AKU lahir tahun 1934. Orang tuaku, Fred ras Edna Molohan, nggo jadi Ajar-Ajar Pustaka si Badia (Saksi-Saksi Jahwe) 20 tahun dekahna. Bujur kel kukataken perban iajarina aku ngkelengi Jahwe. Aku tading i Parsons, kota si kitik i bagin tenggara Kansas. Hampir kerina kalak bas runggunku kalak si ipilih ku surga. Keluargaku ratur reh ku perpulungen bage pe erberita. Bas Sabtu karaben, biasana kami erberita bas dalan, si gundari ikataken erberita bas ingan jelma si nterem. Mon-mon latih kap kami, tapi lalap ibere Bapak man kami es krim kenca dung erberita.

Daerah erberita runggun kami si kitik eme piga-piga kota si kitik janah melala peternaken i je. Asangken mereken sumbangen sen perban ibere kami ia baca-bacanta, piga-piga perjuma e mereken gulen si nggo iperanina, telor (si ibuatna arah kandang), janah lit ka si mereken manuk si nggeluh denga. Sen si ibereken kalak si ngaloken baca-bacanta, isumbangken Bapak ku kotak sumbangen, janah pangan si ibereken kalak e banci ipan kami.

Itukur orang tuaku fonograf gelah banci ipake guna erberita. Kitiksa denga aku nggunaken alat e, tapi meriah kuakap nampati Bapak ras Mamak mutarken rekamen khotbah Senina Rutherford sanga ndahi mulihi bage pe erlajar Pustaka.

Itama Bapak speaker si galang i datas tarum motor kami, emaka motor kami jadi motor si ersora. Mantap kel kuakap alu cara si bage erberita. Biasana, iputarken kami lebe musik gelah iperdiateken kalak kami, kenca e putarken kami khotbah Pustaka. Dung e, itawarken kami baca-bacanta man kalak si nggit megikenca.

Bas kota Cherryvale si kitik, i Kansas, ibaba Bapak motorna si ersora ku taman kota, i je nterem  kalak sangana santai-santai bas wari Minggu. Kenca e, reh polisi janah katakenna man Bapak maka i darat taman ngenca banci iputarkenna sora e. Emaka ipindahken Bapak motor kami ku dalan deher taman e, alu bage banci denga terbegi ku taman. Sanga si e, meriah kel kuakap ras Bapak bage pe abangku, Jerry.

Sanga si e, ilakoken kami kampanye khusus bas daerah si kalakna segat kel atena man Saksi. Bagi si nggo kukataken tangtangna ndai, medak kami bas pagi-pagi si lampas kel janah meter-meter itamaken kami risalah ntah pe buku si kitik ku teruh pintu tiap rumah. Kenca e, jumpa kami kerina i darat kota guna mastiken lit si itangkap polisi ntah lang.

Bagin si deban si meriahna kel kuakap i bas pelayanen kami eme barisen informasi. Ipake kami papan-papan tanda si galang janah erbaris kami ngelewati kota. Kuinget bas sada wari reh turang seninata ku kota kami janah ipakena papan tanda si ertulisken “Agama Eme Siding ras Penipu.” Imulai kalak e erdalan arah rumah kami, erdalan kalak e kira-kira sada setengah kilometer ngelewati kota janah mulihken kami ku rumah kami. Meriah kel kuakap perban la lit si mpengadi kalak e, tapi nterem kalak mamang atena ngidahsa.

Kami sekeluarga rusur lawes ku Texas guna kebaktin. Bapak erdahin bas perusahan kereta api, emaka banci kami gratis naik kereta api ku kebaktin janah ndahi kade-kade kami. Mamaku, abang Mamakku, si gelarna Fred Wismar, ras mamiku, Eulalie, tading i Temple, Texas. Mama erlajar sanga ia nguda denga, tahun 1900-en, kenca e iperidiken ia. Iceritakenna kai si ipelajarina man adek-adekna, termasuk man mamakku. Nterem kalak nandai Mama bas pusat kota Texas perban ia hamba zona (gundari pertua keliling). Ia mehuli kalakna, mbacar, janah semangat, emaka ia jadi usihen man bangku.

Bas tahun 1941 lawes kami naik kereta api ku St. Louis, Missouri, guna reh ku kebaktin si galang. Kerina anak muda iundang kundul i deher panggung guna megiken khotbah Senina Rutherford si erjudul “Anak Raja.” Bas pendungi khotbahna, 15.000 anak muda ndatken hadiah. Senina Rutherford ras asistenna mereken buku si mbaru si erjudul Children.

Bas bulan April 1943 reh kami ku kebaktin i Coffeyville, Kansas, si temana “Sora si Erban Semangat.” I je, iumumken maka bas perpulungen iban sada sekolah si mbaru, eme Sekolah Erberita si Meriah. Idat kami ka buku si kitik si risiken 52 pelajaren si banci ipake kami i bas sekolah e. Setahun kenca e, kupeseh me khotbahku si pertama bas sekolah e. Kebaktin e pe istimewa kel man bangku perban iperidiken aku ras piga-piga kalak i lau si mbergeh bas kolam deher sada peternaken.

Aku tamat SMA tahun 1951 janah arus kuban keputusen kerna kai si arus kulakoken bas geluhku. Abangku Jerry nggo ngelayani i Betel. Aku pe merhat ka ngelayani i Betel, emaka kukirim formulirku. La ndekah kenca e, iundang aku ku Betel janah mulai aku ngelayani tanggal 10 Maret 1952. Enda me keputusen si mehulina kel si nampati aku ngelayani Dibata terbuen.

Ngarap aku erdahin i percetaken guna ncetak majalah bage pe baca-bacanta si deban. Tapi la pernah aku erdahin i je. Itugasken aku jadi si naruhken pangan man anggota Betel kenca e erdahin bas dapur. Meriah kel kuakap bas pendahin e janah melala kel si kupelajari i je. La kami sada warin erdahin, jadi lit waktuku istirahat. Emaka rusur aku lawes ku perpustakan Betel janah kugunaken buku-buku si lit i je guna pelajaren pribadiku. Enda mpegegehi kinitekenku bage pe pertemanenku ras Jahwe. Dungna ndekah ateku ngelayani Jahwe i Betel. Abangku lanai ngelayani i Betel bas tahun 1949 janah erjabu ia ras Patricia, tapi kalak e tading i deher Brooklyn. Isampatina ras ipegegehina aku perban aku mbaru denga i Betel.

 La ndekah kenca aku ngelayani i Betel, idarami senina-senina ise anggota Betel si banci masuk daptar jadi pengkhotbah tamu. Senina-senina si lit bas daptar e itugasken ndahi runggun-runggun si dauhna banci seh 320 kilometer arah Brooklyn nari. I je, kalak e mpeseh khotbah janah erberita ras turang senina si lit bas runggun e. Aku me salah sada si ipilih. Alu gugup, kudahi me runggun si itugasken man bangku janah kupeseh khotbah i je. Sanga si e, khotbah ipeseh sada jam dekahna. Biasana naik kereta api aku ndahi runggun-runggun. Kuinget kel kejadin bas wari Minggu karaben sanga musim salju tahun 1954. Mulih aku ku New York naik kereta api janah arusna la berngisa aku seh i Betel. Bas dalan, lit badai ras salju. Lanai erfungsi listrik si lit bas kereta api e, emaka wari Senin jam lima pagi-pagi maka aku seh i New York. Arah stasiun, naik kereta api bawah tanah aku ku Brooklyn janah mis aku erdahin bas dapur. Agak terlambat aku janah latih kel kuakap perban la lit aku medem bas berngi e. Tapi meriah kel kuakap ngelayani runggun-runggun janah jumpa ras turang senina si lit i je, ergan kuakap enda asangken pengorbanen si kuban.

Piga-piga tahun kenca aku masuk Betel, ikut ka aku bas acara erlajar Pustaka si isiarken tiap minggu arah stasiun radiota, WBBR. Studiota lit i lantai dua bas bangunen 124 Columbia Heights. Senina Alexander H. Macmillan, si nggo ertahun-tahun ngelayani i Betel pe rusur ikut bas acara radio enda. Rusur ilebuh kami ia Senina Mac. Ia jadi usihen man kami si nguda denga bas Betel perban tetap ia setia amin pe melala tentangen.

Berubah tugasku bas tahun 1958, dahinku ngurus siswa si mbaru lulus arah Sekolah Gilead. Kusampati turang senina si semangat e ngurus visa si iperlukenna janah ngaturken perdalanen kalak e ku negara penugasenna. Perban merga kel tiket pesawat sanga si e, buen lulusen si itugasken ku Afrika ras Asia lawes naik kapal barang. Piga-piga tahun kenca e, kenca tiket pesawat nggo reh murahna, buen utusen injil lawes ku daerah penugasenna naik pesawat.

Bas tahun 1960, kusewa pesawat arah Amerika Serikat ku Eropa guna kebaktin internasional tahun 1961. Aku ikut penerbangen ku kebaktin i Hamburg, Jerman. Kenca kebaktin e, aku ras telu senina anggota Betel newa motor guna lawes arah Jerman ku Italia janah dahi kami kantor cabang i Roma. Je nari, lawes kami ku Prancis, ilewati kami Pegunungen Pyrenees, kenca e ku Spanyol kami, i je pendahinta ilarang. Banci ibere kami piga-piga baca-bacanta man turang seninata i Barcelona, ibungkus kami bagi kado baca-bacanta e. Meriah kel kuakap jumpa ras kalak e! Je nari lawes kami ku Belanda janah mulih kami ku New York.

Bas tahun 1962, itugasken aku guna ngaturken perdalanen man 583 turang senina guna reh ku  kebaktin internasional si istimewa si lit i belang-belang doni bas tahun 1963, temana “Berita si Meriah si Tahan Rasa Lalap.” Kalak e banci reh ku kebaktin i Eropa, Asia, ras Pasifik Selatan janah kenca e lawes ku Honolulu, Hawaii, ras lawes ku Pasadena, Kalifornia. Banci ka idahi kalak e Lebanon ras Yordania guna ngikuti perdalanen si khusus ku daerah-daerah si lit bas Pustaka. Departemen kami ngaturken penerbangen, hotel, ras visa si iperluken.

Tahun 1963 pe penting kel man bangku. Bas tanggal 29 Juni, erjabu aku ras Lila Rogers arah Missouri, si nggo ngelayani i Betel mulai tahun 1960. Seminggu kenca perjabun kami, aku ras Lila ikut perdalanen ngkelilingi doni janah lawes kami ku Junani, Mesir, ras Lebanon. Je nari lawes kami naik pesawat ku Yordania. Tapi, pendahinta ilarang i je, janah la ibere pemerentah visa man Saksi-Saksi Jahwe. Emaka la iteh kami kai kari si terjadi seh kenca kami i je. Sengget kel kami janah meriah kel ukur kami sanga idah kami piga-piga turang seninata cinder i ingan si meganjangna kel bas bandara e janah itagang kalak e spanduk si isina “Mejuah-juah Saksi-Saksi Jahwe”! Luar biasa kel perdalanen ku ingan si lit bas Pustaka enda, i je me ingan Abraham, Isak, Jakup tading, i je ka Jesus ras rasul-rasul erberita, arah ingan e nari me kalak Kristen lit i “belang-belang doni.”​—Perbahanen Rasul-Rasul 13:47.

Nggo 55 tahun dekahna, setia Lila nemani aku i bas penugasen kami. Piga-piga kali kami ndahi Spanyol ras Portugal sanga pendahinta ilarang i je. Ipegegehi kami turang senina si lit i je janah ibaba kami baca-bacanta bage pe si debanna si iperluken kalak e. Banci ka ijumpai kami piga-piga turang seninata si ipenjaraken i Cádiz, Spanyol. Meriah kel kuakap banci mpegegehi kalak e arah khotbah si kupeseh.

Mulai tahun 1963, dahinku ngaturken perdalanen man kebaktin internasional i Afrika, Australia, Amerika Tengah bage pe Amerika Selatan, Eropa, Timur Jauh, Hawaii, Selandia Baru, ras Puerto Riko. Melala kebaktin si la banci ilupaken kami, salah sadana i Warsawa, Polandia, bas tahun 1989. Nterem turang senina arah Rusia reh ku kebaktin enda. Enda me kebaktin kalak enda si pertamana kel! Banci kami jumpa ras turang seninata si nggo pernah ipenjaraken ertahun-tahun dekahna i Uni Soviet perban kiniteken kalak e.

Sada tugas si erban meriah kel ukurku eme ndahi ras mpegegehi keluarga Betel bage pe utusen injil si lit i sebelang doni. Bas kunjungen kami si terakhir, lawes kami ku Korea Selatan, janah banci kami jumpa ras 50 seninata si ipenjaraken i Suwon. Positip kel perukuren kalak e kerina janah itimaina waktuna banci ngelayani Jahwe mulihi alu la lit pelarangen. Terpegegehi kel kami banci jumpa ras kalak e!​—Roma 1:11, 12.

Nggo kuidah uga Jahwe masu-masu umatNa ertahun-tahun dekahna. Sanga aku iperidiken bas tahun 1943, 100.000 denga ngenca perberita. Tapi gundari lit lebih 8.000.000 kalak si ngelayani Jahwe bas 240 negeri. Mbelin kel pengaruh kerja keras lulusen Gilead i bas pertambahen e. Meriah kel ukurku banci erdahin ras nterem utusen injil e janah nampati kalak e i bas penugasenna.

Meriah kel ukurku perban sanga aku nguda denga kupilih mereken kegeluhenku guna ngelayani Jahwe, e kulakoken alu ngelayani i Betel. Melala kel pasu Jahwe bas geluhku. Selain keriahen ukur si idat kami i bas Betel, meriah ka ukur kami erberita ras runggun-runggun si lit i Brooklyn lebih 50 tahun dekahna janah melala dat kami teman.

Terus aku ngelayani i Betel janah tiap wari aku idukung Lila. Amin pe gundari umurku nggo lebih 84 tahun, meriah ukurku banci tetap ngelayani bas Betel janah nampati bas bagin surat menyurat bas kantor cabang.

Meriah kel jadi bagin organisasi Jahwe si luar biasa enda janah ngidah maka payo kel kata-kata si lit bas Maleaki 3:18, ‘Sekali nari iidah bangsaKu kai lainna kalak bujur ras kalak jahat, kalak si nembah man bangKu ras kalak si lang.’ Doni Setan enda reh parahna tiap wari, la lit arapen kalak janah sitik ngenca keriahen ukurna. Tapi kalak si ngkelengi ras ngelayani Jahwe ermeriah ukur amin gia nggeluh bas doni enda, janah lit arapenna si pasti bas wari si pepagi. Luar biasa kel banci mberitaken berita si meriah man kalak si deban. (Matius 24:14) Iubah Kerajan Dibata pagi doni enda jadi pardis. Pasti sitima-timai kel wari e! Sanga si e pagi, kerina kalak bas doni enda sehat, ermeriah ukur, janah nggeluh rasa lalap.