1, 2. (a) Engkai maka kalak bas doni enda terbagi-bagi? (b) Penungkunen kai saja si ijawap kari bas artikel enda?

“KITIK-KITIK nari, perbahanen si la adil ngenca lalap kuidah,” nina turang seninata bas Eropa selatan sanga iceritakenna masa laluna. “Emaka kutulak sistem politik si lit bas negeriku, janah lalap kuikuti demo. Piga-piga tahun dekahna ngerondong aku ras teroris.” Ikataken turang seninata si lit i Afrika selatan engkai maka kejam kel ia, nina, “Sukuku kuakap si hebatna, janah aku jadi anggota partai politik. Iajari kami gelah munuh lawan kami alu tombak. Si sada suku ras kami pe, adi dukungna partai politik si deban, ibunuh kami ka nge ia.” Lit turang senina si tading bas Eropa tengah, ngataken, “Kucurigai kerina kalak, segat ateku ise pe si agama ras bangsana beda ras aku.”

² Gundari, reh teremna kalak si bagi telu turang seninata ndai. Melala partai politik si nggunaken kekerasen gelah banci menang. Biasa akap kalak ersoal kerna politik. I bas melala negara, kalak pendatang ianiaya. Bagi si  nggo ikataken bas Pustaka, kalak “la nggit arih-arih” i bas wari-wari pendungi. (2 Timotius 3:1, 3) Uga carana gelah kalak Kristen tetap ersada i bas doni si kalakna terbagi-bagi enda? Banci kita erlajar arah Jesus. Kalak i bas jamanna terbagi-bagi perban politik. Bas artikel e, sijawap kari telu penungkunen enda: Engkai Jesus la nggit ikut campur bas politik? Kai si ilakoken Jesus si ncidahken maka umat Dibata la banci ikut campur bas masalah politik? Janah uga cara Jesus ngajar kita gelah ula pernah nggunaken kekerasen?

3, 4. (a) Bas jaman Jesus, kai si iarapken kalak Jahudi? (b) Kai pengaruh arapen kalak Jahudi e ku murid-murid Jesus?

³ Enterem kalak Jahudi si ijumpai Jesus sanga erberita merhat kel bebas arah kalak Roma. Kelompok Zealot eme kelompok politik Jahudi si fanatik kel. Iusahakenna kel gelah reh merhatna kalak Jahudi bebas arah kalak Roma nari. Enterem anggota Zealot si ngikutken Judas, kalak Galilea, si nggeluh sejaman ras Jesus. Judas eme mesias palsu, si nipu nterem jelma. Ikataken Yosefus, sejarawan Jahudi, maka iusahaken Judas kel kalak Jahudi mberontak ngelawan Roma, janah igelarina kalak si nggit nggalari pajak ku Roma “percikcik.” Dungna ibunuh kalak Roma me Judas. (Perbahanen Rasul-Rasul 5:37) Tapi nterem anggota Zealot reh kejamna gelah datna tujunna.

⁴ Teremen kalak Jahudi la sabar nimai kerehen Mesias. Iakap kalak e Mesias me si mbebasken ia arah Roma ras erban Israel mulihken bagi si mbarenda. (Lukas 2:38; 3:15) Enterem si tek maka kerajan Mesias e lit i doni, eme i Israel. Alu bage, kerina kalak Jahudi si tading i negara si deban banci mulihken ku Israel. Malahen Johanes Peridiken pe pernah nungkun man Jesus, “Kam kin kalak si nandangi reh e, ntah itimai kami denga kalak si deban?” (Matius 11:2, 3) Banci jadi tersungkun-sungkun Johanes, ise nge si mbebasken kalak Jahudi. Kenca si e, lit dua murid Jesus si jumpa ras Jesus kenca ia ipekeke sanga kalak e i perdalanen ku Emaus. Ngarap kel kalak e Jesus si mbebasken Jerusalem. (Baca Lukas 24:21.) La ndekah kenca si e, nungkun rasul-rasul man Jesus, “O Tuan, gundari kin atendu majekken kerajan Israel mulihi?”​—Perbahanen Rasul-Rasul 1:6.

5. (a) Engkai maka merhat kel kalak Galilea Jesus jadi rajana? (b) Kai nina Jesus man kalak e?

⁵ Iarapken kalak Jahudi, Mesias banci ndungi masalah kalak e. Banci jadi e me alasenna maka merhat kel kalak Galilea erban Jesus jadi raja. Pasti iakap kalak e Jesus me peminpin si hebatna, sebap beluh kel Jesus ngerana, si sakit sehat banna, banci ka isediakenna pangan man kalak si melihe. Luar biasa kel akap kalak kenca ibere Jesus 5.000 dilaki man. Iteh Jesus kai si nandangi ilakoken kalak e. Ikataken bas Pustaka, “Perban iteh Jesus maka ipaksa kalak e atena ia jadi raja, emaka lawes ka Jesus sisada ku deleng.” (Johanes 6:10-15) Paginna, banci jadi lanai ipaksa kalak kel Jesus jadi raja. Emaka ijelasken Jesus  man kalak e, tujunna labo mereken kebutuhen jasmani tapi kebutuhen rohani, eme ngajarken Kerajan Dibata. Nina, “Ula erdahin guna pangan si banci mali. Erdahinlah guna pangan si ndekah tahan janah mereken kegeluhen si rasa lalap.”​—Johanes 6:25-27.

6. Kai si ilakoken Jesus guna mbuktiken maka la ia nggit ikut campur bas politik? (Nen gambar pemena artikel.)

⁶ Kematen Jesus nggo ndeher, tapi iteh Jesus maka piga-piga pengikutna tek Jesus me si merentah jadi raja i Jerusalem. Iceritaken Jesus man kalak e perumpaman kerna mina gelah iangkai kalak e maka Jesus labo jadi raja i Jerusalem. Perumpaman e kerna “sekalak bangsawan,” eme Jesus, si lawes ndauh janah ndekah kel maka ia mulih. (Lukas 19:11-13, 15) Ikataken Jesus ka alu jelas man pejabat Roma, Pontius Pilatus, maka labo ia nggit ikut campur bas urusen politik. Nungkun Pilatus man Jesus, “Kam kin Raja Kalak Jahudi?” (Johanes 18:33) Banci jadi mbiar Pilatus iiahken Jesus kalak Jahudi mberontak ngelawan Roma. Tapi nina Jesus, “Kerajanku labo bagin i bas doni enda nari.” (Johanes 18:36) La nggit Jesus ikut campur bas urusen politik, perban Kerajanna lit bas surga. Ikatakenna, dahinna ku doni eme ‘mereken kesaksin kerna kebenaren.’​—Baca Johanes 18:37.

7. La kita nggit ndukung partai politik siapai pe, bas pusuhta pe lang. Engkai mon-mon enda labo gampang?

⁷ Iteh Jesus kai tugasna. Adi siteh kai tugasta, la kita nggit ndukung partai politik siapai pe, bas pusuhta pe lang. Memang mon-mon enda labo gampang. Lit pertua keliling ngataken maka kalak bas daerahna nggo reh rusurna nuntut perubahen, bangga kel kalak e man negarana janah tek ia, adi kalak si ipilihna si jadi peminpin pasti  reh ulina kegeluhenna. Nina ka, “Meriah kel kuakap, perban turang senina tetap ersada alu mberitaken berita si meriah kerna Kerajan. Itimai kalak e waktuna isasapken Dibata perbahanen si la adil ras kerina permasalahen kalak e.”

8. Kai perbahanen si la adil si ialami kalak Jahudi bas jaman Jesus?

⁸ Enterem dungna kalak tertarik ku politik perban perbahanen si la adil si rusur iidahna. Bas jaman Jesus, masalah pajak me si erban kalak ikut campur ku politik. Mberontak Judas, kalak Galilea, ngelawan Roma perban iarusken kalak Roma kalak Jahudi nggalar pajak. Janah melala kel pajak si man galaren, misalna, pajak taneh, rumah, ras barang-barang si debanna. Pemungut pajak pe korupsi, em si erban masalah e reh beratna. Mon-mon isogok kalak e pejabat pemerentah gelah banci dat jabaten, alu bage melala sen idatna. Kepala pemungut pajak bas Jeriho, eme Sakeus, bayak perban galang kel banna pajak si man galaren.​—Lukas 19:2, 8.

9, 10. (a) Kai si ilakoken musuh-musuh Jesus gelah banci ijebakna Jesus? (b) Pelajaren kai si banci sidat arah jawapen Jesus? (Nen gambar pemena artikel.)

⁹ Ijebak musuh-musuh Jesus atena Jesus alu nungkun kerna masalah pajak. Isungkun kalak e Jesus kerna “pajak kepala,” eme pajak si arus igalari kalak Jahudi, si buena sada dinar. (Baca Matius 22:16-18.) Sitik pe la meriah ukur kalak Jahudi nggalarisa perban enda ngingetken kalak e maka kalak Roma me si sangana ngkuasai ia. “Pengikut partai Herodes,” eme kalak si ndukung Herodes, ngarap gelah ikataken Jesus kalak e la perlu nggalar pajak, alu bage banci ikataken kalak e maka Jesus eme musuh Kerajan Roma. Tapi adi ikataken Jesus arus kalak e nggalar pajak, banci jadi lanai lit pengikutna. Jadi, kai nge si ikataken Jesus?

¹⁰ Iusahaken Jesus kel tetap netral bas masalah enda. Nina, “Bereken man Kaisar kai si memang jadi bagin Kaisar, tapi man Dibata kai si memang jadi bagin Dibata.” (Matius 22:21) Iteh Jesus melala kel pemungut pajak si korupsi, tapi labo e si iperdiatekenna. Si iutamaken Jesus eme Kerajan Dibata, si banci ndungi kerina masalah manusia. Jesus jadi contoh si mejile man banta. Tetaplah kita netral bas masalah politik, amin gia sada pihak tempa-tempa benar ras adil janah pihak si deban tempa-tempa la mehuli ras la adil. Kalak Kristen arus ngutamaken Kerajan Dibata ras kai si benar menurut Dibata. Emaka labo perlu sipeduliken pemerentah e adil ntah pe lang.​—Matius 6:33.

11. Uga carata nampati kalak si deban ndatken keadilen situhu-tuhu?

¹¹ Enterem Saksi Jahwe si mbarenda ikut campur bas politik, gundari lanai. Misalna, lit sada turang seninata si diberu i Inggris si ngikuti pelajaren politik bas kampusna, sanga si e lenga ia erlajar Pustaka. Dungna melala atena si ituntutna arah pemerentah. Nina, “Erjuang kel aku gelah lit keadilen man kalak mbiring, perban melala kel perbahanen si la adil si erban kami  menderita. Memang menang aku sanga kami erdebat, tapi kenca si e stres dengang aku. Sanga si e, lenga kuteh maka perasan segat ate man suku si deban arus iambekken arah pusuh manusia. Tapi kenca aku erlajar Pustaka, sadar aku maka arus kumulai arah pusuhku nari.” Turang seninata si diberu si mbentar kulitna me si nampati ia ngubah carana rukur. Nina ka, “Gundari aku nggo jadi perintis biasa bas runggun bahasa isyarat, janah kuusahaken njumpai kerina kalak.”

12. Kai “ragi” si imaksudken Jesus gelah ula ialoken murid-muridna?

¹² Bas jaman Jesus, peminpin agama rusur ndukung politik. Misalna, ikataken buku Daily Life in Palestine at the Time of Christ maka adi masuk kalak Jahudi ku sada agama, seri saja ia masuk ku partai politik. Emaka nina Jesus man murid-muridna, “Teruslah buka mata kena. Hati-hatilah nandangi ragi kalak Parisi ras ragi Herodes.” (Markus 8:15) Sanga ikataken Jesus kerna Herodes, banci jadi si imaksudkenna eme pengikut Herodes. Kelompok si deban eme Parisi, atena bebas min kalak Jahudi arah Kerajan Roma. Bas buku Matius pe ipersingeti Jesus murid-muridna gelah ula idukungna kelompok Saduki. Ate kelompok Saduki, tetap min Roma si erkuasa, perban kalak e banci dat jabaten bas pemerentahen. Ipersingeti Jesus murid-muridna gelah la ngaloken “ragi” ntah pe pengajaren arah telu kelompok enda. (Matius 16:6, 12) Minter ibere Jesus persinget enda kenca iban jelma si nterem atena ia jadi raja.

13, 14. (a) Engkai maka politik ras agama rusur erban masalah bage pe perbahanen si la adil? (b) Engkai maka salah nggunaken kekerasen amin gia sangana siadapi perbahanen si la adil? (Nen gambar pemena artikel.)

¹³ Sanga agama ikut campur bas masalah politik, enda rusur erban masalah. Iajarken Jesus murid-muridna gelah tetap netral. Enda me salah sada alasenna maka ibunuh imam-imam kepala ras kelompok Parisi atena Jesus. Mbiar kalak e itadingken jelma si nterem perban tek man Jesus. Sebap adi bage lanai lit umatna janah lanai ia erkuasa bas politik. Nina kalak e, “Adi sipediat ia terus bagenda, kerina kari kalak erkiniteken man bana. Dungna reh me kari kalak Roma, irampasna me rumah pertotonta ras bangsata.” (Johanes 11:48) Emaka iaturken Imam si Mbelin Kayapas gelah Jesus ibunuh.​—Johanes 11:49-53; 18:14.

¹⁴ Bas berngi wari, isuruh Kayapas tentera nangkap Jesus. Iteh Jesus rencana e. Emaka bas berngi terakhir ia man ras rasul-rasulna, isuruhna kalak e muat pedang. Dua pedang saja bias guna ngajarken pelajaren si penting. (Lukas 22:36-38) Bas berngi e, nterem  kalak reh nangkap Jesus, emaka merawa kel Petrus ngenen perbahanen si la adil e. Ibuatna pedang janah iserangna sekalak dilaki si lit i je. (Johanes 18:10) Tapi nina Jesus man Petrus, “Masukken pedangndu ena ku inganna, sebap kerina si make pedang mate pagi iban pedang.” (Matius 26:52, 53) Pelajaren penting kai si iajarken Jesus man murid-muridna? Gelah ula kalak e jadi bagin doni. E me si nggo itotoken Jesus bas berngi e. (Baca Johanes 17:16.) Dibata ngenca si lit hakNa nasapken kerina si la adil.

15, 16. (a) Uga Pustaka nampati kalak Kristen berubah? (b) Kai perbedan si idah Jahwe bas doni enda?

¹⁵ Turang senina i Eropa selatan si nggo isingetken bas awal ndai, seri pelajaren si idatna. Nina, “Nggo kuidah kekerasen labo ngubah perbahanen si la adil. Rusuren kuidah kalak si nggunaken kekerasen, hasilna kematen. Nterem kalak merawa atena janah la bahagia. Tapi meriah kuakap perban nggo kuteh arah Pustaka maka Dibata ngenca banci ndungi kerina perbahanen si la adil bas doni enda. Nggo 25 tahun kupeseh berita enda man kalak si deban.” Turang senina bas Afrika selatan si nggo isingetken bas awal ndai pe igantina tombakna jadi “pedang si ibereken kesah si badia,” eme Kata Dibata. (Epesus 6:17) Gundari ia mberitaken berita kedamen man kerina kalak, la soal suku kai pe ia. Janah kenca turang senina i Eropa tengah jadi Saksi-Saksi Jahwe, sereh ia man turang senina arah suku si mbarenda segat atena. Teluna kalak e nggo berubah perban atena ngusih Kristus.

¹⁶ Perlu kel erban perubahen bagi kalak e! Ikataken Pustaka manusia la pernah dame bali bagi galumbang laut si la pernah ngadi. (Jesaya 17:12; 57:20, 21; Ketangkasen 13:1) Masalah politik erban kalak emosi, terbagi-bagi, si dungna erban kalak e ngelakoken kekerasen. Tapi kita erdame ras ersada. Sanga idah Jahwe kalak bas doni enda terbagi-bagi, pasti meriah kel ukurNa ngidah kita umatNa ersada.​—Baca Sepanya 3:17.

17. (a) Kai telu cara si banci silakoken gelah kita banci ersada? (b) Kai si man pelajarenta bas artikel seterusna?

¹⁷ Bas artikel enda nggo sipelajari telu cara si banci silakoken gelah kita ersada: (1) Tek kita Kerajan Dibata me si ndungi kerina perbahanen si la adil, (2) la kita nggit ikut campur bas masalah politik, ras (3) la kita nggit nggunaken kekerasen. Tapi lit si banci erban kita lanai ersada eme perasan negatip. Bas artikel seterusna sipelajari kari uga carata ngelawan perasan enda, bagi si ilakoken kalak Kristen bas abad pertama.