ATE Dibata Jahwe dame min umatNa. AteNa iusahaken kalak e min ngayaki perdamen. Adi ilakokenna, dame me bas runggun. Kedamen e erban nterem kalak nggit jadi Saksi Jahwe.

Contohna, lit guru si baso i Madagaskar si mperdiateken kedamen bas umat Jahwe. Rukur ia, ’Seumpama eragama pagi ateku, enda me agama si kupilih.’ Dungna, lanai isembahna malekat si jahat, ibanna melala perubahen i bas perjabunna, janah isembahna Jahwe, Dibata kedamen.

Bagi dilaki e, tiap tahun lit ribun kalak jadi Saksi Jahwe janah ndatken kedamen bagi si iarapkenna. Tapi, sioge bas Pustaka si Badia maka ’cian ate bage pe ngilas ate’ bas runggun banci ncedai pertemanen ras erban masalah. (Jakup 3:14-16) Tapi ibere Pustaka pedah si mehuli kerna cara mpedauh masalah e bage pe cara gelah reh paguhna perdamenta ras turang senina. Mari sinen uga pedah e erguna i bas piga-piga pengalamen.

”Lit masalahku ras sekalak turang seninanta si sada dahin ras aku. Bas sada paksa sigangen sora kami. Lit dua kalak si ngidahsa.”​—CHRIS.

”Sekalak turang senina si rusur kami ras erberita rempet ibatalkenna janji kami guna erberita. Jenari lanai perkuankenna aku. La kuteh ngkai.”​—JANET.

”Pernah aku teleponen ras dua temanku alu nggunaken sambungen telepon man telu kalak. Sada temanku ngataken, ’Enggo ya.’ Kuakap nggo imatekenna. Kenca e kukataken si la mehuli kerna ia man temanku si sada nari, kepeken lenga imateken temanku si ndai teleponna.”​—MICHAEL.

”Bas runggun kami, lit dua perintis si la sicocoken. Iserpuhna temanna. Perjengilen kalak e erban lemah kerohanin turang senina.”​—GARY.

Banci jadi biasa siakap masalah enda. Tapi, situhuna banci mbages perpanna man kalak si ngadapi masalah e janah ncedai kedamen bas runggun. Tapi, kerina turang seninanta enda iikutkenna pedah Pustaka janah banci ka erdame mulihi. Pedah Pustaka si apai nge menurutndu si nampatisa?

”Ola rubat-rubat i bas dalan.” (Kejadin 45:24) Ibere Jusup pedah si mehuli enda man senina-seninana paksa mulih ate kalak e ku bapana. Paksa la banci ikuasai sekalak jelma perasanna janah menukah ia merawa, banci reh beratna masalahna. Banci jadi si deban pe ikut merawa. Isedari Chris maka maun-maun mesera kel iakapna meteruk ukur ras ngikutken piga-piga petunjuk. Robah atena janah ngaku salah ia man turang senina si erjengil ia ras. Emaka erusaha kel Chris nahan emosina. Paksa iperdiateken turang senina e uga tutusna ate Chris erusaha guna robah,  ia pe ikut robah. Gundari nggo dame kalak e duana janah radu ras nembah Dibata Jahwe.

”Rencana gagal adi la icakapken.” (Kuan-kuanen 15:22, Terjemahan Dunia Baru.) Paksa lanai iperkuanken temanna, idalanken Janet me ayat enda. Emaka ijumpaina temanna e guna ncakapken masalahna. Isungkun Janet temanna e kai nge si nggo ilakokenna si erban kitik ukurna ntah pe segat atena. Tangtangna, bagi si mberat nge akap kalak e. Tapi asum kalak e ngerana alu manjar-anjar, nggo reh tenangna akapna. Isedari temanna e maka situhuna salah sangka kepe ia janah situhuna Janet pe la ngelakoken kai pe si erban kitik ukurna. Ngaku salah ia man Janet. Gundari nggo erteman kalak e mulihi janah radu ras ngelayani Jahwe.

”Dage, adi asum atendu nehken persembahen man Dibata ingetndu maka sangkut ukur seninandu nandangi kam, tadingkenlah lebe persembahenndu e jenari erdame ras ia.” (Matius 5:23, 24) Ibere Jesus pedah e bas Kotbahna i datas Uruk. Kenca ikataken Michael si la mehuli kerna temanna, salah kel akapna bana. Iputuskenna maka arus ilakokenna kai pe si banci ndungi masalah e. Emaka, ijumpaina temanna e, iturikenna maka erkadiola kel ia. Kai ulihna? Ikataken Michael, ”Tuhu-tuhu ialemina kel aku.” Mulihi kalak e erteman.

”Ola kam pergelut dingen si alem-alemen salah adi kitik ukurndu ibahan kalak.” (Kolose 3:12-14) Ingetndu nge kerna dua perintis si erjengil paksa erberita? Alu mehuli isampati sekalak pertua ia duana guna ngangkai maka perjengilenna e erban turang senina terganggu janah lanai ermeriah ukur. Ipersingetina kalak e maka arus ia sabar janah perlu njaga runggun tetap dame. Ialokenna janah idalankenna pedah e. Gundari nggo meriah ia ras i bas dahin erberita.

Pedah si deban lit bas Kolose 3:12-14. Enda banci nampati kam gelah meteruk ukur ras ngalemi kalak si erban kitik ukurndu janah lanai ngukuri masalahna. Tapi uga adi nggo siusahaken ngalemi tapi lalap lenga banci? Pedah bas Matius 18:15 banci nampati. Amin gia si ituriken Jesus i jenda kerna dosa si mbelin, iturikenna ka kerna kai si banci silakoken adi lit masalahta ras turang seninanta. Alu cara si mehuli dingen meteruk ukur, banci sijumpai ia guna mbahas masalahna janah erusaha ndungisa.

Melala pedah si mehuli kerna erdame i bas Pustaka. Buen i bas pedah e lit hubungenna ras kesah si badia, si nampati kita ncidahken ”ulih kesah si badia” e. Ulihna eme ”lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, [erkiniteken], setia. Meteruk ukurna dingen ngasup engkuasai diri”. (Galati 5:22, 23)  Contohna, sada mesin banci erdahin alu mehuli adi lit olina. Bali bagi mesin ndai, adi sicidahken sipat-sipat si mehuli si rehna arah Jahwe, enda nampati kita ngatasi perbedan sipat si lit bas kita kerina janah hubungenta pe reh ulina.

Kerina kita la seri sipatta, pendapatta bage pe caranta nuriken isi pusuhta. Enda banci erban pertemanenta ras kalak si deban reh riahna. Tapi, banci ka erban kita la siangkan. Sekalak pertua si erpengalamen mereken contoh kerna uga si bage banci terjadi. Nina, ”Kalak si permela banci saja mesera akapna ergaul ras kalak si pet ngerana. Banci saja perbedan si bagenda biasa siakap; tapi, perbedan e banci ka jadi masalah si serius.” Menurutndu, adi lit dua kalak si beda kel sipatna banci nge ia duana erteman meriah? Mari siperdiateken contohna arah dua rasul enda. Paksa siukuri kerna Petrus, banci jadi siinget maka ia kalakna kai pe si lit bas ukurna ibelaskenna kerina. Paksa siukuri ka kerna Johanes, banci jadi minter siinget sekalak dilaki si perkeleng si iukurina lebe kai atena si ibelaskenna bage pe si man dalankenna. La kel seri sipat Petrus ras Johanes. Tapi banci kalak e radu erdahin alu mehuli i bas nembah Jahwe. (Perbahanen Rasul-Rasul 8:14; Galati 2:9) Kita pe gundari banci ka bagi kalak e. Amin gia lit piga-piga kalak Kristen si beda kel sipatna, banci nge kalak e radu ras erdahin alu mehuli.

Tapi, uga adi lit si nakiti kam i bas runggun alu ranan ntah pe perbahanenna? Mejile kel adi iingetndu maka Kristus mate man bana ras man bandu, janah arus ikelengindu turang seninandu. (Johanes 13:34, 35; Roma 5:6-8) Labo mehuli  adi lanai atendu erteman ras ia ntah pe lanai atendu jumpa ras ia. Tapi, banci sungkunndu bandu, ’Perbahanen si nalahi undang-undang Dibata nge si ilakoken turang seninangku e? Sengaja nge ia nakiti aku? Ntah erkiteken la seri nge sipat kami? Ntah, lit nge sipat-sipatna si mehuli si banci kuusih?’

Contohna, lit sekalak turang senina si percakap-cakap, tapi kam permela. Nggit nge kam erberita ras ia janah iperdiatekenndu nge kai si banci iusihndu bas ia nari? Uga adi ndauh ia lebih melumbar asangken kam? Iperdiatekenndu nge keriahen ukur si idatkenna paksa nampati kalak si nggo metua, si sakit, ntah pe si perlu penampat? Banci nge kam erlajar arah ia kerna uga carana gelah lebih melumbar? Pelajarenna, amin gia la seri sipatndu ras turang senina, banci lebih iperdiatekenndu sipat-sipatna si mehuli. Banci saja ia la pernah banci jadi kandu-kandundu, tapi banci lebih itandaindu ia janah ia pe bage. Enda banci ngerehken kedamen man bandu duana bage pe bas runggun.

Bas abad pemena, lit dua turang seninanta si gelarna Eiodia ras Sintike. Banci saja la seri sipat kalak e, tapi iiahken rasul Paulus gelah ”ersada min arihna bagi si ersenina i bas Tuhan”. (Pilipi 4:2) Kita pe ersura-sura gelah radu min kita ras turang seninanta nembah Jahwe janah siusahaken gelah dame bas runggun.

Engkai maka arus minter siambekken kerina segat ate bas pusuhta man kalak si deban? Banci sipeseri segat ate e ras dukut si turah i bas peken bunga si mejile. Adi la siruah dukut e, banci dungna peren kel peken e. Bage ka pe, adi reh belinna segat ateta, enda banci ngganggu runggun.  Tapi adi keleng ateta Jahwe ras turang seninanta, tentu nggit kita ngelakoken kai pe guna njaga perdamen bas runggun.

Adi siusahaken erdame, banci saja sengget kita nandangi asilna si mehuli. Enda nggo ialami sekalak turang seninanta si diberu. Nina, ”Segat kel ateku sekalak turang seninanta si diberu perban ibanna aku bagi danak-danak. Perban reh segatna ateku, kasar dungna aku man bana. Ningku bas ukurku, ’Adi ia pe la iergaina aku, ia pe la kuergai!’”

Kenca si e iukurina perbahanenna ndai. ”Mulai me kusedari kerna sipat-sipatku si kurang mehuli janah kecewa kel aku man diringku sendiri. Kusedari maka perlu kuperobahi carangku rukur. Ertoto aku man Jahwe. Emaka kutulis bas sada kartu maka ngaku salah aku man bana bas perbahanenku si la mehuli e janah kubereken ras sada hadiah. Sidakepen kami janah sada arih kami ngelupaken masalah e. Kenca si e lanai lit masalah kami.”

Tiap jelma atena ndatken kedamen. Tapi, kalak si nggit ersaing janah meganjang ukur banci ncedai perdamen. Bage me perbahanen teremen jelma bas doni enda, tapi ate Jahwe umatNa ula bage. Bas Saksi-Saksi Jahwe, arus lit perdamen ras persadan. Isuruh Jahwe Paulus nuratken gelah kalak Kristen ”nggeluh sue ras kecibalenna si enggo iaturken Dibata man bana”. Iiahkenna kalak e gelah ilakokenna e alu ’meteruk ukur, lemah lembut, dingen saber, la pergelut erkiteken kekelengen si lit i bas kalak e. Tuhu-tuhu ngusahaken persadan si ibereken kesah e tetap irakut alu enteguh i bas perdamen’. (Epesus 4:1-3) Tuhu-tuhu meherga ”perdamen” si lit i bas umat Jahwe. Emaka, marilah sipepaguh perdamen e janah sidungi masalah kai pe si banci saja lit antara kita ras turang seninanta.