1. Keleng ate si apai nge si mehulina? Kai ertina e? (Nen gambar pemena artikel.)

KELENG ate rehna bas Jahwe nari. (1 Johanes 4:7) Keleng ate si mehulina eme bagi keleng ate Jahwe. Bas Pustaka, enda ikataken kekelengen a·gaʹpe, bas cakap Junani. Kekelengen e tuhu-tuhu bas pusuh nari, tapi labo terjeng perasan saja. Tapi ibuktiken arah perbahanen. Kekelengen e ngiahken kita nampati kalak alu la ngarapken untung. Hasilna, meriah siakap janah puas geluhta.

2, 3. Kai buktina Jahwe ngkelengi manusia alu la ngarapken untung?

² Nggo keleng ate Jahwe manusia sope itepaNa Adam ras Hawa. ItepaNa doni janah isikapkenNa kerina keperlunta. Sikap banNa doni e gelah banci meriah ukurta tading i je. Kerina e labo guna kepentingenNa tapi guna kepentingenta. Kenca nggo mejile banNa doni e, itepaNa me manusia janah ibereNa arapen nggeluh rasa lalap i pardis.

 ³ Lit ka bukti si deban maka Jahwe ngkelengi manusia alu la ngarapken untung. Amin gia mberontak Adam ras Hawa, tek Jahwe maka pasti lit anak-anak kalak e si ngkelengi Ia pagi. Emaka ikorbankenNa AnakNa, Jesus, guna nelamatken kesusuren Adam ras Hawa. (Kejadin 3:15; 1 Johanes 4:10) Paksa ijanjiken Jahwe kerna si e, tempa-tempa nggo iberekenNa tebusen e. Tapi 4.000 tahun kenca si e nge maka ibereken Jahwe AnakNa si tonggal nebus manusia. (Johanes 3:16) Tuhu-tuhu ngata bujur kel kita nandangi kekelengen Jahwe e!

4. Janari banci sieteh maka manusia si la sempurna pe banci ngkelengi alu la ngarapken untung?

⁴ Banci nge kita ngkelengi alu la ngarapken untung, amin pe kita la sempurna? Banci. Itepa Jahwe kita sentudu ras tempasNa, ertina ngasup kita ngusih Ia. Memang labo menukah, tapi pasti kita ngasup. Ibuktiken Abil kekelengenna si la ngarapken untung alu mereken persembahen si mehulina. (Kejadin 4:3, 4) Nuah pe mbuktiken kekelengen si bage alu terus erberita amin pe la iperdiateken kalak. (2 Petrus 2:5) Janah, ibuktiken Abraham maka keleng kel atena Dibata alu nggit ngorbanken anak kekelengenna, Isak. (Jakup 2:21) Bali bagi kalak enda, nggit kita ngkelengi amin gia la menukah.

5. Kai piga-piga cara mbuktiken kekelengen situhu-tuhu?

⁵ Ikataken Pustaka maka kekelengen situhu-tuhu e ”ola terjeng biber saja ntah pe i bas cakap saja ngenca. Arus maka tuhu-tuhu kekelengenta e, si teridah arah perbahanenta”. (1 Johanes 3:18) Payo nge enda ertina la banci sibelasken keleng ateta kalak si deban? Labo bage. (1 Tesalonika 4:18) Maksudna eme la bias terjeng ngataken, ”Keleng ateku kam.” Tapi perlu sibuktiken. Contohna, adi la lit pangan ntah pe uis turang seninanta, sisampati ia labo arah kata-kata saja. (Jakup 2:15, 16) Bage pe, perban keleng ateta Jahwe ras kalak si deban, labo sitotoken saja gelah reh buena kalak si ikut erberita tapi arus ka tutus ateta erberita.​—Matius 9:38.

6, 7. (a) Kai ”keleng ate si tuhu-tuhu” e? (b) Kai piga-piga contoh kekelengen si palsu?

⁶ Ikataken rasul Johanes maka ’kekelengenta e arus tuhu-tuhu, si teridah arah perbahanenta’. Emaka kekelengenta e ”ola min alu pekulah-kulah” tapi ”keleng ate si tuhu-tuhu”. (Roma 12:9; 2 Korinti 6:6) Maun-maun lit kalak si iban-banna ia perkeleng. Tapi bas pusuh nari kin kekelengenna e? Ntah lit kin maksudna si deban? Labo keleng ateta kalak si deban adi siban-ban keleng ateta ia. Enda labo lit ertina.

⁷ Mari sinen piga-piga contoh kekelengen  si palsu. Paksa ngerana Setan man Hawa bas peken Eden, arah rananna teridah tempa-tempa ermediate ia man Hawa. Tapi arah perbahanenna la bage. (Kejadin 3:4, 5) Sanga Daud jadi raja lit temanna gelarna Ahitopel. Ihianati Ahitopel si Daud guna kepentingenna. Arah perbahanenna teridah maka ia labo teman situhu-tuhu. (2 Samuel 15:31) Gundari pe lit kalak murtad ras kalak si deban si nggunaken ”ranan mehuli dingen muji-muji” gelah runggun lanai ersada. (Roma 16:17, 18) Banci saja tempa-tempa iperdiatekenna kalak, tapi situhuna lit tujunna si deban.

8. Penungkunen kai si arus sisungkuni banta?

⁸ Kalak si kekelengenna palsu, mpemelaken dirina perban itokohina kalak si deban. Banci sitokohi manusia tapi la banci sitokohi Jahwe. Ikataken Jesus maka kalak si kekelengenna palsu ”mberat kel ukumenna”. (Matius 24:51, Terjemahan Dunia Baru) Saksi Jahwe la banci palsu kekelengenna. Emaka sungkuni banta, ’Tuhu-tuhu nge keleng ateku ia, ntah kuban-ban saja nge perban lit maksudku?’ Uga banci sibuktiken maka kekelengenta e tuhu-tuhu? Mari sibahas siwah carana.

9. Adi tuhu-tuhu kekelengenta e, kai si arusna silakoken?

⁹ Meriahlah ukurndu nampati amin pe la lit si mperdiatekenca. Mehulilah kita man kalak si deban janah nggitlah kita nampati amin pe la lit si metehsa. (Oge Matius 6:1-4.) Tapi Ananias ras Sapira la bage perbahanenna paksa mereken sumbangen. Atena ieteh kalak min kai si ilakokenna, emaka erbual ia kerna buena sumbangen si iberekenna. Akibatna iukum me kalak e. (Perbahanen Rasul-Rasul 5:1-10) Adi tuhu-tuhu keleng ateta turang seninanta, nggit kita nampati ia amin pe la lit si metehsa. Banci siusih turang seninanta si nampati Badan Pinpinen si ngajari kita kerna Kata Dibata. La kalak e nggit ipuji-puji, janah la ikata-katakenna kai si ilakokenna.

10. Kai buktina siergai kalak si deban?

¹⁰ Siergailah kalak si deban. (Oge Roma 12:10.) Iergai Jesus rasul-rasulna alu mburihi nahe kalak e. (Johanes 13:3-5, 12-15) Arus kita tuhu-tuhu erjuang gelah meteruk ukur bagi Jesus ras banci ngelayani kalak sideban. La mis iangkai rasul-rasul kai si ilakoken Jesus ndai. Tapi, banci dungna iangkaina kenca ialokenna kesah si badia. (Johanes 13:7) Banci jadi ndauh kita pentaren, bayaken, ntah pe lalan tugasta bas organisasi asangken kalak si deban, tapi ula min jagon siakap kita asangken kalak. (Roma 12:3) Janah, ula min cian ateta adi lit kalak si deban ipuji, tapi meriah  min ukurta amin pe siakap kita patut ipuji. Enda me buktina maka siergai kalak si deban.

11. Engkai maka arus bas pusuh nari sipuji kalak?

¹¹ Arah pusuh nari min sipuji kalak. Sidaramilah cara muji kalak si deban. Sieteh maka adi sipuji kalak, enda ”erguna” janah ngiahken ia. (Epesus 4:29) Tapi pujinta e arus bas pusuh nari, labo perban lit maksud si deban, janah labo perban la ateta sinasehati ia. (Kuan-kuanen 29:5) Adi sipuji kalak tapi sipandangi ia kenca la ia i je, enda ertina pujinta e la bas pusuh nari. Tuhu-tuhu keleng ate rasul Paulus turang senina. Sanga itulisna surat man kalak Kristen i Korinti, ipujina kalak e perban mehuli perbahanenna. (1 Korinti 11:2) Tapi paksa perlu kalak e inasehati, iturikenna alasenna alu mehuli ras jelas.​—1 Korinti 11:20-22.

12. Sanga mere man kalak si deban, kai buktina maka tuhu-tuhu keleng ateta ia?

¹² Mehuli man kalak si deban. Isuruh Jahwe kita gelah nggit mere man turang seninanta. (Oge 1 Johanes 3:17.) Tapi ula guna kepentingenta maka kita mehuli. Emaka sisungkuni banta, ’Ise nge si kuundang ku rumahku? Kalak si ndeher ras aku saja nge? Ntah, kalak si kuakap penting saja nge bas runggun? Kalak si banci ngundang aku mulihi nge si kuundang? Ntah pe, nggit nge aku mere man turang senina si la ndeher kel ras aku, ntah si la banci mere kai pe man bangku?’ (Lukas 14:12-14) Contohna, lit turang seninanta si mesera geluhna perban salah keputusenna, nggit nge kita nampatisa? Ntah uga adi lit turang senina si nggo siundang ku rumahta la pernah iergaina kiniulinta e? Nina Jahwe banta, ”Metemuelah kam alu la jungut-jungut.” (1 Petrus 4:9) Meriah ukurta adi labo perban lit maksudta maka kita mere.​—Perbahanen Rasul-Rasul 20:35.

13. (a) Engkai maka maun-maun arus kita lebih sabar? (b) Kai saja si banci silakoken guna nampati kalak si kote kinitekenna?

¹³ Sampatilah kalak si kote, ntah pe lemah. Ikataken bas Pustaka gelah ’sisampati min kalak si kote janah sabar nandangi ise pe’. (1 Tesalonika 5:14) Alu bage banci sieteh kekelengenta e tuhu-tuhu ntah lang. Lit piga-piga turang seninanta si sempat kote kinitekenna tapi paguh ka mulihi. Si debanna arus lebih sabar kita nampatisa. Uga caranta nampatisa? Banci sigunaken ayat Pustaka gelah ia semangat  mulihi, banci ka kita erberita ras ia, ntah pe sibegiken ia. Ula mis sikataken turang seninanta e ”paguh” ntah pe ”kote”. Tapi arus siinget maka lit kap kelebihen ras kekurangenta. Rasul Paulus pe iakuina nge maka lit kekurangenna. (2 Korinti 12:9, 10) Kerina kita perlu sisampat-sampaten janah siiah-iahen.

14. Kai si perlu silakoken gelah erdame ras turang seninanta?

¹⁴ Nggitlah erdame. Seh kel pentingna erdame ras turang seninanta. Amin gia lit kalak si salah sangka ntah pe la adil banta, tetaplah siusahaken erdame. (Oge Roma 12:17, 18.) Adi sangkut siban ukur kalak, mindo maaflah kita, tapi arus bas pusuh nari. Asangken sikataken, ”Maaf ya,” madin siakui kesalahenta alu ngataken, ”Maaf ya, nggo sangkut ukurndu kuban.” Kalak si nggo erjabu pe nggitlah erdame. Ula min i lebe-lebe kalak tempa-tempa sikeleng-kelengen ia duana, tapi adi la lit kalak i je lanai ia siperkuanen janah kasar perbahanenna ntah pe rananna.

15. Kai buktina maka nggo tuhu-tuhu simaafken kalak?

¹⁵ Maafkenlah salah kalak. Adi sangkut ukurta iban kalak, simaafkenlah ia janah ulanai kita merawa. La pe ietehna maka nggo sangkut banna ukurta, tetaplah simaafken. Janah siinget pedah Pustaka enda, ”Ola kam pergelut sapih-sapih kam, erkiteken kekelengen si lit i bas kam. Usahakenlah tuhu-tuhu maka persadanndu si ibereken Kesah e tetap irakut alu enteguh i bas perdamen.” (Epesus 4:2, 3) Adi lanai siinget-inget kesalahen kalak, enda bukti maka nggo simaafken ia. Kalak si erkeleng ate ”la ngkira kesalahen kalak”. (1 Korinti 13:4, 5) Adi  lalap siinget-inget kesalahen kalak, lanai kita kompak ras turang seninanta bage pe Jahwe. (Matius 6:14, 15) Bukti nggo simaafken kalak si ersalah e, sitotoken ia.​— Lukas 6:27, 28.

16. Kai nge si arus silakoken paksa sidatken tugas bas ngelayani Jahwe?

¹⁶ Engkelengi kalak amin pe kita rugi. Paksa sidat tugas penting bas ngelayani Jahwe, sibuktiken maka tuhu-tuhu sikelengi turang seninanta alu la ’ngukuri untung man banta saja, tapi siinget ngukuri untung kalak si deban’. (1 Korinti 10:24) Contohna turang seninanta si jadi tata tertib bas kebaktin banci ibuatna ingan kundul si sikap man bana bage pe keluargana perban leben ia seh ku ingan kebaktin. Tapi perban tugasna, la pe sikap ingan kundulna, labo dalih akapna. Enda buktina la iukurina untung man bana saja. Uga banci siusih kalak e?

17. Adi lit si ngelakoken dosa si mbelin, kai si arus ilakokenna adi tuhu-tuhu ia perkeleng?

¹⁷ Ula tutup-tutupi kesalahenndu. Itutupi piga-piga kalak Kristen kesalahenna si mbelin. Banci jadi perban mela iakapna ntah pe la atena erban sedih kalak si deban. (Kuan-kuanen 28:13) La keleng ateta dirinta bage pe kalak si deban adi situtup-tutupi dosanta. Engkai maka bage? Perban adi bage perbahanenta, la nggit Jahwe mereken kesah si badia man runggun, dungna la lit kedamen i je. (Epesus 4:30) Emaka, adi lit kalak Kristen si ngelakoken dosa si mbelin, nggit min ia ngerana man pertua gelah banci isampati. Enda bukti maka tuhu-tuhu ia perkeleng.​—Jakup 5:14, 15.

18. Engkai maka penting jadi kalak si tuhu-tuhu perkeleng?

¹⁸ Sifat si pentingna eme kekelengen, si rehna bas Jahwe nari. (1 Korinti 13:13) Adi perkeleng kita, e buktina tuhu-tuhu kita pengikut Jesus janah tuhu-tuhu siusih Dibata Jahwe. (Epesus 5:1, 2) Nina Paulus adi la ia erkeleng ate, sia-sia me dirina. (1 Korinti 13:2) Emaka teruslah siusahaken jadi kalak si perkeleng, labo ”i bas cakap saja ngenca” tapi ’arus maka tuhu-tuhu kekelengenta e, teridah arah perbahanenta’.