Teklah man Peminpinta—Jesus Kristus
“Sada Peminpin kena, eme Kristus.”—MATIUS 23:10.
1, 2. Kai tugas si mbelin si ibereken man Josua kenca Musa mate?
NGERANA Jahwe man Josua, “Suruh-suruhenKu Musa enggo mate. Ersikap lah kam genduari ras kerina kalak Israel, jenari keparilah Lau Jordan lako mengketi negeri si Kubereken man bana.” (Josua 1:1, 2) Enda perubahen si mbelin man Josua, perban nggo hampir 40 tahun ia nampati Musa.
2 Nggo ndekah kel Musa minpin kalak Israel, tapi gundari Josua me si minpinsa. Emaka kuatir Josua, nggit nge kari kalak Israel ngaloken ia jadi peminpin kalak e ntah lang? (Ulangen 34:8, 10-12) Lit buku si njelasken kerna Josua 1:1, 2. Nina bas buku e, masa si meserana ras si berbahayana kel man sada bangsa, mbarenda nari seh asa gundari, eme sanga lit pergantin peminpin.
3, 4. (a) Uga Jahwe masu-masu Josua perban tek man baNa? (b) Penungkunen kai si banci jadi turah bas ukurta?
3 Lit alasen Josua kuatir. Tapi tek ia man Jahwe janah mis ikutkenna petunjukNa. (Josua 1:9-11) Ipasu-pasu Dibata Josua perban tek man baNa janah isuruhNa malekat negu-negu Josua bage pe kalak Israel. Banci jadi malekat e Kata, Anak Dibata si pertama kel iciptakenNa.—Keluaren 23:20-23; Johanes 1:1.
4 Isampati Jahwe kalak Israel gelah banci ialoken kalak e Josua jadi peminpinna si mbaru. Gundari pe, melala perubahen si mbelin si terjadi. Banci jadi tersungkun-sungkun kita, ‘Perban organisasi Dibata terus maju janah erban perubahen, perlu denga nge kita tek man Peminpinta, Jesus?’ (Baca Matius 23:10.) Guna njawap penungkunen enda, mari sibahas uga Jahwe minpin umatNa sanga lit perubahen.
SI MINPIN UMAT DIBATA KU TANEH PERJANJIN
5. Kejadin si luar biasa kai si ialami Josua i deher kota Jeriho? (Nen gambar pemena artikel.)
5 La ndekah kenca isebrangi kalak Israel Lau Jordan, ialami Josua kejadin si luar biasa. I deher kota Jeriho, jumpa ia ras sekalak dilaki si nagang pedang. Isungkun Josua dilaki e, “Bas pihak kami nge kam ntah bas pihak musuh kami?” Sengget kel Josua sanga ikataken dilaki e maka ia “peminpin tentera Jahwe,” malekat si nampati umat Jahwe. (Baca Josua 5:13-15, Terjemahan Dunia Baru [NW] * Nen keterangen tambahen.) Amin pe ikataken bas kejadin si deban maka Jahwe si mereken petunjuk man Josua, tapi igunaken Jahwe malekat guna ngerana man Josua, bagi si nggo rusur ilakokenna sebelumna.—Keluaren 3:2-4; Josua 4:1, 15; 5:2, 9; Perbahanen Rasul-Rasul 7:38; Galati 3:19.
6-8. (a) Engkai maka piga-piga petunjuk si ibereken malekat e tempa-tempa la cocok iikuti? (b) Ja nari siteh maka petunjuk si ibereken e cocok ras tepat waktu? (Nen ka keterangen tambahen.)
6 Ikataken malekat man Josua kai si perlu ilakokenna guna naluken Jeriho. Tangtangna, piga-piga petunjuk si iberekenna e, tempa-tempa aneh. Contohna, ikataken malekat e man Josua gelah isunatna kerina tenterana. Jadi, kalak e la banci erperang piga-piga wari dekahna. Tepat nge waktuna sanga si e tentera-tentera e isunat?—Kejadin 34:24, 25; Josua 5:2, 8.
7 Banci jadi, tersungkun-sungkun tentera-tentera e, ‘Uga cara kami ngelindungi keluarga kami adi rempet reh musuh?’ Tapi lit kejadin si la isangka-sangka terjadi! Kalak Israel labo iserang, malahen mbiar kalak Jeriho man kalak e. Nina Pustaka, “Pintu gerbang kuta Jeriho terus-terusen itutup janah ijaga gelah bangsa Israel la banci bengket. Sekalak pe la banci bengket ntah pe nadingken kuta e.” (Josua 6:1) Berita enda pasti erban kalak Israel reh tekna man petunjuk Dibata.
8 Ikataken malekat man Josua gelah ula iserang kalak Israel Jeriho. Tapi, arus kalak e erbaris janah ikelilingina kota e sekali sada wari sedekah enem wari, janah i bas wari si pepituken, arus ikelilingi kalak e pitu kali. Banci jadi bage bas ukur tentera-tentera e, ‘Kurang dahin kuakap enda!’ Tapi, iteh Peminpin Israel, Jahwe, kai si ateNa ilakokenNa. Ngikutken petunjuk Jahwe erban kiniteken kalak Israel reh paguhna, janah kalak e la perlu erperang ngelawan tentera Jeriho.—Josua 6:2-5; Heber 11:30. * (Nen keterangen tambahen.)
9. Engkai maka arus siikuti kerina petunjuk si ibereken organisasi Jahwe? Bereken contohna.
9 Kai si banci sipelajari arah kejadin enda? Mon-mon organisasi Jahwe erban perubahen, janah la siteh kai alasenna. Contohna, la pernah siukuri maka cocok kel nggunaken perangkat elektronik sanga pelajaren pribadi, erberita, ntah pe sanga perpulungen. Tapi gundari, nggo siteh kai gunana perubahen e, adi lit perangkat elektronikta. Sanga siidah hasil si mehuli arah perubahan e, kiniteken bage pe persadanta reh paguhna.
UGA CARA KRISTUS MINPIN KALAK KRISTEN SI PERTAMA?
10. Ise situhuna si ngaturken perjumpan badan pinpinen i Jerusalem guna ndungi masalah kerna sunat?
10 Kira-kira 13 tahun kenca Kornelius si la kalak Jahudi janah la isunat jadi kalak Kristen, ikataken piga-piga kalak Jahudi Kristen maka sunat e perlu denga. (Perbahanen Rasul-Rasul 15:1, 2) Bas kota Antiokia, sijawapen turang senina kerna si e. Emaka isuruh pertua-pertua me Paulus lawes guna nungkun man badan pinpinen i Jerusalem kerna si e. Tapi ise nge situhuna si ngaturken ia gelah lawes? Ijelasken Paulus, “Lawes aku ku je erkiteken ipebetehken Tuan.” Jelas me, Kristus si mereken petunjuk kerna masalah e gelah banci idungi badan pinpinen.—Galati 2:1-3.
Kristus me si minpin runggun Kristen si pertama (Nen paragrap 10, 11)
11. (a) Engkai piga-piga kalak Kristen Jahudi tetap denga perlu kapna isunat? (b) Uga cara Paulus mbuktiken maka alu meteruk ukur nggit ia ndukung pertua-pertua i Jerusalem? (Nen ka keterangen tambahen.)
11 Jelas kel petunjuk si ibereken Kristus man badan pinpinen maka kalak Kristen si labo Jahudi labo perlu isunat. (Perbahanen Rasul-Rasul 15:19, 20) Tapi, ertahun-tahun kenca si e, nterem kalak Jahudi si Kristen, tetap isunatna anakna si dilaki. Ibegi pertua-pertua i Jerusalem berita maka Paulus la ngergai Undang-Undang Musa. Emaka ipindo pertua-pertua e Paulus gelah ibuktikenna maka iergaina Undang-Undang. * (Nen keterangen tambahen.) (Perbahanen Rasul-Rasul 21:20-26) Isuruh kalak e gelah ibuatna empat dilaki arah rumah pertoton gelah iidah kalak e maka iergai Paulus Undang-Undang. Mungkin, banci nge bage nina Paulus, ‘Sia-sia kap e! Engkai isuruh kena aku ngelakoken si bage? Si salah i jenda eme kalak Kristen Jahudi si la ngangkai masalah kerna sunat.’ Tapi iteh Paulus maka ate pertua-pertua e gelah kerina kalak Kristen ersada, emaka alu meteruk ukur iikutkenna petunjuk e. Banci jadi tersungkun-sungkun kita, ngkai maka ipeturut Jesus ndekah permasalahen kerna sunat e terjadi, amin gia Undang-Undang Musa lanai ipake kenca Jesus mate.—Kolose 2:13, 14.
12. Banci jadi, ngkai ndekah maka idungi Kristus permasalahen kerna sunat?
12 Perlu waktu guna ngaloken pemeteh si mbaru. Piga-piga kalak Kristen Jahudi perlu waktu gelah banci ialokenna maka ia lanai perlu ngikutken Undang-Undang. (Johanes 16:12) Si iukuri kalak e maka sunat eme tanda hubungen si khusus ras Dibata. (Kejadin 17:9-12) Si deban, mbiar ia ianiaya perban beda ras kelompok kalak Jahudi. (Galati 6:12) Tapi bas waktu si tepat, ibere Kristus petunjuk si lebih jelas bas surat arah Paulus nari.—Roma 2:28, 29; Galati 3:23-25.
KRISTUS TETAP DENGA MINPIN RUNGGUNNA
13. Kai si nampati kita guna ndukung cara Kristus minpin gundari?
13 Gundari pe Kristus denga si jadi Peminpin bas runggun Kristen. Emaka adi lit perubahen arah organisasi si la siangkai, ukurilah uga Kristus minpin umat Dibata mbarenda. Bas jaman Josua bage pe bas jaman rasul-rasul, lalap ibereken Kristus petunjuk guna ngelindungi umat Dibata, enda erban reh paguhna kiniteken umatNa janah nampati kalak e tetap ersada.—Heber 13:8.
Petunjuk si ibereken budak si setia janah pentar gundari, mbuktiken maka iperdiateken Jesus kita
14-16. Uga petunjuk arah “budak si setia janah pentar” mbuktiken maka tujun Kristus eme nampati kita gelah tetap paguh kinitekenta?
14 Gundari “budak si setia janah pentar” mereken petunjuk man banta sanga tuhu-tuhu siperluken petunjuk e. (Matius 24:45) Petunjuk e mbuktiken maka iperdiateken Jesus kita. Marc, si lit empat anakna, ngataken, “Iusahaken Setan erban runggun lemah alu nerang keluarga-keluarga. Gundari, terus ipersingeti kita gelah erban kebaktin jabu tiap minggu, enda ngingetken kepala keluarga gelah tetap ilindungina keluargana.”
15 Adi siteh uga cara Kristus minpin kita, siangkai me maka tujunna nampati kita eme gelah tetap paguh kinitekenta. Contohna, ikataken sekalak pertua si gelarna Patrick, “Tangtangna lit piga-piga turang senina si la cocok akapna iban perjumpan guna erberita i bas kelompok si kitik.” Tapi ikatakenna, perubahen enda mbuktiken maka iperdiateken Jesus tiap kalak bas runggun. Contohna, piga-piga turang senina si mbarenda permela janah jarang erberita, nggo lit kapna ertina ia reh ku perjumpan guna erberita e. Enda mpegegehi kiniteken kalak e.
16 Isampati Kristus ka kita gelah tetap siutamaken pendahin erberita, enda me dahin si pentingna gundari. (Baca Markus 13:10.) Iusahaken André, sekalak pertua si mbaru, ngikuti kerina petunjuk si terbaru arah organisasi Jahwe. Nina, “Pengurangen anggota bas kantor cabang ngingetken kita kerna kedungen jaman enda si nggo reh deherna. Emaka perlu kel sigunaken gegehta bas erberita.”
UGA CARATA NDUKUNG PETUNJUK ARAH KRISTUS?
17, 18. Engkai maka perlu siukuri kai gunana ngikutken perubahen?
17 Petunjuk si ibereken Raja si merentah, Jesus Kristus, erguna man banta gundari bage pe bas wari si pepagi. Ukuri kai gunana man bandu adi ikutkenndu petunjuk si terbaru. Bas kebaktin jabundu, bahaslah uga perubahen kerna perpulungen ntah pe kerna erberita nggo nampati keluargandu.
Isampatindu nge keluargandu ras kalak si deban ngaloken perubahen si iban organisasi Jahwe? (Nen paragrap 17, 18)
18 Adi siukuri maka melala kel gunana ngikutken petunjuk arah organisasi Jahwe, reh nukahna siakap ndalanken petunjuk e janah kita pe ermeriah ukur. Contohna, perban lanai perlu melala bahan si icetak, uang keluar organisasi pe nggo reh kurangna. Perban teknologi nggo reh canggihna, banci sipeseh berita si meriah man terbuen jelma. Banci nge igunakenndu terbuen baca-bacan, video, ras audio bas perangkat elektronikndu? Enda me salah sada carata ndukung Kristus. Atena gelah sipake dana organisasi alu mehuli.
19. Engkai maka perlu sidukung petunjuk arah Kristus?
19 Adi sidukung petunjuk arah Kristus, sisampati turang seninata gelah reh paguhna kinitekenna janah tetap ersada. Nina André kerna pengurangen anggota Betel i sebelang doni, “Pengaruh si mehuli arah anggota Betel si nggit ngaloken perubahen e erban aku ngergai kalak e janah tek man Jesus, peminpin runggun. Tetap ikutken kalak e gereta Jahwe alu terus ermeriah ukur la soal tugas kai pe si ibereken man bana.”
TEKLAH MAN PEMINPINTA
20, 21. (a) Engkai maka banci kita tek man Peminpinta, Kristus? (b) Penungkunen kai si man bahasenta bas artikel seterusna?
20 Ntisik nari Peminpinta, Jesus Kristus, “naluken musuh-musuhna” janah “ngelakoken kai si luar biasa.” (Ketangkasen 6:2; Masmur 45:4, NW) Gundari pe nggo iberekenna pelatihen man banta guna nggeluh bas doni si mbaru janah guna ngelakoken pendahin si lit i jah pagi, eme ngajari kalak si ipekeke ras ngubah doni enda jadi pardis.
21 Adi tetap kita tek man Peminpin ras Rajata la soal kai si terjadi, pasti iarak-arakna kita ku doni si mbaru. (Baca Masmur 46:2-4.) Memang mesera siakap ngaloken perubahen, apai ka perubahen e lit pengaruhna man banta. Sanga enda terjadi, uga carana gelah tetap dame perukurenta janah tetap paguh kinitekenta man Jahwe? Sibahas kari enda bas artikel seterusna.
^ par. 5 Josua 5:13-15 (NW), “Sanga Josua i deher Jeriho, idahna sekalak dilaki si nagang pedang cinder i lebe-lebena. Erdalan Josua njumpai ia, janah nina, ‘Bas pihak kami nge kam ntah bas pihak musuh kami?’ Ijawap dilaki e, ‘Lang, aku peminpin tentera Jahwe.’ Emaka mungkuk Josua, ayona seh ku taneh, janah nina bana, ‘Kai nge si atendu katakenndu man bangku, suruh-suruhenndu, Tuanku?’ Ijawap panglima tentera Jahwe Josua, nina, ‘Talangi selopndu ena perban kam sangana tedis bas taneh si badia.’ Mis ilakoken Josua bage.”
^ par. 8 Bas bangunen Jeriho si nggo runtuh, lit idat melala biji-bijin si nggo iperani tapi la ipan. Enda cocok ras kejadin si lit bas Pustaka, si ngataken maka serangen e ntisik ngenca janah la sempat ipan kalak Israel biji-bijin kalak Jeriho e. Sanga si e musim rani, cocok akap kalak Israel nerang kuta Jeriho perban lit pangan si itadingken i juma kalak e.—Josua 5:10-12.
^ par. 11 Nen kotak “Paulus dengan Rendah Hati Menyambut Ujian” bas Menara Pengawal 15 Maret 2003, halamen 24.
