1, 2. (a) Kai si itotoken Jesus bas totona si terakhir ras rasul-rasulna? (b) Engkai maka ikuatirken Jesus kerna persadan?

KUATIR Jesus kerna persadan murid-muridna sanga terakhir kalak e ras man berngi. Sanga ertoto ia ras kalak e, itotokenna gelah murid-muridna jadi sada ntah pe ersada, bagi ia ras Bapakna ersada. (Baca Johanes 17:20, 21.) Adi ersada murid-murid Jesus, enda jadi bukti man kalak si deban Jahwe me si ngutus Jesus ku doni. Itandai kalak murid-murid Jesus situhu-tuhu arah kekelengenna man sada ras si debanna, janah keleng e erban kalak e lebih ersada.​—Johanes 13:34, 35.

² Siteh engkai gedang Jesus ngerana kerna persadan bas berngi e. Iperdiatekenna rasul-rasulna la tuhu-tuhu ersada. Contohna, ersoal rasul-rasul “kerna ise si mbelinna i bas kalak e” bagi si pernah ka ipersoalkenna. (Lukas 22:24-27; Markus 9:33, 34) Selain si e, mindo Jakup ras Johanes man Jesus gelah iberekenna ingan si penting bas Kerajan surga, eme i sebelah Jesus.​—Markus 10:35-40.

3. Kai si banci jadi erban murid-murid Jesus la ersada? Penungkunen kai si man bahasenta?

 ³ Labo ngenca sura-sura gelah lebih erkuasa si banci erban murid-murid Kristus lanai ersada. Segat ate ras perasan negatip pe erban kalak i bas jaman Jesus la ersada. Emaka murid-murid Jesus pe perlu ngatasi perasan si bage. Bas artikel enda, sibahas kari telu penungkunen: Uga tanggapen Jesus kerna perasan negatip? Uga cara Jesus nampati pengikutna gelah la mbeda-mbedaken kalak, adil, janah ersada? Ras uga usihen si ibereken Jesus bage pe kai si iajarkenna erban kita tetap ersada?

4. Lit pengaruhna perasan negatip kalak man Jesus. Bereken contohna.

⁴ Lit pengaruhna perasan negatip kalak man Jesus. Sanga ikataken Pilipus man Natanael nggo itehna ise Mesias, nina Natanael, “Banci kin si mehuli reh i Nasaret nari?” (Johanes 1:46) Banci jadi iteh Natanael i Betlehem me Mesias lahir, bagi si ikataken bas Miha 5:2. Emaka la cocok iakapna Nasaret jadi kuta Mesias. Kalak Judea si terpandang pe rendah akapna Jesus perban ia arah Galilea. (Johanes 7:52) Enterem kalak Judea la kapna penting kalak Galilea. Kalak Jahudi si deban pe irendahkenna ka Jesus alu ngelebuh ia kalak Samaria. (Johanes 8:48) Bangsa ras agama kalak Samaria beda ras kalak Jahudi. Kalak Judea ras kalak Galilea la iergaina kalak Samaria janah la ia nggit erteman ras kalak e.​—Johanes 4:9.

5. Kai pengaruh perasan negatip ku murid-murid Jesus?

⁵ Peminpin agama Jahudi pe la iergaina pengikut-pengikut Jesus. Ikataken kalak Parisi kalak e ‘la merga i lebe-lebe Dibata.’ (Johanes 7:47-49) Ianggap kalak Parisi ise pe si la sekolah bas agama Jahudi janah la ngikutken adat kalak e eme kalak biasa janah rendah akapna. (Perbahanen Rasul-Rasul 4:13) Lit pengaruhna perasan negatip man Jesus ras murid-muridna perban kalak bas masa si e bangga man agamana, sukuna janah bangga ia adi iergai bas masyarakat. Dungna, murid-murid e pe negatip ka perasanna man kalak si deban. Emaka gelah tetap ersada, arus iubah murid-murid Jesus carana rukur.

6. Bereken contoh si mbuktiken perasan negatip banci mpengaruhi kita.

⁶ Rata-rata kalak gundari lit perasan negatip bas ia. Banci jadi kalak si negatip perasanna man banta ntah pe kita si negatip perasanta man kalak. Ikataken turang seninata si gundari jadi perintis i Australia, “Segat ateku kalak mbentar perban kuinget lalap perbahanen si la adil si terjadi man kalak Aborigin, mbarenda bage pe gundari.” Reh segatna atena perban lit piga-piga kalak si pernah nganiaya ia. Sekalak turang senina bas Kanada pe iakuina, “Hebaten kuakap kalak si ngerana bas bahasa Prancis.” Dungna segat atena kalak si ngerana bas bahasa Inggris.

7. Kai si ilakoken Jesus kerna perasan negatip?

⁷ Bagi bas jaman Jesus, gundari pe perasan negatip banci seh kel gegehna janah mesera ngubahsa. Kai si ilakoken Jesus kerna perasan negatip e? Pertama,  la ia pernah nggit negatip perasanna. La nggit mbeda-bedaken. Erberita ia man kalak bayak bage pe si mesera, man kalak Parisi bage pe Samaria, termasuk man pemungut pajak bage pe kalak perdosa. Si peduaken, iajarken Jesus murid-muridna janah iberekenna contoh man kalak e gelah ula negatip perasanna man si deban.

8. Kai dasar persadanta? Jelasken.

⁸ Iajarken Jesus kai dasar persadanta. Ikatakenna man murid-muridna, “Kerina kena ersenina.” (Baca Matius 23:8, 9.) Kerina kita ersenina perban kita anak-anak Adam. (Perbahanen Rasul-Rasul 17:26) Selain si e, ijelasken Jesus ka maka murid-muridna erturang ras ersenina perban ndalanken kai si ngena ate Jahwe, Bapak si i surga. (Matius 12:50) Janah kerina kalak e jadi anggota keluarga Dibata si ersada perban kekelengen ras kiniteken. Enda me alasenna rasul-rasul ngelebuh kalak Kristen si deban turang ras seninana i bas suratna man runggun-runggun.​—Roma 1:13; 1 Petrus 2:17; 1 Johanes 3:13. *—Nen keterangen tambahen.

9, 10. (a) Engkai maka labo lit alasen kalak Jahudi mbanggaken sukuna? (b) Uga cara Jesus ngajarken maka salah adi sianggap sukuta si mehulina? (Nen gambar pemena artikel.)

⁹ Kenca ikataken Jesus man murid-muridna kerina kalak e erturang ras ersenina, ikatakenna ka maka kalak e arus meteruk ukur. (Baca Matius 23:11, 12.) Bagi si nggo sipelajari, sanga si e rasul-rasul ersoal perban lit sipat sombong bas ia. Janah bas jaman Jesus pe, nterem kalak iakapna sukuna si hebatna, misalna kalak Jahudi, ia akapna si hebatna perban kalak e keturunen Abraham. Tapi nina Johanes Peridiken man kalak e, “Dibata ngasup njadiken batu-batu enda jadi kesusuren Abraham.”​—Lukas 3:8.

¹⁰ Ikataken Jesus maka salah nge adi siakap sukuta si mehulina. Sanga nungkun ahli Undang-Undang Musa man Jesus, “Ise dage si arus kukelengi?” iceritaken Jesus me sada cerita. Lit kalak Jahudi si ipekpeki pinangko janah itadingkenna ia bas dalan. Lit piga-piga kalak Jahudi si ngidah dilaki e, tapi la isampatina. Tapi lit kalak Samaria si mekuah atena ia janah isampatina. Kenca si e, ikataken Jesus man ahli Undang-Undang ndai maka arus ia bagi kalak Samaria e. (Lukas 10:25-37) Arah kalak Samaria e ibere Jesus pelajaren man kalak Jahudi kai ertina ngkelengi kerina kalak.

11. Engkai maka arus ilawan murid-murid Jesus sipat si sombong ras perasan negatip? Kai si ilakoken Jesus gelah iangkai kalak e perluna ngelawan sipat si bage?

¹¹ Sanga Jesus nandangi nangkih ku surga, iperintahkenna murid-muridna gelah erberita “i belang-belang Judea ras Samaria, bage pe seh ku ujung doni.” (Perbahanen Rasul-Rasul 1:8) Gelah banci ngelakoken si e, arus ilawan murid-murid Jesus sipat si sombong  ras perasan negatip. Rusur ipuji Jesus sipat-sipat mehuli kalak asing, janah enda nikapken murid-muridna gelah banci erberita ku kerina bangsa. Contohna, ipujikenna perwira si labo kalak Jahudi perban paguh kel kinitekenna. (Matius 8:5-10) Bas kutana i Nasaret, ijelasken Jesus uga Jahwe nampati kalak asing, bagi janda i Punike bas kuta Sarpat, ras Naman kalak Siria si sakit kusta. (Lukas 4:25-27) Jesus pe nggit ka erberita man diberu Samaria nari, janah nggit ia dua wari tading i Samaria perban meriah kap kalak e megiken beritana.​—Johanes 4:21-24, 40.

12, 13. (a) Uga tanggapen rasul-rasul sanga idahna Jesus erberita man diberu Samaria nari? (Nen gambar pemena artikel.) (b) Kai si terjadi si ncidahken maka lenga tuhu-tuhu iangkai Jakup ras Johanes kai si nggo iajarken Jesus man kalak e?

¹² Labo gampang akap rasul-rasul ngelawan perasan negatip. Emaka mamang ate kalak e sanga nggit Jesus erberita man diberu Samaria nari. (Johanes 4:9, 27) Engkai? Banci jadi perban peminpin agama Jahudi la nggit ngerana ras diberu i lebe-lebe jelma si nterem, apai ka man diberu Samaria nari si itandai kalak la mehuli. Iiahken rasul-rasul gelah Jesus man, tapi pentingen akap Jesus erberita man diberu e. Iperentahken Dibata gelah Jesus erberita janah ngelakoken kai si ngena ate Bapakna, enda bali bagi pangan man bana, termasuk erberita man diberu Samaria nari.​—Johanes 4:31-34.

¹³ Lenga iangkai Jakup ras Johanes pelajaren penting enda. Sanga murid-murid ras Jesus ngelewati Samaria, idarami kalak e ingan erberngi i je. Tapi la ibere kalak Samaria kalak e erberngi i kutana. Merawa kel Jakup ras Johanes janah ipindona man Jesus gelah ipesusurna api arah langit nari nutung kuta e. Minter ipersingeti Jesus kalak e. (Lukas 9:51-56) Banci jadi labo bage kel rawana Jakup ras Johanes adi e terjadi bas kutana i Galilea. Banci jadi kalak e merawa perban nggo lit perasan negatip bas kalak e. Kenca si e, sanga erberita Johanes man kalak Samaria janah nterem si nggit megikenca, banci jadi mela ia perban kai si nggo ilakokenna mbarenda.​—Perbahanen Rasul-Rasul 8:14, 25.

14. Uga cara ndungi masalah kerna perasan negatip?

¹⁴ La ndekah kenca Pentakosta tahun 33 M, lit masalah nggit mbeda-bedaken bas runggun. Sanga ibereken turang senina pangan man janda-janda, janda si nggunaken bahasa Junani la diatena. (Perbahanen Rasul-Rasul 6:1) Enda banci saja terjadi perban perasan negatip man kalak si beda bahasana. Minter idungi rasul-rasul masalah e. Ipilih kalak e pitu turang senina si dilaki si mehuli guna mbagiken pangan e alu adil. Kerina gelar dilaki e arah bahasa Junani nari, alu bage janda-janda si nggo kitik ukurna ndai banci ermeriah ukur mulihi.

15. Uga Petrus erlajar gelah ula mbeda-bedaken ise pe? (Nen gambar pemena artikel.)

¹⁵ I bas tahun 36 M, mulai murid-murid Jesus erberita man kerina jelma.  Tapi sebelumna, rusuren rasul Petrus erteman ras kalak Jahudi saja. Kenca si e, ijelasken Dibata maka kalak Kristen arusna la mbeda-bedaken, emaka erberita Petrus man Kornelius, tentera Roma. (Baca Perbahanen Rasul-Rasul 10:28, 34, 35.) Kenca si e, nggo nggit Petrus erteman bage pe man ras kalak Kristen si la Jahudi. Tapi ertahun-tahun kenca si e, bas kuta Antiokia, lanai nggit Petrus man ras kalak Kristen si la Jahudi. (Galati 2:11-14) Ipersingeti Paulus me Petrus, janah nggit Petrus robah. Ja nari siteh? Sanga itulis Petrus suratna si pertama man kalak Kristen si Jahudi bage pe man kalak Kristen si la Jahudi i Propinsi Asia, ijelaskenna uga pentingna ngkelengi kerina turang ras seninata.​—1 Petrus 1:1; 2:17.

16. Alu kai kalak Kristen abad pertama itandai?

¹⁶ Dungna, arah contoh si ibereken Jesus, iangkai rasul-rasul me uga carana ngkelengi “manusia i bas erbage bangsa nari.” (Johanes 12:32; 1 Timotius 4:10) Amin gia labo minter, iubah kalak e me carana ngenen kalak si deban. Janah, kalak Kristen abad pertama itandai perban kekelengenna man sada ras si debanna. Kira-kira bas tahun 200 M, itulis sekalak penulis, Tertullian, kai si ikataken kalak kerna kalak Kristen, “Kalak e sikeleng-kelengen,” ras “Nggit kalak e mate guna turang seninana.” Perban lit i bas kalak Kristen “sipat-sipat si mbaru,” erusaha kel kalak e la mbeda-bedaken kalak, bali bagi Dibata.​—Kolose 3:10, 11.

17. Uga carata ngambekken perasan negatip? Bereken contohna.

¹⁷ Gundari pe, labo banci mis siambekken perasanta si negatip. Ijelasken sekalak turang senina i bas Prancis uga serana akapna ngelakokenca. Nina,  “Iajarken Jahwe man bangku kai ertina kekelengen, kai ertina berbagi, ras kai ertina ngkelengi kerina kalak. Tapi tetap dengang arus kuusahaken gelah ula negatip perukurenku man kalak si deban. Emaka terus kutotoken kerna si e.” Ijelasken turang seninata arah Spanyol nari, mon-mon arus ilawanna perasan negatip man kalak tertentu. Nina, “Rusur nge berhasil aku ngelawan perasan negatip. Tapi kuteh maka arus denga nge tetap kulawan. Bujur kukataken man Jahwe perban meriah kel kuakap banci jadi anggota keluargaNa si ersada.” Kita pe, perlu siperiksa perukurenta. Lit nge perasan negatip bas dirita si arus siambekken?

18, 19. (a) Engkai maka nggit kita ngalo-ngalo kerina kalak? (b) Uga carata ngelakokenca?

¹⁸ Mejile adi terus siinget maka kita nggo erdosa ras nggo ndauh arah Dibata. (Epesus 2:12) Tapi itarik Jahwe kita gelah ndeher ku Ia alu kekelengen. (Hosea 11:4; Johanes 6:44) Kristus pe ngalo-ngalo kita. Ia me si erban kita banci jadi anggota keluarga Dibata. (Baca Roma 15:7.) Amin gia kita la sempurna, nggit Jesus ngaloken kita, emaka ula pernah segat ateta kalak si deban!

¹⁹ Perban kedungen doni enda nggo reh deherna, manusia pe pasti lebih terbagi-bagi, reh belinna perasan negatip bage pe segat ate man kalak si deban. (Galati 5:19-21; 2 Timotius 3:13) Tapi perban kita umat Jahwe, sidarami “kepentaren si rehna arah surga nari,” si erban kita tetap ersada ras erdame. (Jakup 3:17, 18) Meriah kel ukurta banci erteman ras kalak arah negara si deban, la sitokohi budayana, ras nggit kita mpelajari bahasana. Adi silakoken e, pasti kedamenta “desken lau” ras perbahanenta si adil “desken galumbang si ergalun ku tepi lawit.”​—Jesaya 48:17, 18.

20. Kai si terjadi adi sipediat kekelengen si ngubah carata rukur ras perasanta?

²⁰ Sanga turang seninata arah Australia ndai erlajar Pustaka, manjar-anjar bene me segat ate bage pe perasan negatip si nggo rurat bas ia. Kekelengen me si ngubah carana rukur ras perasanna. Ikataken turang seninata arah Kanada ndai si nggunaken bahasa Prancis maka nggo sadar ia banci kalak ersegat ate man kalak si deban perban lenga itandaina kalak e. Iangkaina ka “sipat-sipat jelma labo itentuken arah inganna tading.” Erjabu ia ras turang seninata si nggunaken bahasa Inggris! Contoh-contoh enda mbuktiken maka kekelengen banci ngambekken perasan negatip. Kekelengen mpersada kita bagi tali si la banci retap.​—Kolose 3:14.