1, 2. Uga keadan kalak Jahudi i Jerusalem kenca dat Sakaria pengenehenen si pepituken?

MELALA kel si iukuri Sakaria kenca datna pengenehenen si pepituken. Terpegegehi kel ia perban erjanji Jahwe ngukum kalak si la jujur. Tapi lenga lit perubahen. Nterem denga kalak jahat ras si la jujur, janah pembangunen rumah pertoton pe lalap lenga dung. Engkai maka mis itadingken kalak Jahudi tugas si ibere Jahwe bana? Gelah ntabeh nge atena geluhna maka ia mulih ku Jerusalem?

² Ieteh Sakaria maka kalak Jahudi si mulih ku Jerusalem eme kalak si nembah Jahwe. Kalak e ”pusuhna enggo ipekeke Dibata” emaka nggit ia nadingken rumahna ras bisnisna i Babilon. (Esra 1:2, 3, 5) Itadingken kalak e ingan si nggo ndekah kel ia tading i je, janah lawes ia  ku negeri si deban. Teremen kalak e la pernah ngidah negeri e. Penting kel iakap kalak Jahudi e mbangun rumah pertoton Jahwe, buktina nggit ia erdalan 1.600 kilometer dauhna amin gia melala bahaya.

3, 4. Tentangen kai si iadapi kalak Jahudi?

³ Bayangken uga dauhna kalak e erdalan, arah Babilon nari ku Jerusalem. Pasti kalak e ercakap-cakap uga kari geluhna bas Jerusalem. Ituriken kalak si nggo metua uga jilena sange Jerusalem bage pe rumah pertotonna. (Esra 3:12) Adi ikut kam erdalan ras kalak e, uga nge perasanndu sanga idahndu Jerusalem? Bangunenna tading runtuhen janah seh kel perenna. Tembok, menara, ras gerbangna pe nggo ceda kel. Uga nge perasanndu ngidahsa? Banci saja ibandingkenndu ras tembok Babilon si seh kel paguhna. Amin gia bage tetap kalak Jahudi ergiah-giah. Engkai? Perban sanga bas perdalanen, igejapken kalak e maka ilindungi janah isampati Jahwe ia. Seh kenca kalak e i Jerusalem, ibangun kalak e batar-batar bas ingan rumah pertoton mbarenda. Janah tiap wari ibere kalak e persembahen man Jahwe i je. (Esra 3:1, 2) Ergiah-giah kel kalak e, janah la ia sabar mbangunsa. Tempa-tempa la lit si banci ngambatisa.

⁴ Sanga kalak e mbangun rumah pertoton, ibangun kalak e ka rumahna. Gelah banci ia man, arus ka ia ku juma. (Esra 2:70) Melala kel si arus idahiken kalak e. La ndekah kenca si e, reh me musuh janah ipengadina atena kalak e. Lit 15 tahun dekahna kalak e iganggu musuh, dungna lanai kalak e ergiah-giah. (Esra 4:1-4) Janah bas tahun 522, iperentahken raja Persia gelah ipengadi pembangunen i Jerusalem. Tempa-tempa lanai banci ibangun mulihi kota e.​—Esra 4:21-24.

5. Kai si ilakoken Jahwe guna nampati umatNa?

⁵ Ieteh Jahwe maka perlu umatNa ipegegehi. Emaka ibere Jahwe sada nari pengenehenen man Sakaria. Ate Jahwe gelah ieteh kalak e maka keleng ateNa ia janah iergaiNa usaha kalak e i bas ngelayani Ia. Adi iteruskenna mbangun rumah pertoton, erjanji Jahwe pasti ijagaNa kalak e. Nina Jahwe, ”Kerina si enda jadi pagi adi iikutkenndu kai si iperentahken [Jahwe] Dibatandu.”​—Sakaria 6:15.

6. (a) Kai si iidah Sakaria bas pengenehenen si pewaluhken? (Nen gambar pemena artikel.) (b) Engkai maka la seri rupa kuda e?

⁶ Pengenehenen Sakaria si pewaluhken ntah pe si terakhir, tuhu-tuhu mpegegehi kalak e. (Oge Sakaria 6:1-3.) Cuba bayangkenndu kai si iidah Sakaria. ”Arah kelang-kelang dua deleng” si iban arah tembaga nari, reh me kuda-kuda si maba empat gereta. Perban la seri rupa kuda e, menukah siakap mbedaken ise si ngersaksa. Nungkun Sakaria, ”Kai antusenna gereta perang e?” (Sakaria 6:4) Pasti merhat kita metehsa, perban pengenehenen e lit pengaruhna man banta.

7, 8. (a) Kai ertina dua deleng e? (b) Engkai maka deleng e iban bas tembaga nari?

 ⁷ Bas Pustaka, deleng banci ertina kerajan ntah pe pemerentahen. Deleng si iidah Sakaria seri ras dua deleng bas nubuat Daniel. Sada ngertiken pemerentahen Jahwe si lit bas surga ras bas doni si tahan rasa lalap. Sada nari ngertiken Kinirajan Mesias si Jesus Rajana. (Daniel 2:35, 45) Bas tahun 1914, sanga Jesus jadi Raja, i je me lit deleng e. Tujunna guna mastiken gelah sura-sura Dibata terjadi i doni.

⁸ Engkai maka deleng e iban arah tembaga nari? Tembaga eme logam si mejile ras erndilap. Isuruh Jahwe kalak Israel make tembaga sanga mbangun kemah si badia ras rumah pertoton i Jerusalem. (Keluaren 27:1-3; 1 Raja-Raja 7:13-16) Emaka deleng tembaga e ngertiken maka luar biasa kel ulina pemerentahen Jahwe si i surga ras i doni bage pe Kinirajan Mesias. Enda banci erban manusia aman ras ermeriah ukur.

9. Ise si ngersak gereta e janah kai tugasna?

⁹ Kai maksudna gereta ras kalak si ngersaksa? Si ngersak eme malekat-malekat, banci jadi ngertiken malekat-malekat si la seri tugasna i surga. (Oge Sakaria 6:5-8.) Lawes malekat e ”i bas adep-adepen [Jahwe] nari, Tuhan nu kerina doni” guna ngelakoken tugas si penting. Lawes me malekat e ku ingan si nggo itentuken guna njagai umat Dibata, khususna arah Babilon ”i Utara” nari. Pengenehenen e jadi sada jaminen si ibereken Jahwe maka lanai pagi kalak e jadi budak kalak Babilon. Pasti meriah kel akap kalak si mbangun rumah pertoton bas jaman Sakaria. Ietehna maka labo ngasup musuh mpengadi kalak e. 

10. Kai gunana man banta nubuat Sakaria kerna gereta ras si ngersaksa?

¹⁰ Gundari, ipake Jahwe denga malekat-malekatNa guna njaga ras mpegegehi umatNa. (Maleaki 3:6; Heber 1:7, 14) Mulai tahun 1919, ibebasken Jahwe umatNa arah Babilon si Mbelin. Terus iusahaken musuh-musuh e ngambati kalak nembah Jahwe. (Ketangkasen 18:4) Tapi la banci ilakokenna. Perban ijaga malekat organisasi Jahwe, lanai kita mbiar. Tek kita maka umat Jahwe lanai bo banci itaban agama palsu. (Masmur 34:7) Emaka banci terus silayani Jahwe janah ermeriah ukur. Arah nubuat Sakaria enda tek kita maka pasti kita aman, perban lit dua deleng si njagai kita.

11. Engkai maka la kita perlu mbiar paksa iserang pagi?

¹¹ Lanai ndekah ikernepken pemerentah si ikuasai Setan atena umat  Dibata. (Esekiel 38:2, 10-12; Daniel 11:40, 44, 45; Ketangkasen 19:19) I bas pengenehenen Sakaria, sieteh maka seh kel teremna kalak e. Iersakna kuda janah iserangna me umat Dibata. (Esekiel 38:15, 16) * (Nen keterangen tambahen.) Perlu nge kita mbiar? Lang! Sabap arah kita kap tentera Jahwe. Bas kiniseran si mbelin pagi, pasti ikawali malekat-malekat kita janah ikernepkenna me kerina si la patuh man pemerentahen Jahwe. (2 Tesalonika 1:7, 8) Tuhu-tuhu luar biasa pagi! Tapi ise nge si minpin tentera Jahwe i surga?

12, 13. (a) Erkai isuruh Jahwe Sakaria? (b) Kai buktina Tunas e eme Jesus Kristus?

¹² Sakaria ngenca si banci ngidah pengenehenen si pewaluhken. Tapi kai si ilakoken Sakaria sekalenda banci iidah kalak si deban janah ngiahken si mbangun rumah pertoton Dibata. (Oge Sakaria 6:9-12.) Reh me kalak bas Babilon nari eme Heldai, Tobia, ras Jedaya. Isuruh Jahwe gelah ibuat Sakaria pirak ras emas bas kalak e nari guna ijadiken ”mahkota”. (Sakaria 6:11) Bas Jerusalem, lit gubernur si gelarna Jerubabel, suku Juda nari ia janah kesusuren Daud. Man bana nge  mahkota e? Lang. Isuruh Jahwe me Sakaria namaken mahkota e ku takal Imam si Mbelin, si gelarna Josua. Pasti mamang kel ate kalak si ngidahsa.

¹³ Jadi raja nge Josua selaku Imam si Mbelin perban nggo ibereken mahkota bana? Lang. La ia kesusuren Daud, emaka la ia banci jadi raja. Enda sada gambaren saja kerna raja ras imam si mbelin bas wari si pepagi si igelari Tunas. Menurut Pustaka, Tunas e Jesus Kristus.​—Jesaya 11:1; Matius 2:23. *

14. Kai si ilakoken Jesus selaku Raja ras Imam si Mbelin?

¹⁴ Jesus me Raja ras Imam si Mbelin. Ia si minpin tentera Jahwe i surga, eme malekat-malekat. Selain si e, tetap ipastikenna gelah aman iakap umat Dibata bas doni si jahat enda. (Jeremia 23:5, 6) Kentisik nari, italuken Jesus me musuh-musuhna, enda bukti maka idukungna pemerentahen Dibata janah ibelana umat Dibata. (Ketangkasen 17:12-14; 19:11, 14, 15) Tapi sope enda terjadi, lit sada dahin si mbelin si arus idahiken Jesus, ntah pe Tunas ndai.

15, 16. (a) Uga carana maka lit mulihken umat Dibata janah imurniken? Ise si ngelakokenca? (b) Uga pagi keadan doni kenca Jesus merentah seribu tahun?

¹⁵ Selaku Raja ras Imam si Mbelin, lit tugas Jesus guna ”majekken rumah pertoton [Jahwe]”. (Oge Sakaria 6:13.) Bas tahun 1919, mulai me ipajekken Jesus rumah pertoton e alu mbebasken umat Dibata bas agama palsu nari, Babilon si Mbelin. Mulai ka iban Jesus runggun janah itangkuhkenna ”juak-juak si tutus dingen pentar”. Kalak enda ipilih Dibata guna ku surga. Dahinna ngaturken pendahin si penting si ilakoken umat Dibata i doni, si nggambarken kesain rumah pertoton. (Matius 24:45) Janah imurniken Jesus ka umat Dibata, iajarina kalak e uga cara si benar i bas nembah Jahwe.​—Maleaki 3:1-3.

¹⁶ Merentah me pagi Jesus bage pe 144.000 raja ras imam, seribu tahun dekahna. Paksa si e, isampatina me manusia si setia gelah jadi sempurna. Paksa nggo dung dahin kalak e, kalak  si tuhu-tuhu nembah Jahwe ngenca si tading i doni. Dungna, tuhu-tuhu lit ibadat si benar!

17. Kai janji Jahwe man kalak Jahudi? Janah kai pengaruhna man kalak e?

¹⁷ Kai pengaruh ranan Sakaria man kalak Jahudi bas jamanna? Erjanji Jahwe maka isampati janah ikawaliNa kalak e gelah banci idungina rumah pertoton Jahwe. Emaka, ergiah-giah kalak e mulihi. Tapi banci saja tersungkun-sungkun kalak e, ”Banci nge lakoken kami dahin si mbelin e adi kami pe sitik ngenca?” Emaka ngerana me Sakaria si erbanca lanai kalak e mbiar ras sangsi. Lit si nampati kalak e, eme Heldai, Tobia, ras Jedaya. Ikataken Jahwe ka maka melala me pagi si ”reh nampati majekken rumah pertoton [Jahwe]”. (Oge Sakaria 6:15.) Emaka, tek kalak Jahudi maka pasti isampati Jahwe ia. Amin pe nggo ilarang raja Persia kalak e mbangun rumah pertoton, la ia mbiar. Larangen si resmi bas raja nari bali bagi deleng si meganjang si nutupi dalan. Tapi kentisik nari imasapken Jahwe me e. Dungna, bas tahun 515 sope masehi dung me rumah pertoton e. (Esra 6:22; Sakaria 4:6, 7) Tapi, kata-kata Jahwe man kalak Jahudi lit ka pengaruhna man banta gundari.

18. Uga Sakaria 6:15 igenepi gundari?

¹⁸ Gundari, jutan kalak nembah Jahwe. Meriah ukur kalak e mereken ”si mehulina” eme waktu, gegeh, ras ertana. Enda me cara kalak e ndukung rumah pertoton Jahwe si lit i doni. (Kuan-kuanen 3:9) Tek kita maka pasti iergai Jahwe kai si nggo silakoken. Ingetlah maka ibaba Heldai, Tobia, ras Jedaya pirak ras emas janah ijadiken Sakaria jadi mahkota. Tujun mahkota e ngingetken kerna dukungen kalak e guna ibadat man Jahwe. (Sakaria 6:14) La pernah ilupaken Jahwe pengorbanenta man baNa.​—Heber 6:10.

19. Kai atendu si ilakokenndu kenca mbahas pengenehenen Sakaria?

¹⁹ Bas wari-wari pendungi enda, melala kel dahin umat Jahwe. Enda banci silakoken perban isampati Jahwe ras Jesus kita. Meriah kel ukurta banci jadi bagin organisasi si aman dingen tahan rasa lalap. Janah tek kita maka sura-sura Jahwe kerna ibadat si bersih pasti terjadi. Emaka, ngata bujur kita perban banci jadi umat Jahwe, janah ’siikutkenlah kai si iperentahken [Jahwe]’. Alu bage, ikawali Raja ras Imam si Mbelin bage pe malekat-malekat me kita. Sidukunglah ibadat man Jahwe asa ngasupta. Pasti ikawali Jahwe kita bas doni si jahat enda bage pe seh rasa lalap!