1. Kenca Adam ras Hawa erdosa, kai si iperjelas Jahwe kerna musuhta?

ITEH Adam maka nipe la banci ngerana. Jadi, sanga itehna lit nipe si ngerana man Hawa, banci jadi sadar ia maka si ngerana e situhuna makhluk roh. (Kejadin 3:1-6) La iteh Adam ras Hawa ise makhluk roh e. Tapi ipilih Adam ngikutken makhluk si la itandaina e janah mberontak ngelawan Bapakna si perkeleng i surga. (1 Timotius 2:14) Kenca si e, mulai me iperjelas Jahwe kerna musuh e janah erjanji maka imasapkenNa me pagi ia. Tapi ibereken Jahwe persinget maka i bas sementara waktu itentang makhluk roh si ngerana arah nipe e me kerina si ngkelengi Dibata.​—Kejadin 3:15.

2, 3. Banci saja, kai alasen Jahwe maka sitik ngenca itulisken kerna Setan sanga Mesias lenga reh?

² La pernah ikataken Jahwe man banta gelar malekat si mberontak ngelawan Ia. * (Nen keterangen tambahen.) La seh 2.500 tahun kenca pemberontaken i Eden me maka  ikataken Jahwe ise si mberontak e. (Jop 1:6) Itandai ia “Setan,” si ertina “Penentang.” Telu buku ngenca bas Kitap-Kitap Heber lit itulisken kerna Setan eme 1 Kronika, Jop, ras Sakaria. Engkai maka sitik ngenca itulisken kerna musuh enda sanga Mesias lenga reh?

³ La ijelasken Jahwe bas Kitap-Kitap Heber melala keterangen kerna Setan ras kai si ilakokenna. Tujun Kitap-Kitap Heber eme nampati kalak gelah nandai ras ngikutken Mesias. (Lukas 24:44; Galati 3:24) Sanga Mesias reh ku doni, ipake Jahwe ia bage pe murid-muridna guna njelasken terbuen kerna Setan bage pe malekat-malekat si ergabung ras ia. * (Nen keterangen tambahen.) Enda cocok, perban Jesus ras kalak si erpengarapen ku surga me si igunaken Jahwe guna nasapken Setan ras pengikut-pengikutna.​—Roma 16:20; Ketangkasen 17:14; 20:10.

4. Engkai maka la perlu kita mbiar man Iblis?

⁴ Rasul Paulus nggambarken Setan si Iblis bagi “singa si erngaung,” janah ikataken Johanes ia “nipe” ras “naga.” (1 Petrus 5:8; Ketangkasen 12:9) Tapi la perlu kita mbiar man Iblis perban terbatas kuasana. (Baca Jakup 4:7.) Janah ilindungi Jahwe, Jesus, ras malekat-malekat si setia kita. Alu penampat kalak e, banci silawan musuhta. Tapi, perlu denga sijawap telu penungkunen penting enda: Uga belinna pengaruh Setan man manusia? Uga carana mpengaruhi manusia? Ras kai si la banci ilakokenna? Mari sijawap penungkunen enda janah siperdiateken kai pelajarenna man banta.

5, 6. Engkai maka pemerentahen manusia la banci ngubah keadan doni gelah reh ulina?

⁵ Nterem malekat ngikutken Setan mberontak ngelawan Dibata. Sanga Banjir si Mbelin lenga reh, igoda Setan piga-piga malekat gelah erhubungen seks ras diberu-diberu. Emaka secara gambaren bo ngenca sanga ikataken Pustaka maka isaren naga si ndabuh arah langit sepertelu bintang-bintang. (Kejadin 6:1-4; Judas 6; Ketangkasen 12:3, 4) Sanga lanai nggit malekat-malekat e jadi anggota keluarga Dibata i surga, situhuna ipilihna Setan jadi penguasana. Ula min siakap malekat-malekat e kelompok si la teratur. Bas alam roh, iban Setan pemerentahenna alu ngusih Kerajan Dibata. Ia me rajana, ia me si ngatur malekat-malekat pemberontak, iberekenna kalak e kuasa janah ibanna jadi penguasa doni.​—Epesus 6:12.

⁶ Igunaken Setan organisasina e  guna ngkuasai pemerentahen manusia. Enda tuhu, perban icidahkenna man Jesus “kerina kerajan doni,” janah nina, “Kubereken kari kerina kuasa enda ras kerina kemulianna man bandu. Erkiteken enda nggo iserahken man bangku, banci kubereken man ise pe ateku.” (Lukas 4:5, 6) Amin pe melala pemerentah ngelakoken kai si mehuli man rayatna, janah piga-piga memang tutus atena nampati rayatna, tapi la lit pemerentahen manusia si banci ngubah keadan doni gelah reh ulina.​—Masmur 146:3, 4; Ketangkasen 12:12.

7. Uga cara Setan nggunaken agama palsu ras dunia bisnis? (Nen gambar pemena artikel.)

⁷ Igunaken Setan ras malekat-malekat si jahat agama palsu ras dunia bisnis guna nipu “kerina kalak si tading i doni,” ntah pe kerina manusia. (Ketangkasen 12:9) Isebarken Setan kai si la tuhu kerna Jahwe alu nggunaken agama palsu, janah iusahakenna ka gelah la iteh kalak gelar Dibata. (Jeremia 23:26, 27) Hasilna, piga-piga kalak si erpengakap ilayanina Dibata, situhuna malekat jahat nge si ilayanina. (1 Korinti 10:20; 2 Korinti 11:13-15) Isebarken Setan ka kai si la tuhu alu nggunaken dunia bisnis, misalna sen ras barang-barang banci erban manusia bahagia. (Kuan-kuanen 18:11) Ise si tek man bual e ngkeriken waktuna guna ngelayani “Kebayaken,” labo Dibata. (Matius 6:24) Amin gia keleng atena Dibata, tapi adi kelengen atena sen, kekelengenna man Dibata banci bene.​—Matius 13:22; 1 Johanes 2:15, 16.

8, 9. (a) Kai dua pelajaren si banci sidat arah Adam, Hawa, ras malekat-malekat pemberontak? (b) Kai gunana siteh Setan si ngkuasai doni enda?

⁸ Lit dua pelajaren penting si banci sidat arah Adam, Hawa, ras malekat-malekat pemberontak. Pertama, siteh maka dua pihak ngenca lit janah arus sipilih salah sada. Bas pihak Jahwe ntah bas pihak Setan. (Matius 7:13) Si peduaken, siteh maka sementara bo ngenca kesenangen si idat kita adi mihak Setan. Idat Adam ras Hawa kesempaten guna nentuken kai si mehuli ras si la mehuli. Malekat-malekat jahat pe banci ka ngkuasai pemerentahen manusia. (Kejadin 3:22) Tapi la pernah mehuli hasilna adi sipihak Setan. Situhuna, labo lit untungna!​—Jop 21:7-17; Galati 6:7, 8.

⁹ Kai gunana siteh Setan si ngkuasai doni enda? Enda erban kita meteh uga arusna carata erurusen ras pemerentah janah ngiahken kita mberitaken berita si meriah. Siteh maka ate Jahwe siergai min pemerentah. (1 Petrus 2:17) AteNa sipatuhi undang-undang pemerentah adi e la ngelanggar pedah Jahwe. (Roma 13:1-4) Siteh ka maka arus kita tetap netral ras ula pernah sidukung partai politik bage pe peminpinna. (Johanes 17:15, 16; 18:36)  Perban ate Setan gelah la iteh kalak gelar Jahwe janah icedaina gelar e, silakoken ateta si mehulina, gelah iteh kalak si deban kebenaren kerna Dibatata. Bangga kel kita ilebuh alu gelarNa ras nggunaken gelar e. Ergan siakap kekelengenta man Dibata asangken man sen ntah pe si debanna.​—Jesaya 43:10; 1 Timotius 6:6-10.

10-12. (a) Umpan kai si ipake Setan guna nggoda malekat-malekat, janah uga carana? (b) Pelajaren kai si banci sidat arah malekat-malekat si ngikutken Setan?

¹⁰ Igunaken Setan cara si ampuh guna mpengaruhi manusia. Gelah ilakoken kalak e kai si meriah akap Setan, igunaken Setan umpan si erban kalak e tergoda, selain si e iusahakenna ka niksa manusia.

¹¹ Igunaken Setan umpan si erban nterem malekat tergoda. Banci jadi nggo ndekah iperdiatekenna malekat-malekat e gelah itehna kai si banci erban ia tergoda. Ipan piga-piga malekat umpanna, emaka erhubungen seks ia ras diberu-diberu i doni. Anak-anakna jadi raksasa si jahat si niksa kalak si lit i sekelilingna. (Kejadin 6:1-4) Selain nggunaken perbahanen seks guna nggoda malekat-malekat e, banci jadi erjanji ka Setan maka banci ikuasai malekat e manusia. Tujun Setan banci jadi gelah janji Jahwe kerna ‘kesusuren diberu e’ la terjadi. (Kejadin 3:15) Tapi la ipediat Jahwe Setan berhasil. IbanNa Banjir si Mbelin gelah kerina rencana Setan bage pe malekat-malekat jahat, gagal.

¹² Kai pelajarenna banta? Perbahanen seks si salah ras kesombongen jadi umpan si ampuh kel. Malekat-malekat si ngikutken Setan, nggo ndekah kel ras Dibata i surga! Tapi, ipediat malekat-malekat e sura-surana si salah lit bas pusuhna, janah reh belinna. Arus siinget maka la soal uga dekahna kita nggo ngelayani Dibata, sura-sura si salah banci turah bas pusuhta. (1 Korinti  10:12) Emaka, arus rusur siperiksa isi pusuhta janah siambekken kesombongen ras pikiren si salah kerna seks!​—Galati 5:26; baca Kolose 3:5.

13. Kai umpan si deban si ipake Setan? Uga carata nulaksa?

¹³ Umpan si deban si ipake Setan eme penasaren kerna ilmu gaib. Gundari, igunakenna agama palsu bage pe hiburen gelah manusia tertarik man begu-begu. Film, game elektronik, bage pe hiburen si deban banci erban ilmu gaib e tempa-tempa menarik. Uga carata nulak umpan enda? Ula siarapken ibere organisasi Dibata man banta daftar hiburen si mehuli ras si la mehuli. Arus silatih pusuh ras perukurenta gelah banci siban pilihen si mehuli bagi si ngena ate Dibata. (Heber 5:14) Janah adi kekelengenta man Dibata ‘la munapik’ banci siban pilihen si bijaksana. (Roma 12:9) Kalak si munapik, lain cakapna lain si idalankenna. Emaka adi milih hiburen ateta, arus sisungkuni banta, ‘Kudalanken nge pedah Jahwe si kukataken man kalak si deban? Kai nge si ipikirken kalak ntah pe si erlajar Pustaka ras aku adi itehna hiburen kai si kupilih?’ Adi sidalanken pedah si nggo sikataken man kalak si deban, reh gampangna siakap nulak umpan Setan.​—1 Johanes 3:18.

14. Uga cara Setan niksa kita? Uga carata ngelawanca?

¹⁴ Icubaken Setan ka niksa ras mpebiar-biar kita gelah la kita setia man Jahwe. Contohna, ipengaruhina pemerentah gelah ngelarang pendahinta. Banci ka ipengaruhina temanta erdahin ntah pe teman sekolahta gelah nokohi kita perban siikutken pedah Pustaka. (1 Petrus 4:4) Janah banci ka ipengaruhina anggota keluargata si la Saksi, si banci saja mehuli nge tujunna, tapi iusahakenna gelah ulanai kita reh pulung. (Matius 10:36) Kai si banci silakoken gelah banci ngelawan siksan Setan enda? Ula ateta mamang kerna serangen enda, perban siteh kita ras Setan sangana erperang. (Ketangkasen  2:10; 12:17) Arus siinget persoalen situhuna: Ikataken Setan, nggit kita ngelayani Jahwe adi la lit tentangenna janah pasti situlak Ia adi mesera siakap ngelakokenca. (Jop 1:9-11; 2:4, 5) Emaka arus lalap sipindo pergegeh man Jahwe. Ingetlah maka labo pernah itadingken Jahwe kita.​—Heber 13:5.

15. Banci nge ipaksa Setan kita ngelakoken sura-surana? Jelasken.

¹⁵ La banci ipaksa Setan manusia gelah ngelakoken sura-surana. (Jakup 1:14) Nterem kalak i doni enda la sadar situhuna ia nggo bas pihak Setan. Tapi sanga sekalak jelma meteh kebenaren, arus ipilihna mihak Jahwe ntah Setan. (Perbahanen Rasul-Rasul 3:17; 17:30) Adi sipilih ngelakoken kai si ngena ate Dibata, la lit si banci ilakoken Setan guna erban kita la setia.​—Jop 2:3; 27:5.

16, 17. (a) Kai deba nari si la banci ilakoken Setan ras malekat-malekat jahat? (b) Engkai maka la perlu kita mbiar ertoto man Jahwe alu sora megang?

¹⁶ Lit denga si la banci ilakoken Setan ras malekat-malekat jahat. Contohna, la pernah ikataken bas Pustaka maka banci iteh kalak e kai si lit bas pusuh ras perukurenta. Jahwe ras Jesus ngenca banci metehsa. (1 Samuel 16:7; Markus 2:8) Jadi, uga kerna ngerana ntah pe ertoto alu sora si megang? Perlu nge kita mbiar ibegi Setan ntah pe malekat-malekat jahat totota e janah igunakenna e guna nyerang kita? Lang! Engkai? Cuba ukuri enda: Tentu la kita mbiar ngelakoken kai si mehuli i bas ngelayani Jahwe amin gia banci iidah Setan kita. Bage ka pe, la kita perlu mbiar megang sorata sanga ertoto amin gia banci ibegi Setan kita. Janah, ikataken bas Pustaka maka umat Dibata rusur ertoto alu sora megang, tapi la pernah sibaca maka mbiar kalak e ibegi Setan kari totona. (1 Raja-Raja 8:22, 23; Johanes 11:41, 42; Perbahanen Rasul-Rasul 4:23, 24) Adi silakoken si mehulina gelah pengeranata bage pe perbahanenta ngena ate Jahwe, teklah maka ipulahiNa kita arah Iblis nari.​—Baca Masmur 34:8.

¹⁷ Arus sitandai ise musuhta, tapi la perlu kita mbiar man bana. Aminna pe kita la sempurna, alu penampat Jahwe banci sitaluken Setan! (1 Johanes 2:14) Adi silawan ia, kiam me ia nadingken kita. (Jakup 4:7; 1 Petrus 5:9) Gundari, Setan khususna nyerang anak muda. Uga cara anak muda ngelawan serangen Setan? Sibahas kari enda bas artikel seterusna.