1, 2. (a) Kai pengaruh perubahen bas geluhta man banta? (Nen gambar pemena artikel.) (b) Menurut Masmur 131, uga carana gelah tetap dame perukurenta?

KENCA lebih 25 tahun Lloyd ras Alexandra ngelayani i Betel, itugasken kalak e ku lapangen. Tangtangna, sedih nge kap kalak e. Nina Lloyd, “Nggo keleng kel ateku Betel bage pe dahinku i je. Tangtangna kuergai nge alasen iban perubahen e, tapi piga-piga minggu ras piga-piga bulan kenca e, nggo bagi iambekken kuakap aku.” Tangtangna positip perukuren Lloyd kerna perubahen e, tapi kenca e stres ia.

² Banci jadi, lit perubahen bas geluhta si la sisangka-sangka, janah perubahen e banci erban kita kuatir janah stres. (Kuan-kuanen 12:25) Adi mesera siakap ngaloken janah ndalanken perubahen e, kai nge si banci silakoken gelah tetap tenang? (Baca Masmur 131:1-3.) Mari sibahas  uga umat Jahwe si mbarenda bage pe si gundari tetap dame perukurenna sanga lit perubahen bas geluhna.

3. Kai perubahen si terjadi bas kegeluhen Jusup?

³ Cuba ukuri kerna Jusup. Jusup me anak Jakup si kelengna kel atena. Perban si e, cian me ate abang-abangna. Sanga umur Jusup 17 tahun, idayaken kalak e ia jadi budak. (Kejadin 37:2-4, 23-28) Kira-kira 13 tahun dekahna, menderita ia i Mesir, tangtangna jadi budak dungna ipenjaraken. Ndauh kel Jusup arah bapakna, si keleng kel atena. Banci saja keadan enda erban ia putus asa janah merawa, tapi la ia nggit bage. Kai si nampati ia?

4. (a) Kai si ilakoken Jusup sanga ia bas penjara? (b) Uga cara Jahwe njawap toto Jusup?

⁴ Sanga Jusup menderita i penjara, arus iukurina kerna uga Jahwe nggo nampati ia. (Kejadin 39:21; Masmur 105:17-19) Banci jadi, iukurina ka nipina sanga ia nguda denga janah tek ia maka Jahwe nemani ia. (Kejadin 37:5-11) Mungkin, rusur ia ertoto janah iceritakenna kerina isi pusuhna man Jahwe. (Masmur 145:18) Janah ijawap Jahwe toto Jusup alu mpetetap ukurna maka Jahwe lalap “ras ia” la soal kai pe si terjadi.​—Perbahanen Rasul-Rasul 7:9, 10. * (Nen keterangen tambahen.)

5. Uga “kedamen i bas Dibata nari” banci erban kita tetap ngelayani Jahwe?

⁵ Uga serana pe keadanta, banci sidat “kedamen i bas Dibata nari” si ngelindungi ‘perukurenta’ janah erban kita tenang. (Baca Pilipi 4:6, 7.) Adi kuatir janah stres kita, “kedamen i bas Dibata nari” banci mpegegehi kita gelah tetap ngelayani Jahwe janah la nyerah. Mari sibahas contoh bas jaman si gundari arah turang seninata si pernah ngalamisa.

6, 7. Uga totota banci erban perukurenta dame mulihi? Bereken contohna.

⁶ Kitik kel ukur Ryan ras Juliette sanga ibegi kalak e maka tugasna jadi perintis istimewa sementara nggo dung. Nina Ryan, “Lalap kami ertoto man Jahwe. Iteh kami maka enda me kesempaten si mejile guna mbuktiken maka tek kami man baNa. Nterem kalak si mbaru jadi Saksi bas runggun kami, emaka ertoto kami man Jahwe gelah isampatiNa kami mereken usihen si mejile man kalak e.”

⁷ Uga Jahwe njawap toto kalak e? Nina Ryan, “Kenca ertoto, lanai lit perasan negatip kami janah lanai kami kuatir. Kedamen bas Dibata nari njaga pusuh ras perukuren kami. Iteh kami maka terus kami erguna man Jahwe adi tetap mehuli perbahanen kami.”

8-10. (a) Uga kesah si badia nampati kita sanga kita kuatir? (b) Uga Jahwe nampati kita adi siutamaken ngelayani Ia?

⁸ Kesah si badia banci erban kita tenang, janah banci ka iberekenna  petunjuk gelah sidat ayat si banci nampati kita ngangkai kai si pentingna bas geluhta. (Baca Johanes 14:26, 27.) Perdiateken kai si terjadi man Philip ras Mary, pasangen si nggo hampir 25 tahun ngelayani i Betel. Bas empat bulan, mate mamak kalak e duana bage pe kade-kade kalak e, janah arus ka iurus kalak e bapak Mary si nggo kolihen.

⁹ Nina Philip, “Kuakap banci kulakoken kerina alu mehuli, tapi kepeken lang. Lit kuidah Kolose 1:11 bas Sora Ermomo pelajaren. Memang nggo banci kugengken kerina, tapi la meriah ukurku. Arus ‘kuadapi kerinana alu sabar ras ermeriah ukur.’ Arah ayat e kuteh maka uga pe keadanta, banci kita ermeriah ukur adi lit kesah si badia bas geluhta.

¹⁰ Perban terus iutamaken Philip ras Mary ngelayani Jahwe, ipasu-pasu Jahwe kalak e alu erbage cara. La ndekah kenca kalak e lanai ngelayani i Betel, idat kalak e piga-piga si erlajar Pustaka si mindo erlajar piga-piga kali seminggu janah mis erban perubahen. Nina Mary, “Kalak enda erban meriah ukur kami, janah enda me cara Jahwe ngataken man kami maka mehuli nge kari kerinana.”

11, 12. (a) Kai si ilakoken Jusup si erban ia ipasu-pasu Jahwe? (b) Uga Jahwe masu-masu Jusup?

¹¹ Sanga rempet lit perubahen bas geluhta, e banci erban kita kuatir janah dungna masalahta ngenca siukuri. Mbarenda, enda banci saja terjadi man Jusup. Tapi, ipilihna ngelakoken kai si mehulina si banci ilakokenna bas situasina e. Bali bagi sanga ia kerja keras man Potipar, bas penjara pe kerja keras ia ngelakoken kerina si isuruh penjaga penjara man bana.​—Kejadin 39:21-23.

¹² Bas sada wari, isuruh me Jusup njaga dua tahanen si erdahin bas istana Paro. Mehuli Jusup man kalak e, emaka nggit kalak e nceritaken nipi si erban kalak e kuatir. (Kejadin 40:5-8) La iteh Jusup maka kai si icakapken kalak e banci mbebasken ia arah penjara. Dua tahun kenca si e, ibebasken me ia arah penjara janah dungna jadi penguasa i Mesir. Jusup jadi kalak nomor dua kenca Paro.​—Kejadin 41:1, 14-16, 39-41.

13. Kai si banci silakoken gelah ipasu-pasu Jahwe kita, la soal uga pe keadanta?

 ¹³ Bagi Jusup, banci jadi lit kejadin si la isangka-sangka terjadi bas geluhta. Tapi adi sabar kita janah silakoken kai si mehulina, pasti ipasu-pasu Jahwe kita. (Masmur 37:5) Amin pe bingung janah kuatir kita kerna kai si terjadi bas geluhta, tapi la kita “sempat putus asa.” (2 Korinti 4:8; cataten i teruh) Tetap isampati Jahwe kita, khususna adi siutamaken pelayanenta.

14-16. Uga Pilipus tetap ngutamaken pelayanenna amin gia lit perubahen bas geluhna?

¹⁴ Pilipus eme penginjil si jadi usihen kerna kalak si tetap ngutamaken pelayanenna la soal perubahen kai pe si terjadi bas geluhna. Bas sada waktu, meriah kel kapna dat tugas si mbaru i Jerusalem. (Perbahanen Rasul-Rasul 6:1-6) Tapi kenca e kerina berubah. Kenca Stepanus ibunuh, lit penganiayan si kejam man kalak Kristen. Emaka kiam kalak e arah Jerusalem nari. Perban terus ate Pilipus ngelayani Jahwe, lawes ia ku kuta Samaria, i je kalakna perlu megiken berita si meriah.​—Matius 10:5; Perbahanen Rasul-Rasul 8:1, 5.

¹⁵ Ku japa pe isuruh kesah si badia, nggit Pilipus lawes. Emaka isuruh Jahwe ia erberita ku ingan si kalakna lenga pernah megi berita si meriah. Nterem kalak Jahudi la ngergai kalak Samaria janah la mehuli perbahanenna man kalak e. Tapi Pilipus la bage, tetap ia semangat mberitaken berita si meriah man kalak Samaria. Janah ibegiken kalak e ia alu “tutus”!​—Perbahanen Rasul-Rasul 8:6-8.

¹⁶ Kenca si e, isuruh kesah si badia Pilipus erberita i kota Asdot bage pe Kesarea, i je nterem kalak si la Jahudi. (Perbahanen Rasul-Rasul 8:39, 40) Kenca e, berubah ka kegeluhen Pilipus. Dungna erkeluarga ia janah terus ia tading i je. Tapi la soal perubahen kai pe si terjadi bas kegeluhen Pilipus, tetap ia semangat erberita. Emaka ipasu-pasu Jahwe ia ras  keluargana.​—Perbahanen Rasul-Rasul 21:8, 9.

17, 18. Engkai maka adi siutamaken pelayanen banci nampati kita sanga lit perubahen bas geluhta?

¹⁷ Nterem kalak si ngelayani sepenuh waktu ngataken maka ngutamaken pelayanenna nampati ia tetap ermeriah ukur ras positip, amin gia lit perubahen bas geluhna. Contohna, sanga pasangen arah Afrika Selatan si gelarna Osborne ras Polite lanai ngelayani i Betel, iakap kalak e gampang ndarami dahin si piga-piga kali ngenca masuk i bas seminggu bage pe ndarami ingan tading. Tapi nina Osborne, “La mis idat kami dahin e.” Nina Polite, “Nggo telu bulan dekah lenga lalap dat kami dahin e, janah la lit tabungen kami. Enda tentangen man kami.”

¹⁸ Kai si nampati Osborne ras Polite ngadapi keadan si bage? Nina Osborne, “Erberita ras turang senina bas runggun erban kami tetap ngutamaken pelayanen janah tetap positip.” Asangken kundul i rumah janah kuatir, tetap kalak e semangat erberita. Enda erban kalak e ermeriah ukur. Nina Osborne ka, “Terus idarami kami dahin kami, dungna idat kami me.”

19-21. (a) Kai si erbanca perukurenta tetap dame? (b) Kai gunana adi sialoken perubahen si la sisangka-sangka?

¹⁹ Bagi si nggo siteh, adi silakoken si mehulina uga pe keadanta janah tetap kita tek man Jahwe, pasti ngasup kita njaga perukurenta tetap dame, la soal kai pe si terjadi. (Baca Miha 7:7.) Bas waktuna pagi, siteh me maka carata ngadapi perubahen situhuna banci mpegegehi pertemanenta ras Jahwe. Ijelasken Polite maka perubahen tugas arah Betel ngajari ia kai ertina tek man Jahwe amin gia mesera kel kapna  kegeluhenna. Nina, “Reh deherna kuakap aku ras Jahwe.”

²⁰ Mary, si nggo iceritaken ndai, tetap iurusna bapakna janahna merintis. Nina, “Nggo kuteh, maka sanga kuatir aku, perlu aku ngadi ntisik, ertoto janah kupetenang bangku. Pelajaren si mbelinna kel si kudat eme peturutlah Jahwe ndungi kerina masalahndu, janah pelajaren enda siperluken bas wari si pepagi.”

²¹ Iakui Lloyd ras Alexandra maka perubahen si terjadi, nguji kiniteken kalak e alu cara si la isangka-sangkana. Tapi banci idah kalak e uga perubahen enda nampati ia. Gundari, iteh kalak e maka kinitekenna banci mereken penghiburen sanga lit masalah kalak e, janah igejapkenna maka reh ulina sipat-sipatna.

22. Kai si ijanjiken Jahwe adi silakoken si mehulina uga pe keadanta?

²² Bas doni si gundari, kegeluhenta banci rempet-rempet berubah. Banci jadi ibereken organisasi banta tugas si mbaru, sakit kita, ntah pe arus siurus keluargata. Tapi la soal kai pe si terjadi, teklah maka iperdiateken Jahwe kam janah pasti isampatiNa bas waktu si tepat. (Heber 4:16; 1 Petrus 5:6, 7) Janah gundari, lakokenlah si mehulina uga pe keadanndu. Ertotolah man Bapakndu, Jahwe, janah lalaplah tek man baNa. Alu bage, la soal perubahen kai pe si terjadi bas geluhndu, banci lalap dame perukurenndu iban Jahwe.