1, 2. Kai si igunaken Setan guna ncedai kerina manusia?

PIGA-PIGA penemuan, bagi telepon, bola lampu, motor, ras kulkas, erban kegeluhenta reh tabehna. Penemuan si deban, bagi pistol, bom si meledak adi terperjak, isap, ras bom atom, bahaya man kegeluhen. Tapi lit penemuan si tangtangna kel idat janah ncedai kerina manusia. Kai e? Bual! Erbual eme sikataken kai si nggo siteh la tuhu guna nipu kalak. Ise kin si tangtangna kel erbual? Iblis! Ilebuh Jesus Kristus ia “bapak kalak si perbual.” (Baca Johanes 8:44.) Ndigan nge tangtangna kel ia erbual?

² Enda ilakokenna ribun tahun si lewat i taman Eden. Meriah kel akap Adam ras Hawa nggeluh i Pardis si mejile si iciptaken Jahwe man kalak e. Ikataken Dibata man kalak e, adi ipanna “buah batang kayu si mereken pemeteh kerna si bujur ras si jahat,” banci kalak e mate. Amin pe iteh Setan kerna si e, igunakenna nipe guna ngerana man Hawa, nina, “Labo tuhu e, labo kam mate.” Enda me bual si pertama. Nina Setan ka, “Perban ietehNa  kenca ipanndu, bali kam ras Dibata, meteh si bujur ras si jahat.”​—Kejadin 2:15-17; 3:1-5.

3. (a) Kai bual si kejam si ikataken Setan? (b) Perban erbual Setan, kai si terjadi?

³ Kejam kel kai si la tuhu si ikataken Setan e, perban itehna adi tek Hawa man bana janah ipanna buah e, mate me Hawa. Janah e me si terjadi. Dungna, Adam ras Hawa la patuh man perentah Jahwe janah mate. (Kejadin 3:6; 5:5) Selain si e, perban dosa Adam, “kematen nggo ngelangketi kerina manusia.” Dungna, “kematen nggo erkuasa jadi raja . . . , janah kematen e pe erkuasa nandangi kalak si la ngelakoken dosa si bali bagi pelanggaren Adam.” (Roma 5:12, 14) Enda me si erban kita la sempurna ras la banci nggeluh rasa lalap bagi si arapken Dibata. Emaka kita nggeluh ‘pitu puluh tahun ngenca, adi megegeh banci jadi seh waluh puluh tahun’ janah kegeluhenta dem “kesusahen.” (Masmur 90:10) Kerina enda terjadi perban kai si la tuhu si ikataken Setan.

4. (a) Penungkunen kai si perlu sibahas? (b) Menurut Masmur 15:1, 2 kalak si uga si banci jadi teman Jahwe?

⁴ Nina Jesus kerna Setan, “La ia tetap i bas kebenaren, perban kebenaren la lit i bas ia.” Setan lenga berubah. Tetap denga ia “nipu kerina kalak si tading i doni” alu bualna. (Ketangkasen 12:9) Tapi la kita nggit itipu Setan gelah ula bene pertemanenta ras Jahwe, bagi Adam ras Hawa. Emaka perlu sijawap telu penungkunen enda. Uga cara Setan nipu kalak gundari? Engkai maka biasa kalak erbual gundari? Uga carana gelah lalap ‘sikataken kai si benar’?​—Baca Masmur 15:1, 2.

5. Uga cara Setan nipu kalak gundari?

⁵ Banci kita la itipu Setan. Nina rasul Paulus, “Sebap nggo siteh rencanana.” (2 Korinti 2:11) Siteh maka Setan me si ngkuasai kerina doni enda, termasuk agama palsu, pemerentahen si korupsi, ras bisnis si merangap. (1 Johanes 5:19) Emaka la teta mamang adi ipengaruhi Setan ras malekat-malekat jahatna kalak si erkuasa gelah “erbual.” (1 Timotius 4:1, 2) Contohna, piga-piga kalak si erbisnis, erbual ia i bas iklanna guna ndayaken barangna si berbahaya ntah pe itipuna kalak gelah banci ibuatna sen kalak e.

6, 7. (a) Engkai maka jahat kel bual si ikataken peminpin agama? (b) Kai saja bual si pernah ibegindu arah peminpin agama?

⁶ Si jahatna kel eme bual si ikataken peminpin agama. Engkai? Perban, adi tek kalak man ajaren peminpin agama si salah janah ilakoken kalak e kai si segat ate Dibata, bene me kesempaten kalak e ndatken kegeluhen si rasa lalap. (Hosea 4:9) Iteh Jesus maka peminpin agama bas jamanna nipu kalak. Alu pang, nina man kalak e, “Cilaka kel kena, o ahli Undang-Undang Musa ras kalak Parisi, kalak si munapik! Erkiteken ilewati kena lawit ras taneh guna erban sada kalak masuk ku agama kena, janah kenca masuk, iban kena ia cocok masuk ku Gehena,” maksudna mate rasa lalap. (Matius 23:15) Ikataken Jesus maka  peminpin agama e bali bagi Iblis, bapak kalak e, si “pemunuh.”​—Johanes 8:44.

⁷ Gundari pe melala kel peminpin agama si bage. Kalak e ilebuh pastor, pendeta, ntah pe gelar-gelar si debanna. Bali bagi kalak Parisi, kalak e ngajarken kai si la tuhu arah Kata Dibata, tapi “itukarkenna kebenaren Dibata alu kai si la tuhu.” (Roma 1:18, 25) Piga-piga ajarenna eme api neraka, lit roh kalak si nggo mate, janah ialoken Dibata hubungen seks sesama jenis ras perjabun sesama jenis.

8. (a) Kai bual si ikataken peminpin politik pagi? (b) Uga tanggapenta kerna bual e?

⁸ Peminpin politik pe erbual guna nipu manusia. Salah sada bual si galangna kel arah kalak e eme ikatakenna pagi maka nggo ibanna keadan doni enda jadi “dame ras aman.” Tapi “i je me kalak e rempet ikernepken i bas waktu si kentisik.” Emaka ulalah kita tek man peminpin agama si ngataken maka lit nge pagi perubahen. ‘Tuhu-tuhu siteh maka kerehen wari Jahwe e bali bagi kerehen pinangko i bas berngi wari.’​—1 Tesalonika 5:1-4.

9, 10. (a) Engkai manusia erbual, janah kai akibatna? (b) Kai si arus siinget kerna Jahwe?

⁹ Gundari, labo kalak si erkuasa ngenca si erbual. Nina sada artikel si erjudul Why We Lie (Engkai Kita Erbual), si itulis Y. Bhattacharjee, “Erbual nggo jadi sipat manusia.” Maksudna, nggo biasa kap manusia erbual. Rusur kalak erbual guna ngelindungi dirina, mungkin ibunikenna atena kesalahenna ntah pe kejahaten si nggo ilakokenna. Kalak e erbual gelah banci ka ia dat sen ntah pe lit kapna gunana man bana. Bas artikel e pe ikataken maka labo dalih iakap piga-piga kalak erbual “man kalak si lenga itandaina, teman dahinna, temanna, ras kalak si ikelengina.”

¹⁰ Kai nge akibatna adi erbual? Lanai kalak siteken sada ras si debanna, janah enda ncedai pertemanen. Contohna, bayangken uga cedana pusuh perbulangen si setia megi diberuna selingkuh janah erbual diberuna e gelah la iteh perbulangenna kai si nggo ilakokenna. Ntah pe bayangken uga ngerina adi la mehuli perbahanen perbulangen man diberuna ras anak-anakna i rumah, tapi tempa-tempa ikelengina janah iperdiatekenna kalak e i lebe-lebe jelma si nterem. Kalak si bage banci nipu manusia, tapi arus siinget maka la banci itipuna Jahwe. Nina Pustaka “kerinana terbuka ras jelas teridah” man baNa.​—Heber 4:13.

11. Kai si banci sipelajari arah contoh Ananias ras Sapira? (Nen gambar pemena artikel.)

¹¹ Bas Pustaka lit contoh pasangen Kristen si ipengaruhi Setan gelah erbual man Dibata. Itipu Ananias ras Sapira rasul-rasul. Idayaken kalak e  tanehna tapi la kerina senna iberekenna man rasul-rasul. Ate Ananias ras Sapira ipuji runggun min ia, emaka ikatakenna man rasul-rasul maka nggo kerina sen taneh e iberekenna. Tapi iteh Jahwe maka kalak e erbual, emaka iukumNa kalak e.​—Perbahanen Rasul-Rasul 5:1-10.

12. Kai pagi si terjadi man kalak si erbual alu kejam ras la nggit robah? Engkai?

¹² Uga perasan Jahwe man kalak si erbual? Kerina kalak si erbual alu kejam ras la nggit robah iambekken ku “danau api,” bali bagi Setan. Maksudna, mate me kalak e rasa lalap. (Ketangkasen 20:10; 21:8; Masmur 5:7) Engkai? Perban nggo ianggap Jahwe kalak si erbual e seri ras “kalak si terus ngelakoken kai si erban ciga ate Dibata.”​—Ketangkasen 22:15, cataten i teruh.

13. (a) Kai si nggo siteh kerna Jahwe? (b) Sipat Jahwe e ngiahken kita ngelakoken kai?

¹³ Siteh maka Jahwe “labo bagi manusia, si [perbual]” janah “Dibata la mungkin erbual.” (Bilangen 23:19; Heber 6:18) “Ciga kal ate [Jahwe] . . . dilah [perbual].” (Kuan-kuanen 6:16, 17) Adi meriah ateta siban ukur Jahwe, arus sikataken kai si benar. Emaka kita “ula erbual sada ras si debanna.”​—Kolose 3:9.

14. (a) Kai si erban kalak Kristen situhu-tuhu beda ras anggota agama palsu? (b) Jelasken pedah si lit bas Lukas 6:45.

¹⁴ Kai salah sada cara si mbuktiken maka kalak Kristen situhu-tuhu beda ras anggota agama palsu? “Katakenlah si tuhu-tuhu.” (Baca Sakaria 8:16, 17.) Nina Paulus, ‘Icidahken kami maka kami pelayan Dibata, alu jujur  ngerana.’ (2 Korinti 6:4, 7) Janah kataken Jesus maka kata-kata kalak Kristen situhu-tuhu “rehna i bas pusuh nari.” (Lukas 6:45) Enda maksudna maka kalak si jujur, ngataken kai si benar. Pasti ikatakenna kai si benar man kalak si lenga itandaina, teman dahinna, temanna, ras kalak si keleng atena. Mari sibahas piga-piga contoh si mbuktiken maka kita jujur i bas kai pe.  

15. (a) Engkai maka la mehuli adi kita munapik? (b) Uga carana gelah banci itulak anak muda godan arah teman sebayana? (Nen keterangen tambahen.)

¹⁵ Adi kam nguda denga, pasti atendu itemani teman sebayandu. Tapi perban si e, piga-piga anak muda dungna jadi munapik. Tempa-tempa bujur kel ia sanga i lebe-lebe keluargana ntah pe bas runggun, tapi beda kel ia bas media sosial ntah pe ras kalak si la ngelayani Jahwe. Cakap kotor ia, la mehuli peruisna, ibegikenna musik si la mehuli lirikna, mabuk-mabuk ia, pakena narkoba, ngerondong alu erbuni-buni, ntah pe ilakokenna perbahanen si la mehuli si deban. Ibualina orang tuana, turang seninana bas runggun, bage pe Jahwe. (Masmur 26:4, 5) Tapi iteh Jahwe nge sanga sikataken sipuji Ia tapi silakoken kai si segat ateNa. (Markus 7:6) Emaka mehuli kel adi silakoken kai si ikataken kuan-kuanen enda, “Ola morahi kalak perdosa. Erkemalangenlah man [Jahwe].”​—Kuan-kuanen 23:17. * (Nen keterangen tambahen.)

16. Uga arusna kita njawap penungkunen bas formulir guna ngelayani sepenuh waktu?

¹⁶ Adi jadi perintis biasa atendu ntah pe ngelayani sepenuh waktu, contohna bas Betel, arus isindu sada formulir. Penting kel ijawapndu alu jujur penungkunen kerna kesehatenndu, jenis hiburen si ipilihndu, ras perbahanenndu. (Heber 13:18) Uga adi nggo ilakokenndu kai si la ngena ate Jahwe ntah pe lit si erban pusuh peratenndu terganggu, tapi lenga ikatakenndu man pertua? Pindolah penampat man pertua gelah banci ilayanindu Jahwe alu pusuh peraten si bersih.​—Roma 9:1; Galati 6:1.

17. Adi lit kalak si nganiaya kam nungkun kerna turang seninandu, kai nge si arus ilakokenndu?

¹⁷ Kai nge si arus ilakokenndu adi pendahin erberita ilarang bas daerahndu janah itangkap pemerentah kam, kenca e isungkunina kam kerna turang  seninandu? Ikatakenndu nge kerina si itehndu? Kai nge si ilakoken Jesus sanga isungkun gubernur Roma ia? Idalanken Jesus pedah Pustaka maka lit “paksa sinik bage pe paksa ngerana,” emaka mon-mon sinik saja ia. (Pengerana 3:1, 7; Matius 27:11-14) Adi bage situasindu, perlu kam hati-hati gelah turang seninandu la kena bahaya.​—Kuan-kuanen 10:19; 11:12.

18. Kai nge si arus silakoken adi isungkun pertua kita kerna turang seninata?

¹⁸ Uga adi lit sekalak turang senina bas runggun ngelakoken dosa serius janah itehndu kerna si e? Lit tanggung jawap pertua njaga runggun tetap bersih, emaka banci jadi isungkunina kam kerna kai si itehndu. Kai nge si ilakokenndu adi si ngelakoken dosa e temanndu ndeher ntah pe keluargandu? Nina Pustaka, “Alu melasken kata tuhu, kalak enggo encidahken keadilen.” (Kuan-kuanen 12:17; 21:28) Emaka arus katakenndu kerina man pertua janah ula bunikenndu kai pe. Arus iteh pertua kai si terjadi gelah banci sampatina kalak si ngelakoken dosa e ndeher mulihi ras Jahwe.​—Jakup 5:14, 15.

19. Kai si man bahasenta bas artikel seterusna?

¹⁹ Ertoto Daud man Jahwe, “Ukur si pinter ras kebujuren nge si ipindoNdu.” (Masmur 51:8) Iteh Daud maka si pentingna eme ise kita situhuna. Kalak Kristen lalap ‘ngataken kai si tuhu-tuhu man sada ras si debanna.’ Cara si deban si mbuktiken maka beda kita ras anggota agama palsu eme alu ngajarken kai si benar arah Pustaka. Bas artikel seterusna, sibahas kari uga cara ngelakokenca sanga kita erberita.