1. Engkai maka piga-piga kalak patut ihamati, janah kai si man pelajarenta bas artikel enda?

UGA caranta nghamati kalak si deban? Siperdiateken ia alu khusus janah sicidahken pengerganta. Biasana, kalak si ihamati eme kalak si lit jasana ntah pe si penting jabatenna. I bas artikel enda, sipelajari kari ise si arus sihamati janah ngkai.

2, 3. (a) Engkai maka Jahwe si khususna patut ihamati? (Nehen gambar pemena artikel.) (b) Ise Anak Biri-biri si ituriken bas Ketangkasen 5:13, janah ngkai maka arus sihamati ia?

² Nina Ketangkasen 5:13, ”Ia si kundul i kursi kinirajan e” ras ”Anak Biri-biri e” patut ihamati. ”Ia si kundul i kursi kinirajan e” eme Jahwe. Bas Ketangkasen bindu 4, ituriken makhluk-makhluk si i surga man banta sada alasen ngkai maka Jahwe, ”si nggeluh rasa lalap seh rasa lalap”, patut ndatken kinihamaten. Nina kalak e, ”O Jahwe Dibata kami Kam me si metunggung ngaloken kemulian,  kehamaten ras kuasa. Sabap Kam njadikenca kerina si nasa lit, janah erkiteken peratenNdu nge maka kerina e lit dingen nggeluh.”—Ketangkasen 4:9-11.

³ ”Anak Biri-biri e” si ituriken bas Ketangkasen 5:13 eme Jesus Kristus. Janari sieteh? Paksa i doni, ilebuh ia ”Anak Biri-biri Dibata, si ngangkut dosa doni enda”. (Johanes 1:29) La lit raja si deban si nggit mate guna nebus rayatna. Tentu saja enda alasen si tepat guna nghamati ia. Jesus patut ihamati erkiteken ia ”Raja i bas kerina raja, dingen Tuhan i bas kerina tuan”. (1 Timotius 6:14-16) Banci jadi seri perasanndu ras makhluk-makhluk si i surga si ngendeken, ”Anak Biri-biri si enggo igeleh e metunggung ngaloken kuasa, kinibayaken, kepentaren, gegeh, kehamaten, kemulian ras puji-pujin.”—Ketangkasen 5:12.

4. Engkai maka bijaksana nghamati Jahwe ras Jesus?

⁴ Johanes 5:22, 23 ngataken maka Jahwe me si nangkuhken Jesus jadi hakim kerina manusia. Enda me alasen si pentingna ngkai maka arus sihamati Jesus. Janah paksa silakoken e, kita pe nghamati Jahwe. Paksa sipilih guna nghamati Jesus ras Bapana, banci kita nggeluh rasa lalap.—Oge Masmur 2:7, 11, 12.

5. Engkai maka kerina jelma patut ihamati ras iergai?

⁵ Manusia itepa Dibata ”sentudu ras tempasNa”. (Kejadin 1:27) Maksudna, manusia ngasup ncidahken biak-biak Dibata. Contohna, banci icidah-ken manusia kekelengen, kiniulin, ras perkuah ate. Janah ibereNa ka pusuh peraten, guna meteh apai si benar ntah pe si salah, si mehuli ntah pe si la mehuli. (Roma 2:14, 15) Teremen jelma, ngena atena si bersih ras si mejile janah atena nggeluh alu dame ras si deban. Enda labo man kemamangen, erkiteken Jahwe Dibata si ratur dingen dame. Jelas me, kerina manusia itepa alu kengasupen ngusih Jahwe. Enda me alasenna maka manusia patut iergai ras ihamati.—Masmur 8:5, Terjemahan Dunia Baru.

6, 7. Uga Saksi-Saksi Jahwe la seri ras jelma si nterem i bas nghamati kalak si deban?

⁶ Sieteh maka arus sihamati jelma si deban, tapi la sieteh kehamaten si uga si arus sibereken ras uga belinna. Enda terjadi perban nterem manusia si la serta ipengaruhi doni Setan. Ibanna dilaki ntah pe diberu jadi idolana. Labo iberekenna kehamaten ras pengergan bagi si ngena ate Jahwe, tapi ibanna manusia e bagi Dibata. Banci saja iusih kalak e peruisna, lagu langkah, ras pengelako peminpin politik ras peminpin agama, bintang olah raga, bintang film, ras kalak si terkenal si debanna.

⁷ Ieteh kalak Kristen situhu-tuhu maka salah nghamati manusia alu cara si bage. Jesus ngenca si mereken usihen si serta bas kerina manusia si pernah nggeluh. (1 Petrus 2:21) Perlu siinget maka, ”Kerina manusia enggo erdosa janah enggo ndauh sirang ras sura-sura Dibata si mejile.”  (Roma 3: 23) La lit manusia si patut isembah. Adi sihamati manusia lebih asa arusna, enda erban ceda ukur Jahwe.

8, 9. (a) Uga tanggapen Saksi-Saksi Jahwe nandangi pejabat pemerentah? (b) I bas situasi si uga kita la perlu patuh man pejabat-pejabat e?

⁸ Piga-piga kalak patut sihamati ntah pe siergai erkiteken kedudukenna. Contohna, ukurken kerna pejabat pemerentah janah kai si nggo ilakokenna bandu. Ibahanna lingkungenta terus aman janah iperdiatekenna keperlun wargana. Erguna kel dahin kalak e man jelma si nterem. Ikataken rasul Paulus maka arus sianggap kalak e selaku ”pemerentah si erkuasa”. Ikatakenna ka maka arus siikuti undang-undangna, ”Berekenlah man sekalak-sekalak kai si patut ialokenna. Galarilah pajakndu man si ngaloken pajak, cuke man pemungut cuke. Hamatilah kalak si patut ihamatindu, janah pehagalah kalak si patut ipehagandu.”—Roma 13:1, 7.

⁹ Selaku Saksi-Saksi Jahwe, silakoken asa ngasupta guna ncidahken man pejabat pemerentah maka siergai ia. Tentu saja, tiap negara la seri kebiasanna, emaka kai si ipindo pejabat bas sada ingan banci saja beda ras ingan si deban. Tapi, tetap kita kerja sama ras pejabat pemerentah asum idahikenna dahinna. Amin gia bage, adi suruhna kita ngelakoken kai si erban kita la patuh man Jahwe, la kita nggit ngelakokenca. I bas si e, sipatuhi janah sihamati Jahwe asangken manusia.—Oge 1 Petrus 2:13-17.

10. Uga umat Jahwe si mbarenda mereken usihen si mehuli man banta?

¹⁰ Banci kita erlajar bas umat Jahwe si mbarenda, si ncidahken kehamaten man pemerentah ras pejabat-pejabatna. Jusuf ras Maria usihen si mehuli. Paksa isensus pemerentah Roma atena rayatna, lawes me Jusup ras Maria ku Betlehem amin gia Maria nandangi mupus. (Lukas 2:1-5) Usihen si deban eme rasul Paulus si ngergai pemerentahen manusia. Paksa ituduh ia ngelakoken kesalahen, alu mehamat ibelana dirina i lebe-lebe Raja Herodes Agripa ras Pestus, gubernur Juda paksa pemerentahen Roma.—Perbahanen Rasul-Rasul 25:1-12; 26:1-3.

11, 12. (a) Engkai maka la sihamati peminpin agama alu khusus? (b) Kai asilna erkiteken iergai sekalak Saksi i Austria sekalak politikus?

¹¹ Uga kerna peminpin agama? Uga caranta nghamati ia? Seri bagi kita nghamati jelma si deban, bage me kita nghamati kalak e. Tapi, uga adi ipindona kita nghamati ia alu khusus? La kita nggit. Engkai? Erkiteken agama palsu la ngajarken kebenaren kerna Dibata ras KataNa, Pustaka si Badia. Ipersingeti Jesus guru agama palsu janah ikatakenna maka kalak e pekulah-kulah ras pemimpin si la mehuli. (Matius 23:23, 24) Sebalikna, la salah adi siergai ras sihamati pejabat pemerentah. Adi silakoken bage, ulihna bas sada paksa pagi isampatina kita.

¹² Contohna, Heinrich Gleissner, sekalak politikus Austria nari. Sedekah Perang Doni II, itangkap Nazi ia. Paksa ikirim ku penjara Nazi alu kereta api,  jumpa ia ras Leopold Engleitner, sekalak Saksi si ergiah-giah bas Austria nari. Alu mehamat ituriken turang seninanta Engleitner kinitekenna man Dr. Gleissner, si megiken alu tutus. Kenca dung perang, piga-piga kali ipake Gleissner jabatenna nampati Saksi-Saksi i Austria. Banci saja ietehndu contoh si deban kerna asil si mehuli erkiteken kalak Kristen nghamati pejabat pemerentah.

13. Ise si khususna patut siergai ras sihamati, janah ngkai?

¹³ Turang ras seninanta patut sihamati ras siergai. Khususna turang senina si muat pinpinen, bagi pertua, pertua keliling, anggota Panitia Cabang, ras anggota Badan Pinpinen. (Oge 1 Timotius 5:17.) Iperdiateken kalak e kel keperlun umat Dibata, janah ikataken Pustaka maka juak-juak enda eme ”pemere-pemere man manusia”. (Epesus 4:8) Emaka masuk akal adi sihamati janah siergai kalak e la soal bangsa kai ia, uga pendidikenna, umurna, sukuna, pendahinna, ntah pe ertana. Kalak Kristen abad pemena mereken usihen si mehuli banta. Ihamatina kalak si muat pinpinen, janah e me silakoken gundari. La siban ia bagi malekat ntah pe bagi kalak si luar biasa jagona. Tapi siergai janah sihamati pendahin ras sipatna si meteruk ukur.—Oge 2 Korinti 1:24; Ketangkasen 19:10.

14, 15. Uga pertua Kristen la seri ras peminpin agama?

¹⁴ Pertua-pertua e bali bagi permakan  si meteruk ukur. La atena iban bagi kalak si terkenal. Emaka beda kel kalak e ras melala peminpin agama si gundari bage pe peminpin agama bas jaman Jesus. Ikatakenna kerna kalak e, ”Lit kenca kerja-kerja kundul ia arah ingan si mehamat, janah i bas rumah pertoton pe arah lebe ia kundul; atena gelah mehamat kalak man bana i tiga janah atena ikataken kalak ia ’Guru’.”—Matius 23:6, 7.

¹⁵ Pertua Kristen patuh man kata-kata Jesus enda, ”Ola kam nggit ikataken kalak ’Guru’, sabap sada ngenca Gurundu, janah kam kerina ersenina. Ola ise pe i doni enda ikatakenndu ’Bapa’, sabap sada ngenca Bapa-ndu e me Dibata. Bage pe ola kam nggit ikataken kalak ’Peminpin’, sabap sada ngenca Peminpinndu, e me Mesias si ipadanken Dibata. Ise si mbelinna i bas kam, ialah si ngelai kam kerina. Ise si peganjangken bana, ipeteruk Dibata me, janah ise si peteruk bana, ipeganjangken Dibata me ia.” (Matius 23:8-12) Adi kerina pertua meteruk ukur janah patuh man kata-kata Jesus, pasti ia ikelengi, iergai, ras ihamati turang seninana.

16. Engkai maka perlu siusahaken nghamati kalak?

¹⁶ Banci saja la menukah erlajar nghamati kalak si deban. Enda me si terjadi bas kalak Kristen abad pemena. (Perbahanen Rasul-Rasul 10:22-26; 3 Johanes 9, 10) Tapi labo sia-sia usahanta e. Janah mbelin kel gunana adi sihamati kalak si deban bagi si ngena ate Jahwe.

17. Kai saja gunana ncidahken kehamaten man kalak si lit wewenangna?

¹⁷ Adi sihamati ras siergai kalak si lit wewenangna i daerahta, mbelin kemungkinenna ibelana hakta guna erberita. Janah banci saja mehuli tanggapenna nandangi dahinta e. Eme si terjadi piga-piga tahun si lewat i Jerman paksa sekalak perintis si gelarna Birgit si reh ku acara kelulusen sekolah anakna. Ikataken guru-guru man Birgit maka sedekah enda meriah kel akap kalak e lit muridna Saksi. Ikatakenna maka murid-murid si Saksi erban situasi bas sekolah reh ulina. Nina Birgit, ”Enggo iajari kami anak-anak kami ngikuti patoken-patoken Dibata, termasuk ncidahken pengergan man guru ras nghamatisa.” Nina sekalak guru, adi kerina murid bagi Saksi-Saksi, reh nukahna akapna ngajar. Mehuli kel tanggapen kalak e nandangi murid si Saksi, piga-piga minggu kenca e salah sada guruna reh ku kebaktin regional.

18, 19. Kai si arus siinget paksa nghamati pertua?

 ¹⁸ Pedah si lit bas Kata Dibata nampati kita ngangkai cara nghamati pertua i runggun. (Oge Heber 13:7, 17.) Janah arusna kin sipuji kerja keras kalak e. Adi sidalanken petunjuk si iberekenna, meriah ukur pertua e i bas ndahiken dahinna. Nina Pustaka arus ka nge siusih kiniteken kalak e. Tapi labo ertina arus siusih-usih cara peruis, pengerana, ras cara ngajar pertua si ”ihamati” e. Adi silakoken e, tempa-tempa manusia si niikutken labo Kristus. Ula min silupaken maka pertua e pe la serta seri bagi kita.

¹⁹ Adi sihamati ras siergai pertua janah la siban ia bagi kalak si terkenal, enda nampati ia. Engkai? Erkiteken enda erban reh nukahna akapna tetap meteruk ukur janah mpedauh perukuren maka ulin ia asangken si deban ntah pe erpengakap maka ia lalap si benar.

20. Kai gunana adi sihamati kalak si deban?

²⁰ Enghamati kalak si deban nampati kita mpedauh sifat mentingken bana ras tetap meteruk ukur paksa lit si mperdiateken kita alu khusus. Enda pe nampati kita gelah la menukah kitik ukur adi ikecewaken kalak si niergai. Janah kita pe terus ersada ras organisasi Jahwe. La ibereken organisasi e man ise pe kehamaten si la patut, subuk si sada kiniteken bage pe si la sada kiniteken.

21. Kai kegunan si pentingna i bas nghamati kalak si deban?

²¹ Kegunan si pentingna i bas nghamati kalak si deban eme erban Dibata senang. Silakoken kai si ngena ate Jahwe ras tetap setia man baNa. Banci ijabap Jahwe tuduhen Setan, maka la lit ise pe si banci setia. (Kuan-kuanen 27:11) Nterem jelma i doni enda la iangkaina cara si benar nghamati kalak si deban. Ngata bujur kel kita erkiteken sieteh cara si ngena ate Jahwe i bas nghamati!