1, 2. (a) Dahin kai si pentingna akap Jesus, janah engkai? (b) Kai si arus silakoken gelah berhasil kita jadi “teman erdahin Dibata”?

DAHIN Jesus Kristus mbarenda tukang kayu, kenca si e jadi perberita ia. (Markus 6:3; Roma 15:8) Duana pendahin e ilakokenna alu mehuli. Sanga jadi tukang kayu, ipelajarina uga cara make alat-alatna guna erban barang-barang arah kayu nari. Sanga ia jadi perberita, igunakenna pemetehna kerna Pustaka guna nampati jelma si nterem ngangkai Kata Dibata. (Matius 7:28; Lukas 24:32, 45) Sanga umur Jesus 30 tahun, ngadi ia jadi tukang kayu janah jadi perberita ia. Ietehna maka enda me dahin si pentingna. Nina Jesus, salah sada alasen maka iutus Dibata ia ku doni eme gelah banci mberitaken berita si meriah kerna Kerajan Dibata. (Matius 20:28; Lukas 3:23; 4:43) Si iutamaken Jesus bas geluhna eme dahin erberita, janah atena kalak si deban pe ngutamaken pendahin e.​—Matius 9:35-38.

² Memang labo kerina kita tukang kayu, tapi kerina kita perberita si ngajarken berita si meriah man kalak si deban. Dahin enda seh kel pentingna perban Dibata pe ikut erdahin. Emaka igelari kita “teman erdahin Dibata.” (1 Korinti 3:9; 2 Korinti 6:4) Pasti setuju kita man  kai si ikataken pemasmur enda, “KataNdu kap ulih kebenaren.” (Masmur 119:159, 160) Kata Jahwe kap kebenaren. Enda me si ngiahken kita gelah “ngajarken kata Dibata alu tepat” sanga kita erberita. (Baca 2 Timotius 2:15.) Emaka siusahakenlah nggunaken Pustaka alu mehuli. Enda me alatta si utamana guna ngajar kalak si deban kerna Jahwe, Jesus, bage pe KerajanNa. Gelah berhasil kita erberita, ibereken organisasi Jahwe alat si deban man banta, emaka perlu siteh uga cara nggunaken alat e. Si e kerina lit bas Kotak Alat-Alat Pengajarenta.

3. (a) Kai si arus siutamaken bas pelayanenta? (b) Uga Perbahanen Rasul-Rasul 13:48 nampati kita ngelakokenca?

³ Mungkin banci kam tersungkun-sungkun ngkai maka e ikataken Kotak Alat-Alat Pengajarenta labo Kotak Alat-Alat Erberita. “Erberita” ertina mpeseh berita, tapi “ngajar” ertina njelasken berita e gelah iangkai kalak si deban kai si ibegina janah dungna ilakokenna me kai si ipelajarina e. Perban lanai ndekah ikernepken Jahwe kerina si jahat, arus siutamaken pendahinta ngajari kalak kerna Pustaka gelah banci kalak e jadi murid Jesus. Maksudna arus kita semangat ndarami kalak “si pusuh ras perbahanenna ngaloken kebenaren” janah sisampati kalak e ngelayani Jahwe.​—Baca Perbahanen Rasul-Rasul 13:44-48.

4. Uga cara metehsa ‘pusuh ras perbahanen sekalak jelma ngaloken kebenaren’?

⁴ Uga cara metehsa ‘pusuh ras perbahanen sekalak jelma ngaloken kebenaren’? Bagi si ilakoken kalak Kristen si pertama, eme alu erberita. Ikataken Jesus man murid-muridna, “Sanga kena masuk ku kota ntah ku kuta si apai pe, daramilah kalak si nggit ngalo-ngalo kena.” (Matius 10:11) Emaka, bage ka min silakoken gundari. Tapi adi kalak si ijumpai kita la tuhu-tuhu ndarami Dibata, meganjang ukurna, ntah pe la diatena Dibata, ula siarapken ibegikenna beritata. Tapi kalak si man daramenta eme kalak si tuhu-tuhu ndarami Dibata, meteruk ukurna, janah tuhu-tuhu merhat ia meteh kai situhuna si iajarken Pustaka. Banci sibandingken dahinta i bas ndarami kalak ras pendahin Jesus sanga ia jadi tukang kayu. Pertama, idaramina lebe kayu si mejile ope ibentukna jadi pintu, peralaten arah kayu, ntah pe si debanna. Kenca e, ibuatna kotak alat-alatna, igunakenna pemetehna, janah ibanna me sada barang. Kita pe, sidarami lebe kalak si tuhu-tuhu ndarami Dibata, kenca e sigunaken alat-alatta bage pe pemetehta guna erban kalak jadi murid.​—Matius 28:19, 20.

5. Kai si perlu siteh kerna alat-alat si lit bas Kotak Alat-Alat Pengajarenta? Ban perumpamanna. (Nen gambar pemena artikel.)

⁵ La seri kerina gunana tiap alat bas kotak alat-alatta. Contohna, cuba ukuri alat-alat si ipake Jesus sanga ia jadi tukang kayu. * (Nen keterangen tambahen.) Perlu ia alat-alat guna ngukur, erban tanda, motong, ngebor, bage pe mbentuk kayu, janah arus pakena kerina alat e gelah mejile hasilna.  Bage ka pe, kerina alat-alat si lit bas Kotak Alat-Alat Pengajarenta la seri gunana. Emaka mari sibahas uga cara nggunaken alat-alat e.

6, 7. (a) Uga nge carandu nggunaken kartu kontak? (b) Engkai maka sigunaken undangen gelah reh kalak ku perpulungenta?

⁶ Kartu Kontak. Amin pe alat enda kitik, tapi arah alat enda banci iteh kalak ise kita situhuna janah alat enda mpetandaken situs web jw.org. Bas situs web enda, banci ipelajari kalak terbuen kerna kita janah banci ka ipindona erlajar Pustaka. Nggo lebih 400.000 kalak si mindo erlajar Pustaka arah jw.org, janah lebih ratusen kalak tiap wari. Babalah piga-piga kartu kontak janah gunaken enda sanga kam ngerana ras kalak si ijumpaindu tiap wari.

⁷ Undangen. Ikataken bas undangen e, “Itenahken kam guna erlajar Pustaka si Badia ras Saksi-Saksi Jahwe.” Ikataken ka i je maka banci kam erlajar “i perpulungen minggun kami” ntah pe “ras sekalak Saksi Jahwe.” Emaka arah undangen enda banci iteh kalak ise kita situhuna janah banci ka siundang kalak “si iakapna perlu itandaina Dibata” gelah erlajar Pustaka ras kita. (Matius 5:3) Tapi sialo-alo kerina kalak si reh ku perpulungenta la soal nggit ia erlajar Pustaka ntah lang. Adi reh ia ku perpulungenta, tehna me maka mbue kel si banci ipelajarina arah Pustaka.

8. Engkai maka penting kel ngundang kalak gelah reh ku perpulungenta sekalilah gia? Bereken contohna.

⁸ Penting kel siundang kalak reh ku perpulungenta amin pe sekali ngenca ia reh. Engkai? Perban adi reh ia, banci idahna maka Saksi-Saksi Jahwe nampati kalak nandai Dibata janah ngajarken kai si benar arah Pustaka, si la iajarken bas agama palsu. (Jesaya 65:13) Contohna, pasangen i Amerika Serikat, Ray ras Linda, iperdiatekenna perbedan e piga-piga tahun si lewat. Tek ia man Dibata janah terbuen atena itehna kerna Dibata. Emaka idahina kerina gereja si lit bas daerahna janah ope ergabung ia ku salah sada gereja, lit dua si atena ipastikenna lebe. Si pertama, arus tambah pemetehna arah gereja e, janah si peduaken, peruis anggota gereja e arus ncidahken maka ia ngelayani Dibata. Perban melala kel gereja bas daerahna, ertahun-tahun kalak e ndarami gereja si cocok akap kalak e. Tapi kecewa kel kalak e. La lit tambah pemeteh kalak e, janah peruis anggota gerejana pe la sopan. Kenca idahi kalak e gereja si terakhir si lit bas daptarna, Linda lawes erdahin janah Ray mulih ku rumah. Sanga mulih ia ku rumah, ilewatina Bale Kerajan. Rukur ia, ‘Nta kunen lebe ku jah, ntah uga kin?’ Tentu enda me perpulungen si mehulina si pernah idahina. Kerina kalak bas Bale Kerajan mehuli janah ramah, peruisna pe sopan. Arah lebe kel Ray kundul, janah kerina si ibegina erban ia ermeriah ukur. Enda ngingetken kita man kai si ikataken rasul Paulus kerna kalak si mbaru denga reh ku perpulungen, nina, “Tuhu-tuhu kepe Dibata lit i tengah-tengah kena.” (1 Korinti 14:23-25) Kenca si e, tiap minggu Ray reh  ku perpulungen. Dungna, ku perpulungen tengah pekan pe, nggo reh ia lalap. Linda pe nggo mulai reh ku perpulungen, janah aminna pe umur kalak e nggo 70-en, nggit kalak e erlajar Pustaka janah iperidiken.

9, 10. (a) Engkai maka gampang nggunaken risalah? (b) Jelasken uga cara nggunaken risalah Kai kin Kinirajan Dibata e?

⁹ Risalah. Lit waluh risalah si lit bas kotak alat-alatta. Menukah kel nggunakenca janah e banci sipake gelah banci ercakap-cakap ras kalak si deban. Piga-piga risalah e iterbitken tahun 2013 janah lit lima miliar si icetak. Bentukna seri kerina. Sadalah gia ipelajarindu uga cara nggunakenca, nggo banci igunakenndu kerina. Uga carandu nggunaken risalah enda gelah banci ercakap-cakap ras kalak si deban?

¹⁰ Mungkin igunakenndu atendu risalah Kai kin Kinirajan Dibata e? Tuduhken penungkunen si lit i arah lebe risalah e janah sungkun ia, “Pernah nge kam tersungkun-sungkun kai kin Kinirajan Dibata e? Adi menurutndu, tuhu kin e . . . ?” Kenca e, pindo gelah pilihna salah sada arah telu jawapen si lit i je. Asangken mis katakenndu jawapenna e benar ntah salah, pangen bacakenndu Daniel 2:44 ras Jesaya 9:6 bas bagin “Uga Nina Pustaka si Badia.” I bas pendungi percakapenndu, sungkun penungkunen si lit i arah pudi risalah e bas bagin “Si Man Ukuren”: “Kai nge si inanami rayat Kinirajan Dibata e pagi?” Penungkunen enda banci ijawapndu sanga reh ka kam pagi mulihi. Sanga reh ka kam, banci bahasndu pelajaren 7 brosur Berita si Meriah i bas Dibata nari!, enda salah sada alatta guna nampati kalak erlajar Pustaka.

11. (a) Kai gunana majalahta iban? (b) Kai si arus siteh kerna majalahta?

¹¹ Majalah. Sora Ermomo ras Sadarlah! me majalah si mbuena kel iterjemahken janah seh ku belang-belang doni. Perban si mbaca majalah e arah erbage-bage negara nari, emaka judul-judul isampulna iusahaken gelah menarik iakap kerina kalak. Sigunakenlah majalah enda guna nampati kalak gelah iutamakenna kai si pentingna bas geluhna. Tapi perlu lebe siteh, majalah siapai si cocok man tiap kalak.

12. (a) Man kalak si uga majalah Sadarlah! e iban, janah kai tujunna? (b) Lit nge pengalamenndu mbaru-mbaru enda sanga nggunaken alat enda?

¹² Sadarlah! iban man kalak si sitik ngenca pemetehna ntah banci jadi la lit pemetehna kerna Pustaka. Banci jadi la iteh kalak e ajaren Kristen, la ia tuhu-tuhu tek man agama, ntah la isadarina maka erguna kel ajaren Pustaka bas geluhna. Salah sada tujun Sadarlah! eme gelah tek kalak si mbacasa maka Dibata e lit. (Roma 1:20; Heber 11:6) Majalah e pe nampati kalak si mbacasa gelah tek maka Pustaka eme “kata si rehna . . . i bas Dibata nari.” (1 Tesalonika 2:13) Telu majalah bas tahun 2018 erjudul: “Apa Kebahagiaan Sejati Itu?,” “12 Kunci Keluarga Bahagia,” ras “Bantuan bagi Yang Berduka.”

13. (a) Man kalak si uga Sora Ermomo man jelma si nterem iban? (b) Lit nge pengalamenndu mbaru-mbaru enda sanga nggunaken alat enda?

 ¹³ Tujun Sora Ermomo man jelma si nterem eme guna njelasken ajaren Pustaka man kalak si nggo tek man Dibata bage pe Pustaka. Banci saja lit piga-piga pemetehna kerna ajaren Pustaka, tapi lenga pas pemeteh si iangkaina e. (Roma 10:2; 1 Timotius 2:3, 4) Telu majalah bas tahun 2018 njawap penungkunen enda: “Tuhu nge Pustaka Erguna Denga Gundari?,” “Kai nge Pagi si Terjadi?,” ras “Iperdiateken Dibata nge Kam?”

14. (a) Kai gunana empat video si lit bas Kotak Alat-Alat Pengajarenta? (b) Lit nge pengalamenndu sanga ncidahken video-video enda?

¹⁴ Video. Bas jaman Jesus, alat si ipake tukang kayu lenga bagi si gundari canggihna. Tapi gundari alat-alatna nggo canggih perban nggo nggunaken listrik, contohna, gergaji, bor, ras penghalus kayu. Gundari pe, sanga kita erberita, selain baca-bacanta si tercetak, lit ka video si banci sicidahken man kalak si deban. Empat video enda lit bas kotak alat-alatta: Engkai maka Perlu Erlajar Pustaka si Badia?, Uga kin Situhuna Program Pelajaren Pustaka si Badia Kami?, Kai si Ilakoken i Bale Kerajan?, ras Saksi-Saksi Jahwe—Ise nge Kalak e? Video si gendek dekahna lebih kurang dua menit janah banci siputarken bas perjumpan si pertama. Video si tergedangen banci siputar sanga ndahi mulihi ntah pe man kalak si sangana la sibuk. Luar biasa kel alatta enda perban banci ngiahken kalak erlajar Pustaka janah reh ku perpulungen.

15. Kai pengaruh videota man kalak si nontonsa bas bahasana? Bereken contohna.

¹⁵ Contohna, sekalak turang seninata jumpa ras sekalak diberu si pindah arah Mikronesia nari janah bahasana bahasa Yap. Icidahken turang seninata enda ndai video Engkai maka Perlu Erlajar Pustaka si Badia? i bas bahasa Yap. Sanga iputarken video e, ngerana diberu e, “Ih, bahasaku kap enda! Arah logatna e pe mis kuteh pasti anak kutaku si ngerana e.” Kenca si e, ikatakenna maka ibacana janah itontonna kari kerina si lit bas situs jw.org i bas bahasana. (Bandingken ras Perbahanen Rasul-Rasul 2:8, 11.) Contoh si deban eme turang seninata si tading i Amerika Serikat, janah lit permenna si tading i negara si ndauh kel arah negarana. Ikirimna situs video si seri man permenna e. Itonton permenna video e janah ikirimna email man turang seninata e ndai, nina, “Bagin si ngataken maka kuasa si jahat me si ngkuasai doni enda menarik kel kuakap. Nggit aku erlajar Pustaka.” Si menarik eme permenna e tading bas negara si ngelarang pendahinta.

16. Jelasken kai gunana brosur enda: (a) Dengkehkenlah Dibata Gelah Nggeluh si Rasa Lalap. (b) Berita si Meriah i bas Dibata nari! (c) Ise si Ngelakoken Peraten Jahwe Genduari?

¹⁶ Brosur. Uga carata ngajari kalak si la beluhsa mbaca ntah pe si la lit baca-bacanta bas bahasana? Banci  sigunaken brosur Dengkehkenlah Dibata Gelah Nggeluh si Rasa Lalap. * (Nen keterangen tambahen.) Salah sada alat si mejile guna erlajar Pustaka eme brosur Berita si Meriah i bas Dibata nari! Banci tuduhkenndu 14 topik si lit i pudi brosur e janah sungkun ia topik si apai si menarikna kel kapna. Kenca e, bahas topik si ipilihna. Pernah nge cubakenndu cara enda sanga kam ndahi mulihi? Brosur si peteluken i bas kotak alat-alatta eme Ise si Ngelakoken Peraten Jahwe Genduari? Brosur enda iban gelah iteh kalak si sangana erlajar Pustaka kerna organisasita. Gelah itehndu uga cara nggunaken brosur enda sanga erlajar Pustaka, banci nenndu Pelayanen ras Kegeluhen Kristen—Agenda Perpulungen bas bulan Maret 2017.

17. (a) Kai gunana dua buku si lit bas Kotak Alat-Alat Pengajarenta? (b) Kai si perlu ilakoken kalak si nggo iperidiken, janah ngkai?

¹⁷ Buku. Kenca imulaindu erlajar Pustaka ras sekalak jelma alu nggunaken sada brosur, ndigan pe banci igantikenndu ku buku Kai Nina Pustaka si Badia? Alat enda nampati kalak mpelajari terbuen kerna ajaren dasar Pustaka.Adi si erlajar Pustaka e meter erban perubahen janah nggo dung ipelajarina buku e, banci iteruskenndu ku buku Carana Gelah Tetap Ikelengi Dibata. Alat enda ngajari si erlajar Pustaka uga carana dalanken pedah Pustaka bas kegeluhenna tiap wari. Ingetlah, amin pe ia nggo iperidiken, kalak si mbaru jadi Saksi arus idungina mpelajari dua buku enda ras kalak si nampati ia erlajar Pustaka. Enda mpepaguh kinitekenna man Jahwe janah tetap setia.​—Baca Kolose 2:6, 7.

18. (a) Uga 1 Timotius 4:16 ngiahken kita jadi guru si ngajarken ajaren si benar arah Pustaka? Kai asilna? (b) Kai tujunta nggunaken Kotak Alat-Alat Pengajarenta?

¹⁸ Lit tanggung jawap Saksi-Saksi Jahwe ngajari kalak kerna “berita kebenaren eme berita si meriah” si banci erban kalak e ndatken kegeluhen si rasa lalap. (Kolose 1:5; baca 1 Timotius 4:16.) Guna nampati kita, lit Kotak Alat-Alat Pengajarenta si isina alat-alat si iperluken kita. (Nen kotak “ Kotak Alat-Alat Pengajarenta.”) Sipelajarilah alat-alat enda gelah banci sigunaken alu mehuli. Kerina kita banci milih alat si apai si ateta sipake janah ndigan. Tapi ingetlah, tujunta labo mereken baca-bacan ngenca, janah labo sibereken baca-bacanta man kalak si la nggit megiken beritata. Tapi tujunta, erban kalak jadi murid, eme kalak si tuhu-tuhu ndarami Dibata, si meteruk ukur, ras si “ngaloken kebenaren guna kegeluhen si rasa lalap.”​—Perbahanen Rasul-Rasul 13:48; Matius 28:19, 20.