1, 2. (a) Kedamen kai si banci sigejapken gundari? (b) Engkai maka lenga banci sigejapken kedamen situhu-tuhu? (Nen gambar pemena artikel.)

ATETA kerina dame min geluhta, ula lit masalahta. Emaka ngata bujur kel kita perban ibere Jahwe ”kemalemen ate si rehna i bas [Ia] nari”. Kedamen e erban tenang pusuh ras perukurenta. (Pilipi 4:6, 7) Perban nggo silayani Jahwe, banci sigejapken ”perdamen ras Dibata”. Maksudna, banci kita rembak ras Ia.​— Roma 5:1.

² Tapi, lenga bo waktuna doni enda tuhu-tuhu dame iban Dibata. Kita nggeluh bas wari-wari pendungi, emaka melala masalah si erban gulut ukurta. Selain si e, melala kalak jahat. (2 Timotius 3:1-4) Janah arus ka silawan Setan ras ajarenna si palsu. (2 Korinti 10:4, 5) Tapi si erban gulut kel ukurta adi la senang kade-kadenta janah merawa ia perban silayani  Jahwe. Itokohina kita perban kinitekenta, janah ikatakenna kita si erban keluarganta lanai ersada. Banci saja ikatakenna ka lanai kita keluargana adi tetap kita nembah Jahwe. Emaka, kai si arus silakoken adi la senang ntah pe merawa keluarganta banta? Amin gia bage, uga carana gelah keluarganta tetap dame?

3, 4. (a) Kai si banci terjadi adi jadi pengikut Jesus kita? (b) Kai si erbanca maka mesera siakap jadi pengikut Jesus?

³ Ieteh Jesus maka labo kerina kalak senang nandangi kai si iajarkenna. Ietehna ka maka lit pagi kalak si la senang man ajar-ajarna. Enda me si erbanca keluarga lanai ersada, emaka arus kalak e pang. Nina Jesus, ”Ola akapndu aku reh ku doni enda maba dame. Aku reh labo maba dame, tapi erbahan perang. Aku reh erbahanca rubati anak si dilaki ras bapana, anak si diberu ras nandena, permain ras simetuana, janah kerina si lit i bas jabuna imbangna kerina.”​—Matius 10:34-36.

⁴ Kai maksud Jesus paksa ikatakenna ”Ola akapndu aku reh ku doni enda maba dame”? Maksud Jesus, arus lit si ikorbanken adi jadi ajar-ajarna ateta. Payo, tujun Jesus ngajari kalak nandai Dibata labo gelah keluarga lanai siangkan. (Johanes 18:37) Tapi arus iinget ajar-ajar Jesus maka labo menukah ngikutken ia, terlebih ka adi lit teman ntah pe keluargana si la senang.

5. Kai si pasti iadapi ajar-ajar Jesus?

⁵ Ikataken Jesus maka pasti iadapi ajar-ajarna tentangen bas keluargana nari. (Matius 10:38) Tapi perban keleng atena Jesus, tetap ia megenggeng amin gia itokoh-tokohi ntah pe lanai iakui keluargana. Ulihna, ndauh belinen pasu-pasu si idatna asangken kai si nggo ikorbankenna.​—Oge Markus 10:29, 30.

6. Kai si arus siinget paksa la senang kade-kadenta ngenen kita?

⁶ Amin pe la senang kade-kadenta perban kita jadi Saksi, tetap sikelengi ia. Tapi siingetlah maka arus belinen kekelengenta man Dibata ras Kristus asangken man ise pe. (Matius 10:37) Arus ka min kita metenget perban kekelengenta man keluarga banci iban Setan jadi cara gelah lanai kita setia man Jahwe. Mari sibahas piga-piga situasi si banci jadi tentangen man banta janah uga cara ngadapisa.

7. Kai si arus ilakokenndu adi teman geluhndu la nggit nembah Jahwe?

⁷ Nina Pustaka, kalak si nggo erjabu ”ngenanami kesusahen”, ntah pe masalah. (1 Korinti 7:28) Terlebih ka adi erjabu kam ras si la Saksi, reh buena masalahndu janah reh latihna akapndu rukur. Adi bage situasindu, ikutkenlah pedah Jahwe. Nina ula min sitadingken ntah pe sisirangken teman geluhta perban la nggit nembah Jahwe. (1 Korinti 7:12-16) Amin  gia perbulangenndu la Saksi janah la iberena keperlun rohani man keluargandu, tetaplah mehamat bana sabap ia kap kepala keluargandu. Adi ndeharandu la nggit nembah Jahwe, tetaplah kelengi ia janah mesayang man bana.​—Epesus 5:22, 23, 28, 29.

8. Penungkunen kai si banci isungkunndu bandu adi ibatasi teman geluhndu waktundu eribadat?

⁸ Kai si arus ilakokenndu adi ibatasi teman geluhndu waktundu eribadat? Ikataken sekalak perbulangen man ndeharana si Saksi maka bas wari-wari tertentu saja ia banci erberita. Adi bage situasindu, sungkuni bandu: ’Tuhu-tuhu ilarangna nge aku ngelayani Jahwe? Adi labo, banci nge kuikutken kai si ipindona?’ Adi banci denga ikutkenndu, la melala masalah bas perjabunndu.​—Pilipi 4:5.

9. Uga cara kalak Kristen ngajari anak-anakna ngergai orang tuana si la Saksi?

⁹ Pasti mesera akapndu ngajari anakndu adi teman geluhndu la ngelayani Jahwe. Contohna, ajarindu anakndu gelah patuh man perentah enda, ”Pehagalah nande-bapandu.” (Epesus 6:1-3) Tapi uga adi la mehuli perbahanen teman geluhndu? Banci banndu contoh man anakndu maka iergaindu teman geluhndu. Ukuri kerna sifat-sifatna si mehuli, janah kataken bujur man bana kerna perbahanenna si mehuli. Ula sempat ibegi anakndu ikatakenndu si la mehuli kerna teman geluhndu. Tapi, banci ijelaskenndu man anakndu maka tep-tep kalak arus erban pilihen ngelayani Jahwe ntah lang. Adi iajarindu anak-anakndu ngergai orang tuana amin pe la Saksi, perbahanen anak-anakndu e banci dungna ngiahken teman geluhndu erlajar kerna Jahwe.

10. Uga cara orang tua Saksi ngajari anakna gelah ngkelengi Jahwe?

¹⁰ Piga-piga orang tua si la Saksi  banci saja isuruhna anakna ngerayaken perayan agama palsu ntah pe mpelajari ajaren agama e. Piga-piga perbulangen ilarangna ndeharana ngajarken Pustaka man anakna. Adi bage situasindu, tetaplah usahaken ngajari anakndu kerna Dibata. (Perbahanen Rasul-Rasul 16:1; 2 Timotius 3:14, 15) Misalna, lit perbulangen si la senang adi iajari ndeharana anakna kerna Pustaka. La ka ia senang adi ibaba anakna ku perpulungen. Iergai ndeharana nge keputusen e, tapi asa bancina tetap iusahakenna ngajari anak-anakna kerna kinitekenna. Alu bage, banci ieteh anak-anakna kerna Jahwe bage pe kai si ngena ras si la ngena ateNa. (Perbahanen Rasul-Rasul 4:19, 20) Dungna, anak-anak e me si erban keputusen ngelayani Jahwe ntah lang. * (Nen keterangen tambahen.)—Ulangen 30:19, 20.

11. Engkai maka banci kita lanai siangkan ras keluarganta?

¹¹ Tangtangna kita erlajar ras Saksi Jahwe, banci saja la mis sikataken man keluarganta. Tapi perban reh tekna kita maka enda agama si benar, sikataken me man keluarganta maka jadi Saksi ateta. (Markus 8:38) Erkiteken si e, banci kita lanai siangkan ras keluarganta. Mari sibahas kai si banci ilakokenndu gelah banci tetap kam dame ras keluargandu janah tetap setia man Jahwe.

12. Kai saja nge kira-kira alasen keluarganta maka la senang ia kita jadi Saksi? Uga cara ngadapisa?

¹² Siangkai min perasan kade-kadenta si la Saksi. Pasti meriah ukurta perban nggo sieteh kai situhuna si iajarken Pustaka. Tapi, banci saja iakap kade-kadenta kita nggo itipu ntah pe siikutken agama si sesat. Perban lanai kita ikut bas wari-wari raya mungkin iakap keluarganta lanai keleng ateta ia. Banci saja mbiar kalak e ntah kai kari si terjadi adi kita mate. Usahakenlah ngangkai perasan kalak e janah begikenlah ngkai maka mbiar ia adi kita jadi Saksi. (Kuan-kuanen 20:5) Paulus pe iusahakenna ngangkai ”kerina kalak” gelah banci iajarina kalak e berita si meriah. Adi sieteh ngkai maka keluarganta mbiar, enda banci jadi dalanta nuriken kai si nggo sipelajari.​—1 Korinti 9:19-23.

13. Uga arusna caranta ngerana man kade-kadenta si la Saksi?

¹³ Mehamatlah kam ngerana. Nina Pustaka, ”Mehuli dingen ngena min ate kalak cakapndu.” (Kolose  4:6) Memang, la menukah ngelakokenca. Banci sipindo gelah isampati Jahwe kita alu kesah si badia gelah manjar-anjar janah mehamat kita ngerana man kade-kadenta. Ula kita nggit erjengil amin pe sieteh ajaren agamana salah. Adi sangkut ukurta erkiteken ranan ntah pe perbahanenna, usihlah rasul-rasul Jesus. Nina Paulus, ”Adi isumpahi kalak kami, ipasu-pasu kami ia; adi isiksa kalak kami, megenggeng kami. Adi igombang-gombangi kalak kami, mehuli pengaloi kami man bana.”​—1 Korinti 4:12, 13.

14. Kai ulihna adi mehuli perbahanenta?

¹⁴ Mehulilah perbahanenndu. Engkai maka enda penting? Amin gia ranan si mehuli banci erban kita dame ras keluarganta, tapi ndauh belinen pengaruh perbahanen si mehuli. (Oge 1 Petrus 3:1, 2, 16.) Buktikenlah man kade-kadendu maka mehuli perjabun kalak si jadi Saksi Jahwe, iurusna anak-anakna, dalankenna pedah Pustaka, janah geluhna pe ermeriah ukur. Amin gia nggo mehuli perbahanenta tapi tetap la nggit keluarganta jadi Saksi, ula kitik ukurta perban siteh maka nggo meriah siban ukur Jahwe.

15. Rencana kai si banci siban gelah ula sempat erjengil ras keluarganta?

¹⁵ Banlah rencana. Cuba ukuri kai si erbanca kam ras kade-kadendu erjengil. Janah ukuri kai si banci ilakokenndu. (Kuan-kuanen 12:16, 23) Enda me si ilakoken turang seninanta i Australia. Merawa bengkilana perban kalak e jadi Saksi. Emaka, adi iteleponna atena bengkilana, ertoto ia lebe ras perbulangenna mindo penampat Jahwe gelah banci ia tetap manjar-anjar ngerana man bengkilana. Janah ipilihna topik si meriah akap bengkilana. Gelah ula ndekahsa ngerana si banci dungna erban perjengilen kerna agama, ibatasina me waktuna nelepon.

16. Kai si banci iingetndu gelah la ceda ukurndu paksa la siangkan ras keluargandu?

¹⁶ Memang labo banci lalap kam siangkan ras keluargandu. Emaka banci saja ceda ukurndu adi la kena siangkan perban keleng atendu ia. Janah meriah min atendu ukur keluargandu. Tapi ingetlah maka arus kelengen atendu Jahwe asangken keluargandu. Adi idah keluargandu e, banci itehna maka penting kepe ngelayani Jahwe. La banci ipaksandu ise pe nembah Jahwe. Tapi banci ibuktikenndu maka reh ulina geluhndu perban nggo ngelayani Jahwe. Janah, ibereken Jahwe kesempaten man kalak e guna milih ngelayani Ia ntah lang.​—Jesaya 48:17, 18.

17, 18. Kai si banci ilakokenndu adi lit keluargandu lanai ngelayani Jahwe?

¹⁷ Pasti ceda kel ukurta adi lit keluarganta ipedarat bas runggun nari ntah pe lanai ia nggit ngelayani Jahwe. Bagi isayat sembilu nanamna. Uga cara ngadapisa?

¹⁸ Tetaplah sibuk ngelayani Jahwe. Adi bage si iadapindu, pepaguhlah kinitekenndu. Ogelah Pustaka tiap wari, ban persikapen guna perpulungen, raturlah kam pulung, ratur erberita, janah ertotolah man Jahwe mindo gegeh gelah ngasup ngadapisa. (Judas 20, 21) Uga adi nggo pe ilakokenndu kerina tapi tetap denga ceda pusuhndu? Ula kam nerah! Tetaplah sibuk ngelayani Jahwe. Adi silakoken e, la i je lalap ukurta. Enda me si igejapken penulis Masmur 73. Paksana kel gulut ukurna. Tapi perban sibuk ia ngelayani Jahwe, banci reh beluhna ia rukur. (Masmur 73:16, 17) Kam pe banci bage.

19. Uga carandu ndukung pengaturen Jahwe?

¹⁹ Dukunglah pengaturen Jahwe. Ieteh Dibata maka mbelin gunana disiplin si iberekenNa, termasuk man kalak si ipedarat bas runggun nari. Pasti ceda kel pusuhta adi idisiplin Jahwe teman ntah pe keluarganta, tapi situhuna enda nampati ia gelah mulihken ku Jahwe. (Oge Heber 12:11.) Emaka, arus sidukung pengaturen Jahwe gelah ’ola kita erteman’ ras kalak si nggo ipedarat bas runggun nari. (1 Korinti 5:11-13) Enda labo menukah. Tapi ula siteleponi ia, sikirim SMS, surat, e-mail, ntah pe erhubungen bas media sosial (program bas komputer ntah tablet si banci ercakap-cakap ras nterem jelma).

20. Kai si banci siarapken?

²⁰ Teruslah arapken! Kalak si erkeleng ate ”tetap erpengarapen”, emaka tetaplah sitimai teman ntah pe keluarganta mulihken ngelayani Jahwe. (1 Korinti 13:7) Adi idahndu ia nggo mulai robah, banci totokenndu gelah itetapkenna ukurna ngikutken pemindon Jahwe, ”Mulihlah kempak Aku.”​—Jesaya 44:22.

21. Kai si banci ilakokenndu adi la senang keluargandu kam jadi ajar-ajar Jesus?

²¹ Ikataken Jesus maka arus kelengen ateta ia asangken ise pe. Janah tek ia maka banci ajar-ajarna setia amin pe lit tentangen bas keluargana. Emaka adi merawa keluargandu perban kam jadi ajar-ajar Jesus, ernalemlah man Jahwe. Pindo baNa gelah isampatiNa kam megenggeng. (Jesaya 41:10, 13) Adi megenggeng kam pasti meriah ukur Jahwe ras Jesus janah pasti kam ipasu-pasuNa. Adi ingetndu e banci kam ermeriah ukur.