”Kuidah sada kursi Kinirajan i surga, janah lit Sekalak kundul i je. AyoNa ersinalsal bagi permata jaspis ras permata sardis. I kelewet kursi Kinirajan e lit benteha si erbage-bage rupana.”​—Ketangkasen 4:2, 3.

”Ia teridah ersinalsal bagi tembaga i tengah gara api. Sinalasalna harhar kal, janah rupaNa erbage-bage bali ras benteha. Enda me terang si mesilo nandaken [JAHWE] lit i je.”​—Esekiel 1:27, 28.

Pengenehenen enda, mere gambaren man Johanes ras nabi Esekiel kerna kemulian Jahwe, Dibata Si Meganjangna, alu cara si banci siangkai. Eme arah batu si meherga, benteha, ras takhta si megah. Enda njelasken maka Jahwe Pribadi si tuhu-tuhu mulia, mereken keriahen ukur, ras kedamen.

Gambaren kerna Dibata enda sentudu ras kata-kata pemasmur, nina, ”Sabap mbelin kal kap [JAHWE], medolat mekelek me Ia, patut maka mbiar kalak man baNa lebihen asangken man kerina dibata-dibata. Dibata-dibata bangsa si deban, gana-gana kap, tapi [JAHWE] kap Si Nepa langit. Kemulian ras kiniulin lit i sekelewetNa, kuasa ras kinijilen ndemi rumahNa.”​—Masmur 96:4-6.

Aminna pe Jahwe Si Meganjangna, iundangNa kita rembak ras Ia alu toto, ras ipetetapNa ukurta maka ibegikenNa totonta. (Masmur 65:3) Keleng janah ermediate kal Dibata man banta, emaka payo isuratken Johanes, ”Dibata kekelengen kap.”​—1 Johanes 4:8.

”[Istepanus eme pengikut Kristus], si dem alu kesah si badia, natap ku das. Idahna terang si ersinalsal i bas Dibata nari janah idahna pe Jesus tedis arah kemuhen Dibata. Jenari nina, ’Nehenlah! Kuidah langit talang, janah Anak manusia si isuruh Dibata tedis arah kemuhen Dibata.’”​—Perbahanen Rasul-Rasul 7:55, 56.

La ndekah ope denga Istepanus ngidah pengenehenen enda, Jesus ibunuh erkiteken pengaruh peminpin agama Jahudi si itandai Istepanus. Pengenehenen e mbuktien maka Jesus nggeluh janah ia nggo ipekeke ras ihamati. Kerna si enda, Paulus nuratken, ”[Jahwe] mpekeke [Jesus] i bas si mate nari, janah ipekundulNa ia arah kemuhenNa i bas ingan si meganjangna. Kuasa Kristus e ndauh kal ganjangen asangken kerina kuasa pemerentah ras penguasa si la teridah, janah pangkatna ganjangen asangken kerina pangkat si terbelasken, subuk i bas paksa enda, bage pe i bas paksa si reh pagin.”​—Epesus 1:20, 21.

Selain njelasken kedudukenna si meganjang, Pustaka ncidahken maka Jesus, bali bagi Jahwe, ermediate kal man manusia. Sanga  pelayanenna i doni, ipepalem Jesus kalak sakit, ipegegehina kalak si kote, ras ipekekena kalak mate. Alu kematenna icidahkenna kekelengenna si mbelin man Dibata bage pe man manusia. (Epesus 2:4, 5) Jesus si paksana tedis arah kemuhen Dibata, kentisik nari ncidahken wewenangna janah mereken pasu-pasu si simpar man kerina manusia si patuh.

Nina Daniel, ”Sanga kupernehen, itamaken me piga-piga kursi Kinirajan i bas inganna. Ia [Jahwe] si enggo nggeluh rasa lalap kundul i bas sada kursi . . . . I je lit meribu-ribu kalak si erdahin guna ia, janah erjuta-juta manusia tedis i adep-adepenna. Ibenaken me pengadilen e, jenari italangi me kitap-kitap kerina.”​—Daniel 7:9, 10.

I bas pengenehenen kerna surga enda, iidah Daniel labo ngenca sada malaikat tapi seh kal lalana. Tuhu-tuhu pengenehenen si luar biasa! Malekat eme makhluk roh si mulia, pentar, janah seh kal gegehna. Piga-piga pangkatna eme serafim ras kerubim. Lit lebih 250 kali malekat isuratken i bas Pustaka.

Malekat labo manusia si pernah nggeluh i doni. Dibata nepa malekat ndekah ope denga itepaNa manusia. Sanga doni itepa, kerina malekat mperdiatekenca janah ersurak ia.​—Jop 38:4-7.

Sada cara malekat si setia ngelayani Dibata eme alu ikut i bas pendahin si pentingna si ilakoken i doni gundari—pembarken berita si meriah kerna Kinirajan Dibata. (Matius 24:14) Penampat kalak enda i bas pendahin e tereteh arah pengenehenen rasul Johanes, si nuratken, ”Jenari kuidah sada malekat si deban kabang meganjang i awang-awang. Ibabana berita si meriah si la ermasap-masap guna iberitaken man manusia i doni enda, man kerina bangsa, suku, cakap ras negara.” (Ketangkasen 14:6) Aminna gia gundari malekat lanai ngerana man manusia, tapi tetap itegu-teguna kalak si erberita si meriah man kalak bujur.

”Kenca bage jadi perang i surga. Mikael [Jesus Kristus] ras malekat-malekatna erperang ngelawan naga e. Janah naga e ras malekat-malekatna ngelawan Mikael,  tapi talu naga e. Naga e ras malekat-malekatna lanai ipelepas ringan i surga. Naga si galang e isampatken ndarat! Enda me nipe si nuria si igelari Iblis ntah Setan, si nipu i belang-belang doni enda. Isampetken ia ku doni ras kerina malekat-malekatna.”​—Ketangkasen 12:7-9.

Labo lalap dame i surga. I bas pemena sejarah umat manusia, lit sada malekat merhat isembah, emaka itentangna Jahwe. Dungna ia jadi Setan, si ertina ”Si nentang”. I bas pudi wari, malekat si deban pe ikut mberontak, ia igelari begu-begu. Jahat kal Setan ras begu-begu e, terang-terangen itentangna Jahwe janah ipengaruhina manusia gelah la ndalanken perentah Dibata si perkeleng.

Setan ras begu-beguna jahat janah kejam. Ia musuh manusia si erban melala kiniseran i doni. Contohna, ikernepken Setan asuh-asuhen ras juak-juak Jop, dilaki si setia. Kenca si e, ibanna ”angin meter” guna ngerontasken rumah anak Jop. Akibatna sepuluh anakna mate. Kenca si e, ”ipeturahna ugah mekelek i bas kula Jop mulai i bas tapak-tapak nahena nari terus ku piseranna”.​—Jop 1:7-19; 2:7.

Kentisik nari, ikernepken me Setan. Kenca iambeken ia ku doni, ietehna maka ”kentisik nari ngenca kesempaten lit i bas ia”. (Ketangkasen 12:12) Setan pasti ikernepken, enda tuhu-tuhu berita si meriah!

’Enggo itukur Jesus manusia guna Dibata i bas kerina suku, cakap, negara ras bangsa nari. Enggo ibahanndu ia jadi Kinirajan imam-imam ndahiken dahin Dibatanta, janah irajaina pagi doni enda.’​—Ketangkasen 5:9, 10.

Bagi Jesus si ipekeke guna nggeluh i surga, lit ka kalak si ipekeke ku surga. Ikataken Jesus man rasul-rasulna si setia, ”Lawes me aku nikapken ingan man bandu, . . . reh denga pagi aku ngalo-ngalo kam, gelah i ja aku i je kam pe.”​—Johanes 14:2, 3.

Kalak si lawes ku surga lit tujunna. Kalak enda pagi ikut merentah ras Jesus i bas Kinirajanna si nandangi erkuasa i doni janah mere pasu-pasu. Kinirajan e me si imaksud i bas contoh pertoton si iajarken Jesus man murid-muridna, nina, ”O Bapa kami si ni surga. GelarNdu ipebadia min; reh min KinirajanNdu; sehlah min peratenNdu, i bas doni enda bagi ni surga.”​—Matius 6:9, 10.

”[Ibegi rasul Johanes] sora si megang ngerana i bas kursi Kinirajan e nari, nina, ’Genduari Kemah Dibata lit i tengah-tengah manusia! . . . Iapusi Dibata me kerina iluh anak-anakNa e. Lanai pagi lit kematen, ceda ate, tangis ntah pe si mesui. Sabap si pemena enggo lepas.’”​—Ketangkasen 21:3, 4.

Pengenehenen enda sada nubuat kerna Kinirajan Dibata, si iperentah Jesus ras kalak si ipekeke i bas doni nari. Ikernepkenna pagi pemerentahen Setan janah ibanna doni jadi pardis. Lanai pagi lit si erbanca kiniseran ras ceda ate man manusia. Janah kematen pe lanai lit.

Tapi uga kerna miliaren kalak si mate si la ipekeke ku surga? I bas wari si pepagi, kalak e ipekeke guna nggeluh si rasa lalap i doni si nggo jadi Pardis.​—Lukas 23:43.