1. Engkai maka Kain erbahan keputusen si la mehuli, janah kai akibatna?

ARUS iban Kain sada keputusen si penting. Banci ipilihna ngkuasai perasanna si erdosa, si maba kiniulin man bana. Ntah pe banci ipeturutna perasanna ngkuasai perbahanenna, si maba akibat si la mehuli. Ituriken Pustaka si Badia maka keputusen Kain la mehuli, enda erban agina Abil mate janah pertemanenna ras Si Nepa ia pe ceda.—Kejadin 4:3-16.

2. Engkai maka penting kel erban keputusen si mehuli?

² Seri bagi Kain, kerina kita arus erban pilihen ras keputusen bas geluhta. Piga-piga keputusen e seh kel seriusna, janah lit ka si lang. Tapi, buen keputusenta mbelin kel pengaruhna man kegeluhenta. Adi siban keputusen si mehuli, banci jadi sitik ngenca masalahta janah kegeluhenta pe reh damena. Tapi, adi siban keputusen si la mehuli, kegeluhenta dem masalah ras erban kecewa.—Kuan-kuanen 14:8.

3. (a) Guna erban keputusen si mehuli, nandangi kai kita arus erkiniteken? (b) Penungkunen kai si man bahasenta?

 ³ Kai si nampati kita i bas erban keputusen si mehuli? Perlu kita erkiniteken man Dibata, tek maka nggit Jahwe nampati kita janah mereken kepentaren si niperluken guna erban keputusen si mehuli. Perlu ka kita erkiniteken man KataNa, janah tek man nasehatNa. (Oge Jakup 1:5-8.) Asum ndeher kita man Jahwe janah ngena ateta KataNa, enda nampati kita gelah tek maka ieteh Jahwe kai si mehulina banta. Sidaramilah lebe pedah i bas Kata Dibata sope erban keputusen. Tapi uga carana mpebelin kengasupenta erban keputusen si mehuli? Janah maun-maun perlu nge siubah keputusenta?

4. Keputusen kai si arus iban Adam, janah kai akibatna?

⁴ Tangtangna nari kin pe, manusia arus erban keputusen si penting. Manusia si pemena, Adam, arus erban keputusen guna megiken Si Nepa ia, Jahwe, ntah megiken ndeharana, Hawa. Ipilih Adam megiken Hawa, si mpengaruhi ia erban keputusen si la kel mehuli. Akibatna, ipelawes Jahwe me Adam bas peken Eden nari, dungna mate me ia. Gundari, kita pe ngenanami kiniseran akibat keputusen Adam si la mehuli.

5. Uga arusna tanggapenta nandangi tanggung jabap i bas erban keputusen?

⁵ Banci saja piga-piga kalak erpengakap maka menukah kel geluh enda adi la perlu erban keputusen. Banci saja bage perasanndu. Tapi ingetlah maka la itepa Jahwe manusia bagi robot si la banci rukur ras erban pilihen. IbereNa kita KataNa, si ngajari kita uga erban keputusen si mehuli. Ate Jahwe gelah siban keputusenta, janah tanggung jabap enda banci nampati kita. Ukuri contoh enda.

6, 7. Keputusen kai si arus iban bangsa Israel, janah ngkai maka mesera kel akapna erban keputusen e? (Nehen gambar pemena artikel.)

⁶ Paksa i Taneh Perpadanen, arus iban kalak Israel keputusen guna nembah Jahwe ntah ngelayani dibata si deban. (Oge Josua 24:15.) Tempa-tempa enda keputusen si sepele. Tapi, pilihen kalak e kesah taruhenna. Paksa jaman Hakim-Hakim, kalak Israel lalap erban keputusen si la mehuli. Lanai isembahna Jahwe janah mulai nembah dibata-dibata palsu. (Hakim-Hakim 2:3, 11-23) Kenca si e, paksa jaman nabi Elia pe, umat Dibata arus milih ngelayani Jahwe ntah dibata palsu Baal. (1 Raja-Raja 18:21) Banci saja menukah siakap erban keputusen  enda erkiteken lalap nge ulin ngelayani Jahwe. Kalak si pentar la nggit ngelayani dibata si la nggeluh. Tapi la banci kalak Israel erban keputusen. Ikataken Pustaka maka la ”ipetetapna ukurna”. Alu pentar, iiahken Elia kalak Israel gelah milih Dibata si benar, Jahwe.

⁷ Engkai maka mesera iakap kalak Israel erban keputusen si mehuli? Si pemena, la ia erkiniteken man Jahwe, janah la nggit megikenca. La kalak e tek man Jahwe, janah la ipelajarina kerna Ia ntah pe kepentarenNa. Adi ilakokenna e, enda nampati ia erban keputusen si mehuli. (Masmur 25:12) Si peduaken, kalak Israel ipengaruhi bangsa-bangsa si deban. Ipengaruhi kalak asing e perukuren kalak Israel janah ibanna keputusen man kalak Israel. Akibatna, iikuti kalak Israel me kalak asing e janah isembahna dibatana si palsu. Mbarenda nari nggo ipersingeti Jahwe kalak Israel.—Keluaren 23:2.

8. Pelajaren penting kai si banci sipelajari bas kalak Israel nari?

⁸ Kalak Israel jadi contoh man banta maka adi erban keputusen si mehuli ateta, arus sipake Kata Dibata. Ipersingeti Galati 6:5 maka tiap kalak ertanggungjabap man pilihenna. Jelas me, la sipediat kalak si erban keputusen banta. Sebalikna, tep-tep kalak arus ipelajarina kai si benar iakap Dibata janah milih guna ngelakokenca.

9. Engkai maka bahaya adi sipeturut kalak erban keputusen banta?

⁹ Uga maka banci kalak si deban erban keputusen banta? Alu mpeturut kalak e nekan kita erban pilihen si la mehuli. (Kuan-kuanen 1:10, 15) Enda bahaya kel. Ertanggungjabap kita ngikutken pusuh peraten si iajari Pustaka. Adi sipeturut kalak si deban erban keputusen banta, jadi pengikutna me kita. Pilihen si bage maba mara.

10. Persinget kai si ibereken Paulus man kalak Galati?

¹⁰ Ipersingeti rasul Paulus kalak Galati gelah ula ipediatna kalak si erban keputusen man bana. (Oge Galati 4:17.) Piga-piga turang senina i Galati erban keputusen atena man kalak si deban i runggun. Kai tujunna? Ate kalak si mentingken bana e gelah lebih iikutken turang seninana ia asangken rasul-rasul. La kalak e meteruk ukur, janah la iergaina hak turang seninana i bas erban keputusen.

11. Uga caranta nampati kalak si deban paksa erban keputusen atena?

¹¹ Kerina kita banci erlajar bas rasul Paulus nari. Ietehna maka lit hak  turang seninana erban keputusen, janah iergaina hakna e. (Oge 2 Korinti 1:24.) Gundari, banci iikuti pertua usihen enda paksa mereken nasehat kerna masalah si lit hubungenna ras pilihen pribadi. Meriah kel ukur kalak e mereken keterangen si erpalasken Kata Dibata man turang seninana. Tapi, pertua pe arus metenget gelah mpeturut kalak Kristen erban keputusen erkiteken ia nge kari si nanggung akibatna. Pelajarenna: Banci sisampati kalak si deban ngangkai nasehat Pustaka gelah ipakekenna i bas ngadapi masalahna. Tapi, lit hak ras tanggung jabap turang seninanta i bas erban keputusen. Paksa kalak e erban keputusen si mehuli man dirina sendiri, enda erguna kel man bana. Jelas me, ula min siakap lit hakta erban keputusen kerna kai si arus ilakoken turang seninanta.

12, 13. Engkai maka bahaya erban keputusen paksa merawa ntah pe paksa kitik ukurta?

¹² Gundari, teremen jelma ngikutken pusuhna paksa erban keputusen. Tapi enda banci maba bahaya. Ipersingeti Pustaka gelah keputusenta ula erpalasken pusuh ntah pe perasanta si la serta. (Kuan-kuanen 28:26) La banci siteki pusuhta erkiteken ”la lit si deban bali ras pusuh manusia penipuna”. (Jeremia 17:9) Melala kel contoh i bas Pustaka si ncidahken akibat si la mehuli erkiteken ernalem man pusuh si la serta. (1 Raja-Raja 11:9; Jeremia 3:17; 13:10) Emaka, kai si banci terjadi adi siikutken pusuhta paksa erban keputusen?

¹³ Iperentahken Jahwe kita gelah ngkelengi Ia asa ukurta lit janah ngkelengi temanta bagi kita ngkelengi dirinta.  (Matius 22:37-39) Tapi perlu kita metenget. Ayat Pustaka bas paragrap si nggo lewat ncidahken maka bahaya adi sipeturut perasanta ngkuasai perukuren ras perbahanenta. Contohna, mesera erban keputusen si mehuli paksa merawa. (Kuan-kuanen 14:17; 29:22) Mesera ka erban pilihen si pentar paksa kitik ukurta. (Bilangen 32:6-12; Kuan-kuanen 24:10) Arus sipeturut hukum Dibata negu-negu perukurenta. (Roma 7:25) Paksa erban keputusen si penting, arusna ula min perasanta saja siikutken.

14. Uga banci sieteh maka mehuli ngubah piga-piga keputusen?

¹⁴ Perlu siban keputusen si mehuli. Tapi, ieteh kalak si pentar maka maun-maun perlu iukurina mulihi keputusenna si mbarenda janah banci saja iubahna. Ibere Dibata Jahwe usihen si serta man banta. Perdiateken kai si ilakoken Jahwe man kalak Niniwe bas jaman Juna, ”Iidah Dibata kai si ilakoken kalak ndai; iidahNa pe maka lanai ia ngelakoken perbahanen si jahat. E maka salih ukur Dibata, janah la surung iukumNa kalak e aminna pe enggo ikatakenNa iukumNa ateNa.” (Juna 3:10) Paksa iidah Jahwe kalak Niniwe robah janah lanai ngelakoken kai si jahat, iubahNa keputusenNa. Enda ncidahken maka Jahwe masuk akal, meteruk ukur, janah perkuah ate. La bagi nterem jelma, keputusen si iban Jahwe la asal-asalen, amin gia paksa merawa.

15. Engkai maka banci saja perlu siubah keputusenta?

¹⁵ Maun-maun mehuli adi siukuri mulihi sada keputusen e, misalna paksa keadan berubah. Ingetlah maka maun-maun Jahwe pe iubahNa keputusenNa. (1 Raja-raja 21:20, 21, 27-29; 2 Raja-raja 20:1-5) Selain si e, mung-kin banci siubah keputusenta paksa sidat keterangen si mbaru. Ukuri kerna usihen Raja Daud. Ibanna sada keputusen erpalasken keterangen si salah kerna Mepiboset, kempu Saul. Tapi, paksa ibegi Daud keterangen si terteki iubahna keputusenna e. (2 Samuel 19:24-29) Emaka, maun-maun mehuli adi kita pe bage.

16. (a) Petunjuk kai si erguna paksa erban keputusen? (b) Engkai maka arus sipereksa keputusenta si lewat, janah uga cara ngelakokenca?

¹⁶ Ikataken Pustaka maka ula min merudu-rudu erban keputusen si penting. (Kuan-kuanen 21:5) Perlu waktu guna ngukuri kerina faktana alu metenget, alu bage banci siban keputusen si mehuli. (1 Tesalonika 5:21) Sope erban keputusen, arus iban kepala keluarga waktuna gelah  irisetna ayat-ayat Pustaka ras publikasinta. Janah mehuli ka adi ibegikenna pendapat anggota keluarga si deban. Ingetlah maka isuruh Dibata gelah ibegiken Abraham ndeharana. (Kejadin 21:9-12) Pertua pe arus ibanna waktuna guna riset. Adi lit keterangen si mbaru si ncidahken maka perlu iubahna salah sada keputusen si nggo lewat, la kalak e mbiar bene pengergan i bas turang seninana nari. Pertua si masuk akal ras meteruk ukur arus siap ngubah keputusenna adi perlu janah mehuli kal siusih kalak e. Enda nampati runggun tetap dame ras ersada.—Perbahanen Rasul-Rasul 6:1-4.

17. Kai si nampati kita gelah berhasil erban keputusen?

¹⁷ Piga-piga keputusen pentingen asangken si deban, contohna, keputusen guna erjabu ntah lang ntah pe ras ise kita erjabu. Enda keputusen si seh kel pentingna. Keputusen penting si debanna eme ndigan ateta mulai ngelayani sepenuh waktu. Sope erban keputusen si penting, perlu siukuri alu manjar-anjar kerna keadanna janah ertoto mindo penampat Jahwe. Mungkin ndekah prosesna. Tapi adi erban keputusen si mehuli ateta, arus kita tek man Jahwe, sibegiken petunjukNa, janah ikuti arahenNa. (Kuan-kuanen 1:5) Ibereken Jahwe man banta nasehat si seh kel ulina bas KataNa nari. Emaka penting kel gelah siban riset janah ertoto mindo petunjuk Jahwe. Banci ibereNa sifat-sifat si iperluken guna erban keputusenta si sue ras peratenNa. Sope erban keputusen si penting, sisungkuni lebe banta: ’Kucidahken nge maka keleng ateku Jahwe arah keputusen enda? Maba keriahen ras kedamen nge e ku jabungku? Janah, teridah nge aku sabar ras perkeleng?’

18. Engkai maka iiahken Jahwe gelah siban keputusenta sendiri?

¹⁸ La ipaksa Jahwe kita ngkelengi ras nglayani Ia. Tapi, ibereNa kita kebebasen erban pilihen. Iergaina tanggung jabap ras hakta guna milih ngelayani Ia ntah lang. (Josua 24:15; Pengeran 5:4) Iiahken Jahwe kita ngelakoken keputusen si erpalasken KataNa. Adi tek kita man pengajaren Jahwe janah ndalanken pedahNa, banci siban keputusen si mehuli. Janah situduhken maka kita la monce-once.—Jakup 1:5-8; 4:8.