1. Ja nari sieteh maka umat Dibata ibebasken pagi i bas Babilon si Mbelin nari, janah penungkunen kai saja si nandangi ijabap?

I BAS artikel si lewat, sipelajari maka kalak Kristen si setia itaban Babilon si Mbelin. Tapi, lit berita si mehuli. La ia itaban seh rasa lalap. Menurut Pustaka si Badia, iperentahken Dibata umatNa gelah ”ndarat” i bas agama palsu nari. (Oge Ketangkasen 18:4.) Enda ncidahken maka kalak Kristen pagi ibebasken i bas Babilon si Mbelin nari. Merhat kal kita meteh ndigan e terjadi! Tapi si pemena, arus sijabap penungkunen enda: Kai tekad Ajar-Ajar Pustaka kerna Babilon si Mbelin ope denga tahun 1914? Uga semangat turang senina i bas erberita sanga Perang Doni I? Payo nge umat Dibata itaban Babilon paksa si e erkiteken perlu ibere persinget?

2. Kai tekad Ajar-Ajar Pustaka ope denga Perang Doni I?

² Ertahun-tahun ope Perang Doni I (1914-1918), isadari Charles Taze Russell ras Ajar-Ajar Pustaka si debanna maka Susunen Kristen la ngajarken kebenaren Pustaka.  Emaka, lanai ia nggit terlibat ras agama palsu. Janah i bas 1879, ikataken Zion’s Watch Tower maka tep-tep gereja si ngaku jadi penganten Kristus si setia, tapi ndukung pemerentah, situhuna bagin Babilon si Mbelin, si igelari Pustaka selaku diberu perlua-lua.​—Oge Ketangkasen 17:1, 2.

3. Kai si ilakoken Ajar-Ajar Pustaka guna ncidahken maka lanai kalak e terlibat ras agama palsu? (Nehen gambar i bas pemena artikel.)

³ Ieteh kalak si setia adi terus idukungna agama palsu, la ia ipasu-pasu Dibata. Emaka, nterem si nulis surat ku gereja guna ngataken maka ndarat ia i bas gereja nari. Janah, piga-piga iogekenna ka suratna e i lebe-lebe jemaat. Adi la iijinken ngogekenca, ikirimna suratna ku tep-tep anggota gereja. Icidahken Ajar-Ajar Pustaka alu tangkas maka la ia nggit terlibat ras agama palsu! Adi ilakokenna e i bas tahun-tahun ope si e, banci ia ibunuh. Tapi i bas 1870, pemerentah i melala negeri lanai ndukung gereja bagi si mbarenda. Emaka, banci kalak bebas ncakapken Pustaka janah banci ka la setuju man gereja.

4. Kesimpulen kai si banci sidat arah kegiaten Ajar-Ajar Pustaka nari sanga Perang Doni I?

⁴ La bias iakap Ajar-Ajar Pustaka nuriken man keluarga, teman ras jemaat gereja maka lanai idukung kalak e agama palsu. Atena sebelang-belang doni meteh maka Babilon si Mbelin eme agama palsu si bali bagi diberu si perlua-lua! Emaka mulai Desember 1917 seh asa pemena tahun 1918, ribun Ajar-Ajar Pustaka ergiah-giah mbagiken 10.000.000 risalah si isina kerna ”Keruntuhen Babilon”. Terang-terangen risalah e nuriken maka ajaren Susunen Kristen e salah. Bagi nggo si iduga, merawa kal peminpin gereja! Tapi Ajar-Ajar Pustaka terus erberita janah ertekad ”ngikutken Dibata, labo manusia”. (Perbahanen Rasul-Rasul 5:29) Kai si banci isimpulken arah keadan enda? Kalak Kristen si setia situhuna labo mulai itaban sanga Perang Doni I, tapi sebalikna iusahakenna mbebasken diri i bas agama palsu nari janah nampati kalak si deban ngelakokenca.

5. Ngkai maka banci sikataken adi turang senina ergiah-giah sanga Perang Doni I?

⁵ Mbarenda siangkai sanga Perang Doni I, la senang Dibata man umatNa perban la ergiah-giah kalak e erberita. Erkiteken si e, tek kita maka ipediat Jahwe Babilon si Mbelin naban kalak e piga-piga tahun dekahna. Tapi, turang senina si setia mulai tahun 1914 seh asa 1918, i bas pudi wari njelasken maka selaku sada terpuk, nggo iusahakenna asa ngasupna erberita. Alu ngangkai terbuen kerna kai si terjadi man Ajar-Ajar Pustaka paksa si e, banci siangkai piga-piga kejadin si lit i bas Pustaka.

6, 7. (a) Tentangen kai saja si iadapi Ajar-Ajar Pustaka sanga Perang Doni I? (b) Kai si ncidahken maka Ajar-Ajar Pustaka tuhu-tuhu ergiah-giah?

⁶ Janah, sanga Perang Doni I pe, ergiah-giah kal Ajar-Ajar Pustaka erberita. Tapi iadapina ka piga-piga tentangen, mari sinen dua saja. Si pemena, lenga ieteh Ajar-Ajar Pustaka carana erberita alu make Pustaka saja. Biasana kalak e mbagiken buku, buku e  saja si njelasken kebenaren. Emaka sanga buku The Finished Mystery (Rahasia si Igenepi) ilarang sanga pemena tahun 1918, nterem turang senina mesera iakapna erberita. Peduaken, i bas tahun e ka terjadi flu spanyol. Menukah kal langket pinakit si bahaya e, alu bage mesera iakap turang senina ndarat ras erberita. Aminna pe bage, ilakoken kalak e si mehulina i bas erberita.

⁷ I bas 1914, sada terpuk si kitik Ajar-Ajar Pustaka mutarken ”Drama-Foto Penciptaan” si igelari ”Drama”. Enda gambar-gambar si ipersada ras film si lit sorana. Pemutaren enda hal si mbaru paksa si e. Drama e nuriken sejarah manusia mulai Adam itepa nari seh pendungi Pemerentahen Kristus. Sanga tahun pemena pemutarenna tahun 1914, lit lebih 9.000.000 kalak si nontonsa. Cuba bayangkenndu. Jumlahna buen asangken jumlah Saksi Jahwe i belang-belang doni gundari! Menurut laporen si deban i bas 1916, lebih 809.000 kalak reh ku perpulungen i Amerika Serikat, janah tahun 1918, jumlah e jadi menam 950.000 kalak. Ajar-Ajar Pustaka e tuhu-tuhu ergiah-giah!

8. Uga turang senina si lit tanggungjabapna mpegegehi Ajar-Ajar Pustaka sanga Perang Doni I?

⁸ Sanga Perang Doni I, turang senina si lit tanggungjabapna tutus kal atena erdahin nikapken ogen Pustaka ras mpegegehi kerina Ajar-Ajar Pustaka. Erkiteken dukungen si perkeleng enda, terus kalak e ergiah-giah erberita. Richard H. Barber, perberita si ergiah-giah paksa si e, ngataken, ”Berhasil iaturken kami gelah piga-piga pertua keliling tetap ndahi runggun janah majalah The Watch Tower tetap lit, ras ikirimken ka ku Kanada aminna pe ilarang i je.” Nina ka, ”Meriah  kuakap ngirimken buku The Finished Mystery si ukurenna asa kantongta man teman-teman si bukuna itaban. Ipindo Rutherford gelah iban kami kebaktin i piga-piga kota i Amerika Serikat bagin barat ras ngutus pengkotbah gelah banci mere semangat man turang senina.”

9. (a) Ngkai maka umat Dibata perlu ibere persinget mulai tahun 1914 seh 1919? (b) Aminna pe bage, enda labo ngertiken kai?

⁹ Lit piga-piga hal si perlu denga ipekena i bas Ajar-Ajar Pustaka nari. Lenga tuhu-tuhu iangkaina perentah Jahwe guna patuh man pemerentah. (Roma 13:1) E me sababna selaku sada terpuk, kalak e la lalap netral sanga perang. Contohna sanga ipindo presiden Amerika Serikat rayat notoken perdamen i bas tanggal 30 Mei 1918, iiahken The Watch Tower Ajar-Ajar Pustaka gelah ikut notokenca. Piga-piga turang senina mereken sumbangen guna ndukung perang. Janah lit ka jadi tentara ras ikut perang. Aminna pe perlu ibere persinget, labo e alasenna maka kalak e itaban Babilon si Mbelin. Situhuna kalak e nggo menam serap i bas kerina agama palsu sanga Perang Doni I.​—Oge Lukas 12:47, 48.

10. Uga Ajar-Ajar Pustaka ncidahken maka iergai kalak e kegeluhen?

¹⁰ Memang, la tuhu-tuhu iangkai Ajar-Ajar Pustaka kai ertina netral. Tapi ietehna maka munuh e salah. Emaka aminna gia piga-piga turang senina jadi tentera ras maba senjata sanga Perang Doni I, la ia nggit munuh, alu bage piga-piga itama i bas barisen si arah lebe gelah mate ibunuh.

11. Uga tanggapen pemerentah sanga itulak Ajar-Ajar Pustaka guna erperang?

¹¹ Merawa si Iblis erkiteken turang senina tetap setia man Dibata. Emaka igunakenna ”hakim-hakim penipu, si pepinter-pinter si la bujur”. (Masmur 94:20) James Franklin Bell jenderal angkatan bersenjata U.S.A, mpebetehken man Rutherford ras Van Amburgh maka iusahaken pemerentah erban undang-undang si mbaru si ngataken maka tep-tep kalak si nulak erperang banci iukum mate. Khususna si imaksudna eme Ajar-Ajar Pustaka. Alu merawa ikataken jendral e man Rutherford maka undang-undang e la jadi iban erkiteken la ibere presiden Amerika Serikat. Kenca si e nina jenderal, ”Tapi ieteh kami cara nangkap kena, janah pasti itangkap kami kena!”

12, 13. (a) Ngkai maka waluh turang senina ipenjaraken? (b) Kenca ipenjaraken, ertekad denga nge kalak e matuhi Jahwe? Jelasken.

¹² Dungna berhasil pemerentah mereken hukumen man Ajar-Ajar Pustaka. Rutherford ras Van Amburgh, bage pe enem kalak si debanna si jadi wakil Lembaga Menara Pengawal, itangkap. Menurut hakim si nangani kasus e, kalak enda bahayan asangken sada pasuken tentara Jerman. Ikatakenna maka arus kalak e ibere hukumen si berat erkiteken nggo ihinana pemerentah, militer, ras kerina gereja. ^[1] (Nehen penjelasen tambahen.) Emaka, waluh Ajar-Ajar Pustaka e ipenjaraken piga-piga waktu dekahna i Atlanta, Georgia. Tapi, sanga dung perang, kalak e ibebasken janah kerina tuduhenna ibatalken.

 ¹³ Aminna pe ipenjaraken, waluhna dilaki e ertekad matuhi hukum Dibata. Kai buktina? Itulisna surat permohonen man presiden Amerika Serikat gelah ibebasken. Ikatakenna maka Pustaka ngelarang manusia sibunuhen, jadi ise pe si mbaktiken diri man Dibata janah sengaja ngelanggar hukumNa, la ngena ate Dibata janah banci ikernepken. Ijelaskenna maka e me alasen kalak e la banci janah la nggit munuh. Surat e ncidahken maka tuhu-tuhu kal kalak e perpang janah tetap ertekad matuhi Jahwe.

14. Jelasken kai si terjadi mulai 1914 seh asa 1919 menurut Pustaka si Badia.

¹⁴ Maleaki 3:1-3 njelasken kai si terjadi man Ajar-Ajar Pustaka mulai tahun 1914 seh asa pemena tahun 1919. (Oge.) Dibata Jahwe, ”TUHAN” si benar ras Jesus Kristus, ’PersuruhenNa’, reh mereksa ”imam-imam”, si nggambarken terpuk si iminaki. Kenca Jahwe mere persinget ras mbersihken kalak e, kalak enda ersikap ngaloken tugas si mbaru. I bas tahun 1919, itangkuhken Jesus ”juak-juak si tutus dingen pentar”, si itugasken negu-negu ras ngajari kerina juak-juak Dibata. (Matius 24:45) Dungna, umat Dibata bebas i bas Babilon si Mbelin nari. Mulai je nari, pemeteh kalak e kerna peraten Dibata reh mbagesna, alu bage reh kelengna atena Dibata. Bujur kal ikatakenna erkiteken kerina pasu-pasu Dibata e! ^[2]​—Nehen penjelasen tambahen.

15. Uga kita banci ncidahken maka bujur kal sikataken erkiteken nggo ibebasken i bas Babilon si Mbelin nari?

¹⁵ Bujur kal sikataken erkiteken nggo ibebasken i bas Babilon si Mbelin nari. La banci ikernepken Setan ibadat situhu-tuhu. Gagal ia! Tapi, perlu siinget alasen Jahwe mbebasken kita. AteNa gelah kerina kalak iselamatken. (2 Korinti 6:1) Tapi, agama palsu terus denga ngkuasai kalak si bujur, janah kalak e perlu penampatta! Mari silakoken si mehulina guna ngusih turang seninanta si setia alu nampati kalak bebas i bas Babilon si Mbelin nari!