TOPIK UTAMA | ISE SI TADING I BAS ALAM ROH?
Penungkunen kerna Ise si Tading i bas Alam Roh
Pernah nge kam tersungkun kerna alam roh ras ise si tading i je? Adi bage, kam la sisada. Ribun tahun dekahna, erbage-bage jabapen kerna si e. Lit si ngatakenca maka si tading i bas alam roh eme nini-nininta si arus siergai. Si deban erpengakap e ingan si dame ras dem keriahen si igelari surga, si iiani malekat ras kalak si mehuli si nggo mate. Lit ka si ngatakenca eme rumah ratusen juta dewa.
Melala si ngatakenca maka la banci sieteh kai pe kerna alam roh erkiteken la lit saksi mata si reh je nari. E la benar. Jesus Kristus nggeluh i surga, i bas alam roh, ope denga ia reh ku doni. Alu tangkas ikatakenna man peminpin agama i bas abad pemena, ”Sabap aku enggo reh i surga nari guna nehken peraten si nuruh aku, labo guna nehken peratenku.” Emaka ikatakenna man ajar-ajarna kerna kai si nggo ialamina sendiri, ”I bas rumah Bapangku mbas ingan.”—Johanes 6:38; 14:2.
Bapa Jesus, eme Dibata, gelarNa Jahwe janah ”rumah” Jahwe eme i surga. (Masmur 83:18, Terjemahan Dunia Baru [NW]) Erkiteken si e, ise pe la banci nuriken kerna doni si la teridah enda alu tangkas, kecuali Dibata Jahwe ras Jesus Kristus. Enggo ijelaskenna melala keterangen kerna alam roh alu mereken pengenehenen si luar biasa man kalak si setia.
Artikel selanjutna mbahas kai nina Pustaka kerna pengenehenen si idatken piga-piga dilaki. Asum ipelajarindu pengenehenen enda, ingetlah maka alam roh la banci sijemak ntah pe siidah. Erkiteken si e, asangken mereken penjelasen alu bentuk rohani, si la banci siangkai, igambarken Dibata pengenehenen e alu cara si banci siangkai. Pengenehenen e banci nampati kam ngangkai ise si tading i bas alam roh ’i bas ingan si mbas’.
