1, 2. Kai ertina natap Jahwe?

KITA nggeluh bas “masa si sulit si dem kiniseran.” (2 Timotius 3:1) Janah e pasti reh serana perban lanai ndekah ikernepken Jahwe me doni si jahat enda, kenca si e ibanNa lit kedamen situhu-tuhu i doni. Emaka arus sisungkuni dirita, ‘Ise nge si kutatap guna mindo penampat ras petunjuk?’ Banci saja mis sikataken, “Jahwe,” janah e me jawapen si mehulina.

² Kai ertina natap Jahwe? Janah uga carana gelah banci terus sitatap Ia sanga lit masalahta? Mbarenda sekalak penulis Pustaka ngataken maka perlu kel sitatap Jahwe sanga perlu kita penampat. (Baca Masmur 123:1-4.) Ikatakenna maka sanga sitatap Jahwe, bali kita bagi sekalak suruh-suruhen si natap tuanna. Engkai? Sekalak suruh-suruhen natap tuanna ntah ngarap man tuanna gelah ibere ia man ntah pe perlindungen. Tapi, arus ka terus itatapna tuanna gelah itehna kai si  iarapken tuanna i bas ia nari, janah kenca itehna, arus ilakokenna kai si isuruh tuanna e. Kita pe bage ka, arus tuhu-tuhu sipelajari Kata Dibata tiap wari gelah siteh kai si iarapken Jahwe bas kita nari, kenca siteh, arus silakoken. Alu bage, tek kita pasti isampati Jahwe kita sanga siperluken penampat.​—Epesus 5:17.

3. Kai si banci erban kita lanai natap Jahwe?

³ Amin pe siteh maka arus lalap sitatap Jahwe, mon-mon banci ka kita lanai natap Jahwe. Enda me si terjadi man Marta, kalak si rembak ras Jesus. ‘Marta la mperdiateken Jesus sebap sibuk ia ndahiken dahinna.’ (Lukas 10:40-42) Adi kalak si setia bagi Marta saja pe banci la mperdiateken Jesus padahal lit Jesus i deherna, terlebih ka kita, emaka ula ateta mamang adi e terjadi banta. Jadi, kai si banci erban kita lanai natap Jahwe? I bas pelajaren enda sibahas kari uga perbahanen kalak si deban banci erban kita lanai natap Jahwe. Janah sipelajari uga carana gelah terus sitatap Jahwe.

4. Engkai maka banci saja kita sengget Musa la masuk ku Taneh Perjanjin?

⁴ Pasti itatap Musa Jahwe guna ndatken petunjuk. Ikataken Pustaka, “Tetap [Musa] paguh, tempa-tempa idahna Dibata si la teridah.” (Baca Heber 11:24-27.) Nina ka, ‘La pernah lit nabi i Israel bagi Musa, si seh kel rembakna ras Jahwe.’ (Ulangen 34:10) Tapi, amin pe rembak Musa ras Jahwe, la ia masuk ku Taneh Perjanjin. (Bilangen 20:12) Engkai maka bage?

5-7. (a) Kai si terjadi la ndekah kenca kalak Israel ndarat Mesir nari? (b) Kai si ilakoken Musa?

⁵ La seh dua bulan kenca kalak Israel ndarat Mesir nari, janah lenga pe seh kalak e bas Deleng Sinai, terjadi me masalah si serius. Perban la lit lau, merawa me kalak Israel. Mulai kalak e jungut-jungut man Musa janah ban rawana kalak e, ‘serko Musa ertoto man Jahwe, nina, “Uga nari perbahanenku man bangsa enda? Nandangi ibenterina me aku alu batu!”’ (Keluaren 17:4) Ibereken Jahwe petunjuk si jelas man Musa. Isuruh Jahwe ia muat tongkatna janah mekpek batu si lit i Horeb. Nina Pustaka, “Ibahan Musa bage i lebe-lebe peminpin-peminpin kalak Israel.” Kenca si e ndarat me lau, kerina kalak Israel banci minem. Janah dung me masalah e.​—Keluaren 17:5, 6.

⁶ Ikataken Pustaka maka igelari Musa ingan e Masa, si ertina “Nguji,” ras Meriba, si ertina “Jungut-jungut.” Engkai? ‘Sebap jungut-jungut kalak Israel, janah iujina Jahwe sanga nina, “Tuhu kin Jahwe ras kita ntah lang?”’—Keluaren 17:7.

⁷ Uga perasan Jahwe ngidah kai si terjadi bas Meriba? Kalak Israel labo saja nentang Musa, tapi nentang Jahwe ras kuasaNa. (Baca Masmur 95:8, 9.) Salah kel si ilakoken kalak Israel e. Tapi benar si ilakoken Musa. Itatapna Jahwe janah ikutkenna kerina petunjukNa.

8. Kai si terjadi sanga kalak Israel nandangi seh ku Taneh Perjanjin?

 ⁸ Kira-kira 40 tahun kenca si e, terjadi ka me si bage, tapi lit si beda. Kai e? Kentisik nari ngenca ilewati kalak Israel taneh mesawang. Kalak e nggo seh bas sada ingan i deher Kades, ndeher ku perbatasen Taneh Perjanjin. Ingan enda pe igelari ka Meriba. * (Nen keterangen tambahen.) Engkai? Perban mulihi kalak Israel jungut-jungut erkiteken la lit lau. (Bilangen 20:1-5) Tapi i bas keadan e, iban Musa kesalahen si serius.

9. (a) Petunjuk kai si ibereken Jahwe man Musa? (b) Kai si ilakoken Musa? (Nen gambar pemena artikel.)

⁹ Kai si ilakoken Musa sanga kalak Israel mberontak? Mulihi itatapna Jahwe guna mindo petunjuk. Tapi i bas situasi e, lanai isuruh Jahwe Musa mekpek batu. IsuruhNa Musa muat tongkatna, maba kalak Israel ku deher batu, kenca si e isuruh Jahwe Musa ngerana ku batu. (Bilangen 20:6-8) Bage nge si ilakoken Musa? Lang. Perban putus asa kel ia janah merawa, nina man kalak e, “Begiken, o kam si tukang berontak! Terpaksa kin ipedarat kami man bandu lau i bas batu enda nari?” Kenca si e, ipekpekna batu e, labo ngenca sekali, tapi dua kali.​—Bilangen 20:10, 11.

10. Engkai maka merawa kel Jahwe man Musa?

¹⁰ Merawa kel Jahwe man Musa. (Ulangen 1:37; 3:26) Engkai maka bage kel rawana Jahwe? Perban la ipatuhi Musa petunjuk si mbaru si ibereken Jahwe man bana.

11. Alu mekpek batu, kai si banci saja lit i bas perukuren kalak Israel?

¹¹ Lit alasen si deban ngkai Jahwe merawa. Batu si galang si lit bas Meriba si pertama seh kel piherna. La soal uga gegehna kalak mekpek batu e, lau la banci ndarat. Tapi beda kel batu si lit bas Meriba si peduaken. Menam kerina batu si lit i je batu kapur. Perban batu kapur e la piher, rusur lau meresap ku bas batu e janah pulung launa bas teruh taneh. Emaka, alu erban lubang bas batu, banci idat kalak lau. Emaka sanga ipekpek Musa batu e, janah labo ia ngerana man batu, mungkin nge iakap kalak Israel lau e reh bage saja, labo perban mukjizat si iban Jahwe? * (Nen keterangen tambahen.) La banci sipastiken.

12. Kai alasen si deban maka merawa Jahwe man Musa ras Harun?

¹² Lit denga alasen si deban ngkai maka merawa kel Jahwe man Musa  ras man Harun. Nina Musa man bangsa e, “Terpaksa kin ipedarat kami man bandu lau i bas batu enda nari?” Sanga ikataken Musa “kami,” banci saja maksudna ia ras Harun. Kai si ikataken Musa sitik pe la ngergai Jahwe, perban la iberekenna kerina pujin man Jahwe erkiteken mukjizat e. Nina Masmur 106:32, 33, ‘I sumbul Meriba, ipekeke kalak enda ka rawaNdu, erkiteken perbahanen kalak enda, Musa lit i bas kesusahen. Pagit kel iakap Musa ibahan kalak enda, seh maka ibelaskenna ranan si la iukurina leben.’ (Bilangen 27:14) La bagi si iarapken Jahwe si ilakoken Musa, la iergaina Jahwe. Nina Jahwe man Musa ras Harun, “Duana kam ngelawan perentahKu.” (Bilangen 20:24) Enda sada dosa si serius kel!

13. Engkai banci sikataken cara Jahwe e benar ras adil sanga iukumNa Musa?

¹³ Buen si iarapken Jahwe bas Musa ras Harun nari asangken kalak si deban perban kalak e si minpin umatNa. (Lukas 12:48) Mbarenda, nterem kel kalak Israel la ibereken masuk ku Taneh Perjanjin, perban mberontak kalak e man Jahwe. (Bilangen 14:26-30, 34) Emaka, sanga mberontak Musa, ibereken Jahwe man bana ukumen si seri, janah enda ukumen si benar ras adil. Bali bagi pemberontak si deban, Musa la ibereken Jahwe masuk ku Taneh Perjanjin.

14, 15. Kai si erban Musa mberontak man Jahwe?

¹⁴ Kai si erban Musa mberontak man Jahwe? Perdiateken mulihi kai nina Masmur 106:32, 33, ‘I sumbul Meriba, ipekeke kalak enda ka rawaNdu, erkiteken perbahanen kalak enda, Musa lit i bas kesusahen. Pagit kel iakap Musa ibahan kalak enda, seh maka ibelaskenna ranan si la iukurina leben.’ Aminna pe kalak Israel si mberontak man Jahwe, Musa si merawa ntah pe pagit kel iakapna. La terkuasaina dirina, dungna ibelaskenna ranan si erbanca ia dat masalah.

¹⁵ Perban perbahanen kalak si deban, lanai Musa natap Jahwe. Sanga tangtangna kalak Israel jungut-jungut perban la lit lau, benar si ilakoken Musa. (Keluaren 7:6) Tapi perban nggo ertahun-tahun dekahna kalak Israel mberontak, banci saja dungna latih kel iakap Musa ras putus asa ia. Banci saja e si erbanca maka lanai imuliakenna Jahwe, perban perasanna saja ngenca si iukurina.

16. Engkai maka arus siukuri kesalahen Musa?

¹⁶ Adi nabi si setia bagi Musa saja pe banci lanai natap Jahwe ras erdosa, terlebih ka kita. Musa nandangi masuk ku Taneh Perjanjin, janah kita pe nandangi masuk ku doni si mbaru.  (2 Petrus 3:13) Pasti la ateta bene kesempaten si luar biasa e. Tapi, gelah banci kita masuk ku doni si mbaru, arus terus sitatap Jahwe janah lalap patuh man baNa. (1 Johanes 2:17) Kai si banci sipelajari arah kesalahen Musa?

17. Uga carana gelah banci sikuasai dirita sanga nembeh ateta kalak si deban?

¹⁷ Ula sempat la terkuasaindu dirindu sanga kam putus asa. Mon-mon mulih-ulih siadapi masalah si seri. Tapi nina Pustaka, “Ula kita nyerah i bas ngelakoken kai si mehuli. Sebap adi la kita nyerah, siperani me ulihna i bas waktuna.” (Galati 6:9; 2 Tesalonika 3:13) Sanga lit si rusur erbanca nembeh ateta, siukuri nge lebe maka kita ngerana? Sikuasai nge dirita gelah ula merawa? (Kuan-kuanen 10:19; 17:27; Matius 5:22) Sanga lit si mancing kita merawa, perlu kita erlajar guna ‘mpediat Dibata si ncidahken rawaNa.’ (Baca Roma 12:17-21.) Kai ertina e? Asangken merawa, padin kita sabar nimai Jahwe ndungi masalahta alu caraNa. Adi balas dendam kita janah la sitatap Jahwe, e ertina la siergai Ia.

18. Kai si arus silakoken sanga lit petunjuk si terbaru?

 ¹⁸ Ikutkenlah petunjuk si terbaru. Siikutken nge kerina petunjuk si terbaru si ibereken Jahwe man banta? Labo arus terus sidalanken petunjuk si sedekah enda nggo sialoken. Tapi arus ka siikutken petunjuk si terbaru si ibereken Jahwe man banta arah organisasiNa. (Heber 13:17) Selain si e, arus lalap ‘siikutken kai si tertulis.’ (1 Korinti 4:6) Adi siikutken petunjuk Jahwe, e ertina lalap sitatap Ia.

19. Kai si erbanca maka banci kita lanai erteman ras Jahwe?

¹⁹ Ula pediat kesalahen kalak si deban erban kam lanai erteman ras Jahwe. Adi terus sitatap Jahwe, banci kita terus erteman ras Ia, janah la kita merawa aminna pe lit si rusur erban nembeh ateta. Enda khususna penting, adi lit piga-piga tanggung jawapta bas organisasi Jahwe, bali bagi Musa. Memang kerina kita perlu kerja keras janah patuh man Jahwe gelah iselamatken. (Pilipi 2:12) Tapi, adi lit lebih tanggung jawapta, lebih ka si iarapken Jahwe bas kita nari. (Lukas 12:48) Janah adi tuhu-tuhu keleng ateta Jahwe, la lit si banci erban kita tertuktuk ntah pe si nirangken kita arah kekelengen Jahwe.​—Masmur 119:165; Roma 8:37-39.

20. Kai arusna jadi tekadta?

²⁰ Kita nggeluh i bas masa si sulit janah melala kel tentangen siadapi. Emaka penting kel lalap sitatap Jahwe si ‘kerajanNa i surga,’ gelah siteh kai si iarapkenNa bas kita nari. Ula pernah sipediat perbahanen kalak si deban erban kita lanai jadi teman Jahwe. Kai si terjadi man Musa jadi pelajaren si penting kel banta. Adi lit kalak si deban erban kesalahen, ula mis kita merawa, tapi ertekadlah kita ‘natap Jahwe Dibatata, seh maka mekuah ateNa man banta.’​—Masmur 123:1, 2.