KUINGET bas erpagi-pagi si mbergeh puluhen tahun si nggo lewat i Brookings, Dakota Selatan, AS. Sangana aku ras piga-piga kalak bas sada lumbung, bergehen kami kerina. Banci kugejapken musim mbergeh nandangi reh. Cinder kami i deher tanki lau, launa pe mbergeh kel! Mari kuturiken kerna geluhku gelah banci ietehndu ngkai aku lit i je.

Aku tubuh tanggal 7 Maret 1936. Empat kami sembuyak, aku anak singuda. Kami tading i bas perjuman si kitik i bagin timur Dakota Selatan. Erjuma dahin si penting bas keluarga kami, tapi labo enda si pentingna kel. Orangtuangku iperidiken jadi Saksi-Saksi Jahwe i bas tahun 1934. Ibaktikenna dirina man Jahwe, emaka si pentingna kel iakapna ngelakoken peraten Jahwe. Bapangku, Clarence, janah bas pudi wari mamangku Alfred, ngelayani selaku hamba sidang (gundari igelari koordinator badan pertua) bas runggun kami sikitik i Conde, Dakota Selatan.

Keluarga kami ratur perpulungen ras erberita arah rumah ku rumah nuriken arapen si luar biasa kerna wari si pepagi i bas Pustaka si Badia nari. Usihen ras pengajaren orang tuangku nampati kami ngkelengi Jahwe. Aku ras turangku, Dorothy, jadi perberita paksa umur kami enem tahun. Bas tahun 1943, ikut aku bas Sekolah Pelayanen Teokratis, si mbaru denga ibenaken.

Penting kel akap kami kebaktin regional ras kebaktin wilayah. Kuinget sada kebaktin  bas tahun 1949 i Sioux Falls, Dakota Selatan. Turang Seninanta Grant Suiten mpeseh kotbah ”Enggo Ndeher Kel Waktuna, La Bagi si Ibayangkenndu!” Iturikenna maka kerina kalak Kristen si nggo mbaktiken diri arus nggunaken kegeluhenna lako mberitaken berita si meriah kerna Kinirajan Dibata. Kenca si e, kubaktiken me diringku man Jahwe. Tanggal 12 November 1949, iperidiken aku i bas kebaktin wilayah i Brookings. Enda me alasenna ngkai maka aku bergehen bas lumbung bagi si ituriken ndai. Empatna kami nimai guna iperidiken i bas tangki si galang bas besi nari.

Jadi perintis ateku. Emaka kubenaken tanggal 1 Januari 1952 paksa umur 15 tahun. Nina Pustaka, ”Adi kam erteman ras kalak pentar kam pe ikut jadi pentar”, janah i bas keluargangku melala kalak pentar si ndukung keputusenku guna merintis. (Kuan-kuanen 13:20) Megati aku erberita ras mamangku Julius, si umurna 60 tahun. Amin gia ndauh ia tuan, meriah ukur kami ras-ras erberita. Melala kel aku erlajar i bas ia nari bage pe pengalamenna. La ndekah kenca si e Dorothy pe jadi perintis.

Paksa nguda denga aku, megati iundang orang tuangku pertua keliling ras ndeharana tading i rumah. Si melalana nampati aku eme Jesse ras Lynn Cantwell. Ermediate kel kalak e janah terus aku iiahkenna. Paksa kalak e ngelayani bas runggun-runggun si ndeher, maun-maun itenahkenna aku gelah ras kami erberita. Tuhu-tuhu meriah kel kuakap! Terbuen ateku rusur kulakoken i bas dahin Jahwe bagi kalak enda janah merintis.

Kenca si e, pertua keliling kami Bud Miller. Paksa reh ia ras ndeharana, Joan, ku runggun kami, umurku 18 tahun. Paksa si e arus aku ngadap ku panitia wajib militer. Atena gelah ikut aku bas dahin si la sentudu kuakap ras perentah Jesus guna netral secara politik. Janah terus ateku erberita. (Johanes 15:19) Emaka kupindo gelah iberena aku jadi sekalak penginjil saja.

Meriah kel ukurku paksa ikataken turang seninanta Miller maka nggit ia lawes ras aku  njumpai Panitia wajib militer. Ia perpang, la mbiar man ise pe. Mbages ka pengangkanna kerna Pustaka. Radu ras ia erbahan aku pe jadi perpang! Asil perjumpan kami, i bas pendungi musim las tahun 1954, ibere panitia wajib militer e aku jadi penginjil. Gundari reh nukahna kuakap ngelakoken terbuen man Jahwe.

La ndekah kenca e, iundang aku ngelayani i Betel, bas bagin si paksa si e gelarna Watchtower Farm, i Staten Island, New York. Telu tahun aku erdahin i je. Melala kudat pengalamen si mehuli erkiteken jumpa janah erdahin ras turang senina si pentar.

Stasiun Radio WBBR lit bas perjuman Watchtower i bas Staten Island. Enda ipake Saksi-Saksi Jahwe mulai tahun 1924 seh 1957. Anggota keluarga Betel si ertugas i je 15 seh ku 20 kalak ngenca. Teremen kami nguda denga ras kurang erpengalamen. Tapi lit si ikut erdahin ras kami, Eldon Woodworth, si arapenna ku surga. Ia bagi sekalak bapa man kami janah melala kel si iajarkenna. Maun-maun sanga kami la sicocoken sapih-sapih kami ikataken turang senina Woodworth, ”Luar biasa kel si nggo ilakoken Jahwe amin gia manusia si la serta ipakeNa.”

Turang Seninanta Frederick W. Franz pe nampati kami. Pentar ia janah mbages kel pengangkanna kerna Pustaka. Iperdiatekenna kami sekalak-sekalak. Si erdakan kami eme Harry Peterson. Nukahen akap kami ngelebuh gelarna e asangken gelar aslina, Papargyropoulos. Ia pe erpengarapen ku surga, janah meriah kel ukurna erberita. Amin gia tutus atena erdahin i Betel tapi la pernah ia lupa erberita. Tiap bulan banci ipedaratna ratusen majalah. Pemetehna kerna Pustaka pe seh kel bagesna janah banci ijabapna melala penungkunen kami.

Bas perjuman Watchtower, iperani kami buah-buahen ras gulen-gulen janah ikaleng-ken kami. Lit kira-kira 45.000 kaleng buah-buahen ras gulen si ikalengken kami tiap  tahun guna keluarga Betel. Aku erdahin ras Etta Huth, sekalak turang si pentar. Ia si erban resep guna nikapken buah ras gulen. Lit piga-piga turang si tading i deher perjuman e ikut erdahin ras kami, janah isampati Etta ngaturken dahin kalak e. Amin gia melala ieteh Etta proses pengalengen, tetap iergaina senina-senina si jadi pengawas bas perjuman e. Ia usihen man kami kerina.

Angela Romano sekalak turang si nampati i bas perjuman e. Etta me si nampati ia kenca ia iperidiken. Bulan April 1958, erjabu aku ras Angie janah radu kami ngelayani Jahwe, nggo 58 tahun dekahna. Kesetian Angie man Jahwe erbahan perjabun kami paguh. Pentar ia janah banci tuhu-tuhu kupenalem, la soal tantangan kai pe iadapi kami.

Paksa idayaken turang seninanta fasilitas WBBR bas Staten Island tahun 1957, ngelayani aku kentisik i Betel Brooklyn. Kenca erjabu aku ras Angie, kutadingken me Betel. Merintis kami i Staten Island telu tahun dekahna. Piga-piga waktu dekahna, erdahin aku i stasiun radionta mbarenda si nggo igelari WPOW, tapi si empuna nggo mbaru.

Usahaken kami nggeluh sederhana gelah banci ngelayani i japa pe si merluken kami. Dungna, bas tahun 1961 ialoken kami undangen jadi perintis istimewa i Falls City, Nebraska. La ndekah kenca kami pindah ku je, iundang kami ku Lansing Selatan, New York, guna Sekolah Pelayanen Kinirajan. Meriah kel ukur kami dat pelatihen e, janah iakap kami kenca sekolah e mulihken kami ku Nebraska. Tapi, sengget kel kami paksa dat tugas si mbaru. Lawes me kami ngelayani selaku utusen injil i Kamboja! Enda negara si mejile i Asia Tenggara, melala hal si mbaru si niidah kami, si ibegi, bage pe si inanami kami. Merhat kel kami mpeseh berita si meriah kerna Kinirajan man kalak si i je.

Tapi situasi politik i Kamboja berubah, arus kami lawes ku Vietnam Selatan. Ndele kel kuakap, perban dua tahun kenca e sakit aku janah mekelek kel, emaka mulih-ken kami ku AS. Tapi ndekah maka malem. Kenca nggo malem, merintis ka kami mulihi.

Bulan Maret 1965 mulai me kami ngelayani runggun-runggun selaku pertua keliling. Meriah kel kuakap ras Angie 33 tahun jadi pertua keliling ras distrik, bage pe nampati ngaturken kebaktin, erkiteken adi lit kebaktin meriah kel kuakap. Piga-piga tahun kami ndahi runggun-runggun isekelewet New York, ras mbue kebaktin i Stadion Yankee.

Ertahun-tahun dekahna melala kel aloken kami dahin si mbaru ras la menukah. Tahun 1955, ipindo aku ngajar bas Sekolah  Pelatihen Pelayanen. Telu tahun kenca e, iundang kami ku Betel. Meriah kel kuakap kenca 40 tahun banci ka mulihken ku Betel, i je me tangtangna aku ngelayani i bas pelayanen sepenuh waktu khusus. Sempat ka aku erdahin bas departemen dinas ras ngajar bas melala sekolah. Tahun 2007, iban Badan Pinpinen me Departemen Sekolah si Iban Organisasi guna ngaturken sekolah-sekolah i Betel, janah piga-piga tahun aku si ngawasisa.

Tahun-tahun terakhir enda, melala perubahen sekolah-sekolah i Betel. Tahun 2008 iban Sekolah man Pertua Runggun. Lebih dua tahun kenca e, lit lebih 12.000 pertua si iajari bas Patterson ras i Betel Brooklyn. Gundari sekolah enda terus lit i bas melala ingan. Tahun 2010 gelar Sekolah Pelatihen Pelayanen iganti jadi Sekolah si Erpalasken Pustaka man Dilaki janah sekolah si mbaru ibentuk igelari Sekolah si Erpalasken Pustaka man Pasangen Kristen.

Bulan September 2014, dua sekolah enda ipersada jadi Sekolah man Perberita Kinirajan. Siswana eme pasangen si nggo erjabu, singuda-nguda ras anak perana. Meriah kel ukur turang senina i sebelang doni megi maka sekolah-sekolah e iban ka i negarana. Meriah kel ukurta lit kesempaten guna ikut bas sekolah-sekolah e. Janah ngata bujur kel aku banci jumpa ras nterem turang senina si erban perubahen bas geluhna gelah ikut bas pelatihen e.

Paksa kuukuri kerna geluhku sope iperidiken i lumbung si mbergeh seh ngasa gundari, bujur kel ningku man Jahwe erkiteken banci jumpa ras kalak si pentar. Isampati kalak e aku nandai ras ngelayani Ia terulin. Lit si ngudan ras si tuan asang-ken aku. Janah nterem si rehna i bas budaya si la seri ras budayangku. Tapi banci kuidah i bas perbahanen ras lagu langkahna maka keleng kel atena Jahwe. Ngata bujur kel aku banci erteman ras turang senina si pentar janah banci erlajar bas kalak e nari.