1, 2. (a) Engkai maka terpegegehi kel kita ngidah turang senina si tetap erberita bas daerah si la nterem kalak megikenca? (Nen gambar pemena artikel.) (b) Kai si ikataken Jesus kerna erberita ‘i kutana’? (Nen keterangen tambahen.)

SERGIO RAS OLINDA eme pasangen perintis i Amerika Serikat. Umur kalak e nggo lebih 80 tahun. Janah nggo mesera kapna erdalan perban nggo mesui nahena. Tapi, bagi si nggo ilakoken kalak e ertahun-tahun dekahna, erdalan kalak e ku ingan si nterem jelma jam pitu erpagi-pagi. Jaga gerai kalak e bas deher terminal bus janah itawarkenna baca-bacanta man kalak si mentas. Teremen kalak la mperdiatekenca, tapi Sergio ras Olinda tetap jaga gerai janah tetap kalak e cirem. Nggo kenca ben, manjar-anjar kalak e erdalan mulih. Paginna, jam pitu erpagi-pagi mulihken ka kalak e jaga gerai ku terminal ndai. Nggo ertahun-tahun kalak e erberita enem kali sada minggu.

² Nterem turang seninata si setia bagi Sergio ras Olinda si erberita bas deher inganna tading piga-piga tahun  dekahna, aminna pe nterem kalak si la nggit megikenca. Banci jadi kam pe erberita bas daerah si bage ka. Adi bage, ipuji kami kam, perban tetap kam semangat ras terus kam erberita amin gia mesera. * (Nen keterangen tambahen.) Usihenndu banci mpegegehi nterem turang senina, termasuk turang senina si nggo erpengalamen. Perdiateken kai si ikataken piga-piga pertua keliling enda, “Sanga erberita aku ras turang seninata si setia, terpegegehi kel aku ngidah usihen si iberekenna.” “Kesetian kalak e erban aku reh semangatna janah lebih ergiah-giah bas pelayanenku.” “Malem kel pusuhku ngidah usihen kalak e.”

3. Kai telu penungkunen si man bahasenta? Engkai?

³ Bas artikel enda sijawap kari telu penungkunen: Engkai mon-mon kitik ukurta? Kai ertina erbuah? Kai si banci nampati kita la nyerah seh erbuah? Jawapen arah penungkunen enda banci erban kita tetap semangat guna ngelakoken tugas si ibereken Jesus eme terus erberita.

4. (a) Uga perasan Paulus perban perbahanen kalak Jahudi? (b) Engkai maka bage penggejapenna?

⁴ Pernah nge kitik ukurndu perban la ibegiken kalak kam erberita bas daerahndu? Adi pernah, pasti iangkaindu perasan rasul Paulus. Nggo 30 tahun ia erberita, janah nterem si isampatina jadi kalak Kristen. (Perbahanen Rasul-Rasul 14:21; 2 Korinti 3:2, 3) Tapi, la banci ibanna melala kalak Jahudi jadi Kristen. Nterem arah kalak e la nggit megiken Paulus, malahen lit ka si nganiaya ia. (Perbahanen Rasul-Rasul 14:19; 17:1, 4, 5, 13) Uga perasan Paulus perban perbahanen kalak e? Nina, “Ceda kel ateku janah megogo kel kuakap la erngadi-ngadi.” (Roma 9:​1-3) Engkai maka bage penggejapenna? Perban keleng kel atena dahin erberita bage pe kalak si deban. Ermediate kel Paulus man kalak Jahudi emaka sedih kel akapna sanga itulak kalak e perkuah ate Dibata.

5. (a) Kai si ngiahken kita erberita? (b) Engkai maka wajar adi mon-mon kitik ukurta?

⁵ Bagi Paulus, kita pe erberita perban ermediate man kalak si deban janah sisampati ateta kalak e. (Matius 22:39; 1 Korinti 11:1) Arah pengalamenta siteh maka ngelayani Jahwe eme cara nggeluh si mehulina. Emaka nggit kita nampati kalak si deban gelah ndatken cara nggeluh si mehulina e! Enda me alasenna engkai maka terus siiahken kalak e gelah erlajar kerna Jahwe ras gelah itehna kai sura-sura Jahwe man manusia. Enda bali bagi sanga kita mereken pemere si seh kel jilena janah mindo kel kita, ‘Aloken min enda.’ Emaka sanga itulakna pemereta e, wajar adi ‘ceda kel ateta’ bagi Paulus. Ceda pusuhta labo perban kurang kinitekenta, tapi perban keleng kel ateta kalak e. Emaka aminna pe mon-mon kitik ukurta, tetap dengang kita erberita. Pasti setuju kita ras Elena, si  nggo 25 tahun merintis, si ngataken, “Memang mesera erberita. Tapi, enda me dahin si mehulina.”

6. Penungkunen kai si man bahasenta?

⁶ Kai si erban kita tek maka banci kita sukses la soal i ja kita erberita? Guna njawap penungkunen si penting enda, mari sibahas dua perumpaman Jesus sanga iceritakenna kerna perluna “erbuah.” (Matius 13:23) Perumpaman si pertama kerna batang anggur.

7. (a) Bas perumpaman Jesus, ise nge maksudna “perjuma,” “batang anggur,” ras “dahan-dahan”? (b) Penungkunen kai si perlu sijawap?

⁷ Baca Johanes 15:1-5, 8. Bas perumpaman enda, ijelasken Jesus maka Jahwe eme “perjuma,” Jesus eme “batang anggur,” janah murid-muridna eme “dahan-dahan.” * (Nen keterangen tambahen.) Ikataken Jesus man rasul-rasulna, “Adi terus ihasilken kena melala buah, imuliaken me Bapakku janah e jadi bukti maka kena me murid-muridku.” Jadi, kai ertina erbuah? Bas perumpaman e, la ijelasken Jesus kai maksudna buah e, tapi iberekenna petunjuk si banci nampati kita guna njawap penungkunen e.

8. (a) Bas perumpaman Jesus, engkai maka “erbuah” labo maksudna ndatken murid si mbaru? (b) Pendahin si uga si isuruh Jahwe gelah silakoken?

⁸ Nina Jesus kerna Bapakna, “Dahan-dahan si la erbuah itektekNa.” Maksudna, banci kita jadi umat Jahwe adi kita erbuah. (Matius 13:23; 21:43) Jadi, bas perumpaman e erbuah labo ertina ndatken murid si mbaru. (Matius 28:19) Adi e kin maksudna, Saksi si setia si la lit isampatina kalak si deban jadi murid Jesus bali bagi dahan si la erbuah. Tapi enda labo tuhu! Engkai? Perban la banci sipaksa ise pe jadi murid. Jahwe Dibata si perkeleng. La pernah isuruhNa kita ngelakoken pendahin si la ngasup kita ngelakokenca, tapi pendahin si banci silakoken nge si isuruhNa.​—Ulangen 30:​11-14.

9. (a) Kai si perlu silakoken gelah erbuah? (b) Perumpaman kai si man bahasenta seterusna?

⁹ Adi bage, kai nge maksudna erbuah? Maksudna pasti pendahin si ngasup kita kerina ngelakokenca. Pendahin kai si ibereken Jahwe man kerina umatNa? Mberitaken berita si meriah kerna Kerajan Dibata. * (Nen keterangen tambahen.) (Matius 24:14) Perumpaman Jesus kerna sekalak perjuma njelasken kerna si e. Mari sibahas perumpamanna.

10. (a) Bas perumpaman Jesus, kai maksudna benih ras taneh? (b) Kai si ihasilken batang gandum?

¹⁰ Baca Lukas 8:5-8, 11-15. Bas perumpaman kerna perjuma, ijelasken Jesus maka benih eme “kata Dibata,” ntah pe berita kerna Kerajan Dibata. Taneh eme pusuh manusia. Benih si ndabuh bas taneh si subur, mulai me rurat, turah, janah reh galangna.  Dungna, “ihasilkenna buah 100 kali lipat.” Bicara batang gandum si isuan e, kai nge si ihasilkenna? Batang gandum si mbaru nge? Lang, tapi benih, benih e me si turah jadi batang gandum. Bas perumpaman enda, sada benih ngasilken 100 benih. Kai pelajarenna bas pelayanenta?

11. (a) Pelajaren kai si banci sidat arah perumpaman sekalak perjuma kerna pelayanenta? (b) Uga carata ngasilken benih si mbaru?

¹¹ Sanga iajari orangtuata ntah Saksi Jahwe si deban kita kerna Kerajan Dibata, kalak enda nggo nuan benih bas taneh si subur. Meriah kel ukur kalak e sanga sialoken berita e. Benih e terus turah janah reh galangna dungna banci erbuah. Bali bagi batang gandum ndai la ngasilken batang gandum si mbaru, tapi benih si mbaru, kita pe labo ndatken murid si mbaru tapi benih si mbaru. * (Nen keterangen tambahen.) Uga carata ngelakokenca? Tiap siberitaken kerna Kerajan Dibata, nggo sipebue janah siambur benih si nggo turah bas pusuhta. (Lukas 6:45; 8:1) Jadi, adi terus siberitaken berita kerna Kerajan Dibata, berarti ‘megenggeng kita seh erbuah.’

12. (a) Pelajaren kai si banci sidat arah perumpaman Jesus kerna batang anggur ras sekalak perjuma? (b) Kai si igejapkenndu arah pelajaren e?

¹² Pelajaren kai si banci sidat arah perumpaman Jesus kerna batang anggur ras sekalak perjuma? Siteh maka “erbuah” labo perban nggit ntah lang kalak megiken beritata. Tapi perban nggit ntah lang kita terus erberita. Paulus pe bage nge nina sanga ikatakenna, “Ialoken kalak e pagi upah sue ras pendahinna sekalak-sekalak.” (1 Korinti 3:8) Iupahi Jahwe kita perban pendahinta, labo perban hasil arah pendahinta e. Matilda, si nggo 20 tahun merintis ngataken, “Meriah kel kuakap meteh maka iupahi Jahwe pendahinta.”

13, 14. Menurut Roma 10:1, 2, kai alasenna maka terus Paulus erberita?

¹³ Kai si nampati kita ‘megenggeng seh erbuah’? Mari sibahas terbagesen  contoh si ibereken Paulus. Siteh maka kitik ukur Paulus perban itulak kalak Jahudi berita kerna Kerajan Dibata. Tapi, tetap Paulus erberita man kalak e. Ikatakenna uga perasanna kerna kalak Jahudi, nina, “Sura-sura pusuhku ras pemindonku man Dibata gelah iselamatken min kalak e. Pang aku ngatakenca kalak e tuhu-tuhu semangat nembah Dibata, tapi semangatna e labo menurut pemeteh si benar.” (Roma 10:​1, 2) Jadi, engkai maka tetap Paulus erberita?

¹⁴ Pertama, erberita Paulus man kalak Jahudi perban ‘sura-sura pusuhna.’ Atena gelah selamat min kalak e. (Roma 11:​13, 14) Si peduaken, ikatakenna kerna ‘pemindonna man Dibata.’ Ipindo Paulus man Jahwe gelah nggit kalak Jahudi ngaloken berita kerna Kerajan. Si peteluken, nina Paulus, “Kalak e tuhu-tuhu semangat nembah Dibata.” Iidah Paulus si mehuli arah kalak e janah ianggapna kalak e calon umat Jahwe. Itehna maka semangat bas kalak Jahudi banci berubah jadi semangat ngelayani jadi murid Kristus, bali bagi ia.

15. Uga carata ngusih Paulus? Bereken contohna.

¹⁵ Uga carata ngusih Paulus? Pertama, arus nggit kita ndarami kalak si “pusuh ras perbahanenna ngaloken kebenaren guna kegeluhen si rasa lalap.”  Si peduaken, sipindo man Jahwe gelah sampatiNa kalak si tutus gelah nggit megiken beritata. (Perbahanen Rasul-Rasul 13:48; 16:14) E me si ilakoken Silvana si nggo hampir 30 tahun merintis. Nina, “Sope lawes aku erberita bas daerahku, ertoto aku man Jahwe gelah positip perukurenku.” Ertoto ka kita gelah isampati malekat kita jumpa ras kalak si nggit megiken. (Matius 10:​11-13; Ketangkasen 14:⁠6) Robert, si nggo lebih 30 tahun merintis ngataken, “Meriah kel erdahin ras malekat si meteh uga kegeluhen si mpuna rumah.” Si peteluken, cubakenlah ngenen kai si mehuli bas kalak si deban janah anggap ia calon turang seninata. Carl, pertua si nggo iperidiken 50 tahun si lewat, ngataken, “Kuperdiateken tanda-tanda si kitik, bagi perciremna, pengalo-ngalona, ntah pe penungkunenna.” Adi silakoken kerina e, banci kita ‘megenggeng seh erbuah’ bagi si ilakoken Paulus.

16, 17. (a) Pelajaren kai si banci sidat arah Pengerana 11:6? (b) Kai pengaruh pendahinta man kalak si mperdiateken kita?

¹⁶ Ingetlah maka lit pengaruhna pendahin erberita e man kalak si deban, amin gia tempa la lit si megikenca. (Baca Pengerana 11:6.) Iperdiateken kalak kita. Iperdiatekenna maka sikap peruista, sopan janah ramah kita. Enda banci erban kalak e terkesan, janah banci erban kalak si negatip pengakapna kerna kita jadi lebih positip. Enda me si ialami Sergio ras Olinda.

¹⁷ Nina Sergio, “Perban sakit, la kami jaga gerai piga-piga waktu dekahna. Sanga mulihken kami jaga gerai, isungkun kalak si mentas kami, ‘Ku ja kena? Nggo tedeh ate kami pe.’” Nina Olinda ka janahna cirem, “Idada-dadaken supir bus tanna man kami janah piga-piga arah motorna nari ngataken, ‘Mehuli kel si ilakoken kena e!’ Ipindo kalak e ka baca-bacanta.” Sengget kel Sergio ras Olinda sanga reh sekalak dilaki ku gerai janah iberekenna kalak e sada iket bunga ras katakenna bujur perban kai si nggo ilakoken kalak e.

18. Engkai maka iusahakenndu ‘megenggeng seh erbuah’?

¹⁸ Adi ngambur benih kam pagi-pagi nari seh ku berngi bas mberitaken Kerajan Dibata, ikut me kam bas pendahin si penting guna mereken “kesaksin man kerina bangsa.” (Matius 24:14) Si pentingna, meriah ukurndu perban tehndu meriah ukur Jahwe banndu. Keleng kel ateNa kerina si ‘megenggeng seh erbuah’!