MESERA kel nggejapken kedamen gundari, perban melala kel masalah bas doni enda. Amin gia dame siakap, e banci mis bene. Kai si ikataken Pustaka si banci nampati kita ndatken kedamen situhu-tuhu si tahan rasa lalap? Janah uga carata nampati kalak si deban ndatkenca?

Banci sigejapken kedamen situhu-tuhu adi aman janah terlindungi siakap kita. Perlu kita teman si mehuli, janah si pentingna, perlu kita ndeher ku Dibata. Uga carana?

Pedah-pedah Jahwe erguna kel man banta. Adi silakoken pedah-pedahNa e, enda mbuktiken tek kita man Jahwe janah erdame ateta ras Ia. (Jeremia 17:7, 8; Jakup 2:22, 23) Alu bage Jahwe pe nggit ndeher ras kita janah dame banNa pikirenta. Nina Jesaya 32:17, “Erkiteken kerina kalak ngelakoken si bujur e maka lit kedamen ras ketenengen seh rasa lalap.” Banci sigejapken kedamen situhu-tuhu adi patuh kita man Jahwe.​—Jesaya 48:18, 19.

Ibereken Jahwe ka penampat gelah kedamenta tahan rasa lalap. Penampat e eme kesah si badia.​—Perbahanen Rasul-Rasul 9:31.

Ikataken rasul Paulus, kedamen termasuk “sipat-sipat si ihasilken kesah si badia.” (Galati 5:22, 23) Perban kedamen hasil kesah si badia, emaka adi dame ateta arus lit kesah si badia bas kita. Uga carana?

Pertama, arus kita ratur mbaca Pustaka. (Masmur 1:2, 3) Adi tuhu-tuhu siukuri kai si sangana sibaca, pasti isampati kesah si badia kita gelah siangkai perukuren Jahwe.  Contohna, nggo sipelajari uga cara Jahwe njaga perdamen janah engkai maka penting kel perdamen e man baNa. Emaka, adi silakoken kai si nggo sipelajari arah Pustaka, reh damena me geluhta.​—Kuan-kuanen 3:1, 2.

Peduaken, arus kita ertoto mindo kesah si badia man Dibata. (Lukas 11:13) Enggo erjanji Jahwe man kalak si mindo penampatNa, “Kedamen i bas Dibata nari si banci naluken perukuren kai pe, ngarak-ngarak pusuh ras perukuren kena erkelangken Kristus Jesus.” (Pilipi 4:6, 7) Adi tetap kita ndeher ras Jahwe janah sipindo kesah si badia, dame me banNa pikirenta.​—Roma 15:13.

Enterem kalak nggo berubah kegeluhenna perban ipelajarina Pustaka, gundari banci kalak e erdame ras Jahwe, pikirenna pe dame, janah banci ka ia erdame ras kalak si deban. Uga maka banci kalak e berubah?

Sanga lenga erlajar Pustaka, piga-piga turang seninata kalakna gampang merawa janah kasar. Tapi iusahaken kalak e kel gelah banci berubah, emaka gundari kalak e nggo reh ulina, reh sabarna, janah banci erdame ras kalak si deban. * (Nen keterangen tambahen.) (Kuan-kuanen 29:22) Perdiateken uga David ras Rachel erban perubahen bas geluhna.

Sanga lenga erlajar Pustaka, kasar David man keluargana janah ipandangina kerina kalak. Tapi sadar ia maka arus ia berubah. Kai si ilakokenna? Nina, “Kulakoken kai si kupelajari arah Pustaka, dungna kuergai keluargaku janah keluargaku pe ngergai aku.”

Ingan tading Rachel mpengaruhi sipat-sipatna.  Nina, “Gundari pe arus denga kuusahaken gelah ula gampang merawa, perban aku ipebelin bas keluarga si kalakna gampang kel merawa.” Kai si nampati Rachel? Nina, “Terus aku ertoto gelah isampati Jahwe.”

Selain David ras Rachel, nterem denga kalak si nggo nggejapken kedamen perban ngelakoken kai si ipelajarina arah Pustaka janah mindo kesah si badia. Amin gia nterem kalak bas doni enda gampang merawa, tapi pikirenta banci tetap dame. Alu bage reh gampangna siakap erteman ras keluargata bage pe ras turang senina bas runggun. Tapi isuruh Jahwe kita gelah “dame ras kerina kalak.” (Roma 12:18) Mungkin nge e? Janah engkai maka arus siusahaken erdame ras kerina kalak?

Sanga kita erberita, berita kerna kedamen si rehna arah Kerajan Dibata me siberitaken. (Jesaya 9:6, 7; Matius 24:14) Enterem kalak meriah akapna megiken berita e. Dungna, lanai kalak e putus asa ntah pe gampang merawa perban kai si terjadi bas doni enda. Gundari nggo lit arapen kalak e kerna masa depan janah nggit kalak e “erbahan perdamen.”​—Masmur 34:15.

Memang, tangtangna sitik ngenca kalak si nggit megiken beritata. (Johanes 3:19) Tapi, uga pe tanggapen kalak, ibere Dibata kita kesah si badia. Enda erban kita tetap erdame janah siergai kerina kalak sanga erberita. Alu bage, siikutken me pedah Jesus enda, “Adi masuk kena ku sada rumah katakenlah, ‘Mejuah-juah!’ Adi kena ialo-alo bas rumah e, reh me kedamen i je, tapi adi la kena ialo-alona, mulihken man kena kedamen e.” (Matius 10:11-13) Adi silakoken enda, uga pe tanggapen kalak ntah kai pe si ikatakenna, banci kita tetap erdame. Ingetlah, banci jadi lit denga ka nge pagi kesempatenta nampati kalak e. 

Banci ka kita erdame adi sopan kita ngerana ras pejabat pemerentah amin gia ilarang kalak e pendahinta. Contohna, bas salah sada negara i Afrika, ilarang pemerentah Bale Kerajan ibangun i je. Iteh turang seninata masalah enda arus idungi alu dame. Iutus kalak e sekalak turang senina si pernah jadi utusen injil bas negara e guna njumpai duta besar Afrika i London, Inggris, guna ngataken maka dahin Saksi Jahwe e maba dame.

Nina turang senina e, “Seh kenca aku i meja resepsionis ntah pe si ngalo-ngalo tamu, arah uis si ipakena kuteh suku kai ia, janah pernah kupelajari bahasana. Kukataken mejuah-juah i bas bahasana. Sengget kel ia, emaka sungkunna aku, ‘Erkai ndai atendu ku jenda?’ Alu sopan kukataken, ateku njumpai duta besar. Emaka iteleponna duta besar e, kenca e reh duta besar e njumpai aku janah ialo-alona aku alu bahasa Inggris. Sanga kujelasken pendahin Saksi-Saksi Jahwe maba dame, tutus kel atena mbegiken aku.”

Kenca ibegiken duta besar e turang seninata ndai, nggo lebih iangkaina pendahinta janah lanai negatip tanggapenna. La ndekah kenca si e, ibere pemerentah me ijin mbangun Bale Kerajan man Saksi-Saksi Jahwe. Meriah kel ukur turang seninata! Jelas me, adi siergai kalak si deban, banci kita erdame.

Gundari, umat Jahwe lit bas pardis rohani, perban kalak e ngelayani Jahwe alu dame. Gelah umat Dibata lebih dame, arus lit lebe kedamen bas geluhta. Alu bage, pasti meriah ukur Jahwe ngidah kita. Janah bas doni si mbaru, iberekenNa me pagi kedamen si tahan rasa lalap.​—2 Petrus 3:13, 14.