1-3. Kai si banci saja terjadi man Eiodia ras Sintike? Uga masalah si bage banci sipedauh? (Nehen gambar i bas pemena artikel.)

SIERGAI kal Pustaka si Badia erkiteken e buku i bas Dibata nari. Pustaka risiken pedah si banci nampati kita mpedauh masalah, ras mpersingeti kita adi erban kesalahen. Adi bage, uga tanggapenta nandangi pedah e? Perdiateken Eiodia ras Sintike, diberu si iminaki i bas abad pemena. Nina Pustaka kalak e la siangkan, tapi la ituriken engkai. Mari sibayangken kai si mungkin nggo terjadi.

² Mungkin iundang Eiodia piga-piga turang senina man ku rumahna, tapi la iundangna Sintike. Sanga ibegi Sintike meriah kal man-man i je, kitik kal ukurna. Banci saja iukurina, ’Engkai aku la iundangna? Kami me kompak.’ Iakapna la senang Eiodia man bana janah lanai ideherina ia. Emaka, iundang Sintike piga-piga turang senina man ku rumahna, tapi la iundangna Eiodia! Kejadin e banci erban kitik ukur kalak si deban i bas runggun. Ituriken Pustaka maka ipersingeti Paulus kalak e gelah erdame. Banci saja ibegikenna Paulus janah terus ngelayani Jahwe alu meriah ukur.​—Pilipi 4:2, 3.

 ³ I bas runggunta gundari, maun-maun lit ka masalahta ras turang senina si deban. Tapi adi siikutken pedah Pustaka, banci sidungi masalah e. Janah banci ka sipedauh. Adi patuh kita man pedah Pustaka, sicidahken maka siergai kal Buku Jahwe.​—Masmur 27:11.

4, 5. Pedah si apai i bas Kata Dibata si banci nampati kita ngkuasai perasanta?

⁴ Labo lalap menukah ngkuasai perasanta. Banci saja kita merawa ntah kitik kal ukurta adi lit si ngataken ntah pe ngelakoken kai si la mehuli erkiteken kebudayan, warna kulit ntah penampilenta. Janah reh kitikna ukurta adi si ngelakokenca turang seninanta. Pedah si apai i bas Kata Dibata si banci nampati?

⁵ Ieteh Jahwe kai si banci terjadi adi la terkuasai manusia perasanna. Adi merawa ntah pe kitik ukurta, banci saja sikataken ntah pe silakoken kai si erban kita erkadiola. Jahwe nuruh kita ngkuasai rawanta. Nina Pustaka, ”Ola pedas-pedassa das darehndu.” Ukuri uga lalana masalah si banci sipedauh adi la menukah merawa! (Oge Pengerana 7:9; Kuan-kuanen 16:32.) Nina ka sialemi min kalak si deban. Janah nina Jesus adi la kita nggit ngalemi, Jahwe pe la nggit ngalemi kita. (Matius 6:14, 15) Perlu nge kam reh sabarna janah reh nggitna ngalemi?

6. Kai si banci terjadi adi la sikuasai perasanta?

⁶ Adi la sikuasai perasanta, banci saja terus kita merawa janah mulai nembeh atenta kalak si deban. Ntah banci saja sipengaruhi piga-piga kalak gelah ndukung kita. Janah adi siusahaken pe muniken rawa ntah pe ateta segat, kalak si deban dungna banci meteh. Akibatna, turang senina banci lanai nggit ndeher ras kita. (Kuan-kuanen 26:24-26) Pertua banci nggunaken Pustaka i bas nampati kita meneken rawa ras ate segat janah ngalemi kalak si deban. (Imamat 19:17, 18; Roma 3:11-18) Sanga bage ilakokenna, siikutken nge pedah i bas Buku Jahwe?

7, 8. (a) Uga Jahwe negu-negu umatNa? (b) Kai piga-piga petunjuk i bas Pustaka ras engkai maka arus siikuti?

⁷ Jahwe negu janah ngajari kalak si i bas organisasiNa. Uga carana? IpilihNa Kristus jadi ”takal perpulungen”, janah ipilih Jesus ”juak-juak si tutus dingen pentar” guna ngajari ras mere petunjuk man umat Jahwe. (Epesus 5:23; Matius 24:45-47) Bagi badan pinpinen i bas abad pemena, juak-juak enda iergaina kal Pustaka erkiteken e Kata Dibata. (Oge 1 Tesalonika 2:13.) Kai piga-piga petunjuk i bas Pustaka?

⁸ Isuruh Pustaka kita pulung alu ratur. (Heber 10:24, 25) Iajari ka kita gelah seri pengangkanta kerna pengajaren Pustaka. (1 Korinti 1:10) Isuruhna kita gelah tetap ’ndarami lebe kinirajanNa’. (Matius 6:33) Pustaka nuruh kita erberita arah rumah ku rumah i bas ingan nterem jelma, janah i ja pa pe. (Matius 28:19, 20; Perbahanen Rasul-Rasul 5:42; 17:17; 20:20) Isuruh ka pertua njaga kebersihen runggun. (1 Korinti 5:1-5, 13; 1 Timotius 5:19-21) Janah, isuruh ka kita gelah sijaga kulanta tetap bersih ras  sipedauh perukuren bage pe kebiasan si nembeh ate Jahwe.​—2 Korinti 7:1.

9. Ise si ipilih Jesus nampati kita i bas ngangkai Kata Dibata?

⁹ Piga-piga banci saja iakapna la perlu isampati erlajar Pustaka. Tapi mulai 1919, igunaken Jesus ”juak-juak si tutus dingen pentar” i bas nampati umat Jahwe ngangkai ras ngikuti kai si ikataken Pustaka. Alu matuhi Pustaka, sijaga runggun tetap bersih, dame, ras ersada. Sungkun dirindu, ’Setia nge aku man Jesus janah kuikutken petunjuk juak-juak si tutus dingen pentar?’

10. Uga buku Esekiel njelasken bagin organisasi Jahwe si lit i surga?

¹⁰ I bas Pustaka, sipelajari maka juak-juak Jahwe si i surga pe iatur. Contohna, iidah Esekiel pengenehenen kerna kereta Jahwe si banci pedas kal erdalan ku ja pa pe bagi si iarapken Jahwe. (Esekiel 1:4-28) Kereta e nggambarken bagin organisasi Dibata si i surga, si pedas kal ngikutken petunjukNa. Enda mpengaruhi bagin organisasi Dibata si i doni. Ukuri perubahen si nggo iban organisasi Dibata i bas sepuluh tahun terakhir enda. Ingetlah Jahwe si negu-negu perubahen enda. Lanai ndekah, Kristus ras malekatna ngkernepkan doni si jahat enda. Alu bage, lanai lit kalak si la nghamati Jahwe bage pe gelarNa ntah nentang caraNa merentah!

11, 12. Kai si nggo ilakoken organisasi Jahwe i bas wari-wari pendungi enda?

¹¹ Perdiateken kai si ilakoken organisasi Jahwe i bas wari-wari pendungi enda. Pembangunen. Ratusen turang senina tutus kal atena mbangun kantor pusat Saksi-Saksi Jahwe i Warwick, New York, AS. Ribun sukarelawan si deban i belang-belang doni nari mbangun Bale Kinirajan ras kantor cabang. Kalak e iarahken Departemen Rancang/Bangun Sedunia. Siergai kal kalak si ikut i bas pembangunen enda! Janah, juak-juak Jahwe i ja pa pe mereken kai pe si nampati pembangunen enda. Ipasu-pasu Jahwe umatNa erkiteken setia ras meteruk ukur.​—Lukas 21:1-4.

¹² Pendidiken. Meriah ukur Jahwe ngajar umatNa. (Jesaya 2:2, 3) Perdiateken sekolah si nggo iban. Lit Sekolah Dinas Perintis, Sekolah man Perberita Kinirajan, Sekolah Gilead, Sekolah Dinas Betel, Sekolah man Pertua Keliling ras Ndeharana, Sekolah man Pertua Runggun, Sekolah Pelayanen Kinirajan, ras Sekolah man Anggota Panitia Cabang ras Ndeharana. Janah i bas jw.org, banci sidat Pustaka bage pe publikasi si debanna i bas ratusen cakap. Lit ka bagin khusus man anak-anak ras man keluarga, bage pe bagin berita. Igunakenndu nge jw.org i bas pelayanenndu ras i bas kebaktin jabundu?

13. Kai tanggung jabap umat Jahwe?

¹³ Sada kinihamaten jadi bagin organisasi Jahwe janah meteh kai si ipindoNa i bas kita nari! Erkiteken sieteh kai si erban meriah ukur Dibata, ertanggungjabap kita matuhi Ia janah ngelakoken si benar. Aminna pe nterem jelma meriah iakapna ngelakoken kai si jahat, arus ’ciga atenta nandangi kai si jahat’ bali bagi Jahwe. (Masmur 97:10) Ula kita bagi kalak si erpengakap  ’maka kejahaten e mehuli janah si mehuli ikatakenna jahat’. (Jesaya 5:20) Siban atenta meriah ukur Jahwe, emaka siusahaken lalap bersih i bas kai pe. (1 Korinti 6:9-11) Si ikataken Jahwe i bas Pustaka guna kiniulinta. Keleng atenta Ia janah merhat kita setia man baNa. E me alasenna maka sidalanken pedahNa i rumah, i runggun, i bas ingan erdahin, i sekolah ntah i ja pa pe. (Kuan-kuanen 15:3) Sibahas kari i bas bagin kai saja perlu setia man Dibata.

14. Uga orang tua banci setia man Jahwe?

¹⁴ Cara mere pelatihen man anakta. I bas Pustaka ibere Jahwe petunjuk man orang tua cara mere pelatihen man anakna. Kalak Kristen perlu metenget gelah la ipengaruhi cara rukur si biasa i doni enda. (Epesus 2:2) Contohna, i bas piga-piga ingan sekalak bapa banci saja rukur, ’Diberu si ngajari anak-anak.’ Tapi Pustaka alu tangkas merentahken perbapan ngajari anakna kerna Jahwe. (Epesus 6:4) Bapa ras nande si ngkelengi Jahwe ersura-sura gelah anakna rembak ras Jahwe, bali bagi Samuel sanga kitik denga.​—1 Samuel 3:19.

15. Uga kita banci setia man Jahwe sanga erban keputusen si penting?

¹⁵ Cara erban keputusen. Ope erban keputusen si penting i bas kegeluhen, sidarami atenta kai petunjuk Jahwe gelah banci setia man baNa. Pustaka ras organisasiNa banci nampati kita. Contohna, gundari piga-piga orang tua si nggo lawes ku negeri si deban nadingken anakna si kitik denga ku keluargana. Alu bage, bapa ras nandena banci terus erdahin. Memang enda keputusen  pribadi, tapi arus isungkunna dirina, ’Uga perukuren Jahwe kerna keputusen kami?’ (Oge Roma 14:12.) Bijaksana adi siukuri lebe kai nina Pustaka ope erban keputusen si penting kerna keluarga ras pendahinta. Perlu kita penampat Bapanta erkiteken la banci sitentuken langkahta.​—Jeremia 10:23.

16. Keputusen kai si arus iban sekalak pernanden sanga tubuh anakna? Kai si nampati ia erban keputusen si benar?

¹⁶ Kenca sekalak ndehara ras perbulangen pindah ku luar negeri, tubuh me anakna, janah ikirimna atena anakna man nini bulangna i kuta. Tapi paksa si e, si ndehara erlajar Pustaka ras sekalak Saksi Jahwe. Ipelajarina maka ngajar anak kerna Jahwe eme tanggungjabapna. (Masmur 127:3; Kuan-kuanen 22:6) Ertoto ia man Jahwe, gelah isampati ngelakoken kai si benar. (Masmur 62:7, 8) Iturikenna ka masalahna e man si nampati ia erlajar ras man turang senina i bas runggun. Aminna gia keluarga ras teman-temanna tetap nuruh ia gelah ikirimna anakna man nini bulangna, la ia nggit. Iperdiateken perbulangenna maka ermediate kal turang senina man ndehara bage pe man anakna. Enda erbanca mulai ia tertarik janah nggit erlajar Pustaka ras reh ku perpulungen. Bayangken uga riahna akap ndehara e sanga igejapkenna Jahwe njabap totona!

17. Petunjuk kai si arus siikuti sanga kita ngajarken Pustaka?

¹⁷ Cara ndalanken petunjuk. Adi kita setia man Dibata, sidalanken atenta petunjuk si ibereken organisasiNa. Contohna, pertimbangken kai si perlu mis ilakoken kenca mulai sipelajari buku Kai Nina Pustaka si Badia? ras sekalak jelma. Nggo ipebetehken man banta gelah sigunaken piga-piga menit kenca erlajar guna nampati si erlajar nandai terbagesen kerna organisasi Jahwe. Banci sigunaken video Kai si Ilakoken i Bale Kerajan? ras buku Ise si Ngelakoken Peraten Jahwe Genduari? Kenca dung ipelajarina kerina buku Kai Nina Pustaka, banci silanjutken ku buku ”Tetaplah Berada dalam Kasih Allah” gelah ’reh gegehna kiniteken’ si erlajar, amin gia ia nggo iperidiken. (Kolose 2:7) Idalankenndu nge petunjuk organisasi Jahwe enda?

18, 19. Kai piga-piga alasen maka kita arus ngata bujur man Jahwe?

¹⁸ Melala alasen engkai maka arus sikataken bujur man Jahwe! Salah sadana eme perban ”i bas Ia kita nggeluh, muit, dingen lit”. (Perbahanen Rasul-Rasul 17:27, 28) IberekenNa ka BukuNa, eme Pustaka si Badia. Bali bagi kalak Kristen i Tesalonika, bujur kal sikataken nandangi pemere enda erkiteken e Kata Dibata.​—1 Tesalonika 2:13.

¹⁹ Pustaka nggo nampati kita gelah rembak ras Jahwe, janah Ia pe nggo rembak ras kita. (Jakup 4:8) Bujur kal sikataken erkiteken nggo iundang Bapanta kita jadi bagin organisasiNa. Perasanta bali bagi si itulisken pemasmur, ”Kataken bujur man [JAHWE], sabap mehuli kal Ia, keleng ateNa tetap rasa lalap.” (Masmur 136:1) Tep-tep ayat i bas masmur e, iulihi pemasmur kata-kata ”keleng ateNa tetap rasa lalap”. Jelas me, adi kita setia man Jahwe janah sidalanken petunjuk si iberekenNa arah organisasiNa, iberekenNa kegeluhen rasa lalap janah Ia pe terus setia man banta!