I BAS Hukum Musa, maun-maun kalak banci ersumpah alu ngataken, ”Ersumpah aku i bas gelar Dibata”, ntah pe ”Ersumpah aku i bas gelar Jahwe”. Tapi, bas jaman Jesus nggo biasa akap kalak ersumpah, janah kai pe si ikatakenna isumpahkenna. Atena gelah reh tekna kalak nandangi kai si ikatakenna. Tapi segat ate Jesus kalak si bage. Nina, ”Katakenlah, ’ue’ adi tuhu janah katakenlah, ’lang’ adi la tuhu.”​—Matius 5:33-37; 23:16-22.

Ituriken Theological Dictionary of the New Testament, bas Talmud ntah pe kitap kalak Jahudi, maka lit sumpah si arus itepati ras lit sumpah si banci ilanggar. Jenari sieteh maka rusur kel kalak Jahudi e ersumpah guna mbuktiken kai si ikatakenna e benar.

Labo Jesus saja si la senang nandangi kalak si ersumpah. Itulis sekalak ahli sejarah Jahudi, Flavius Josephus, maka lit sada sekte Jahudi si la banci ersumpah. Tek anggota sekte e maka adi ersumpah ia, enda ndauh jahaten asangken erbual. Menurut kalak e, adi lit kalak si arus ersumpah gelah tek kalak bana, berarti kalak e perbual. Nina buku Jahudi Wisdom of Sirach, ”Kalak si ersumpah tuhu-tuhu ngelanggar hukum.” Segat ate Jesus kalak si ersumpah kerna kai si la penting. Situhuna, adi lalap nge sikataken kai si benar, la perlu kita ersumpah gelah tek kalak banta.