Bas tahun 2012, idat piga-piga arkeolog me pecahen kudin taneh si dekahna nggo 3.000 tahun. Meriah kel ukur peneliti-peneliti. Engkai? Labo erkiteken pecahen kudin taneh e, tapi erkiteken tulisen si lit i je.

Paksa pecahen-pecahen e ipersada arkeolog, teridah me tulisen cakap kalak Kanaan si ngataken, ”Esbaal Bin Beda”, ertina ”Esbaal anak Beda”. Enda me tangtangna kel idat arkeolog gelar e tersurat bas sada ingan si nuria.

Lit ka ituriken gelar Esbaal i bas Pustaka si Badia, eme salah sada anak Raja Saul. (1 Kronika 8:33; 9:39) Profesor Yosef Garfinkel, kalak si ikut ndatken kudin taneh e, ngataken, ”Patut iperdiateken maka gelar Esbaal si lit i bas Pustaka bage pe bas cataten arkeologi si gundari, duana lit i bas masa pemerentahen Raja Daud ngenca.” Enda me contoh si deban maka Pustaka sentudu ras bukti arkeologi!

I bas Pustaka, Esbaal anak Saul ilebuh ka Isboset. Engkai maka ”baal” iganti jadi ”boset”? Ijelasken peneliti maka mbelin kemungkinenna la ipake penulis kitap dua Samuel gelar Esbaal, erkiteken enda banci ngingetken kalak Israel nandangi Baal, dewa udan si isembah kalak Kanaan. Tapi, bas Pustaka i kitap sada Kronika lit denga gelar Esbaal.