1, 2. (a) Kai pendapat piga-piga kalak kerna organisasi agama? (b) Kai kari sibahas i bas artikel enda?

NINA piga-piga kalak, ”La kam perlu sada organisasi guna ngatur kam. Si iperlukenndu eme hubungen ras Dibata.” Payo nge bage? Uga situhuna?

² I bas artikel e, sipelajari kari maka kai pe si ilakoken Jahwe ilakokenNa alu ratur janah iorganisasiNa umatNa. Sibahas ka kari kai si perlu silakoken sanga organisasi Jahwe mere petunjuk. (1 Korinti 14:33, 40) I bas abad pemena, umat Jahwe ngikutken petunjuk Kata Dibata gelah ngasup erberita si meriah i bas melala ingan. Bagi kalak e, kita pe nggit itegu-tegu Kata Dibata. Janah, sipatuhi petunjuk si ibereken organisasi Dibata. Asilna, banci kita erberita i belang-belang doni. Sijaga ka runggun tetap bersih, dame, ras ersada.

3. Kai si erban kam tek maka Jahwe Dibata si ratur?

³ Sanga sinen tinepa Jahwe, jelas teridah Ia Dibata si ratur. ”[JAHWE] njadiken doni enda alu kepentarenNa, alu kebeluhenNa itamakenNa langit i bas inganna.” (Kuan-kuanen 3:19) Melala si la siangkai kerna tinepa Jahwe.  Situhuna, ”desken kusik-kusik si seh ku cupingta” ngenca sieteh. (Jop 26:14) Aminna pe sitik ngenca siangkai kerna alam semesta enda, sieteh maka e iatur alu mehuli. (Masmur 8:5, 6) Jutan bintang-bintang ratur pergerakenna. Ukuri cara planet i bas tata suryanta ngkeleweti matawari. Keteraturen si luar biasa enda banci terjadi erkiteken Jahwe si ngaturkenca. Sanga siukuri ”alu kepentarenNa ijadikenNa langit” bage pe doni, sipuji, sisembah, janah setia atenta man baNa.​—Masmur 136:1, 5-9.

4. Engkai maka la banci ijabap ilmuwan penungkunen si penting?

⁴ Ipakeken ilmuwan kai si nggo ipelajarina kerna alam semesta bage pe doni enda guna erban kegeluhenta reh ulina. Tapi la banci ijabapna piga-piga penungkunen si penting. Contohna, la banci ijelaskenna uga bena-benana alam semesta, ntah engkai manusia, rubia-rubia, ras sinuan-sinuan lit i doni. Janah nterem jelma la banci ijelaskenna engkai manusia lalap atena nggeluh. (Pengerana 3:11) La ieteh kalak jabapna eme erkiteken ilmuwan ras kalak si deban ngataken maka Dibata la lit janah ngajarken evolusi. Tapi ibere Dibata jabapNa i bas BukuNa, Pustaka si Badia.

5. Uga hukum alam mpengaruhi kegeluhenta?

⁵ Itepa Jahwe melala hukum alam. Hukum enda la berubah. Tukang listrik, tukang pipa, insinyur, pilot, ahli bedah, ras si debanna make hukum enda i bas pendahinna. Contohna, ingan jantung manusia seri kerina i bas kulanta. Emaka ieteh ahli bedah i ja inganna i bas kula pasienna. Janah ieteh kalak kerina adi lompat i bas ingan si meganjang nari pasti ndabuh ras banci mate. Sipatuhi hukum alam e, bagi gravitasi, erkiteken tetap atenta nggeluh.

6. I ja nari banci sieteh maka iarapken Jahwe umatNa nembah Ia alu cara si ratur?

⁶ Iaturken Dibata alam semesta enda alu cara si luar biasa. Pasti iarapkenNa ka umatNa pe iatur i bas nembah Ia. Situhuna, ibereken Dibata Pustaka gelah sieteh uga cara nembah Ia. Alu ndalanken pedah si iberekenNa si lit i bas Pustaka bage pe organisasiNa, banci kita nggeluh puas ras ermeriah ukur.

7. Kai si banci sipelajari arah cara Pustaka itulis?

⁷ Pustaka eme pemere si istimewa i bas Dibata nari. Piga-piga sarjana ngataken maka Pustaka e buku kalak Jahudi ras kalak Kristen si ipersada manusia. Tapi Dibata si nentuken ise si nulisken buku e, ndigan itulis, janah kai si itulis. Eme alasenna engkai maka kerina buku i bas Pustaka banci nampati kita ngangkai Kata Dibata. Mulai Kejadin seh Ketangkasen, ncidahken maka lit pagi ”kesusuren” si ngubah doni enda jadi pardis. Janah nggo sipelajari maka ”kesusuren” e eme Kristus Jesus janah Kinirajanna pagi si mbuktiken maka Jahwe ngenca si lit hakNa merentah.​—Oge Kejadin 3:15; Matius 6:10; Ketangkasen 11:15.

8. Alu cara kai saja kalak Israel iatur alu mehuli?

⁸ Kalak Israel ngikutken Undang-Undang si ibereken Dibata man bana janah iorganisasi alu mehuli. Contohna, lit ”diberu-diberu si erdahin i bas dalan bengket ku bas Kemah Perjumpan e”. (Keluaren 38:8) Idatna ka petunjuk kerna cara mindahken kemah ras tabernakel. I bas pudi wari, iaturken Raja Daud kai  saja dahin imam ras kalak lewi i rumah pertoton. (1 Kronika 23:1-6; 24:1-3) Adi patuh kalak Israel, ipasu-pasu Jahwe ia. Kalak e iatur janah nggeluh alu dame ras ersada.​—Ulangen 11:26, 27; 28:1-14.

9. Uga runggun i bas abad pemena iorganisasi?

⁹ Runggun-runggun i bas abad pemena pe iaturken. Lit sada badan pinpinen, eme sada terpuk dilaki si ngaturken runggun-runggun. Tangtangna, anggotana rasul-rasul. I bas pudi wari, itambahken ka pertua-pertua. (Perbahanen Rasul-Rasul 6:1-6; 15:6) Itegu-tegu Jahwe anggota badan pinpinen ras kalak si ikut erdahin nulis surat si isina pedah ras petunjuk man runggun-runggun. (1 Timotius 3:1-13; Titus 1:5-9) Kai manfaat si ialoken runggun-runggun adi idalankenna petunjuk e?

10. Kai asilna sanga runggun-runggun i bas abad pemena ndalanken petunjuk pinpinen? (Nehen gambar i bas pemena artikel.)

¹⁰ Oge Perbahanen Rasul-Rasul 16:4, 5. I bas abad pemena, piga-piga turang senina ndahi runggun guna mpeseh ”kai si enggo itetapken rasul-rasul ras pertua-pertua i Jerusalem”, eme badan pinpinen. Runggun-runggun ndalanken petunjuk enda janah ”erteguhna kiniteken perpulungen janah tep-tep wari reh teremna anggota perpulungen e”. Kai manfaat contoh enda man runggunta?

11. Kai arusna ilakoken pertua ras si nampati perpulungen sanga ialokenna petunjuk i bas organisasi Dibata nari?

¹¹ Anggota panitia cabang ntah pe anggota panitia negeri, pertua keliling, ras pertua perlu patuh man petunjuk si ibereken organisasi Dibata. Ikataken Buku Jahwe man banta gelah patuh kita man kalak si muat pinpinen. (Ulangen 30:16; Heber 13:7, 17) Kalak si setia man Jahwe la nggit mberontak, janah la jungut-jungut nandangi petunjuk si ialokenna. La kita nggit bagi Deotrepes, si la mehamat man kalak si muat pinpinen. (Oge 3 Johanes 9, 10.) Sanga siikuti petunjuk, sijaga perdamen ras persadan runggun. Jadi banci sisungkun dirinta, ’Kupegegehi nge turang senina gelah setia man Jahwe? Mis nge kudalanken petunjuk si kualoken i bas organisasi Dibata nari?’

12. Uga carana pertua ras si nampati perpulungen itangkuhken?

¹² Mbaru-mbaru enda, iubah Badan Pinpinen cara pertua ras si nampati perpulungen itangkuhken. ”Pertanyaan Pembaca” i bas Menara Pengawal 15 November 2014, njelasken maka i bas abad pemena, ibereken badan pinpinen wewenang man pertua keliling guna nangkuhken pertua ras si nampati perpulungen. Mulai September 2014, pertua keliling nggo ndalanken pengaturen enda. Sanga isaranken pertua sekalak turang senina gelah jadi pertua ntah pe si nampati perpulungen, iusahaken pertua keliling nandai ia bage pe keluargana. Contohna, banci saja ia erberita ras turang senina e. (1 Timotius 3:4, 5) Kenca si e, runggu me pertua keliling ras pertua si debanna. Ibahasna Pustaka si Badia si nuriken kerna sifat-sifat sekalak pertua ntah pe si nampati perpulungen.​—1 Timotius 3:1-10, 12, 13; 1 Petrus 5:1-3.

13. Uga banci sicidahken maka kita matuhi petunjuk pertua?

¹³ Ibereken pertua petunjuk i bas Pustaka nari erkiteken keleng janah ikawalina atena runggun. Perlu sipatuhi kalak e guna kiniulinta. (1 Timotius 6:3)  I bas abad pemena, lit piga-piga kalak jadi ’la tertib’. Kalak e la nggit erdahin tapi icampurina urusen si la man urusenna. Iusahaken pertua mpersingeti ia, tapi la diatena. Ikataken Paulus man runggun cara mperlakoken kalak si bage, nina, ”Perdiatekenlah ia janah ola nai perkuanken gelah mela iakapna.” Turang senina ula nai erteman ras ia, tapi ula ka iban ia bagi musuh. (2 Tesalonika 3:11-15) Gundari pe iusahaken pertua nampati kalak si la ngikuti patoken Dibata, contohna, si ngerondong ras kalak si la sada kiniteken. (1 Korinti 7:39) Adi la ia robah, banci ipeseh pertua khotbah si nuriken maka perbahanenna si bage banci ncedai gelar runggun. Adi lit khotbah si bage i runggunndu, uga tanggapenndu? Adi ietehndu ise kalakna, ibatasindu nge hubungenndu ras ia? Adi ue, isampatindu ia gelah ietehna maka perbahanenna e mbahayaken ia janah erban Jahwe la senang. Enda banci saja erban ia robah. ^[1]—Nehen penjelasen tambahen.

14. Uga kita banci jaga runggun tetap bersih?

¹⁴ Ipebetehken Kata Dibata kai si arus silakoken gelah runggun tetap bersih. Perdiateken kai si terjadi i Korinti. Keleng ate Paulus turang senina si lit i je. Enterem si isampatina erlajar kebenaren i je. (1 Korinti 1:1, 2) Emaka, bayangken uga perasanna sanga lit si ngelakoken perbahanen si amoral, janah ipediat turang senina ia tetap i bas runggun! Ikataken Paulus man pertua gelah ”ngendesken si perlua-lua e man Iblis”. Arus ipedaratna kalak si bage i bas runggun nari, ntah pe i pecat. (1 Korinti 5:1, 5-7, 12) Gundari pe, pertua banci saja mpedarat sekalak jelma i bas runggun nari adi mekelek kal dosana janah la robah. Adi bage, siperlakoken nge ia bagi si ikataken Pustaka? Adi silakoken, sijaga runggun tetap bersih. Janah, sisampati kalak e gelah sadar maka perlu ia robah janah mindo gelah Jahwe ngalemi ia.

15. Uga kita banci njaga perdamen i bas runggun?

¹⁵ Lit masalah si deban i Korinti. Turang senina si la sicocoken maba perjengilenna ku pengadilen. Ikataken Paulus man bana, ”Ma ulin kam kena perbahanen si la adil?” (1 Korinti 6:1-8) Gundari pe, piga-piga turang senina i bas runggun erban perjanjin bisnis sapih-sapih ia, tapi kepeken rugi ntah pe iakapna ia itipu. Emaka, iadukenna turang seninana e ku pengadilen. Enda banci erban kalak ngataken si la mehuli kerna Jahwe bage pe umatNa. Janah, enda banci erban masalah bas runggun. Pustaka nampati kita meteh maka arus sijaga kedamen ras turang seninanta, amin gia bene senta. ^[2] (Nehen penjelasen tambahen.) Situhuna, iajari Jesus kita uga ndungi masalah si serius bage pe la siangkan. (Oge Matius 5:23, 24; 18:15-17.) Adi  sipatuhi petunjuk enda, sijaga perdamen ras persadan i bas runggun.

16. Engkai maka umat Dibata ersada?

¹⁶ Nina Buku Jahwe, ”Andiko ulina ras senangna, adi kalak si ersenina ersada perarih!” (Masmur 133:1) Sanga kalak Israel matuhi Jahwe, kegeluhenna ratur janah ersada. Inubuatken Dibata kerna umatna, ”Kupersada kam kerina desken biri-biri mulih ku rarasenna.” (Miha 2:12) Inubuatken Jahwe ka maka umatNa erlajar kebenaren i bas Pustaka nari janah ersada ngelayani Ia. Nina, ”Kenca bage Kusambari me cakap bangsa-bangsa jadi cakap si badia, janah man bangKu saja ngenca ia ertoto, lanai man dibata-dibata si deban. Kerina ia ngikutken Aku.” (Sepanya 3:9) Bujur kal sikataken erkiteken banci kita ersada nembah Jahwe!

17. Kai si arus ilakoken pertua adi lit kalak i bas runggun ngelakoken dosa si serius?

¹⁷ Adi sekalak jelma ngelakoken kesalahen si serius, arus mis ipersingeti pertua ia alu cara si perkeleng. Ieteh kalak e maka ate Jahwe gelah ilindungina runggun i bas pengaruh si buruk nari janah ijagana tetap bersih ras ersada. (Kuan-kuanen 15:3) Keleng kal ate Paulus turang seninana i Korinti janah adi perlu ipersingetina kalak e, bagi sioge i bas suratna si pemena man kalak e. Sieteh maka mis idalanken pertua-pertua petunjuk Paulus, buktina piga-piga bulan kenca si e ipujina ia i bas suratna si peduaken. Adi sekalak turang senina ”terdat ersalah” ope denga ia sadar, arus ipersingeti pertua ia alu cara si perkeleng.​—Galati 6:1.

18. (a) Uga petunjuk i bas Kata Dibata nari nampati runggun i bas abad pemena? (b) Kai kari sibahas i bas artikel selanjutna?

¹⁸ Jelas me adi kalak Kristen i bas abad pemena ndalanken petunjuk i bas Pustaka nari, runggunna banci bersih, dame, ras ersada. (1 Korinti 1:10; Epesus 4:11-13; 1 Petrus 3:8) Asilna, turang senina e banci erberita ”ku belang-belang doni enda”. (Kolose 1:23) Gundari pe, umat Jahwe ersada ras ratur, janah kalak e erberita si meriah i belang-belang doni. I bas artikel selanjutna, ibereken terbuen bukti maka merhat kal kalak e nghamati Jahwe, Dibata Si Madakuasa, ras patuh man petunjukNa si lit i bas Pustaka.​—Masmur 71:15, 16.