Alasenta ‘Ngasilken Melala Buah’
“Adi terus ihasilken kena melala buah, imuliaken me Bapakku janah e jadi bukti maka kena me murid-muridku.”—JOHANES 15:8.
1, 2. (a) Kai si icakapken Jesus ras murid-muridna bas berngi sope ia mate? (Nen gambar pemena artikel.) (b) Engkai maka penting nginget alasenta erberita? (c) Kai si ibahas bas artikel enda?
BAS berngi sope kematen Jesus, ndekah ia ngerana ras rasul-rasulna. Ikatakenna maka keleng kel atena kalak e. Iceritakenna ka perumpaman kerna batang anggur si nggo sibahas bas artikel sebelumna. Ipegegehi Jesus atena murid-muridna gelah ‘ngasilken melala buah,’ maksudna, gelah ula kalak e nyerah mberitaken berita kerna Kerajan.—Johanes 15:8.
2 Ikataken Jesus man murid-muridna labo kerna kai saja si perlu ilakoken kalak e, tapi pe kerna engkai maka perlu ilakokenna. Iberekenna man kalak e alasen gelah terus erberita. Penting kel siinget alasen engkai maka terus kita erberita. Alu terus ngukurisa, enda banci erban kita la nyerah sanga mereken “kesaksin man kerina bangsa.” (Matius 24:13, 14) Bas artikel enda, sibahas me kari empat alasen arah Pustaka engkai maka kita erberita. Sibahas ka kari empat pemere arah Jahwe si nampati kita tetap erbuah.
MULIAKEN JAHWE
3. (a) Menurut Johanes 15:8, kai alasen si pentingna erberita? (b) Bas perumpaman Jesus, buah anggur nggambarken kai? Engkai maka perumpaman e cocok?
3 Alasen si pentingna kel engkai maka kita erberita eme perban simuliaken ateta Jahwe ras mpebadia gelarNa. (Baca Johanes 15:1, 8.) Sanga iceritaken Jesus perumpaman kerna batang anggur, ikatakenna maka Jahwe eme perjuma, si mpeturah anggur. Jesus eme batang anggur e janah pengikutna eme dahan-dahan. (Johanes 15:5) Jadi bas perumpaman e, anggur nggambarken buah si ihasilken murid-muridna, ntah pe pendahin erberita si ilakoken kalak e. Ikataken Jesus man rasul-rasulna, “Adi terus ihasilken kena melala buah, imuliaken me Bapakku.” Adi ihasilken batang anggur buah si mejile, enda erban perjuma ipuji. Bage ka pe, adi silakoken si mehulina guna mpeseh berita kerna Kerajan, enda erban Jahwe ipuji ntah pe imuliaken.—Matius 25:20-23.
Adi silakoken si mehulina guna mberitaken kerna Kerajan, enda erban Jahwe imuliaken
4. (a) Uga carata mpebadia gelar Dibata? (b) Uga perasanndu perban banci kam mpebadiaken gelar Dibata?
4 Gelar Dibata nggo badia. La lit si banci silakoken guna erban gelar e lebih badia. Jadi, uga carata mpebadia gelar Dibata sanga erberita? Perdiateken kai si ikataken nabi Jesaya, “Inget, Aku, [Jahwe] si Mada Kuasa, badia kap.” (Jesaya 8:13) Sipebadiaken gelar Dibata, Jahwe, adi sianggap gelar e gelar si muliana kel arah kerina gelar, janah sisampati ka kalak si deban gelah itehna maka gelar e badia. (Matius 6:9) Contohna, sanga siajari kalak uga situhuna sipat-sipat Jahwe si luar biasa ras kerna tujunNa gelah manusia nggeluh rasa lalap bas Pardis, sisampati me kalak si deban meteh maka bual kerina si ikataken Setan kerna Jahwe. (Kejadin 3:1-5) Sipebadiaken ka gelar Jahwe sanga sisampati kalak meteh maka lit hak Jahwe “ngaloken kemulian, kehamaten, ras kuasa.” (Ketangkasen 4:11) Rune, si nggo 16 tahun jadi perintis ngataken, “Meriah kel kuakap meteh maka lit kesempatenku jadi saksi arah Pencipta kerinana. Enda erban tetap ateku erberita.”
ENGKELENGI JAHWE RAS ANAKNA
5. (a) Menurut Johanes 15:9, 10, kai alasenta erberita? (b) Kai si ikataken Jesus man murid-muridna gelah iangkai kalak e perluna la nyerah?
5 Baca Johanes 15:9, 10. Alasen si peduaken engkai maka kita erberita eme perban keleng ateta Jahwe ras Jesus. (Markus 12:30; Johanes 14:15) Ikataken Jesus man murid-muridna gelah ‘tetap kalak e i bas kekelengenna.’ Engkai maka bage nina? Perban itehna maka pengikutna arus tetap paguh gelah tetap banci jadi kalak Kristen situhu-tuhu. Bas Johanes 15:4-10, siteh rusur ipake Jesus kata “tetap” gelah iangkai murid-murid perluna la nyerah.
6. Uga carata ncidahken maka tetap ateta bas keleng ate Kristus?
6 Uga carata ncidahken maka tetap ateta bas keleng ate Kristus janah meriah kapna ngidah kita? Alu patuh man bana. Isuruh Jesus kita ngelakoken kai si nggo ilakokenna. Nina, “Aku nggo matuhi perentah-perentah Bapak janah aku tetap i bas kekelengenNa.” Jadi, nggo ibereken Jesus contoh man banta.—Johanes 13:15.
7. Kai hubungenna patuh ras engkelengi?
7 Jelas iban Jesus kai hubungenna patuh ras engkelengi sanga ikatakenna, “Ise pe si ngaloken janah ndalanken perentah-perentahku, eme kalak si ngkelengi aku.” (Johanes 14:21) Perentah si ibereken Jesus reh arah Bapakna nari, jadi adi patuh kita man Jesus guna erberita, sibuktiken maka keleng ateta Jahwe. (Matius 17:5; Johanes 8:28) Janah adi keleng ateta Jahwe ras Jesus, kalak e pe terus engkelengi kita.
MPERSINGETI KALAK SI DEBAN
8, 9. (a) Kai alasen si deban si erban kita erberita? (b) Uga kata-kata Jahwe bas Esekiel 3:18, 19 ras 18:23 ngiahken kita gelah tetap erberita?
8 Alasen si peteluken engkai maka kita erberita eme perban sipersingeti ateta kalak si deban kerna wari Jahwe. Bas Pustaka, Nuah ikataken “sekalak perberita.” (Baca 2 Petrus 2:5.) Sanga ipersingeti Nuah kalak si deban kerna Banjir si Mbelin, beritana termasuk ka kerna wari pengukumen. Engkai maka banci bage ninta? Perban nina Jesus, “Ope lenga Banjir si Mbelin, kalak i bas jaman e man ras minem, dilaki-dilaki erjabu ras diberu-diberu ipejabuken, seh asa Nuah masuk ku bas bahtra. Kalak e la ermediate seh ngayak reh Banjir si Mbelin ras ngkernepken kerina kalak e, bage me pagi kerehen Anak manusia.” (Matius 24:38, 39) Aminna pe teremen kalak la nggit megiken Nuah, tetap iberitakenna berita penghukumen si ipeseh Jahwe man bana.
9 Gundari pe, siberitaken berita kerna Kerajan guna mereken kesempaten Esekiel 18:23) Sanga erberita kita arah rumah ku rumah bage pe bas ingan si nterem jelma, ateta min sipersingeti kerina kalak maka reh me Kerajan Dibata janah imasapkenna doni si jahat enda.—Esekiel 3:18, 19; Daniel 2:44; Ketangkasen 14:6, 7.
man kalak si deban gelah itehna kai tujun Jahwe man manusia. Bali bagi Jahwe, ateta min ibegi kalak berita e gelah banci tetap “nggeluh.” (ENGKELENGI KALAK SI DEBAN
10. (a) Menurut Matius 22:39, kai alasenta erberita? (b) Kai si ilakoken Paulus ras Silas guna nampati penjaga penjara i Pilipi?
10 Alasen si peempatken engkai maka kita erberita eme perban keleng ateta kalak si deban. (Matius 22:39) Kekelengenta e erban kita tetap erberita, perban banci saja berubah tanggapen kalak sanga berubah keadanna. Contohna, Paulus ras Silas imasukken penentang ku penjara i kota Pilipi. Tapi bas tengah berngi, terjadi gempa bas penjara e janah talang me pintu penjara. Mbiar penjaga penjara kiam tahanenna, emaka bunuhna atena bana. Tapi serko Paulus, nina, “Ula bunuh bandu!” Isungkun penjaga e ia, “Kai si arus kulakoken gelah aku selamat?” Ijawap Paulus ras Silas, ‘Teklah man Tuan Jesus, gelah kam iselamatken.’—Perbahanen Rasul-Rasul 16:25-34.
Erberita kita perban keleng ateta Jahwe, Jesus, bage pe kalak si deban (Nen paragrap 5, 10)
11, 12. (a) Pelajaren kai si banci sidat arah penjaga penjara kerna dahin erberita? (b) Kai si erban kita tetap erberita?
11 Pelajaren kai si banci sidat arah penjaga penjara kerna dahin erberita? Perdiateken maka kenca gempa, berubah tanggapen penjaga penjara e janah ipindona penampat. Bage ka pe, kalak si la nggit megiken berita arah Pustaka banci saja berubah tanggapenna janah idaramina penampat sanga lit masalahna. Contohna, piga-piga kalak banci saja sedih perban ipecat arah dahinna ntah pe cerai ia. Si deban banci saja sedih akapna perban lit penakitna si mekelek ntah pe lit keluargana si mate. Sanga terjadi si bage, banci jadi tersungkun-sungkun kalak kerna kegeluhen enda, penungkunen si lenga pernah iukurina. Mungkin nina, ‘Kai si arus kulakoken gelah banci selamat?’ Banci jadi e me tangtangna si erban kalak e nggit mbegiken berita kerna pengarapen.
12 Jadi, adi terus kita erberita, ndigan pe banci siceritaken arapen si mereken penghiburen arah Pustaka man kalak si bage. (Jesaya 61:1) Charlotte, si nggo 38 tahun merintis ngataken, “Buen kalak gundari nggo lanai tehna tujun geluh. Perlu begi kalak e berita si meriah.” Ejvor, si nggo 34 tahun merintis ngataken, “Gundari, lebih asa si nggo-nggona, nterem kel kalak sedih. Kusampati kel ateku kalak e. E me si erban aku semangat erberita.” Jelas me, keleng man kalak si deban eme alasen si mehuli guna tetap erberita!
PEMERE SI NAMPATI KITA GELAH LA NYERAH
13, 14. (a) Kai pemere si ikataken bas Johanes 15:11? (b) Uga carata ndatken keriahen ukur bagi Jesus? (c) Uga keriahen ukur e nampati kita bas pelayanenta?
13 Bas berngi sope kematen Jesus, ikatakenna ka pemere si banci nampati
rasul-rasul tetap erbuah. Kai saja pemere e, janah uga e nampati kita gundari?14 Keriahen ukur. Jadi beban nge erberita e? Labo. Kenca iceritaken Jesus perumpaman kerna batang anggur, ikatakenna maka adi erberita kita pasti sigejapken keriahen ukurna. (Baca Johanes 15:11.) Engkai? Ingetlah, bas perumpaman Jesus, ikatakenna maka ia me batang anggur janah murid-muridna eme dahan-dahan. Idatken dahan lau ras pangan si iperlukenna adi tetap ia leket ku batang. Bage ka pe, banci sigejapken keriahen ukur bagi Jesus adi tetap kita ersada ras ia janah siusih ia. Selain si e, banci sidatken keriahen ukur Jesus, adi silakoken kai si ipindo Dibata. (Johanes 4:34; 17:13; 1 Petrus 2:21) Hanne, si nggo 40 tahun lebih merintis, ngataken, “Keriahen ukur si kugejapken kenca dung erberita ngiahken aku terus erberita.” Keriahen ukur mereken gegeh man banta gelah tetap erberita amin gia teremen kalak la nggit megikenca.—Matius 5:10-12.
15. (a) Kai pemere si ikataken bas Johanes 14:27? (b) Uga kedamen banci nampati kita tetap erbuah?
15 Kedamen. (Baca Johanes 14:27.) Bas karaben sope Jesus mate, ikatakenna man rasul-rasulna, “Kubereken man kena kedamenku.” Uga kedamen Jesus nampati kita tetap erberita? Adi tetap kita erberita, dame siakap perban siteh maka nggo meriah siban ukur Jahwe ras Jesus. (Masmur 149:4; Roma 5:3, 4; Kolose 3:15) Ulf, si nggo 45 tahun merintis ngataken, “Memang latih kuakap sanga erberita, tapi tuhu-tuhu puas kel kuakap janah lebih erguna geluhku.” Bujur kel sikataken perban banci sidatken kedamen enda!
16. (a) Kai pemere si ikataken bas Johanes 15:15? (b) Uga cara rasul-rasul banci tetap jadi teman Jesus?
16 Pertemanen. Kenca ikataken Jesus man rasul-rasulna maka ermeriah ukur atena kalak e, ijelaskenna ka engkai maka penting gelah kekelengen kalak e la egois. (Johanes 15:11-13) Kenca e nina, “Kugelari kena teman-temanku.” Luar biasa kel banci jadi teman Jesus! Tapi uga carana gelah rasul-rasul e tetap jadi temanna? Kalak e arus ‘terus ngasilken buah.’ (Baca Johanes 15:14-16.) Maksudna, terus erberita. Dua tahun sope si e, iperentahken Jesus rasul-rasulna gelah mberitaken, “Kerajan surga nggo ndeher.” (Matius 10:7) Enda me alasenna, bas berngi sope Jesus mate ipegegehina murid-muridna gelah ula pernah nyerah bas dahin erberita. (Matius 24:13; Markus 3:14) Pasti lit tentangen i bas erberita, tapi banci kalak e berhasil janah tetap jadi teman Jesus. Uga carana? Alu penampat pemere si deban.
17, 18. (a) Kai pemere si ikataken bas Johanes 15:7? (b) Uga pemere e nampati murid-murid Jesus? (c) Pemere siapai si nampati kita gundari?
17 Jawapen arah totota. Nina Jesus, “Pindolah kai si ate kena ipindo kena, e pasti ibereken man kena.” (Johanes 15:7, 16) Janji Jesus enda pasti mpegegehi rasul-rasul! * (Nen keterangen tambahen.) Memang, lenga bo iangkai rasul-rasul kel maka lanai ndekah mate me Jesus. Tapi kematen Jesus labo ngertiken maka kalak e lanai ndatken penampat. Jahwe siap njawap pertoton kalak e janah isampatiNa bas erberita. La ndekah kenca kematen Jesus, ipindo rasul-rasul man Jahwe gelah pang kalak e, janah ijawap Jahwe totona.—Perbahanen Rasul-Rasul 4:29, 31.
Tek kita ijawap Jahwe nge totota mindo penampat (Nen paragrap 18)
18 Gundari pe bage kang. Adi la kita nyerah erberita, tetap kita jadi teman Jesus. Tek kita maka Jahwe pe siap njawap totota mindo penampatNa sanga mesera siakap erberita. (Pilipi 4:13) Meriah kel siakap ijawap Jahwe totota janah nggit Jesus jadi temanta. Kerina pemere arah Jahwe enda nampati kita gelah tetap erbuah.—Jakup 1:17.
19. (a) Engkai maka tetap kita erberita? (b) Kai saja si nampati kita ndungi dahin si nggo ibereken Dibata man banta?
19 Bas artikel enda, nggo sipelajari empat alasen engkai maka tetap kita erberita: guna muliaken Jahwe ras mpebadia gelarNa, mbuktiken maka keleng ateta Jahwe ras Jesus, mpersingeti kalak si deban, janah guna mbuktiken maka keleng ateta kalak si deban. Sipelajari ka empat pemere arah Dibata: keriahen ukur, kedamen, pertemanen, ras jawapen arah totota. Pemere enda mpegegehi kita guna ndungi dahin si nggo ibereken Dibata man banta. Meriah kel ukur Jahwe sanga idahNa erusaha kel kita ‘ngasilken melala buah’!
^ par. 17 Sanga ngerana-ngerana Jesus ras rasul-rasul, iingetkenna kalak e piga-piga kali maka ijawap Jahwe nge pertoton kalak e.—Johanes 14:13; 15:7, 16; 16:23.