1-3. Kai maksudna ngelayani Jahwe alu ”ukur bulat”? Bereken contohna.

KERINA kita la serta janah ngelakoken kesalahen. Tapi bujur kel sikataken, erkiteken ibere Jahwe kita tebusen janah nggit Ia ngalemi kita. Emaka adi meteruk ukur kita janah robah, banci sipindo pengalemenNa. Teklah kita maka labo ibalas Jahwe kita ”sue ras dosanta”. (Masmur 103:10) Tapi, arus kita ’erdahin guna Ia alu bulat ukur janah tutus ate’. (1 Kronika 28:9) Uga carana ngelakokenca amin gia kita la serta?

² Guna nampati kita, mari sibandingken ku kegeluhen Raja Asa ras Raja Amasia. Mehuli perbahanen raja e duana, tapi erban kesalahen ka nge ia erkiteken la serta. Tapi nina Pustaka si Badia Asa ”tetap erkemalangen man Jahwe kidekah ia nggeluh”. (2 Kronika 15:16, 17; 25:1, 2; Kuan-kuanen 17:3) Iusahakenna rusur erban Jahwe senang janah ’erdahin guna Ia alu bulat ukur  janah tutus atena’. (1 Kronika 28:9) Tapi, Amasia la ngelayani Jahwe alu ”ukur bulat”. Kenca italukenna musuh Dibata, ibabana berhala-berhala kalak e mulih janah mulai me isembahna.—2 Kronika 25:11-16.

³ Kalak si ngelayani Jahwe alu ”ukur bulat” keleng kel atena Jahwe janah rasa lalap min atena nembah Ia. Bas Pustaka, kata ”ukur” biasana ngertiken jelma si uga kin kita situhuna. Termasuk ka caranta rukur, kai si nikelengi, kai tujun geluhta, janah kai alasenta ngelakoken sada hal. Amin gia kita la serta, banci sisembah Jahwe alu bulat ukur. Silayani Ia erkiteken tuhu-tuhu kin ateta silayani, labo erkiteken kearusen  ntah pe kebiasan.—2 Kronika 19:9.

4. Kai si man bahasenta gundari?

⁴ Kenca mbahas kegeluhen Asa ras telu raja Juda si setia eme Josapat, Hiskia, ras Josia, banci reh tangkasna siangkai erti ngelayani Dibata alu bulat ukur. Amin gia empat raja enda erban kesalahen, tetap ngena ate Jahwe ngidahsa. IidahNa maka ilayani kalak e Ia alu bulat ukur. Engkai maka banci tetap ngena ate Dibata? Janah uga carana ngusih kalak e?

5. Kai si ilakoken Asa paksa ia jadi raja?

⁵ Asa eme raja si peteluken i Juda kenca bangsa Israel terbagi jadi kerajan Israel ras kerajan Juda. Paksa Asa jadi raja i Juda, ertekad ia nasapken penembahen palsu ras perbahanen seksual si ciga ate i kerajanna. Ikernepkenna berhala-berhala janah ipelawesna kalak si dahinna erlua-lua i rumah pertoton. Ipecat Asa nini-na i bas jabaten ’kemberahen nari, sabap enggo ibahanna sada gana-gana si mereha man tatapen’. (1 Raja-Raja 15:11-13) Iiahken Asa ka rayatna ”ngelakoken si ngena ate Jahwe” ras patuh man ”pengajaren ras perentah-perentah Jahwe”. Asa bancina isampati Asa kalak si deban nembah Jahwe.—2 Kronika 14:4.

6. Kai si ilakoken Asa paksa Juda iserang kalak Etopia?

⁶ Ngasa sepuluh tahun pemerentahen Asa, la pernah kerajan Juda erperang. Kenca si e reh kalak Etiopia nerang Juda alu sada juta tentera ras telu ratus gereta. (2 Kronika 14:1, 6, 9, 10) Kai si ilakoken Asa? Tek ia maka banci isampati Jahwe rayatNa. Emaka ertoto ia mindo penampat Jahwe gelah menang bas pertempuren e. (Oge 2 Kronika 14:11.) Maun-maun, ipilih Jahwe mereken kemenangen man umatNa, amin gia rajana la setia. Enda ilakokenNa guna  ncidahken maka Ia Dibata si benar. (1 Raja-Raja 20:13, 26-30) Tapi paksa si e, isampati Jahwe rayatNa erkiteken ernalem man baNa. Ijabap Jahwe pertoton Asa, janah menang ia bas pertempuren e. (2 Kronika 14:12, 13) Bas pudi wari ilakoken Asa kesalahen si serius, ipindona penampat man raja Siria labo man Jahwe. (1 Raja-Raja 15:16-22) Amin gia bage, banci iidah Jahwe maka keleng ate Asa Ia. ’Tetap ia erkemalangen man Jahwe i bas gedang-gedang geluhna.’ Uga caranta ngusih usihen si mehuli bas Asa nari?—1 Raja-Raja 15:14.

7, 8. Uga kam ngusih Asa?

⁷ Janari sieteh adi kesetianta nggo bulat man Jahwe? Banci sisungkuni banta: ’Patuh nge aku man Jahwe amin gia mesera? Kuusahaken nge gelah runggun tetap bersih?’ Ukurken uga belinna kinipangen si iperluken Asa guna mpengadi nini-na i bas jabaten kemberahen nari! Maun-maun, kam pe perlu perpang bagi Asa. Contohna, uga adi anggota keluargandu ntah pe temanndu erban dosa, la ia nggit ertobat janah arus ipedarat bas runggun nari? Iusahakenndu nge la erteman ras ia? Bas ukurndu nari nge ngelakokenca?

⁸ Bagi Asa, maun-maun kerina kalak siakap nentang kita. Mungkin itokohi teman sekolahndu kam ntah pe gurundu erkiteken kam Saksi Jahwe. Ntah pe banci saja motu iakap temanndu sada dahin kam erkiteken la erdahin guna reh ku kebaktin ntah pe la kam rusur lembur. I bas keadan si bage, ernalemlah man Dibata, bagi Asa. Ertotolah man Jahwe, panglah kam, janah tetap lakoken kai si benar. Ingetlah maka ipegegehi Dibata Asa, janah kam pe pasti ipegegehiNa.

9. Engkai maka meriah ukur Jahwe paksa kita erberita?

⁹ Asa la ngukurken dirina saja; iiah-kenna ka si deban ”ngelakoken kai si ngena ate Jahwe”. Kita pe sisampati ateta kalak gelah nembah Jahwe. Iperdiateken Jahwe kita paksa sicakapken Ia kempak kalak si deban. Meriah kel ukurNa ngidah kita ngelakokenca erkiteken keleng ateta Ia janah ermediate man manusia ras masa depanna!

10, 11. Uga caranta ngusih Josapat?

¹⁰ Josapat ”bali ras bapana”, Asa, si ngelakoken kai si ngena ate Jahwe. (2 Kronika 20:31, 32) Kai buktina? Bagi bapana, iiahken Josapat rayatna gelah nembah Jahwe. Ikirimna kalak ku kota Juda guna ngajar rayatna ”kitap Undang-Undang Jahwe”. (2 Kronika 17:7-10) Janah lawes ka ia ku daerah kerajan Israel bagin utara, ku  kalak i deleng Eperaim, guna ”ngajuk bangsa e gelah mulihken ku Jahwe”. (2 Kronika 19:4) Josapat eme raja ”si enggo erdahin guna Jahwe asa gegehna lit”.—2 Kronika 22:9.

¹¹ Gundari, ate Jahwe kerina kalak i sebelang doni iajar kerna Ia, janah kerina kita banci nampati dahin e. Ibanndu nge tujunndu guna ikut i bas dahin e tiap bulan? Meriah nge akapndu ngajarken kerna Pustaka man kalak si deban gelah ia pe nembah Jahwe? Itotokenndu ka nge dahin e? Adi erupaya kam, isampati Jahwe kam ndatken kalak si nggit erlajar. Nggit nge kam ngajari kalak si deban i bas waktu si arusna ipakendu guna santai-santai? Janah bagi Josapat, isampatina kalak ngelayani Jahwe mulihi, kita pe banci nampati kalak si lanai aktif. Bage pe, iaturken pertua guna ndahi janah nampati kalak si ipedarat bas runggun nari si banci saja nggo nadingken dosana si nggo lewat.

12, 13. (a) I bas paksa si uga Josapat mbiar, janah kai si ilakokenna? (b) Engkai maka arus siusih Josapat?

¹² Bagi bapana, Asa, ernalem Josapat man Jahwe paksa tentera si mbelin reh nerang Juda. (Oge 2 Kronika 20:2-4.) Mbiar kel ia emaka ertoto ia man Jahwe mindo penampat. Bas pertotonna, iakuina maka la banci italukenna musuh e. Ikatakenna ka maka lanai ietehna ras rayatna kai si arus ilakokenna. Sitik kel pe la Josapat ragu maka banci nge kalak e isampati Jahwe. Nina, ”Man baNdu kami mindo penampat.”—2 Kronika 20:12.

¹³ Bagi Josapat, maun-maun banci saja lanai sieteh kai si arus silakoken erkiteken masalahta, janah banci saja kita mbiar. (2 Korinti 4:8, 9) Tapi inget kai si ilakoken Josapat. I lebe-lebe rayatna, ertoto ia man Jahwe janah ikatakenna maka kote kel kalak e. (2 Kronika 20:5) Kepala keluarga banci iusihndu Josapat. Pindo gelah isampati Jahwe kam ras keluargandu guna ngadapi masalah e janah gelah ietehndu kai si arus ilakokenndu. Ula mela adi ibegi keluargandu pertotonndu. Gelah ietehna uga belinna kinitekenndu man Jahwe. Isampati Jahwe Josapat, emaka kam pe pasti isampatiNa.

14, 15. Uga Hiskia alu bulat ukur ernalem man Jahwe?

¹⁴ Hiskia eme raja si deban si ”patuh man Jahwe” amin gia bapana mereken usihen si la mehuli ras nembah berhala-berhala. ’Ikernepken Hiskia ingan-ingan ersembah kalak perbegu, iripukkenna tugu-tuguna, ras itabahna gana-gana Asera. Nipe tembaga si ibahan Musa nai pe, si igelari Nehustan, e pe iripukkenna’, erkiteken isembah kalak Israel. Enda bukti maka bulat ukur Hiskia setia man Jahwe. ”Alu metenget [terus] iikutkenna kerina Undang-undang si enggo ibereken [Jahwe] man Musa.”—2 Raja-Raja 18:1-6.

 ¹⁵ Paksa Hiskia jadi raja, iserang tentera Assur si megegeh me Juda janah ikernepkenna atena Jerusalem. Raja Assur, Sanherip, nggombangi Jahwe janah iusahakenna gelah Hiskia nerah. I bas paksa si bahaya enda, tek kel Hiskia man Jahwe janah ertoto ia mindo penampat. Ietehna maka belinen gegeh Dibata asangken kalak Assur janah banci nge iselamatkenNa umatNa. (Oge Jesaya 37:15-20.) Ijabap Jahwe pertoton Hiskia alu ngutus sada malekat guna munuh 185.000 prajurit Assur.—Jesaya 37:36, 37.

16, 17. Uga kam banci ngusih Hiskia?

¹⁶ Kenca si e, sakit me Hiskia janah menam mate. I bas masa si mesera e, ipindona kel man Jahwe gelah iingetNa kesetianna ras isampatina ia. (Oge 2 Raja-Raja 20:1-3.) Ibegi Jahwe pertoton Hiskia janah ipepalemna ia. I bas Pustaka nari sieteh maka gundari lanai banci siarapken mukjizat Dibata guna mpepalem penakitta ntah pe gelah gedang umurta. Tapi bagi Hiskia, banci kita ernalem man Jahwe. Banci sikataken, ”Ingetlah, Jahwe; alu tutus ras erkemalangen enggo kulayani Kam.” Tek nge kam maka lalap kam iperdiateken Jahwe amin gia paksa sakit?—Masmur 41:4.

¹⁷ I bas kai ka banci siusih Hiskia? Banci jadi, lit si ngambati hubungenta ras Jahwe ntah pe lanai lit waktunta ngelayani Ia. Contohna, gundari melala kalak ibanna manusia bagi berhala. Ibangga-banggakenna kel kalak si terkenal ras kalak situhuna la itandaina. Melala keri waktuna, guna ngoge kerna kalak e ras ngenen-ngenen potona. Ntah pe ipakena media sosial ntah pe alat-alat si deban guna ercakap-cakap ras kalak e bas internet. Tentu saja, banci kita ngerana-ngerana ras keluarga ntah pe temanta alu alat-alat enda. Tapi banci melala kel waktunta keri. Paksa nterem kalak muji komentar ntah pe potonta bas Internet, enda banci erban meganjang ukurta. Ntah pe, adi sieteh lit kalak si lanai ngenenca, banci jadi kitik ukurta. Banci kita erlajar bas usihen rasul Paulus, Akuila, ras Persila nari. Isempatkenna nge ndarami kerina keterangen kerna kalak si deban, khususna si la ngelayani Jahwe? Ikataken Pustaka maka ”meritaken berita si meriah nari ngenca dahin Paulus”. Persila ras Akuila pe isempatkenna erberita janah iturikenna ’alu lebih tepat dalan kegeluhen’ man kalak si deban. (Perbahanen Rasul-Rasul 18:4, 5, 26) Emaka banci sisungkuni banta: ’Metenget nge aku gelah la kuban manusia bagi berhala? Kusia-siaken nge waktungku guna kai si kurang penting?’—Oge Epesus 5:15, 16.

18, 19. Uga banci siusih Josia?

¹⁸ Raja Josia pe patuh man perentah Jahwe ”alu bulat ukur”. (2 Kronika 34:31) Josia eme ente Hiskia. Paksa  umurna belasen tahun, ”ia mulai nembah man Dibata nini-ninina Raja Daud”. Janah paksa umurna 20 tahun, mulai ikernepkenna penembahen berhala bas Juda. (Oge 2 Kronika 34:1-3.) Iusahaken Josia kel erban Jahwe senang lebihen asa raja-raja Juda si deban. Kenca e, bas sada wari idat imam si mbelin kitap Undang-Undang Dibata i bas rumah pertoton. Banci jadi Musa si nuratkenca! Paksa iogeken sekretaris man Josia, isedarina maka perlu terbuen ilakokenna gelah banci ngelayani Jahwe alu bulat ukur. Iiahkenna ka kalak si deban ngelakoken si bage. Ulihna, ”kalak Israel nembah man Jahwe” kidekah Josia nggeluh.— 2 Kronika 34:27, 33.

¹⁹ Adi kam nguda denga, banci usihndu Josia janah nandai Jahwe terbagesen. Banci jadi erlajar Josia bas bulangna nari, Raja Manase, si nggo robah. Erlajar ia maka Jahwe nggit ngalemi. Kam pe banci erlajar bas kalak si nggo metua nari i keluargandu ras runggun. Banci iturikenna kerna kai si mehuli si nggo ilakoken Jahwe bana. Bage pe, ingetlah uga perasan Josia kenca ibegina kai si ikataken Pustaka si Badia. Erupaya kel ia erban Jahwe senang janah mis erban perubahen. Alu ngoge Pustaka, banci jadi reh belinna sura-surandu patuh man Jahwe. Ulihna, pertemanenndu ras Ia reh paguhna janah kam pe ermeriah ukur. Janah reh merhatna kam mpebetehken man si deban kerna Jahwe. (Oge 2 Kronika 34:18, 19.) Paksa kam erlajar Pustaka, banci saja isedarindu maka lit cara si banci ningkatken pelayanenndu man Dibata. Adi bage, usahakenlah asa ngasupndu ndalankenca, bagi si ilakoken Josia.

20, 21. (a) Kai si seri i bas empat raja si nggo sibahas ndai? (b) Kai si man bahasenta bas artikel si reh?

²⁰ Kai si banci sipelajari bas empat raja Juda enda si ngelayani Jahwe alu bulat ukur? Iusahaken kalak enda erban meriah ukur Jahwe janah nembah Ia i bas kerina geluhna. Ernalem kalak e man baNa paksa reh musuh si megegeh nerang ia. Si pentingna, kalak e ngelayani Jahwe erkiteken keleng ate kalak e Ia.

²¹ Amin gia empat raja e la serta janah erban kesalahen, ngena ate Jahwe ngidah kalak e. IidahNa isi pusuh kalak e janah ietehNa maka tuhu-tuhu keleng kel ate kalak e Ia. Kita pe la serta janah erban kesalahen. Tapi meriah akap Jahwe ngidah kita adi silayani Ia alu bulat ukur. Bas artikel si reh, sibahas kai si banci sipelajari i bas kesalahen raja e nari.