1, 2. (a) Engkai anak muda banci menang ngelawan Setan ras malekat-malekat jahat? (Nen gambar pemena artikel.) (b) Kai kari si man bahasenta?

IPESERI rasul Paulus kalak Kristen ras tentera. Kita sangana erperang, janah musuhta tuhu-tuhu lit! Kita labo ngelawan manusia, tapi Setan ras malekat-malekat jahat. Kalak e nggo ribun tahun jadi prajurit janah ahli kel nyerang manusia. Emaka tempa-tempa lo mungkin siakap kita banci menang, khususna adi kita nguda denga. Tapi, banci nge anak muda naluken musuh si megegeh e? Banci, janah kalak e me si menang! Engkai? Perban ialoken kalak e gegeh arah Jahwe. Janah bagi tentera si nggo terlatih, kalak e pe banci ‘make kerina perlengkapen perang i bas Dibata nari,’ alu bage nggo ersikap kalak e guna erperang.​—Baca Epesus 6:10-12.

² Sanga igunaken Paulus perumpaman enda, mungkin si ingetna eme peralaten perang si ipake tentera Roma. (Perbahanen Rasul-Rasul 28:16) Bas artikel  enda, sibahas kari perumpaman si mejile e. Sibahas ka kai si ikataken piga-piga anak muda kerna kai tentangenna ras kai manpaatna make kerina peralaten perang rohanita.

3, 4. Engkai kebenaren arah Pustaka ipeseri ras ikat pinggang tentera Roma?

³ Baca Epesus 6:14. Ikat pinggang tentera Roma iban arah logam nari guna ngelindungi awak tentera janah erban pelindung tentenna la miser. Bas piga-piga ikat pinggang lit ingan nggantungken pedang. Adi keskes ikat pinggangna, nggo tetap ukurna lawes erperang.

⁴ Bagi ikat pinggang e, kebenaren si nggo sipelajari arah Kata Dibata banci ngelindungi kita arah ajaren si salah. (Johanes 8:31, 32; 1 Johanes 4:1) Janah adi reh kelengna ateta kebenaren e reh gampangna siakap ngikutken patoken Dibata, ntah pe makeken ‘pelindung tententa.’ (Masmur 111:7, 8; 1 Johanes 5:3) Selain si e, adi lebih siangkai kebenaren, reh gampangna siakap ngelawan musuhta.​—1 Petrus 3:15.

5. Engkai maka arus lalap sikataken kai si benar?

⁵ Perban penting kel siakap kebenaren si lit bas Pustaka, sipatuhi kai si ikataken Pustaka janah lalap sikataken kai si benar. Erbual eme salah sada senjata Setan si ampuh kel. Bual banci erban rugi kalak si icakapken bage pe kalak si tek man bual e. (Johanes 8:44) Jadi, aminna pe kita la sempurna, siusahaken kel gelah ula erbual. (Epesus 4:25) Enda labo gampang. Abigail si umurna 18 tahun ngataken, “Ngataken kai si benar tempa-tempa labo lalap erguna, apai ka adi erbual kita banci erban kita la kena masalah.” Jadi engkai maka lalap ikatakenna kai si benar? Nina, “Adi kukataken kai si benar bersih pusuh ras perukurenku i lebe-lebe Jahwe. Orang tua ras teman-temanku pe banci tek man bangku.” Victoria si umurna 23 tahun ngataken, “Adi katakenndu kebenaren ras ibelandu kinitekenndu, banci saja itekan kalak kam. Tapi lalap lit manpaatna: Tenang akapndu, reh deherna kam ras Jahwe, janah kalak si keleng atena kam ngergai kam.” Tehndu nge engkai maka penting lalap make “ikat pinggang kebenaren”?

6, 7. Engkai maka patoken Jahwe si benar ipeseri ras pelindung tenten?

⁶ Pelindung tenten tentera Roma rusuren iban arah potongen besi si isusun gelah banci ipake bagi baju. Potongen besi e iiket alu tali si iban arah kulit nari janah isambungken alu pengait si bali bagi takal ikat pinggang. Buen potongen besi si lit i barana. Penutup tenten e erban ia la bebas ergerak. Janah  arus ka terus iperiksana gelah besi e tetap bas inganna. Tapi pelindung e ngelindungi jantung bage pe organ-organ si debanna arah pedang ntah pe anak panah!

⁷ Patoken Jahwe si benar si ngelindungi pusuh ntah pe perukurenta banci ipeseri ras pelindung tenten. (Kuan-kuanen 4:23) Labo pernah iganti tentera pelindung tentenna si iban arah besi ku logam si kurang mejile. Bage ka pe, ula min pernah siganti patoken Jahwe si benar alu kai si iakap kita benar. Labo kita ngasup ngelindungi pusuhta. (Kuan-kuanen 3:5, 6) Emaka arus rusur siperiksa “pelindung tententa” gelah banci ngelindungi pusuhta.

8. Engkai maka arus siikutken patoken Jahwe?

⁸ Pernah nge igejapkenndu mon-mon patoken Jahwe e erban lanai kam bebas ngelakoken kai si meriah kapndu? Daniel si umurna 21 tahun ngataken, “Itokohi guru ras teman sekolahku aku perban kuikutken patoken Pustaka. Pernah, lanai aku percaya diri janah tertekan kuakap.” Tapi uga perasanna gundari? Nina, “Dungna, kuteh kai gunana ngikutken patoken Jahwe. Piga-piga ‘temanku’ nggo narkoban; si deban ipedarat arah sekolah. Sedih kel kuakap ngidah kegeluhen kalak e. Jahwe tuhu-tuhu ngelindungi kita.” Madison si umurna 15 tahun ngataken, “Erjuang kel aku ngikuti patoken Jahwe gelah ula ngelakoken kai si meriah akap teman sebayaku.” Jadi, kai si ilakokenna? Nina, “Kuinget lalap maka aku maba gelar Jahwe janah godan e bagi anak panah si ipanahken Setan man bangku. Puas kel kuakap adi kumenangken peperangen e.”

9-11. (a) Sepatu gambaren kai si ipake kalak Kristen? (b) Uga carana gelah meriah siakap erberita?

⁹ Baca Epesus 6:15. Tentera Roma la banci lawes erperang adi la lit sepatuna. Sepatu kalak e iban arah telu lapis kulit, emaka nteguh kel sepatuna e. Tapi sepatu e pe arus ntabeh makesa, alu bage ntabeh kapna erdalan janah la gampang celus.

¹⁰ Bagi sepatu si ipake tentera Roma nampati kalak e gelah menang bas perang, sepatu gambaren si ipake kita pe nampati kita “mberitaken berita si meriah kerna kedamen.” (Jesaya 52:7; Roma 10:15) Tapi, mon-mon iperluken sipat si pang i bas erberita. Bo, si umurna 20 tahun ngataken, “Mbiar aku erberita man teman sada kelasku. Mela kuakap. La kuteh engkai maka bage aku mbarenda. Gundari meriah kel kuakap erberita man kalak si sebaya ras aku.”

¹¹ Nterem anak muda Kristen meriah akapna erberita adi persiapen ia lebe. Uga carandu erban persiapen? Julia, si umurna 16 tahun ngataken, “Lalap lit  kuban baca-bacanta bas tas sekolahku, janah kubegiken pendapat ras kiniteken teman-temanku. Dungna, banci kuteh uga nampati kalak e. Kenca kuban persiapen, banci me kukataken kai si sangana tuhu-tuhu iperluken kalak e.” Makenzie, si umurna 23 tahun ngataken, “Adi mehuli kam janah nggit megiken, itehndu me kai si sangana iadapi teman sebayandu. Kubaca kerina baca-bacanta kerna anak muda. Emaka banci kupeseh sada topik arah Pustaka ntah pe jw.org si banci nampati kalak e.” Adi persiapen kam muat erberita, enda bali bagi make “sepatu” si pas man bandu.

12, 13. Kai piga-piga “anak panah si gara” si ipanahken Setan?

¹² Baca Epesus 6:16. Tentera Roma maba ampang-ampang si mbelang. Enda ngelindungi ia arah pedang, tombak, bage pe anak panah, mulai bara nari seh ku lututna.

¹³ “Anak panah si gara” si ipanahken  Setan man bandu banci jadi eme bual kerna Jahwe. Ate Setan gelah iakapndu maka labo keleng ate Jahwe kam janah labo diate kalak kam. Ida, si umurna 19 tahun ngataken, “Rusur lit perasanku maka labo aku ndeher ras Jahwe janah la Ia nggit jadi Temanku.” Kai si ilakokenna sanga bage perasanna? “Perpulungen mpegegehi kinitekenku. Biasana kundul ngenca aku, la pernah mereken komentar, perban kuakap labo lit kalak si merhat megiken komentarku. Gundari, nggo kuban persiapen guna perpulungen, janah kuusahaken ka mereken komentar dua ntah telu kali. Enda labo gampang, tapi meriah kel ukurku. Turang senina pe mpegegehi aku. Kenca mulih perpulungen kuteh maka kepeken keleng ate Jahwe aku.”

14. Kai si banci sipelajari arah pengalamen Ida?

¹⁴ Ampang-ampang tentera seri lalap belangna. Tapi arah pengalamen Ida, siteh maka kinitekenta labo bage. Kinitekenta banci reh belinna ntah reh kitikna, reh paguhna ntah pe reh lemahna. Enda pilihenta. (Matius 14:31; 2 Tesalonika 1:3) Perban “kiniteken jadi ampang-ampang” si ngelindungi kita, arus sijaga kiniteken e gelah reh belinna ras reh paguhna!

15, 16. Engkai arapen ipeseri ras pelindung takal?

¹⁵ Baca Epesus 6:17. Ipake tentera Roma pelindung takal guna ngelindungi takalna, kerahungna, ras ayona. Mon-mon pelindung takal e lit tagangenna, emaka banci ibaba tentera alu tanna.

¹⁶ Bagi pelindung takal si ngelindungi otak, “arapen keselamaten” ngelindungi pikirenta. (1 Tesalonika 5:8; Kuan-kuanen 3:21) Arapen erban kita tetap fokus man janji Dibata, janah la mis kitik ukurta bicara lit pe masalahta. (Masmur 27:1, 14; Perbahanen Rasul-Rasul 24:15) Tapi, gelah arapen e ngelindungi kita, arapen e arus tuhu-tuhu nyata man banta. Arus sipake “pelindung takal” bas takalta, labo sibaba-baba alu tanta!

17, 18. (a) Kai si ilakoken Setan gelah silepasken pelindung takalta? (b) Uga carana gelah ula kita itipu Setan?

¹⁷ Kai si ilakoken Setan gelah silepasken pelindung takalta? Cuba ukuri kai si nggo ilakokenna man Jesus. Iteh Setan maka Jesus me pagi si minpin manusia. Tapi Jesus arus menderita janah mate lebe. Dung e, arus ka itimaina waktu si nggo itetapken Jahwe gelah ia jadi Raja. Emaka, itawarken Setan man bana kesempaten gelah banci mis merentah. Erjanji Setan maka adi isembah Jesus ia sekali saja, mis banci Jesus jadi penguasa doni enda. (Lukas 4:5-7) Iteh Setan ka maka nggo erjanji Jahwe mereken doni si mbaru man banta. Tapi arus sitimai janji e, janahta nimai pe melala ka masalah si arus siadapi. Emaka itawarken Setan man banta kesempaten gelah ntabeh pergeluhta gundari. Atena siutamaken kesenangenta labo Kerajan Dibata.​—Matius 6:31-33.

¹⁸ Nterem anak muda Kristen la nggit  itipu Setan. Contohna, Kiana si umurna 20 tahun ngataken, “Kuteh maka Kerajan Dibata ngenca si banci ndungi masalahta.” Uga arapenna mpengaruhi perukuren bage pe kegeluhenna? Enda erban ia tetap nginget, maka kerina si lit bas doni enda sementara ngenca. Asangken nggunaken keterampilenna gelah ndatken dahin si mejile bas doni enda, igunaken Kiana waktu ras gegehna guna ngelayani Jahwe.

19, 20. Uga carana gelah reh beluhna kita make Kata Dibata?

¹⁹ Ipake tentera Roma pedang si gedangna 50 cm. Beluh kel tentera e make pedangna, perban nggo latihen kalak e tiap wari.

²⁰ Ikataken rasul Paulus maka Kata Dibata e seri ras pedang. Enda nggo ibereken Jahwe man banta. Tapi arus sipelajari cara makesa gelah beluh kita mbela kinitekenta ntah pe mperobahi cara rukurta. (2 Korinti 10:4, 5; 2 Timotius 2:15) Uga carana gelah reh beluhna kam makesa? Sebastian si umurna 21 tahun ngataken, “Kutulis sada ayat tiap kenca dung kubaca sada pasal i bas pembacan Pustakaku. Janah kuban daftar ayat favoritku.” Enda erban lebih iangkaina uga perukuren Jahwe. Nina Daniel ka, “Sanga kubaca Pustaka, kupilih ayat si kuakap banci nampati kalak si kujumpai sanga erberita. Kuidah maka mehuli tanggapen kalak adi idahna tuhu-tuhu tek kita ku Pustaka janah silakoken si mehulina guna nampati kalak e.”

21. Engkai maka la perlu kita mbiar man Setan ras malekat-malekat jahat?

²¹ Kenca nggo sipelajari contoh-contoh arah anak muda bas artikel enda, la kita perlu mbiar man Setan ras malekat-malekat jahat. Payo maka kalak e megegeh, tapi ndauh gegehen Jahwe. Janah kalak e la banci nggeluh si rasa lalap. Ipenjaraken pagi kalak e janah la banci igodana manusia bas Pemerentahen Jesus si Seribu Tahun, kenca si e, imasapken me ia kerina. (Ketangkasen 20:1-3, 7-10) Sitandai ise musuhta, umpanna, bage pe tujunna. Alu penampat Jahwe, banci kita menang ngelawan ia!