1. Kai si terjadi sanga Jerusalem ikernepken?

I BAS tahun 607 SM, Raja Nebukadnesar II ras pasuken si mbelin arah Babilon nerang kota Jerusalem. Ituriken Pustaka si Badia maka ibunuhna anak perana alu pedang. ”Man ise pe la icidahkenna perkuah atena, nguda ntah metua, dilaki entah diberu.” Kenca e, ”tembok kuta Jerusalem iruntuhkenna, kuta e icilukna atan pe Rumah Pertoton, istana-istana ras barangna si meherga si tading denga i je”.​—2 Kronika 36:17, 19.

2. Persinget kai si ibereken Jahwe man kalak Jahudi, janah kai si terjadi man kalak e?

² Arusna la mamang ate kalak Jahudi sanga Jerusalem ikernepken. Nggo ipersingeti Dibata kalak e arah nabiNa ertahun-tahun dekahna. Adi la terus ipatuhina Dibata, kalak e iserang Babilon. Nterem kalak Jahudi ibunuh alu pedang, janah si selamat mbelin kemungkinenna tading i Babilon sedekah ia nggeluh. (Jeremia 15:2) Uga kegeluhen i pembuangen? Pernah ka nge kalak Kristen itaban bagi kalak Israel? Adi ue, ndigan?

3. Kai bedana kegeluhen i pembuangen i Babilon ras kegeluhen sanga jadi budak i Mesir?

³ Nggo ipebetehken Jahwe man kalak Jahudi adi ibaba kalak e pagi ku pembuangen, arus ialokenna keadanna, janah idalanina kegeluhenna asa ngasupna. Nina man kalak e arah Jeremia, ”Pajekkenlah rumah janah tetaplah ringan i je. Suanilah peken jenari pan ulihna. Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sebab adi sikap ia kam pe ikut sikap.” (Jeremia 29:5, 7) Kalak Jahudi si ngikuti petunjuk Jahwe banci ntabeh geluhna i pembuangen. Iijinken kalak Babilon ia ngelakoken kerina kegiatenna. Bebas ka ia lawes ku ja pa pe i negeri e. Paksa si e, Babilon pusat perdagangen. Menurut dokumen si nai, nterem kalak Jahudi erlajar erbinaga, janah si debanna jadi seniman si beluh. Piga-piga kalak Jahudi jadi bayak. Kegeluhen i pembuangen labo seri serana ras kegeluhen sanga jadi budak i Mesir si ialami kalak Israel ratusen tahun ope si e.​—Oge Keluaren 2:23-25.

4. Ise si ikut ngenanami kiniseran ras kalak Jahudi si la setia, janah engkai maka la banci idalankenna kerina Undang-Undang Dibata?

⁴ Piga-piga kalak Jahudi i pembuangen eme juak-juak Dibata si setia. Aminna pe la ersalah, ikut ia ngenanami kiniseran ras kalak Jahudi si la setia. Keperlun kalak Jahudi memang tercukupi, tapi uga ibadatna man Jahwe? Rumah pertoton ras batar-batar nggo irontasken, janah imam-imam la banci ndalanken tugasna sentudu ras undang-undang. Aminna pe bage, iusahaken kalak si setia ngikuti Undang-Undang Dibata. Contohna, Daniel, Saderah, Mesah, ras Abednego, la nggit man pangan si ilarang man kalak Jahudi. Pustaka pe nuratken maka lalap Daniel ertoto man Dibata. (Daniel 1:8; 6:10) Tapi erkiteken ikuasai bangsa kafir, kalak Jahudi si setia la mungkin ndalanken kerina Undang-Undang Dibata.

5. Kai si ijanjiken Jahwe man umatNa, janah engkai enda luar biasa?

⁵ Banci denga nge kalak Israel eribadat mulihi man Dibata alu cara si nggo itetapken? Paksa si e, tempa-tempa la banci, erkiteken kalak Babilon la pernah mbebasken tabanenna. Tapi Jahwe erjanji maka umatNa pagi ibebasken, janah e si terjadi. JanjiNa lalap itepatiNa!​—Jesaya 55:11.

6, 7. Engkai pengangkanta perlu iubah?

⁶ Pernah ka nge kalak Kristen itaban bagi kalak Israel si itaban i Babilon? Piga-piga tahun dekahna, ikataken The Watchtower maka kalak Kristen si setia itaban Babilon tahun 1918 janah ibebasken tahun 1919. Tapi, i artikel enda ras si seterusna, sieteh ngkai pengangkan e perlu iubah.

⁷ Cuba ukurindu: Babilon si Mbelin eme kerina agama palsu sebelang doni. Umat Dibata la jadi budak agama palsu sanga tahun 1918. Memang paksa si e, terpuk si iminaki isiksa. Tapi si terutama niksa kalak e, eme pemerentah, labo agama palsu. Ndekah ope Perang Doni I, juak-juak Dibata si iminaki situhuna mulai serap i bas agama  palsu nari. Emaka, mbelin kemungkinenna umat Jahwe labo itaban Babilon si Mbelin i bas tahun 1918.

8. Kai si terjadi kenca rasul-rasul mate? (Nehen gambar i bas pemena artikel.)

⁸ Sanga Pentakosta 33 M, ribun kalak Kristen si mbaru, iminaki kesah si badia. Kalak e jadi ”bangsa pilihen, imam-imam Raja, bangsa sikerajangen Dibata, anak-anak Dibata si ipilih”. (Oge 1 Petrus 2:9, 10.) Ijaga rasul-rasul runggun alu mehuli sanga ia nggeluh denga. Tapi, terutama kenca kalak e mate, piga-piga dilaki i bas runggun mulai ngajarken ajaren palsu janah ipedauhna atena ajar-ajar i bas kebenaren nari. Dilaki-dilaki enda jadi atena ajaren Aristoteles ras Plato, emaka mulai iajarkenna ajaren kalak e, labo kebenaren i bas Kata Dibata nari. (Perbahanen Rasul-Rasul 20:30; 2 Tesalonika 2:6-8) Nterem i bas kalak enda eme kalak si ihamati ras pengawas i runggun. Ibentukna golongen pendeta, amin gia ikataken Jesus maka ’kalak e kerina ersenina’.​—Matius 23:8.

9. Turiken uga agama Kristen si murtad mulai sada arihna ras pemerentah Roma. Kai akibatna?

⁹ I bas tahun 313 M, Kaisar Konstantin merentah i Kekaisaren Romawi si kafir janah agama Kristen si murtad isahken secara hukum. Kenca si e, Gereja mulai erdahin ras pemerentah Romawi. Contohna, Konstantin erban perjumpan ras peminpin agama si itandai selaku Konsili Nicea. Kenca perjumpan e, iasingken kaisar imam Arius si nulak ajaren maka Jesus e Dibata. I bas pudi wari, Theodosius jadi kaisar Romawi, janah Gereja Katolik, si nggo jadi Kristen si melket, jadi agama resmi Kekaisaran Romawi. Nina sejarawan maka Roma si kafir, jadi ”Kristen” sanga pemerentahen Kaisar Theodosius. Tapi situhuna, kalak Kristen si murtad nggo ngaloken ajaren kafir alu bage kalak e jadi bagin Babilon si Mbelin. Tapi, lit denga terpuk si iminaki si setia. Kalak e bali bagi gandum i bas perumpaman Jesus. Iusahakenna asa ngasupna gelah tetap eribadat man Jahwe, tapi piga-piga ngenca si megiken beritana. (Oge Matius 13:24, 25, 37-39.) Kalak enda tuhu-tuhu itaban Babilon!

10. Engkai kalak mulai sangsi man ajaren gereja?

¹⁰ Ratusen tahun kenca jaman Jesus, nterem kalak banci denga ngoge Pustaka i bas cakap Junani ntah pe Latin. Banci ibandingkenna ajaren Kata Dibata ras ajaren gereja. Sanga ietehna ajaren gereja salah, mis itulakna. Tapi, la ia bebas ngataken pendapatna erkiteken e bahaya, janah banci ka ibunuh.

11. Uga gereja erban kalak mesera ngoge Pustaka?

¹¹ Reh dekahna, sitik ngenca kalak banci ngangkai cakap Junani ntah pe Latin. Ilarang peminpin gereja Kata Dibata iterjemahken ku cakap si melala ipake. Akibatna, pendeta ras piga-piga kalak si erpendidiken ngenca si banci ngoge Pustaka. Janah peminpin agama pe la banci ngoge ras nulis alu mehuli. Ise pe si la setuju man ajaren gereja ndatken hukumen si mberat. Emaka, kalak Kristen si iminaki banci pulung i bas terpuk si kitik ngenca, janah lit ka si la banci pulung. Bali bagi kalak Jahudi  si itaban i Babilon, terpuk si iminaki si ikataken ”imam-imam raja” la banci eribadat alu cara si itetapken Dibata. Babilon si Mbelin tuhu-tuhu ngkuasai melala kalak!

12, 13. Dua hal penting kai si erbanca terang mulai ersinalsal? Jelasken.

¹² Banci nge kalak Kristen situhu-tuhu nembah Dibata alu cara si itetapken Dibata janah la erbuni-buni? Banci! Lit arapen, erkiteken dua hal penting enda. Si pemena, mulai lit mesin cetak alu huruf-huruf si banci iganti-ganti. Kira-kira ope tahun 1450, Pustaka arus itulis alu tan, janah e la menukah. Sekalak penulis si beluh perlu waktu sepuluh bulan guna nulis sada Pustaka saja! Janah, e itulis i perkamen si iban i bas kulit rubia-rubia nari. E me sabapna nggo jarang kal lit Pustaka janah meherga kal ergana. Tapi, kenca lit mesin cetak ras kertas, kalak si beluh banci ncetak lebih 1.300 halamen tep-tep wari!

¹³ Si peduaken, lit penerjemahen Pustaka. Kira-kira tahun 1500, piga-piga dilaki si perpang mulai nerjemahken Kata Dibata ku bas cakap rayat. Ilakokenna enda aminna kesah jadi taruhenna. Mbiar peminpin gereja adi kalak si bujur ngoge Pustaka i bas cakapna sendiri, isungkunna kari, ’I ja ayat kerna api penyucin? Ayat apai si ngataken maka  imam arus igalari guna acara penguburen? Ayat apai si nuriken kerna paus ras kardinal?’ Melala ajaren gereja rehna i bas ajaren Aristoteles ras Plato, si nggeluh ratusen tahun ope Kristus. Merawa peminpin gereja sanga isungkun kalak kerna ajarenna. Dilaki ras diberu si nulak ajaren gereja iukum mate. Ate peminpin gereja gelah ulanai kalak ngoge Pustaka ras nungkun. Janah berhasil ia. Tapi, piga-piga kalak si perpang la nggit ikuasai Babilon si Mbelin. Idatna kebenaren i bas Kata Dibata nari, janah merhat meteh terbuen! Kebebasen i bas agama palsu nari reh deherna.

14. (a) Kai si ilakoken kalak si merhat mpelajari Pustaka? (b) Turiken usaha Russel i bas ndarami kebenaren.

¹⁴ Enterem kalak merhat mpelajari Pustaka ras nuriken kai si ipelajarina. La ia nggit ipaksa gelah tek man ajaren gereja. Emaka kiam kalak enda ku negeri si deban gelah banci bebas mpelajari Pustaka. Salah sada negeri tujunna eme Amerika Serikat. I je, i bas 1870, Charles Taze Russel ras piga-piga kalak si deban mulai mpelajari Pustaka alu mbages. Tantangna idarami Russel atena agama si ngajarken kebenaren. Megermet kal ia mbandingken ajaren Pustaka ras ajaren melala agama Kristen, bage pe agama si debanna. Mis isadarina maka la lit sada pe situhu-tuhu ngikuti Kata Dibata. Pernah ibahasna Kata Dibata ras peminpin gereja-gereja setempat. Iarapkenna gelah kalak e nggit ngaloken kebenaren si nggo idatna ras teman-temanna i bas Pustaka nari guna iajarken man jemaatna. Tapi kalak e la tertarik. Mis isadari Ajar-Ajar Pustaka maka kalak e la banci ipersada ras kalak si jadi bagin agama palsu.​—Oge 2 Korinti 6:14.

15. (a) Ndigan kalak Kristen situhu-tuhu itaban i Babilon? (b) Penungkunen kai saja si ijabap i bas artikel seterusna?

¹⁵ I bas artikel enda, sibahas maka kalak Kristen situhu-tuhu itaban Babilon la ndekah kenca rasul si terakhir mate. Tapi, merhat denga kita meteh jabapen nandangi penungkunen enda: Ja nari sieteh maka terpuk si iminaki situhuna sangana erusaha serap i bas Babilon si Mbelin nari i bas tahun-tahun ope 1914? Payo nge maka Jahwe la senang man umatNa erkiteken pendahin erberita menam ngadi sanga Perang Doni I? La nge netral piga-piga turang seninanta i bas politik paksa si e, ras lanai nge ngena ate Jahwe? Janah, adi kalak Kristen itaban agama palsu kenca kematen rasul-rasul, ndigan kalak e ibebasken? Penungkunen si mejile enda, ijabap i bas artikel seterusna.