1. Kai si erbanca hebaten kita asangken binatang?

LIT si istimewa si ibere Jahwe man manusia, eme pusuh peraten. Enda me si erbanca hebaten kita asangken binatang. Ja nari siteh lit nge pusuh peraten Adam ras Hawa? Kenca kalak e mberontak man Dibata, cebuni ia. Terganggu pusuh peratenna.

2. Engkai maka pusuh peraten ipeseri bagi kompas? (Nen gambar pemena artikel.)

² Pusuh peraten eme perasan benar ras salah si rehna arah pusuhta nari si banci negu-negu kita. Kalak si pusuh peratenna la ilatih alu mehuli, seri bagi kapal si ceda kompasna. Angin ras gelombang laut banci mabai kapal e ku arah si salah. Tapi, adi kompasna mejile denga, seh me kapal e ku tujunna. Bage ka pe, adi silatih pusuh peratenta alu mehuli, enda banci negu-negu kegeluhenta.

3. Kai si terjadi adi la silatih pusuh peratenta alu mehuli?

³ Adi la silatih pusuh peratenta alu mehuli, lanai banci  ipersingetina kita kerna kai si salah. (1 Timotius 4:1, 2) Janah ibanna ka kita tek maka ‘kejahaten e mehuli.’ (Jesaya 5:20) Ikataken Jesus man pengikutna, “Seh me pagi waktuna maka ise pe si munuh kena erpengakap nggo iberekenna pelayanen si badia man Dibata.” (Johanes 16:2) Bage me pengakap kalak si munuh Stepanus. (Perbahanen Rasul-Rasul 6:8, 12; 7:54-60) Mbarenda nari, nterem kalak si eragama ngelakoken kejahaten, bagi munuh, janah ikatakenna kai si ilakokenna e guna Dibata. Tapi situhuna, si ilakokenna e ngelawan Dibata. (Keluaren 20:13) Jelas me, pusuh peratenna la negu-negu ia alu mehuli!

4. Uga carana mastiken pusuh peratenta negu-negu kita alu mehuli?

⁴ Uga carana mastiken pusuh peratenta negu-negu kita alu mehuli? Hukum ras patoken si lit bas Pustaka “erguna i bas ngajar, ncidahken kesalahen, pekena kerinana, janah mereken disiplin guna ngelakoken kai si benar.” (2 Timotius 3:16) Arus kita ratur mpelajari Pustaka, ngukurisa alu mbages, ras ndalankenca. Alu bage, reh dekahna perukurenta bali bagi perukuren Jahwe. Emaka, banci sipastiken pusuh peratenta negu-negu kita alu mehuli. Mari sibahas uga carata nggunaken hukum ras patoken Jahwe i bas ngelatih pusuh peratenta.

5, 6. Uga hukum Dibata nampati kita?

⁵ Gelah erguna hukum Dibata man banta, labo bias mbaca ras meteh isina saja. Perlu sikelengi ras siergai hukum e. Nina Pustaka “Cigalah atendu man kejahaten, ngena atendu si benar.” (Amos 5:15) Tapi uga carana? Arus sipelajari uga carana mpeseri cara rukurta ras cara rukur Jahwe. Ukuri enda. Bayangken mesera akapndu tunduh, emaka suruh dokter kam man pangan si sehat, olahraga, ras erban perubahen si deban bas geluhndu. Ikutkenndu nasehatna e, janah lit hasilna! Uga perasanndu kerna nasehat dokter e?

⁶ Penciptata pe, nggo mereken undang-undang gelah geluhta reh ulina janah ngelindungi kita gelah ula sinanami akibat si la mehuli perban dosa. Contohna, iajari Pustaka kita gelah ula kita erbual, nangko, ngelakoken perbahanen seks si salah, ngelakoken kejahaten, ras kai pe si lit hubungenna ras malekat jahat. (Baca Kuan-kuanen 6:16-19; Ketangkasen 21:8) Sanga sigejapken manpaat perban patuh man Jahwe, reh kelengna ateta Ia bage pe hukumNa.

7. Uga contoh-contoh bas Pustaka banci nampati kita?

⁷ Labo perlu sinanami lebe kai akibatna ngelanggar hukum Dibata gelah siteh kai si benar ras kai si salah. Banci kita erlajar arah kesalahen kalak si icatat bas Pustaka. Nina Kuan-kuanen 1:5, “Pengajaren enda banci nambahi pemeteh kalak pentar.” Nasehat enda rehna i bas Dibata nari, janah e me nasehat si mehulina. Contohna, ukuri uga serana kap Daud perban la patuh man Jahwe janah ngelakoken seks si  salah ras Batseba. (2 Samuel 12:7-14) Sanga ibacandu kisah enda, sungkuni bandu, ‘Kai si aturna ilakoken Daud gelah la ia kena masalah e? Kai si kulakoken bicara aku arah Daud e? Adi lit godan guna ngelakoken seks si salah, kuusih nge Daud ntah Jusup?’ (Kejadin 39:11-15) Adi siukuri manjar-anjar kai akibatna ngelanggar perentah Dibata, pasti reh ‘cigana ateta man kejahaten.’

8, 9. (a) Pusuh peratenta banci nampati kita ngelakoken kai? (b) Kai pengaruh patoken Jahwe ku pusuh peratenta?

⁸ La kita nggit ngelakoken kai pe si segat ate Jahwe. Tapi uga adi la lit hukum Pustaka si jelas si banci nampati kita erban keputusen? Ja nari banci siteh kai si ngena ate Jahwe? Adi sipediat pusuh peratenta ilatih Pustaka, banci siban keputusen si mehuli.

⁹ Perban keleng ate Jahwe kita, iberekenNa patoken-patoken si banci negu-negu pusuh peratenta. Nina, “Aku kap [Jahwe] Dibatandu; Aku ngajari kam guna kiniulinndu, janah naruhken kam ku bas dalan si man dalanenndu.” (Jesaya 48:17, 18) Sanga siukuri alu mbages patoken Pustaka gelah kena ku pusuhta, silatih me pusuh peratenta. Enda banci nampati kita erban keputusen si mehuli.

10. Kai patoken e, janah uga Jesus nggunakenca i bas pengajarenna?

¹⁰ Patoken nampati kita erban keputusen si mehuli. Adi siteh patoken-patoken Jahwe, siteh uga caraNa rukur janah engkai iberekenNa banta hukum-hukum. Igunaken Jesus patoken i bas ngajari murid-muridna maka perukuren ras perbahanenta lit akibatna. Contohna, iajarina maka adi kita merawa, e banci dungna erban kita ngelakoken kejahaten, janah adi lit perukurenta kerna seks si salah dungna e banci silakoken. (Matius 5:21, 22, 27, 28) Adi sipediat patoken Jahwe negu-negu kita, pusuh peratenta banci erdahin alu mehuli janah banci siban pilihen si mereken kemulian man Dibata.​—1 Korinti 10:31.

11. Engkai maka la banci seri kerina pusuh peratenta?

¹¹ Amin gia pusuh peraten kalak Kristen nggo ilatih Pustaka, tapi labo lalap seri pendapatna. Misalna kerna banci ntah lang minem alkohol. La lit ikataken bas Pustaka salah minem alkohol, tapi ipersingetina kita gelah ula melalasa minem ntah pe mabuk. (Kuan-kuanen 20:1; 1 Timotius 3:8) Misalna, lit kalak Kristen si sitik bo ngenca inemna alkohol, tapi la nge perlu iukurina kalak sanga ia minem e? Perlu. Amin gia la terganggu pusuh peratenna minem alkohol, tapi perlu iukurina pusuh peraten kalak si deban.

12. Uga Roma 14:21 nampati kita ngergai pusuh peraten kalak si deban?

¹² Ikataken Paulus maka perlu siergai pusuh peraten kalak si deban sanga itulisna, “Padin la padah man daging ntah pe minem anggur ntah pe ngelakoken kai pe si erban turang senina kena tertuktuk.” (Roma 14:21) Emaka, amin gia lit hakta minem alkohol, nggit kita ngkorbanken hakta e adi siteh terganggu pusuh peraten turang seninata sanga idahna kita minem. Misalna, sanga lenga erlajar Pustaka, lit sekalak turang seninata si candu minem alkohol, janah gundari sitik pe lanai ia nggit minemsa. Pasti la kita nggit ngelakoken kai pe si erban ia candu mulihi. (1 Korinti 6:9, 10) Adi siundang ia ku rumahta, sisuruh nge ia minem amin gia nggo itulakna? Pasti lang!

13. Uga cara Timotius ngergai pusuh peraten kalak si deban gelah ialo-alo kalak e berita si meriah?

¹³ Perban iteh Timotius sunat penting man kalak Jahudi, nggit ia isunat amin gia mesui iakapna, gelah sanga ia erberita man kalak e, nggit kalak e ngalo-ngalosa. Timotius bali bagi Paulus, la atena erban kitik ukur ise pe. (Perbahanen Rasul-Rasul 16:3; 1 Korinti 9:19-23) Nggit nge kam erkorban guna nampati kalak si deban?

14, 15. (a) Uga carana jadi kalak si dewasa? (b) Uga perbahanen kalak Kristen si paguh kinitekenna man kalak si deban?

¹⁴ Kerina kita arus nggit mpelajari “ajaren dasar kerna Kristus” janah “siusahaken gelah jadi dewasa.” (Heber 6:1) Labo banci mis kita jadi kalak si dewasa ntah pe paguh kinitekenta amin gia nggo ertahun-tahun kita bas kebenaren. Perlu siusahaken gelah banci paguh kinitekenta. Arus terus sipelajari janah siangkai Kata Dibata e. Emaka arus sibaca Pustaka tiap wari. (Masmur 1:1-3) Adi ibacandu Pustaka tiap wari, pasti lebih iangkaindu hukum ras patoken Jahwe.

¹⁵ Hukum kai si pentingna man kalak Kristen? Hukum kekelengen. Ikataken Jesus man murid-muridna, “Adi kena sikeleng-kelengen, kerina kalak meteh maka kena me murid-muridku.” (Johanes 13:35) Kekelengen lit kaitenna ras “undang-undang.” (Jakup 2:8; Roma 13:10) Pasti tek kita, kekelengen e seh kel pentingna, sebap nina Pustaka, ”Dibata kekelengen kap.” (1 Johanes 4:8) Bas Dibata, kekelengen e labo terjeng perasan saja. IbuktikenNa kekelengenNa arah perbahanenNa. Itulis Johanes, “Bagenda me cara Dibata mbuktiken kekelengenNa man banta: IsuruhNa AnakNa si tonggal ku doni enda, gelah banci sidatken kegeluhen erkelangken ia.” (1 Johanes 4:9) Adi sikelengi Jahwe, Jesus, turang seninata, ras kalak si deban, enda mbuktiken paguh kinitekenta.​—Matius 22:37-39.

16. Engkai maka adi paguh kinitekenta, pasti lebih siergai patoken-patoken Dibata?

¹⁶ Adi paguh kinitekenta, pasti lebih  siergai patoken-patoken e. Hukum biasana ipake bas keadan tertentu saja, tapi patoken ipake bas erbage-bage keadan. Contohna, anak-anak lenga bo iangkaina maka seh kel bahayana erteman ras kalak jahat, emaka arus iban orang tuana peraturen guna ngelindungi ia. (1 Korinti 15:33) Sanga anak e nggo dewasa, nggo tehna engkai maka peraturen e iban. Patoken e me si nampati ia milih teman si mehuli. (Baca 1 Korinti 13:11; 14:20.) Adi reh buena siangkai patoken Pustaka, reh ulina me pusuh peratenta. Reh jelasna siteh kai ate Dibata silakoken bas kerina situasi.

17. Engkai banci sikataken maka nggo isikapken Jahwe kerinana man banta gelah banci siban keputusen si mehuli?

¹⁷ Nggo isikapken Jahwe kerinana man banta gelah banci siban keputusen si erban meriah ukurNa. Bas Pustaka, lit hukum ras patoken si banci nampati kita gelah “tuhu-tuhu ngasup janah ilengkapi guna ngelakoken kerina perbahanen si mehuli.” (2 Timotius 3:16, 17) Patoken Pustaka nampati kita ngangkai cara rukur Jahwe. Tapi, gelah banci siangkai, perlu kita erusaha. (Epesus 5:17) Guna nampati kita, lit Indeks Publikasi Menara Pengawal, Panduan Riset untuk Saksi-Saksi Yehuwa, Watchtower Library, Perpustakan Online Sora Ermomo, ras JW Library. Pasti melala sidat manpaat adi sigunaken kerina enda bas pelajaren pribadi bage pe kebaktin jabuta.

18. Kai manpaatna adi sigunaken hukum ras patoken Jahwe bas geluhta?

¹⁸ Reh ulina kegeluhenta adi sidalanken hukum ras patoken Jahwe! Nina Masmur 119:97-100, “Lanai tanggung keleng ateku man undang-undangNdu, [kuukuri] i bas ukurku gedang-gedang nu wari. Kerina perentahNdu tetap kuinget katawari pe, e maka pentaren aku asangken imbang-imbangku. Pengertinku ngelebihi pengertin guru si ngajari aku, erkiteken [kuukuri] perentahNdu i bas ukurku. Belinen kepentarenku asangken orang-orang tua, erkiteken kuikutken kerina perentahNdu.” Adi sisikapken waktuta guna ngukuri alu mbages hukum ras patoken Dibata, pasti perbahanenta reh ulina. Janah adi sigunaken hukum ras patokenNa i bas ngelatih pusuh peratenta, banci “seh kita ku tingkat kedewasan Kristus.”​—Epesus 4:13.