁴ Ngata bujur kita man Jahwe alu mereken geluhta man baNa ras iperidiken. Alu bage banci idah kalak maka kita jang Jahwe janah nggit kita patuh man baNa. (Heber 12:9) Jesus pe bage ka sanga ia iperidiken. Aminna pe ia nggo jadi bagin arah sada bangsa si nggo jadi jang Jahwe, tetap denga iberekenna dirina man Jahwe. Tempa-tempa bagenda nina, “O Dibata ngena ateku ndalanken peratenNdu.”​—Masmur 40:8, 9.

5, 6. (a) Kai si ikataken Jahwe sanga Jesus iperidiken? (b) Uga perasan Jahwe sanga sibereken geluhta man baNa? Ban perumpamanna.

⁵ Uga perasan Jahwe sanga Jesus iperidiken? Nina Pustaka, “Kenca iperidiken, mis ndarat Jesus arah lau nari. Rempet me terbuka langit janah idah Johanes kesah Dibata nusur ku datas Jesus bagi merpati. Terbegi ka me sora i langit nari, ‘Enda me AnakKu si Kukelengi, ia me si ngena ateKu.’” (Matius 3:16, 17) Jesus nggo jadi jang Dibata. Tapi meriah ukur Jahwe sanga idahNa Jesus nggit mereken geluhna guna ngelayani Ia saja. Meriah ka ukur Jahwe sanga sibereken geluhta man baNa. Janah hasilna, ipasu-pasuNa kita.​—Masmur 149:4.

⁶ Tapi kerinana jang Jahwe! Kai si banci sibereken man baNa? Bayangken enda, sekalak dilaki lit tamanna. Melala bunga si mejile i je. I bas sada wari, iputikken anakna sada bunga, jenari iberekenna man bana. Amin pe bunga e jangna, pasti meriah kel ukur bapak si perkeleng e ngaloken hadiah e. E tandana keleng ate anakna ia. Bunga arah anakna e ergan asangken kerina bunga si lit bas taman e. Bage ka pe Jahwe, meriah kel ukurNa sanga sibereken geluhta man baNa.​—Keluaren 34:14.

7. Kai si ikataken Maleaki kerna perasan Jahwe man kalak si nggit ngelayani Ia?

⁷ Baca Maleaki 3:16. Engkai maka penting kel sibereken geluhta man Jahwe ras iperidiken? Sanga iciptaken Jahwe kita, kita nggo jadi jangNa. Tapi ukuri uga riahna ukur Jahwe adi sialoken Ia jadi Penguasata janah sibereken geluhta man baNa. (Kuan-kuanen 23:15) Itandai Jahwe kalak si nggit ngelayani Ia, janah itulisNa gelar kalak e i bas bukuNa.

8, 9. Gelah tetap gelarta lit bas buku Jahwe, kai si arus silakoken?

 ⁸ Gelah tetap gelarta lit bas buku Jahwe, lit si arus silakoken. Nina Maleaki arus kita mbiar man Jahwe janah siukuri gelar Jahwe. Adi sisembah si deban, gelarta ihapus arah buku Jahwe!​—Keluaren 32:33; Masmur 69:28.

⁹ Emaka la bias erjanji saja guna ngelakoken peraten Jahwe ras iperidiken. Enda sekali ngenca silakoken, tapi nembah Jahwe silakoken segedang geluhta. Tiap wari, arah perbahanenta arus sibuktiken maka patuh kita man Jahwe.​—1 Petrus 4:1, 2.

10. Kai perbedan kalak si ngelayani Jahwe ras kalak si la ngelayani Jahwe?

¹⁰ I bas pelajaren si lewat, nggo sipelajari kerna Kain, Salomo, ras kalak Israel si ngaku nembah Jahwe tapi la setia man Jahwe. Contoh enda ngajari kita maka la bias ngaku nembah Jahwe. Perlu ciga ateta si jahat ras ngena ateta si mehuli. (Roma 12:9) Ikataken Jahwe maka jelas kel perbedan ‘kalak bujur ras kalak jahat, kalak si nembah Dibata ras si la nembah Ia.’​—Maleaki 3:18.

11. Engkai maka la kita mela ngataken adi kita nggo jadi jang Jahwe?

¹¹ Ngata bujur kel kita man Jahwe perban nggo pilihNa kita jadi umatNa! Arusna mis min iteh kalak kita erpihak ku Jahwe. (Matius 5:16; 1 Timotius 4:15) Sungkuni dirindu, ‘Banci nge idah kalak si deban maka tuhu-tuhu aku setia man Jahwe? Bangga nge aku ngataken maka aku Saksi Jahwe?’ Bayangken uga cedana ukur Jahwe adi mela kita ngataken maka kita nggo jadi jangNa.​—Masmur 119:46; baca Markus 8:38.

12, 13. Kai si erbanca maka mesera iakap kalak mbedaken piga-piga Saksi ras kalak si la nembah Jahwe?

¹² Sayang kel, lit piga-piga Saksi si ngusih “cara rukur si lit bas doni.” Akibatna, lanai lit bedana ia ras kalak si la nembah Jahwe. (1 Korinti 2:12) “Cara rukur si lit bas doni” enda erban kalak ngukuri kepentingenna saja ngenca. (Epesus 2:3) Contohna, aminna pe nggo melala pedah si ibereken kerna peruis, lit denga kalak si la sopan peruisna. Ipakena baju si ketat ras terbuka, janah ku perpulungen pe bage ka peruisna. Gaya bukna pe lebihsa, seri ras doni enda. (1 Timotius 2:9, 10) Akibatna lanai banci ibedaken kalak ia Saksi Jahwe ntah lang.​—Jakup 4:4.

¹³ Lit ka situasi si deban si erbanca piga-piga Saksi lanai lit bedana ras kalak bas doni enda. Contohna bas pesta, lit piga-piga kalak si perlandekna ras perbahanenna la cocok man kalak Kristen. Si debanna namaken poto ras  mereken komentar si la mehuli bas media sosial. Mungkin kesalahen kalak e labo dosa si serius janah la idisiplin bas runggun, tapi kalak e banci mere pengaruh si la mehuli man turang senina si sangana erjuang gelah beda ras doni enda.​—Baca 1 Petrus 2:11, 12.

14. Kai si arus silakoken gelah tetap kita jadi teman Jahwe?

¹⁴ Iusahaken Setan gelah kerina si lit i bas doni enda erban kita ngukuri “sura-sura daging, sura-sura mata, bage pe sura-sura i bas ncidahken erta.” (1 Johanes 2:16) Kita jang Jahwe, emaka arus kita berbeda. ‘Situlak si la ngena ate Dibata, situlak sura-sura doni,’ janah arus kita “beluh rukur, nggeluh alu cara si benar, janah setia man Dibata i bas doni si gundari enda.” (Titus 2:12) Arah carata nggeluh, termasuk carata ngerana, man, minem, peruista, bage pe pendahinta, arus min jelas idah kalak maka kita jang Jahwe.​—Baca 1 Korinti 10:31, 32.

15. Engkai maka arus kita mehuli ras perkeleng man turang seninata bas runggun?

¹⁵ Siergai ntah lang hubungenta ras Jahwe teridah arah perbahanenta man turang seninata. Bali bagi kita, kalak e pe jang Jahwe. Adi siinget kerna si e, pasti mehuli perbahanenta man bana janah sikelengi ia. (1 Tesalonika 5:15) Penting nge enda? Nina Jesus man pengikutna, “Adi kena sikeleng-kelengen, kerina kalak meteh maka kena me murid-muridku.”​—Johanes 13:35.

16. Kai si banci sipelajari arah Undang-Undang Musa kerna kekelengen Jahwe man umatNa?

 ¹⁶ Lit sada contoh i bas Undang-Undang Musa si banci nampati kita ngangkai uga arusna perbahanenta man turang senina i bas runggun. I bas rumah pertoton, lit barang-barang si khusus ipake guna nembah Jahwe. I bas Undang-Undang Musa ijelasken uga arusna cara kalak Lewi ngerawat barang-barang e, janah ise si la ngikutkenca banci ibunuh. (Bilangen 1:50, 51) Adi cara ngerawat barang-barang e saja pe Jahwe ermediate, terlebih ka carata erurusen ras turang seninata! Meherga kel kita iakap Jahwe. Enda teridah arah kata-kataNa enda, “Ise si mekpek kam, anak matangKu jine kap si ipekpekna e.”​—Sakaria 2:8.

17. Kai si ‘iperdiateken ras ibegi’ Jahwe?

¹⁷ Ikataken Maleaki maka ‘iperdiateken ras ibegi’ Jahwe uga perbahanen umatNa man sada ras si debanna. (Maleaki 3:16) “Itandai Jahwe kalak si jadi jangNa.” (2 Timotius 2:19) IperdiatekenNa kel kerina perbahanenta ras pengeranata. (Heber 4:13) Iperdiateken Jahwe sanga la kita mehuli man turang seninata. Tapi sanga kita mehuli, ngalo-ngalo tamu, mere,  ras nggit ngampuni, tek kita pasti ka nge iperdiateken Jahwe.​—Heber 13:16; 1 Petrus 4:8, 9.

18. Uga kita ngata bujur man Jahwe perban nggo ipilihNa kita jadi umatNa?

¹⁸ Ngata bujur kel ateta man Jahwe perban kita nggo jadi jangNa. Siteh maka sanga sibereken geluhta man baNa, e me keputusen si mehulina si pernah siban. Amin pe kita nggeluh “i tengah-tengah kalak si jahat si la ngelakoken kai si benar,” banci denga kita “bersih janah la ersalah” ras “jadi si nerangi doni.” (Pilipi 2:15) Emaka ertekad kita gelah la silakoken kai si segat ate Jahwe. (Jakup 4:7) Janah sikelengi ras siergai turang seninata perban kalak e pe jang Jahwe.​—Roma 12:10.

19. Pasu-pasu kai si ibereken Jahwe man kalak si jadi umatNa?

¹⁹ Nina Pustaka, ‘Labo ieteh Jahwe nulak bangsaNa.’ (Masmur 94:14) Enda me jaminenna. La soal kai si terjadi, Jahwe pasti ras kita. Janah adi kita mate pe, la kita ilupakenNa. (Roma 8:38, 39) “Adi kita nggeluh, kita nggeluh guna Jahwe, janah adi kita mate, kita mate guna Jahwe. Emaka adi kita nggeluh ntah pe mate, kita jang Jahwe kap.” (Roma 14:8) Sitimai ipegeluh Jahwe kerina temanNa si setia si nggo mate. (Matius 22:32) Janah gundari pe melala hadiah si luar biasa si ibereken Bapakta man banta. Bagi si ikataken Pustaka, ‘Malem kal ate bangsa si ngakui Jahwe jadi Dibatana, sangap kal bangsa si terpilih jadi sikerajangenNa.’​—Masmur 33:12.