AKU tubuh tahun 1923 i Hemsworth, sada kuta i Yorkshire, Inggris. Lit sada abangku, gelarna Bob. Sanga umurku 9 tahun, dat bapa buku si nuriken maka nggo itipu agama palsu nterem jelma. Setuju bapa kerna kai si iogena, perban idahna perbahanen peminpin agama la seri ras kai si iajarkenna. Piga-piga tahun kenca e, reh me Bob Atkinson ku rumah kami, iputarkenna rekamen khotbah Turang Seninanta Rutherford. Teh kami maka pasti seri si erban khotbah e ras si erban buku si idat bapa. Megati iundang orang tuangku Atkinson man berngi i rumah janah ijabapna melala penungkunen kami kerna Pustaka. Janah undangna kami ku perpulungen i rumah turang seninanta si piga-piga kilometer dauhna rumah kami nari. Ratur me kami reh, janah iban me runggun si kitik i Hemsworth. La ndekah kenca si e, tading me ras kami hamba zona (gundari pertua keliling). Perintis-perintis pe megati man i rumah kami. Melala si kupelajari bas kalak e nari.

Paksa si e lit bisnis keluarga kami. Tapi ikataken bapa man abang, ”Adi merintis atendu, banci situtup bisnista e.” Setuju abangku janah pindah ia guna merintis paksa umurna 21 tahun. Dua tahun kenca e, sanga aku 16 tahun, jadi perintis ka aku. Biasana sisada ngenca aku erberita, tapi wari Sabtu ras Minggu lalap lit temanku. Erberita aku alu fonograf ras kartu kesaksin. Kartu e kitik janah lit i je berita kerna Pustaka. Ipasu-pasu Jahwe aku alu mereken sekalak si nggit erlajar Pustaka janah ergiah-giah. Melala ka dungna keluargana si jadi Saksi. Sada tahun kenca e, jadi perintis istimewa me aku ras Mary Henshall. Itugasken kami ku daerah si lenga lit Saksi i je, bas kuta Cheshire.

Bas Perang Doni II, diberu pe isuruh ndukung perang. Tapi si erdahin bas gereja banci la ikut perang, emaka perban kami perintis istimewa akap kami banci la ikut perang. Tapi la setuju pengadilen, emaka ipenjaraken aku 31 wari. Setahun kenca e, paksa umurku 19 tahun, lit aku  dua kali ku pengadilen. Tapi perban terganggu pusuh peratenku, tetap aku la nggit ndukung perang. Emaka ipediat pengadilen aku la ikut. Jenda nari, kugejapken maka isampati kesah si badia aku janah Jahwe me si erban aku ngasup ngadapisa.​—Jesaya 41:10, 13.

Jumpa aku ras Arthur Matthews bas tahun 1946. Ipenjaraken ia telu bulan perban la nggit ikut perang. Ndarat kenca ia, ikut ia ras abangna Dennis, perintis istimewa i Hemsworth. Nggo iajari bapana kalak e kitik-kitikna nari kerna Jahwe, janah iperidiken kalak e sanga nguda denga. La ndekah kenca kalak e ras-ras merintis, itugasken me Dennis ku Irlandia. Emaka la lit teman Arthur merintis. Jadi ate bapa ngenen Arthur si tutus erberita. Ipindo bapa me gelah tading ia i rumah kami. Sanga mulih aku ku rumah megati kami ras-ras nuci piring. Dungna, mulai kami sikirim-kirimen surat. Bas tahun 1948, ipenjaraken ka Arthur telu bulan. Kenca e, Januari 1949 erjabu me kami, tetap ate kami ngelayani sepenuh waktu. Emaka, arus kami beluh ngaturken perduiten kami, janah bas wari libur erdahin kami ku juma kalak gelah dat sen tambahen. Banci kami terus merintis perban isampati Jahwe.

Setahun kenca e, itugasken kami ku Irlandia Utara, tangtangna ku Armagh kenca e ku Newry, si nterem kalak Katolik i je. Segat ate kalak e si la sada agamana, emaka arus kami metenget erberita. Kami perpulungen bas rumah sekalak turang senina si dauhna 16 kilometer bas rumah kami nari. Lit waluh kalak si pulung. Maun-maun asa berngi kami pulung. Bas lante kami tunduh janah pepagina ras-ras kami man erpagi-pagi. Meriah kel ukurku perban gundari nggo nterem kel Saksi i je.

Abangku ras ndeharana, Lottie, nggo jadi perintis istimewa i Irlandia Utara. Tahun 1952, reh kami empatna ku kebaktin i Belfast. Lit sekalak turang senina si seh kel ulina, undangna kami erberngi i rumahna radu ras Pryce Hughes, hamba cabang i Inggris. Bas sada berngi bahas kami buku si mbaru, Jalan Allah Adalah Kasih, buku si khusus iban man kalak Irlandia. Ikataken Turang Senina Hughes mesera tuhu erberita man kalak Katolik i Republik Irlandia enda. Turang seninanta isuruh pindah, janah isuruh peminpin agama gelah iserang kalak turang seninanta. Ikataken Pryce, ”Perlu kita kalak ras motor guna kampanye khusus mbagiken buku bas kota enda.” * (Nen keterangen tambahen.) Jabap kami, ”Ue yah, nggit kami!”

Perintis-perintis i Dublin biasana tading i rumah Ma Rutland, sekalak turang senina si nggo ndekah ngelayani Jahwe. Kami pe sempat tading i je, janah dayaken kami piga-piga barang kami.  Kenca e, empatna kami lawes ndarami motor alu kereta Bob si lit gerobakna. Dat kami sada motor bekas si mejile denga, pindo kami man si ndayakenca gelah kirimkenna ku rumah kami perban la teh kami mabasa. Karabenna, kundul me Arthur bas ingan medem janah tempa iganti-gantina gigi motor. Paginna sanga icubakenna mpedarat motor bas garasi nari reh me sekalak utusen injil gelarna Mildred Willet (si dungna jadi ndehara Jhon Barr). Kepeken tehna maba motor emaka ajarina kami. Banci me lakoken kami tugas kami.

Kenca e, darami kami ingan tading. Ipersingeti turang senina kami gelah ula tading bas rumah motor perban banci kari itutung musuh. Emaka darami kami rumah, tapi la lit dat kami. Berngi e tunduh kami bas motor empatna. Paginna dat kami rumah motor si lit dua ingan medemna si kitik. I je me dungna kami tading. Si luar biasana kap kami, ibereken sekalak si mada juma kami parkir i jumana. Emaka banci kami lawes erberita ku ingan si dauhna 16 seh ku 24 kilometer bas rumah motor e nari. Adi pindah kami ku ingan si deban banci kami erberita bas daerah i ja motor kami parkir.

Sanga erberita kami i Republik Irlandia bagin tenggara la melala tentangenna. Banci bagiken kami 20.000 buku, janah kirimken kami ku kantor cabang Inggris gelar kalak si nggit erlajar. Luar biasa kel kuakap perban gundari lit ratusen Saksi i Irlandia!

Piga-piga tahun kenca e, ipindahken kami ku London bagin selatan. Piga-piga minggu kami i je, iundang me Arthur ku kantor cabang janah paginna ipindo gelah ia jadi pertua keliling! Iajari kami seminggu janah berkat me kami ku Skotlandia, jadi la mbue waktu Arthur nikapken khotbahna. Tapi kai pe tugas si ibereken bana, menukah ntah mesera nggit ia ngelakokenca. Ngidah si e, tuhu-tuhu terpegegehi kel aku. Meriah kel kap kami ngelayani bas dahin keliling. Sedekah enda kami ngelayani i daerah si la lit Saksi i je, tapi gundari meriah kel kap kami banci ngelayani ras turang senina.

Bas tahun 1962, iundang me Arthur ku Sekolah Gilead, emaka arus kami erban keputusen. Sekolah enda sepuluh bulan dekahna, tapi la aku ikut perban la iundang. Dungna iputusken kami gelah ikut Arthur ku sekolah e. Erkiteken la lit temanku erberita, itugasken kantor cabang aku mulihi ku Hemsworth jadi perintis istimewa. Sada tahun kenca e, mulih me Arthur janah itugasken jadi pengawas distrik. Daerah kami eme Skotlandia, Inggris bagin utara, ras Irlandia bagin utara.

Bas tahun 1964, itugasken Arthur jadi hamba cabang i Republik Irlandia. Tangtangna, kurang kuakap riahna erdahin i Betel perban riahen kuakap tugas keliling. Tapi gundari ngata bujur  kel aku perban banci ngelayani i Betel. Jadi, amin pe tangtangna la meriah siakap ndahiken sada tugas tapi adi nggit kita ngelakokenca pasti ipasu-pasu Jahwe. Bas Betel maun-maun dahinku i kantor, nikapken buku-buku guna ikirim, erdakan, ras bersih-bersih. Maun-maun tugas keliling ka kami, jadi banci kami jumpa ras nterem turang senina. Terpegegehi kel kalak e ngidah kalak si erlajar Pustaka si ergiah-giah. Tuhu-tuhu pasu-pasu si mbelin!

Kebaktin internasional Irlandia si pemena iban i Dublin tahun 1965. * (Nen keterangen tambahen.) Amin gia melala tentangen, kebaktin e banci erdalan alu mehuli. Lit 3.948 kalak si reh, ras 65 kalak si iperidiken. Kalak si reh bas negara si deban nari lit 3.500, janah tading i rumah turang seninanta i Dublin. Kerina si mada jabu dat surat pengatan bujur. Janah ipuji kalak e turang senina si reh perban mehuli kel ia. Tuhu-tuhu sada perubahen si mehuli kel bas Irlandia.

Bas tahun 1966, Irlandia utara ras selatan nggo ersada perban gabung ku kantor cabang Dublin. La kel seri persadan enda ras keadan bas Irlandia, si la ersada perban politik ras agama. Meriah kel siakap perban melala si mbarenda Katolik dungna ersada ras kalak si mbarenda Protestan perban ngelayani Jahwe.

Bas tahun 2011, berubah kel kegeluhen kami perban kantor cabang Inggris ras Irlandia ipersada janah pindah kami ku Betel London. Paksa si e, sakit me Arthur. Ikataken dokter ia sakit Parkinson. Megogo kel kuakap, tanggal 20 Mei 2015 mate me Arthur, teman geluhku sedekah 66 tahun.

Pudi wari enda, latih kel kuakap rukur, stres aku, janah ceda kel ateku. Lalap kuinget Arthur. Tedeh kel ateku ia! Tapi adi bage paksana keadanndu, banci reh rembakna kam ras Jahwe. Si erban meriah ukurku perban kueteh melala si keleng atena Arthur. Kudat surat bas turang senina nari i Irlandia, Inggris, bage pe Amerika Serikat. Kudat ka surat bas abang Arthur nari eme Dennis ras ndeharana, Mavis, bage pe anak-anakna, Ruth ras Judy. Tuhu-tuhu terapuli aku janah terpegegehi ngoge surat-surat e.

Jesaya 30:18 tuhu-tuhu mpegegehi aku. Nina, ”[Jahwe] ertima-tima lako nehken perkuah ateNa man bandu. Katawari pe Ia sikap nehken perkuah ateNa man bandu sabap katawari pe Ia ngelakoken si bujur. Malem me ate kalak si ernalem man [Jahwe].” Malem kel ukurku perban kueteh maka ertima-tima Jahwe nasapken kerina perbebenta janah iberekenNa pagi man banta tugas si luar biasa bas doni si mbaru.

Adi kuukur-ukuri kai si terjadi bas geluhku, banci kuidah maka isampati Jahwe janah ipasu-pasuNa dahin erberita i Irlandia! Megah kel kuakap banci ikut bas dahin e. Payo tuhu, adi silakoken kai si isuruh Jahwe pasti lalap kita ipasu-pasuNa.