1, 2. Uga Jahwe ngapuli kita paksa ngadapi percuban, janah kai janjiNa?

IUKURI sekalak turang senina si anak perana denga ayat bas 1 Korinti 7:28, si ngataken maka kalak si erjabu ”inanamina me erbage-bage kesusahen”. Isungkunna sekalak pertua si nggo erjabu si tuan asangken ia, nina, ”Kai saja kin ’kesusahen’ i bas perjabun, janah uga carangku ngadapisa pagi?” Sope jabap pertua e, ipindona gelah iukuri anak perana e kerna hal si deban si isuratken rasul Paulus: Jahwe eme ”Dibata sumbul kerina pengapul, enggo iapuliNa kami i bas kerina kiniseran kami” ntah pe kesusahen kami.​—2 Korinti 1:3, 4.

² Sieteh maka keleng ate Jahwe kita selaku Bapanta, janah iapuliNa kita paksa ngadapi masalah. Mungkin iingetndu paksa idukung ras ibere Jahwe petunjuk man bandu arah KataNa. Tek kita maka si mehulina ateNa si  nanami kita, bagi si ilakokenNa man umatNa si mbarenda.​—Oge Jeremia 29:11, 12.

3. Penungkunen kai si man jabapenta i bas artikel enda?

³ Biasana, reh nukahna siakap megenggeng ngadapi masalah ras kesusahen adi sieteh kai sabapna. Emaka ngkai maka lit kesusahen i bas perjabunta ntah pe keluarganta? Janah usihen ise si lit bas jaman Pustaka bage pe bas jamanta si banci nampati kita ndatken pengapul? Mari sijabap penungkunen-penungkunen enda janah sibahas uga kita banci megenggeng ngadapi percuban.

4, 5. Kesusahen kai si banci jadi iadapi perbulangen ras ndehara?

⁴ Kenca itepa Jahwe diberu si pemena, iberekenNa ia man sekalak dilaki, janah diberu e jadi ndeharana. Kenca e ikataken Jahwe, ”Dilaki nadingken nande bapana, gelah ersada ia ras ndeharana, maka duana enggo jadi sada.” (Kejadin 2:24) Payo, kerina kita lanai serta. (Roma 3:23) Erkiteken si e, paksa erjabu dilaki ras diberu, pasti iadapi kalak e masalah. Contohna, sope erjabu, diberu patuh man orang tuana. Tapi ikataken Pustaka si Badia maka kenca erjabu, perbulangen jadi takal ndeharana. (1 Korinti 11:3) Tangtangna, mesera iakap perbulangen mereken petunjuk man ndeharana. Janah nukahen iakap sekalak ndehara ngaloken petunjuk arah orangtuana asangken arah perbulangenna. Selain si e, banci jadi pasangen si mbaru erjabu la siangkan ras simetuana, enda pe banci jadi percuban.

⁵ Masalah si deban eme paksa mehuli kula sekalak ndehara. Ukuri kerna perasan kalak e. Amin gia meriah kel akapna, biasana aru ka nge atena. Misalna kerna kesehatenna ras kesehaten anak i bas bertinna. Ietehna ka maka pasti reh buena uang keluar. Kenca tubuh anak e, perlu ka pasangen enda erban perubahen si deban. Banci jadi nggo keri waktu ndehara e ngurus anakna. Emaka lanai lit waktu perbulangen ras ndehara erdua-dua bagi si sange. Perbulangen pe nggo ka lebih tanggung jabapna. Arus iusahakenna ncukupi keperlun ndehara bage pe anakna.

6-8. Uga penggejapen piga-piga pasangen si nggo erjabu adi la lit anakna?

⁶ Pasangen si deban, lain ka kesusahen si iadapina. Merhat kel ia gelah lit anakna, tapi la banci. Paksa sekalak ndehara la banci mupus, kitik kel ukurna. (Kuan-kuanen 13:12) Bas jaman Pustaka, penting kel man sekalak diberu gelah erjabu janah mupus. Enda me si erbanca ngkai maka kitik kel ukur Rahel, ndehara Jakup, paksa lalap lenga mehuli kulana, tapi kakana banci lit anakna. (Kejadin 30:1, 2) Gundari, i bas piga-piga negara, nterem si erpengakap maka penting kel adi melala anak. Rusur isungkun kalak man utusen injil si tading i negarana, ngkai maka la lit anak utusen injil e.  Amin gia nggo ijelasken utusen injil e alasenna, lit ka si ngataken, ”Bage ari? Totoken kami kam ya, gelah mis lit anakndu!”

⁷ Contoh si deban eme sekalak turang senina si diberu si tading i Inggris, merhat kel ia lit anakna. Kenca nggo ietehna maka la ia banci mupus, ceda kel ukurna. Emaka iadopsina me sekalak anak. Tapi ceda denga lalap ukurna. Nina, ”Pasti nge riahen kuakap mupus anak sendiri asangken ngadopsi.”

⁸ Ikataken Pustaka maka ”sekalak diberu selamat nge arah ia mupus”. (1 Timotius 2:15) Tapi enda labo berarti sekalak diberu banci dat kegeluhen si rasa lalap adi lit anakna. Emaka, kai maksud ayat enda? Tentu sibuk kel sekalak pernanden ngurus anak ras rumahna. Enda nampati ia gelah ula cekurak ntah pe ngurusi masalah kalak si deban. (1 Timotius 5:13) Amin gia bage, tetap nge lit masalah i bas perjabun bage pe keluargana.

9. Kai kesusahen si deban si banci saja terjadi i bas perjabun?

⁹ Kesusahen si deban si iadapi piga-piga kalak si nggo erjabu eme kematen teman geluhna. Amin gia mbarenda la pernah iarapkenna maka si e terjadi, nterem si banci megenggeng ngadapi keadan si erban ceda ate e. Tek kel kalak Kristen janji kerna kinikeken, janah enda tuhu-tuhu ngapuli kalak e. (Johanes 5:28, 29) Bapanta, Jahwe, mereken melala janji i bas Pustaka, si ngapuli kita paksa ngadapi kiniseran. Gundari mari sibahas uga piga-piga umat Jahwe iapuli janah uga enda nampati ia.

10. Uga Hanna iapuli? (Nen gambar pemena artikel.)

¹⁰ Ukuri kai si terjadi nandangi Hanna, ndehara kekelengen Elkana. Lit atena anakna tapi la banci. Tapi, kiduana, Penina, melala anakna. (Oge 1 Samuel 1:4-7.) Gelah kitik ukur Hanna, itokoh-tokohi Penina ia ”tahun ku tahun” erkiteken la lit anakna. Enda erban ceda kel ukur Hanna. Kai si ilakoken Hanna gelah terapuli ia? Ertoto ia man Jahwe. Janah lawes Hanna ku rumah pertoton, ndekah kel ia ertoto i je. Ipindona man Jahwe sekalak anak dilaki, janah tek ia pasti isampatiNa. Kenca dung ia ertoto, nggo menahang akapna janah ”lanai atena ceda”. (1 Samuel 1:12, 17, 18) Ietehna maka banci ibere Jahwe anak ntah pe iapulina ia alu cara si deban.

11. Uga pertoton banci ngapuli kita?

¹¹ Erkiteken la kita serta janah nggeluh i bas doni si ikuasai Setan, terus  kita ngadapi percuban. (1 Johanes 5:19) Tapi lit si nampati kita. Banci kita ertoto man Dibata Jahwe, ”Dibata sumbul kerina pengapul”. E me si ilakoken Hanna. Ituriken Hanna man Jahwe uga perasanna janah mindo kel ia gelah isampati. Bage ka pe, paksa ngadapi kiniseran, labo situriken saja masalahta man Jahwe. Perlu ka sipindo baNa penampat janah situriken uga kin situhuna perasanta.​—Pilipi 4:6, 7.

12. Kai si nampati Anna ermeriah ukur amin gia ngadapi percuban?

¹² Banci getem kel pusuhta erkiteken la lit anakta ntah pe kematen kalak si keleng kel ateta. Tapi banci nge sidat pengapul. Ukuri usihen Anna, si nggeluh paksa jaman Jesus. Kenca pitu tahun ia erjabu, mate perbulangenna. Banci jadi la lit anakna. Tapi kai si nampati ia? ’La pernah itadingkenna Rumah Tuhan.’ Amin gia nggo 84 tahun umurna, tetap ia lawes ku rumah pertoton guna ertoto ras nembah Dibata Jahwe. (Lukas 2:37) E me si ngapuli ia ras si erban ia ermeriah ukur amin gia ngadapi percuban.

13. Uga teman situhu-tuhu banci ngapuli kita adi ikecewaken keluarganta kita?

¹³ Banci ka sidat pengapul arah teman situhu-tuhu si lit bas runggun. (Kuan-kuanen 18:24) Contohna Paula, paksa umurna lima tahun denga nandena lanai ngelayani Jahwe. Kitik kel ukurna, janah mesera kel akapna. Tapi, lit sekalak perintis gelarna Ann si mperdiateken janah ngkelengi ia bage pe mereken semangat. Nina Paula, ”Amin gia ia labo keluargangku, tapi erkiteken ermediate kel ia, tersampati kel aku. Enda me si erbanca aku banci terus ngelayani Jahwe.” Kenca si e, mulih nande Paula ku runggun, meriah kel akap Paula. Ann pe meriah kel akapna erkiteken banci nampati Paula terus ngelayani Jahwe.

14. Kai gunana banta adi siapuli kalak si deban?

 ¹⁴ Paksa sibuk kita ngelakoken kai si mehuli man si deban, banci lupa kita masalahta. Contohna, nterem turang seninanta si diberu, si erjabu ntah pe si la erjabu, ietehna maka paksa ia erberita, ia erdahin man Jahwe janah si ilakokenna eme peratenNa. Enda me si erban ia ermeriah ukur. Situhuna, kerina kita banci nge ermediate man si deban alu erberita. Janah paksa silakoken si mehuli man turang ras seninanta, reh deherna kita ras ia. (Pilipi 2:4) E me si ilakoken rasul Paulus. Iperdiatekenna kalak si deban ”bagi sekalak nande nandangi anakna”. Iapuli janah isemangati Paulus  turang seninana, ”bali ras perbahanen sekalak bapa nandangi anak-anakna”.​—Oge 1 Tesalonika 2:7, 11, 12.

15. Ise si ertanggungjabap ngajar anak kerna Jahwe?

¹⁵ Uga caranta ngapuli keluarga-keluarga si lit bas runggun? Maun-maun, lit kalak si mbaru denga jadi saksi, ipindona gelah siajari anakna kerna Jahwe. Nggo ituriken bas Pustaka maka orang tua nge si ibere Jahwe tanggung jabap guna ngajar ras mere pelatihen man anakna. (Kuan-kuanen 23:22; Epesus 6:1-4) Amin gia piga-piga orang tua perlu penampat arah kalak si deban, tapi penting kel gelah orang tua min si ngajar anakna. Orang tua perlu rusur ngerana-ngerana ras anakna.

16. Kai si arusna siinget paksa nampati anak-anak?

¹⁶ Adi ipindo sekalak orang tua kita ngajari anakna kerna Pustaka, perlu siinget maka la seri hakta ras orangtuana. Maun-maun banci saja siajari anak-anak si orangtuana la Saksi Jahwe. Tapi mehuli adi kita erlajar i rumahna sanga i je ka min orangtuana, ntah pe ras Saksi si erpengalamen ntah i bas ingan si nterem jelma i je. Alu bage, la salah paham siban kalak si deban. Janah i bas paksana, banci saja orang tua e nggo ngasup ngajari anakna kerna Jahwe.

17. Uga anak-anak banci ngapuli keluargana?

¹⁷ Anak muda si erlajar ngkelengi Jahwe banci ngapuli ras mereken semangat man anggota keluargana. Uga carana? Alu nghamati orangtuana janah tutus atena nampatisa. Bage pe, adi tetap setia anak-anak man Jahwe, enda erban kerina anggota keluarga ergiah-giah. Lameh si nembah Jahwe, si nggeluh sope Banjir si Mbelin ngataken kerna anakna Nuah, ”Anak enda me si mereken kemalemen ate man banta i bas kelatihenta erdahin ngusahai taneh si enggo isumpahi [Jahwe].” Kenca Banjir si Mbelin, tergenap me nubuat e paksa isasapken Jahwe sumpahna man taneh. (Kejadin 5:29; 8:21) Gundari, anak-anak si tetap setia man Jahwe banci ka ngapuli keluargana. Banci isampatina kerina si lit bas keluargana gelah tetap megenggeng i bas ngadapi kerina kiniseran si lit gundari bage pe bas wari si reh.

18. Kai si banci nampati kita megenggeng i bas ngadapi percuban?

¹⁸ Gundari pe, umat Jahwe banci dat pengapul alu ertoto, alu ngukuri usihen si lit bas Pustaka, bage pe alu tetap ndeher ras turang senina. (Oge Masmur 145:18, 19.) Sieteh maka katawari paksa pe Jahwe pasti ngapuli kita, janah pasti isampatiNa kita megenggeng i bas kerina percubanta!