Salomo, bapak Rehabeam, 40 tahun dekahna jadi raja Israel. (1 Raja-Raja 11:42) Kenca bapakna mate, lawes Rehabeam arah Jerusalem ku Sikem guna jadi raja. (2 Kronika 10:1) Mbiar nge ia jadi raja? Salomo itandai kalak raja si bijaksana. Emaka Rehabeam pe arus ibuktikenna bijaksana ia i bas ndungi masalah.

Tertekan kel akap kalak Israel, emaka ikirimna utusen guna ngataken man Rehabeam, “Bapandu enggo ngampeken baban si mberat man kami. Adi ipenahangindu baban e dingen ibahanndu kami nggeluh tersenangen, kami jadi suruh-suruhenndu.”​—2 Kronika 10:3, 4.

Mesera akap Rehabeam erban keputusen. Adi ilakokenna kai si ipindo kalak Israel, ia, keluargana bage pe kalak si tading bas istanana lanai banci bagi si mbarenda mewahna kegeluhenna. Tapi, adi itulakna, banci jadi mberontak kalak e. Adi bage, kai nge si ilakokenna? Icakapkenna lebe enda man tua-tua si nampati bapakna mbarenda. Isuruh tua-tua e ia gelah ilakokenna pemindon kalak Israel. Tapi isungkunna ka temanna si sebaya ras ia, dungna kejam ia man kalak Israel. Nina man kalak e, “Enggo itamaken bapangku baban si mberat i babondu tapi kubahan maka babanndu e beraten denga ka asa si e. Iligasna kam salu purih, aku kuligas kam salu cambuk kuda!”​—2 Kronika 10:6-14.

Kai pelajarenna? Gundari pe, nterem kalak si nggo metua si nggo ndekah ngelayani Jahwe janah banci isampatina kita erban keputusen si mehuli. Emaka nggitlah kita mbegiken kalak e.​—Jop 12:12, 13.

Ipepulung Rehabeam tenterana guna erperang ngelawan suku-suku si mberontak e. Tapi iutus Jahwe nabi Semaya guna ngataken, “Ola  iperangindu seninandu, bangsa Israel. Mulihlah kam kerina ku rumahndu. Kai si enggo jadi e, peratenKu kap.”​—1 Raja-Raja 12:21-24. *—Nen keterangen tambahen.

Gampang nge akap Rehabeam patuh man Jahwe? Uga nge kari tanggapen rakyatna man raja si mbaru enda? Nggo ikatakenna iukumna nge kari kalak e “salu cambuk kuda,” tapi suku-suku si mberontak e pe la surung iserangna! (Bandingken ras 2 Kronika 13:7.) Amin gia uga pe tanggapen kalak, raja e ras tenterana “ngikutken pedah [Jahwe] janah mulih ia kerina.”

Kai pelajarenna? Amin gia itokoh-tokohi kalak kita, pasti mehuli hasilna adi patuh man Jahwe. Janah, pasti ipasu-pasu Jahwe kita adi patuh man baNa.​—Ulangen 28:2.

Ipasu-pasu nge Rehabeam perban ia patuh? Rehabeam tetap merentah suku Juda ras Benyamin janah ibangunna kota-kota si mbaru si lit bas daerahna. Ibanna ka piga-piga kota si nggo paguh jadi reh paguhna. (2 Kronika 11:5-12) Si lebih penting, ipatuhina undang-undang Jahwe. Perban kerajan si sepuluh suku nggo mulai nembah dibata-dibata palsu, nterem arah kalak e lawes ku Jerusalem ndukung Rehabeam ras agama si benar. (2 Kronika 11: 16, 17) Emaka perban patuh Rehabeam man Jahwe, reh paguhna me kerajanna.

Kenca kerajan Rehabeam nggo paguh, ilakokenna kai si salah. Lanai ipatuhina undang-undang Jahwe janah isembahna dibata-dibata palsu! Engkai maka banci bage? Mamakna kalak Amon. Ia nge si mpengaruhi Rehabeam? (1 Raja-Raja 14:21) La siteh, tapi bangsana pe nggo ngikutken ia. Ipeturut Jahwe irebut Raja Sisak arah Mesir nari, piga-piga kota si lit i kerajan Juda, amin gia nggo paguh kel iban Rehabeam kota-kota e!​—1 Raja-Raja 14:22-24; 2 Kronika 12:1-4.

Keadanna reh parahna sanga reh Sisak ras tenterana nyerang Jerusalem. Ipeseh Semaya kai si ikataken Dibata man Rehabeam ras peminpin-peminpin, nina, “Enggo itadingkenndu Aku, e maka genduari Kutulak kam man Sisak.” Uga nge tanggapen Rehabeam? Robah ia! Nina Pustaka, “Igejap raja ras peminpin-peminpin e maka ia enggo erdosa, e maka nina, ‘Kai si ibahan [Jahwe] e bujur kap.’” Emaka iselamatken Jahwe me Rehabeam bage pe Jerusalem.​—2 Kronika 12:5-7, 12.

Kenca si e, Rehabeam terus jadi raja i Juda. Sanga Rehabeam nandangi mate, iberekenna melala pemere man anak-anakna. Banci jadi tujunna gelah ula anak-anakna e mberontak ngelawan Abiya, anakna si jadi raja nggantiken ia. (2 Kronika 11:21-23) Arah e siteh, nggo lebih bijaksana Rehabeam kenca ia metua asangken sanga ia nguda denga.

Amin gia ilakoken Rehabeam kai si mehuli, tapi nina Pustaka kerna pemerentahenna, “Rehabeam ngelakoken si jahat.” Engkai maka bage? Perban “la iusahakenna ndarami si ngena ate [Jahwe].” Emaka la meriah ukur Jahwe ngidah ia.​—2 Kronika 12:14.

Kai pelajarenna man banta? Mon-mon ngenca Rehabeam patuh man Dibata. Lit ilakokenna si mehuli man umat Jahwe. Tapi la ia ndeher ras Jahwe, janah la iusahakenna erban meriah ukur Jahwe. Selain si e, lanai ilakokenna kai si benar janah isembahna dibata-dibata palsu. Banci jadi tersungkun-sungkun kam, ‘Sanga nggit Rehabeam ngaloken persinget arah Jahwe, enda tuhu-tuhu perban menyesal nge ia ras atena erban meriah ukur Dibata? Ntah perban isuruh kalak nge?’ (2 Kronika 11:3, 4; 12:6) Kenca ia robah, mulihi ka ilakokenna kai si la mehuli. Beda kel ia ras bulangna Raja Daud! Memang Daud pe pernah ngelakoken kesalahen. Tapi menyesal kel ia janah tuhu-tuhu ia robah. Keleng kel atena Jahwe janah terus ilayanina Jahwe seh asa ia mate.​—1 Raja-Raja 14:8; Masmur 51:3, 19; 63:2.

 Melala kel si banci sipelajari arah Rehabeam. Mejile adi sicukupi kebutuhen keluargata janah mehuli kita man kalak si deban. Tapi gelah meriah ukur Jahwe ngidah kita, arus silayani Ia alu cara si ngena ateNa, janah arus kita ndeher ras Ia.

Gelah banci silakoken enda ndai kerina, arus keleng kel ateta Jahwe. Bali bagi api, gelah tetap gara arus terus itambahi kayuna, kita pe, banci terus ngkelengi Jahwe adi ratur kita erlajar Pustaka, ngukurisa, janah terus ertoto. (Masmur 1:2; Roma 12:12) Perban keleng ateta Jahwe, tentu nggit kita ngelakoken kai pe si meriah akap Jahwe. Kekelengen enda pe erban kita nggit robah sanga ngelakoken kesalahen janah mindo maap man Jahwe. Alu bage la kita bali bagi Rehabeam, sebap terus kita setia ngelayani Jahwe.​—Judas 20, 21.