1, 2. Engkai penting mpegegehi kalak si deban?

NINA Cristina, si umurna 18 tahun, ”Jarang aku ipegegehi orangtuangku, tapi rusuren aku ipandangina. Kata-katana erban kitik kal ukurku. Katakenna aku bagi danak-danak, la pernah erlajar, janah mbur. Emaka rusur aku ngandung janah padin kuakap la ngerana ras ia. La kuakap meherga bangku.” ^[1] (Nehen penjelasen tambahen.) Latih kal nggeluh enda adi la lit kalak si mpegegehi kita!

² Selain si e, ukuri kai manfaatna adi sipegegehi kalak si deban. Nina Ruben, ”Ertahun-tahun dekahna la kuakap meherga bangku. Tapi i bas sada paksa, erberita aku ras pertua si meteh sangana gulut ukurku. Paksa kuturiken isi pusuhku, tutus kal atena megikenca. Kenca si e, iingetkenna aku kerna hal si mehuli si kulakoken. Iingetkenna ka aku kerna kata-kata Jesus—ergan nge kita asangken perik cip-cip. Rusur kuinget ayat e, janah kena kal ke pusuhku. Kata-kata pertua e mbelin kal pengaruhna.”​—Matius 10:31.

3. (a) Kai nina Paulus kerna mpegegehi kalak si deban? (b) Kai sibahas i bas artikel enda?

³ Pustaka si Badia ngatakenca maka perlu sipegegehi  kalak si deban alu ratur. Paulus ngirim surat man kalak Kristen Heber, ”O senina-seninangku, metengetlah gelah ula sekalak pe i bas kam jahat ukurna dingen la tek seh maka itundalkenna Dibata si nggeluh e . . . siajar-ajarenlah kam tep-tep wari.” Ijelasken Paulus alasenna, ”gelah ula sekalak pe i bas kam itipu dosa seh maka mersik ukurna”. (Heber 3:12, 13) Ukuri uga riahna iakapndu sanga lit si mpegegehi kam. Adi bage, kai alasenna maka arus sipegegehi turang seninanta? Kai si banci sipelajari arah cara Jahwe, Jesus ras Paulus i bas mpegegehi si deban? Janah alu cara kai saja banci sipegegehi kalak si deban? Mari sibahas.

4. Ise si perlu sipegegehi? Engkai nterem kalak gundari la mpegegehi kalak si deban?

⁴ Kerina kita perlu ipegegehi. Janah orang tua pe penting kal mpegegehi anakna. Sekalak guru gelarna Timothy Evans ngataken maka anak-anak ”perlu ibere semangat bali bagi sinuan-nuan si merluken lau”. Nina ka, ”Alu kata pergegeh, igejapken anak maka ia meherga janah iergai.” Tapi erkiteken kita nggeluh i ”wari-wari pendungi”, nterem si mentingken bana janah nggo kurang ’kekelengenna’. (2 Timotius 3:1-5) Piga-piga orang tua la ipegegehina anakna erkiteken orangtuana pe la pernah mpegegehi ia. Kalak dewasa pe perlu ipegegehi, tapi e jarang terjadi. Contohna, nterem si ngatakenca la pernah ia ipuji erkiteken pendahin si ilakokenna.

5. Uga kita banci mpegegehi kalak si deban?

⁵ Banci sipegegehi kalak alu sipuji ia erkiteken pendahinna si mehuli. Banci ka alu ngataken maka lit sifatna si mehuli, janah apuli ia paksa kote ntah kitik ukurna. (1 Tesalonika 5:14) Erkiteken rusur jumpa ras turang seninanta, melala kesempatenta mpegegehi ia. (Oge Pengerana 4:9, 10.) Emaka sungkun dirindu, ’Kucidahken nge maka kuergai janah kukelengi si deban? Rusur nge kulakoken e?’ Ukuri kai nina Pustaka, ”Seh kal riahna ukur adi terbelasken, kata si payo i bas paksa si payo.”​—Kuan-kuanen 15:23.

6. Engkai ate setan erban bene ukur umat Dibata? Bere contoh uga ia ngelakokenca.

⁶ Kuan-kuanen 24:10 ngataken, ”Kalak si mintes bene ukurna paksa gawat, kalak si bage tuhu-tuhu lemah kal.” Ieteh Setan adi banci banna bene ukurta, hubungenta ras Jahwe banci reh lemahna. Iusahakenna erban bene ukur Jop alu kiniseran si mbelin. Tapi rencana Setan la berhasil. Jop tetap setia. (Jop 2:3; 22:3; 27:5) Kita pe banci ngelawan Setan janah sibuktiken ia la banci berhasil. Adi terus sipegegehi anggota keluarga ras turang-seninanta, banci sisampati kerina gelah ermeriah ukur janah tetap rembak ras Jahwe.

7, 8. (a) Uga Jahwe mpegegehi umatNa? (b) Uga orang tua banci ngusih Jahwe? (Nehen gambar i bas pemena artikel.)

⁷ Jahwe mpegegehi umatNa. Isuratken pemasmur, ”[JAHWE] nemani kalak si lanai piher ukurna; isampatiNa kalak si enggo bene pengarapenna.” (Masmur 34:19) Sanga mbiar ras kitik ukur Jeremia, Jahwe erjanji nampati ia. (Jeremia 1:6-10) Iutus Jahwe malekat mpegegehi nabi Daniel si nggo metua, nina, ”Keleng kal ate Dibata man bandu.” (Daniel 10:8, 11, 18, 19) Banci nge ipegegehindu  turang senina alu cara si seri, termasuk perintis, si nggo metua si la banci ngelakoken bagi marenda buena?

⁸ Aminna pe Jahwe ras Jesus nggo ndekah kal ras tading, ieteh Jahwe maka perlu denga ipegegehiNa anakNa e sanga Jesus i doni. Ibegi Jesus Bapana ngerana surga nari sanga mulai ia erberita bage pe i tahun terakhir kegeluhenna i doni. I bas dua kesempaten, ikataken Jahwe, ”Enda me anakKu si Kukelengi. Ia me si ngena ateKu.” (Matius 3:17; 17:5) Pasti ipegegehi kal Jesus sanga ibegina Bapana ngataken keleng ateNa ia. I bas pudi wari, berngi ope Jesus mate, aru kal ate Jesus. Ipegegehi Jahwe ia alu ngutus malekat mpegegehi ras ngapuli ia. (Lukas 22:43) Orang tua, banci iusihndu Jahwe, alu ratur mpegegehi anakndu. Puji ia adi ilakokenna si mehuli. Janah sanga iadapina tentangen i sekolah, pegegehi ia asa ngasupndu, janah sampati ia gelah megenggeng.

9. Kai si banci sipelajari arah Jesus mperlakoken ajar-ajarna?

⁹ Jesus pe mere usihen si mehuli man banta. Berngi ope ia mate, iburihi Jesus nahe ajar-ajarna janah iajarkenna sifat meteruk ukur. Tapi kalak e meganjang ukur ras sijabapen kerna ise si mbelinna, janah alu meganjang ukur ikataken Petrus maka la pernah itadingkenna Jesus. (Lukas 22:24, 33, 34) Tapi labo lalap iukuri Jesus kesalahen kalak e. Sebalikna, ipujina kesetianna. Erjanji ia maka ilakoken kalak e pagi pendahin si terbelinen asangken si ilakokenna, ipebetehkenna keleng ate Jahwe man kalak e. (Lukas 22:28; Johanes 14:12; 16:27) Cuba ukuri, ’Kuusih nge Jesus janah kupuji si deban erkiteken sifatna si mehuli? Ntah terus nge kuukuri kesalahenna?’

10, 11. Uga Paulus mpegegehi turang senina, janah guna si e kai si iadapina?

¹⁰ Paulus rusur ngataken hal-hal si mehuli kerna turang seninana. Ertahun-tahun dekahna radu ia ras piga-piga turang senina erberita janah nggo itandaina kal kalak e, tapi la isuratkenna kesalahen kalak e. Sebalikna, ipujina. Contohna, ikatakenna Timotius ’anak si ikelengina dingen setia’ janah tek ia maka Timotius ermediate man turang senina. (1 Korinti 4:17; Pilipi 2:19, 20) Ikataken Paulus man kalak Kristen i Korinti maka Titus e me ”temanku sada dahin kal guna kam”. (2 Korinti 8:23) Pasti ipegegehi kal Timotius ras Titus sanga ietehna uga perukuren Paulus nandangi kalak e!

¹¹ Paulus ras Barnabas nggit ngasamken kesahna guna mpegegehi turang seninana. Contohna, ieteh kalak e maka nterem i kota Listra merhat munuh ia. Tapi, kalak e tetap reh mulihi ku je guna mpegegehi ajar-ajar si mbaru janah nampati ia gelah tetap setia man Jahwe. (Perbahanen Rasul-Rasul 14:19-22) I bas pudi wari, merawa kal jelma si nterem man Paulus i Epesus, tapi tetap ia tading i je piga-piga waktu guna mpegegehi turang senina. Perbahanen Rasul-Rasul 20:1, 2 ngataken, ”Ipepulung Paulus ajar-ajar jenari pegegehina ukur ajar-ajar e. Janah kenca sisalam-salamen, berkat ia ku Makedoni. Isiari Paulus taneh e, iajari dingen ipegegehina ukur kalak si enggo tek man Jesus jenari seh ia i Junani.”

12. Engkai maka penting reh ku perpulungen?

¹² Ate Jahwe mereken si mehulina. Emaka isuruhNa kita pulung alu ratur. I perpulungen, sipelajari kerna Jahwe ras sipegegehi si debanna. (1 Korinti 14:31; oge Heber 10:24, 25.) Cristina, si ituriken i pemena artikel e, ngataken, ”Si erbanca aku merhat kal reh pulung perban kudatken kekelengen ras gegeh i je. Maun-maun gulut kal ukurku sanga reh ku perpulungen. Tapi kenca seh, reh senina-senina ndakep aku. Ikatakenna aku mejile, keleng atena aku, ras meriah ukurna ngidah kemajun rohaningku. Perbahanenna e erban meriah ukurku!” Penting kal kita mpegegehi sada ras si debanna!​—Roma 1:11, 12.

13. Engkai kalak si nggo ndekah ngelayani Jahwe perlu ipegegehi?

¹³ Kalak si nggo ndekah ngelayani Jahwe pe perlu ipegegehi. Ukuri kerna Josua. Sanga kalak Israel nandangi berkat ku Taneh Perjanjin, Jahwe milih Josua minpin kalak e. Jahwe nuruh Musa mpegegehi Josua aminna gia ia nggo ndekah ngelayani Jahwe. Nina Jahwe, ”Berekenlah pedah-pedah man Josua, petetap ukurna, erkiteken ia me si mabai bangsa e ngepar, lako naluken negeri si idahndu e.” (Ulangen 3:27, 28) Josua perlu ipegegehi erkiteken iadapina pagi melala peperangen, janah silang-langna lit sekali talu. (Josua 7:1-9) Gundari, banci sipegegehi pertua ras pertua keliling, si ermediate kal man umat Dibata. (Oge 1 Tesalonika 5:12, 13.) Nina sekalak pertua keliling, ”Maun-maun ibere turang senina man kami surat pengataken bujur erkiteken nggo reh kami ku runggunna. Isusun kami surat-surat e janah ioge sanga kami kurang semangat. Tuhu-tuhu e jadi pergegeh man kami.”

14. Contoh kai si ncidahken maka sada hal si mehuli adi sibereken pergegeh man kalak si deban sanga mere pedah?

¹⁴ Bas sada kesempaten, ibere Paulus pedah man kalak Korinti. Sanga ipakekenna pedah e, ipuji Paulus ia. (2 Korinti 7:8-11) Pasti, kata-katana e mpegegehi kalak e gelah terus ngelakoken si benar. Pertua ras orang tua banci ngusih Paulus. Andreas, si dua anakna, ngataken, ”Kata pergegeh nampati anak-anak maju secara rohani ras sifatna pe reh ulina. Pedahndu banci ndekah iingetna adi berendu kata pegegeh. Amin gia ieteh anak-anakta si benar, ngelakoken kai si benar jadi dalan geluhna adi rusur sibereken kata pergegeh.”

15. Kai cara sibanci mpegegehi kalak si deban?

¹⁵ Kataken man turang seninandu maka iergaindu kal usahana ras sifat-sifatna  si mehuli. (2 Kronika 16:9; Jop 1:8) Iergai Jahwe ras Jesus kai pe si nggo silakoken man KinirajanNa, aminna gia la banci silakoken terbuen bagi atenta. (Oge Lukas 21:1-4; 2 Korinti 8:12.) Contohna, lit si nggo metua erpala-pala kal reh pulung bage pe erberita. Sipegegehi nge ia janah sipuji?

16. Katawari kita banci mpegegehi kalak si deban?

¹⁶ Rusurlah pegegehi kalak si deban. Katawari pe idahndu kalak ngelakoken si mehuli, mislah pujiken. Sanga Paulus ras Barnabas i Antiokia, daerah Pisidi, ikataken peminpin sinagoga man kalak e, ”O senina-senina, adi lit pedahndu man jelma si nterem enda, ngarap kami maka kam ngerana.” Emaka, Paulus pe mpegegehi kalak si deban. (Perbahanen Rasul-Rasul 13:13-16, 42-44) Adi sipegegehi kalak, pasti ipegegehina ka kita.​—Lukas 6:38.

17. Kai cara si mehulina muji kalak si deban?

¹⁷ Kataken kai si man pujinken. Sanga ipuji Jesus kalak Kristen i Tiatira, ikatakenna alasenna muji kalak e. (Oge Ketangkasen 2:18, 19.) Uga kita banci ngusih ia? Banci saja sipuji sekalak nande si sisada ia mpebelin anakna amin mesera akapna. Ntah adi kam orang tua, banci ipujindu anakndu erkiteken usahana ngelayani Jahwe. Turiken bana kerna si mehuli si nggo ilakokenna. Adi sijelasken kai saja si man pujin i bas ia nari, ietehna maka tuhu-tuhu sipuji ia.

18, 19. Uga kita banci nampati kalak si deban tetap rembak ras Jahwe?

¹⁸ Ikataken Jahwe man Musa gelah ipegegehina Josua. Gundari Jahwe lanai ngerana man kita gelah sipegegehi kalak si deban. Tapi meriah ukurNa adi siusahaken mpegegehi kalak si deban. (Kuan-kuanen 19:17; Heber 12:12) Contohna, adi sekalak turang senina mpeseh khotbah i runggun, banci sikataken maka meriah kal siakap megi khotbahna. Banci saja khotbahna e nampati kita ngadapi perbeben ntah pe ngangkai ayat-ayat tertentu. Sekalak turang senina nulis surat man turang senina si nggo mpeseh khotbah, nina, ”Aminna gia kentisik ngenca kita ngerana, mis ietehndu latih kal kuakap, iapuli janah ipegegehindu aku. Ateku gelah tehndu maka sanga ngerana kam alu cara si mehuli ntah e i bas panggung nari ntah secara pribadi, menurutku e pemere i bas Jahwe nari.”

¹⁹ Banci sisampati kalak si deban tetap rembak ras Jahwe adi sipakeken pedah Paulus, ”Sitatang-tatangenlah janah sisampat-sampatenlah kam bagi si sangana ibahan kam genduari e.” (1 Tesalonika 5:11) Adi ”sitatang-tatangen janah sisampat-sampaten” kita tep-tep wari, meriah siban ukur Jahwe!