SANGA iajari Jesus murid-muridna cara erberita, ipersingetina kalak e maka labo kerina kalak nggit megiken beritana. (Lukas 10:3, 5, 6) Gundari pe bage ka nge siadapi. Piga-piga kalak mungkin kasar ntah pe merawa man banta. Sanga bage tanggapenna, banci saja mesera siakap rate mekuah ras erberita man bana.

Kalak si rate mekuah iperdiatekenna keperlun ras masalah kalak si deban, mekuah atena kalak e, janah isampatina atena. Tapi kai akibatna adi lanai ateta mekuah kalak i bas pelayanen? Lanai kita semangat erberita, janah lanai banci sisampati kalak. Banci sipeseri semangatta ras api. Gelah banci gurlah api e, perlu melala oksigen. Kita pe bage ka, gelah reh semangatna kita, perlu mekuah ateta kalak si deban!​—1 Tesalonika 5:19.

Uga carana gelah reh kuahna ateta kalak, aminna pe mesera siakap? Mari sibahas telu contoh si banci siusih: Jahwe, Jesus, ras rasul Paulus.

Ribun tahun dekahna, ikataken kalak kai si jahat kerna Jahwe. Tapi tetap Ia ‘mehuli man kalak si la meteh ngata bujur ras kalak jahat.’ (Lukas 6:35) Uga caraNa sabar man kerina kalak? Ate Jahwe “erbage-bage kalak” iselamatken. (1 Timotius 2:3, 4) Aminna pe segat ate Dibata kejahaten, merga akapNa manusia, janah la ateNa kalak e mate.​—2 Petrus 3:9.

Iteh Jahwe maka beluh kel Setan erban kalak tek man kai si la tuhu. (2 Korinti 4:3, 4) Enterem kalak kitik-kitik nari iajari kai si la tuhu kerna Dibata. Enda erbanca mesera akapna ngaloken ajaren si benar arah Pustaka. Tapi semangat kel Jahwe nampati kalak e. Arah ja siteh?

Contohna, kerna perasan Jahwe man kalak Niniwe. Amin pe kalak e seh kel jahatna, nina Jahwe man Juna, ‘Tentu kuahen denga ka ateKu ngenen Niniwe, kuta si mbelin e. Apai denga ka i bas kuta e lit lebih 120.000 kalak si la meteh apai salah apai benar.’ (Juna 4:11) Mekuah ate Jahwe kalak e, kalak si la meteh uga situhuna Ia. Emaka isuruhNa Juna mpersingeti kalak e.

Perasanta pe bagi Jahwe ka nge. Meherga siakap kalak si deban. Bagi Jahwe, semangat kita nampati kalak erlajar kerna Dibata, aminna pe tempa-tempa la lit minatna.

Sanga la mehuli tanggapen kalak man beritata, perlu siusahaken ngukuri ngkai maka ia bage. Banci saja salah pendapatna  kerna Pustaka ntah pe kerna kalak Kristen perban idahna piga-piga si ngaku Kristen ngelakoken si la mehuli. Si debanna banci saja ibegina si la tuhu kerna kinitekenta. Banci saja lit ka si mbiar itokoh-tokohi keluargana ntah pe tetanggana perban ibegikenna kita.

Piga-piga kalak si ijumpai bas erberita ngadapi masalah si seh kel beratna. Sekalak utusen injil si gelarna Kim ngataken maka nterem kalak si tading bas daerahna eme korban perang janah kadena pe lanai lit. La lit arapen kalak e kerna masa depan. Putus asa kel kalak e janah ise pe ia la tek. Rusur Saksi ilarang erberita i bas daerah e. I bas sada wari Kim iserang paksa erberita.

Kai si ilakoken Kim gelah tetap mekuah atena kalak e? Iusahakenna lalap nginget Kuan-kuanen 19:11 si ngataken, “Kalak pentar ikuasaina dirina.” Sanga iukurina kai si paksana iadapi kalak bas daerahna, enda erban mekuah atena kalak e. Janah labo kerina kalak si ijumpaina la mehuli man bana. Lit piga-piga kalak si banci idahi mulihi.

Banci sisungkun dirita, ‘Adi la kuteh kai si iajarken Pustaka, uga nge tanggapenku sanga erberita Saksi Jahwe man bangku?’ Contohna, uga adi nggo sibegi si la tuhu kerna Saksi? Kita pe banci saja la mehuli tanggapenta, janah perlu kalak rate mekuah man banta. Nina Jesus kai si ateta ilakoken kalak man banta, lakoken ka bage bana. Emaka arus siusahaken ngangkai perasan kalak janah sabar man kalak e, amin pe e mesera.​—Matius 7:12.

Tetap mekuah ate Paulus man kalak si kasar tanggapenna sanga ia erberita. Engkai? Perban ingetna uga ia mbarenda. Nina, “Mbarenda aku tukang hina, tukang niksa, janah sombong. Tapi mekuah ate Dibata nandangi aku sebap kulakoken kerina e perban la lit pemeteh ras kinitekenku.” (1 Timotius 1:13) Iteh Paulus maka mekuah kel ate Jahwe ras Jesus ia. Iangkai Paulus ngkai maka ipengadi kalak atena ia erberita, perban ia pe mbarenda bage.

I bas sada wari, jumpa Paulus ras kalak si erkiniteken kel man pengajaren si salah. Uga perasan Paulus? I bas Perbahanen Rasul-Rasul 17:16, sibaca maka sanga Paulus i Atena “idahna melala kel berhala i bas kota e, emaka segat kel atena.” Tapi kai si atena segat e igunakenna jadi bahan guna  erberita man kalak. (Perbahanen Rasul-Rasul 17:22, 23) Isesuekenna carana erberita, la seri banna carana erberita man kerina kalak perban beda-beda latar belakang kalak, gelah ‘alu cara kai pe banci iselamatkenna kalak e.’​—1 Korinti 9:20-23.

Sanga kita erberita man kalak si la mehuli tanggapenna ntah salah si itekina, banci siusih kai si ilakoken Paulus. Banci sigunaken kai si nggo siteh kerna kalak e guna nampati ia erlajar kerna “berita si mehuli.” (Jesaya 52:7) Nina Dorothy, “I bas daerah kami, nterem kalak iajar maka Dibata e kejam ras tukang ngukum. Kupujiken semangatna bas nembah Dibata, kenca si e, kuturiken kai nina Pustaka kerna sipat-sipat Jahwe si perkeleng ras janjiNa kerna masa depan.”

Arus ka siusahaken mpegegehi turang seninata sanga kita erberita ras ia. Lit pengalamen Jessika. Sanga ia erberita, temanna ndatken tanggapen si la mehuli. La nggit Jessika ncakapken kerna tanggapen si la mehuli ndai. Tapi icakapkenna kai si mehuli, bagi asil si mejile bas erberita amin pe piga-piga la mehuli tanggapen kalak.

Iteh Jahwe maka mon-mon mesera kel siakap erberita. Tapi meriah kel ukurNa sanga siusih sipatNa si perkuah! (Lukas 6:36) Memang, labo rasa lalap Jahwe rate mekuah ras sabar man kalak bas doni enda. Banci kita tek maka iteh Jahwe ndigan waktu si tepat ngkernepken kalak bas doni enda. Sanga e lenga terjadi, perlu kel kita reh semangatna erberita. (2 Timotius 4:2) Emaka teruslah kita semangat erberita janah mekuah ateta “erbage-bage kalak.”