1. Uga arusna perasanta nandangi kinitekenta?

LA KERINA kalak erkiniteken. (2 Tesalonika 3:2) Tapi ibere Jahwe kiniteken man kerina si nembah man baNa. (Roma 12:3; Galati 5:22) Pasti bujur kal sikataken kerna si e!

2, 3. (a) Kai gunana adi kita erkiniteken? (b) Penungkunen kai saja si nandangi sibahas?

² Ibere Jahwe anak si ikelengiNa gelah kalak si erkiniteken man Jesus banci ialemi dosana. Alu bage, kita banci jadi teman Jahwe janah nggeluh si rasa lalap. (Johanes 6:44, 65; Roma 6:23) Mehuli kal Jahwe man banta! Aminna gia kita erdosa janah arus mate, ietehNa kita ngasup ngelakoken kai si mehuli. (Masmur 103:10) Emaka, isampatiNa kita mpelajari kerna Jesus, bage pe korban tebusen. Adi mulai kita erkiniteken man Jesus ras siikuti ia, lit arapenta nggeluh si rasa lalap!​—Oge 1 Johanes 4:9, 10.

³ Tapi kai deba nari si banci sipelajari kerna kiniteken? Adi pemetehta terjeng kerna kai si nggo ilakoken Dibata  ras si nandangi ilakokenNa i bas wari si pepagi ngenca, nggo nge ertina kita erkiniteken? Mari sinen kai ka si arus silakoken.

4. Adi kita erkiniteken, kai pengaruhna man banta?

⁴ Adi kita erkiniteken man Jahwe ras Jesus, labo ngenca sieteh kai si nggo ilakokenNa ras kai si nandangi ilakokenNa man banta. Kita pe merhat ndalanken ajarenNa. Janah, ergiah-giah kita nampati kalak nandai Jahwe ras Jesus. Nina Paulus, ”Adi ngaku kam alu babahndu, ’Jesus Tuhan kap’, janah tek kam i bas pusuhndu maka Jesus enggo ipekeke Dibata i bas si mate nari maka terkelin me kam. Sabap alu pusuh me kalak erkiniteken seh maka ia irembakken ras Dibata, janah alu babah kalak ngaku seh maka ia ikelini.”​—Roma 10:9, 10; 2 Korinti 4:13.

5. Engkai maka penting kal kiniteken, janah kai si perlu silakoken gelah paguh kinitekenta? Bereken contohna.

⁵ Gelah sidatken kegeluhen si rasa lalap, arus kita erkiniteken janah sijaga kinitekenta tetap paguh. Kiniteken e bagi sinuan-sinuan. Perlu terus sisiram gelah turah ras sehat. Adi lang, banci melus janah mate. Kita pe, perlu siusahaken gelah kinitekenta tetap ”sehat” janah terus ”reh bagesna”.​—Titus 2:2; 2 Tesalonika 1:3; Lukas 22:32; Heber 3:12.

6. Kai erti kiniteken i bas Heber 11:1?

⁶ Pustaka njelasken erti kiniteken i bas Heber 11:1. (Oge.) (1) Kiniteken eme ”tek nandangi kai si iarapken”. Kai si ”iarapken” termasuk janji Dibata kerna wari si pepagi. Contohna, tek kita maka lanai pagi lit kejahaten janah lit doni si mbaru. (2) Kiniteken eme ”tek kerna si la idah”. Contohna, sieteh maka Dibata Jahwe, Jesus Kristus, malekat, ras Kinirajan surga e lit, aminna gia la banci siidah. (Heber 11:3) Uga sicidahken maka kita erkiniteken man janji Dibata bage pe man kai si la siidah? Sicidahken arah caranta nggeluh, rananta, ras perbahanenta.

7. Uga usihen Nuah banci nampati kita ngangkai erti kiniteken? (Nehen gambar i bas pemena artikel.)

⁷ Banci sipelajari kerna kiniteken i bas Nuah nari. Nina Paulus, ”Ibegina kata pertenget i bas Dibata nari, kerna si nandangi reh si la idahna. Ikutkenna kata Dibata, jenari ibahanna sada bahtera si dungna nelamatken ia ras keluargana.” (Heber 11:7) Perban erkiniteken man janji Jahwe, ibangun Nuah bahtera si galang. Banci jadi, tersungkun-sungkun kalak ngkai maka ibanna bahtera. Tek kita maka Nuah la sinik saja. Nina Pustaka, ”ipembarken Nuah berita si ngena ate Dibata”. (2 Petrus 2:5) Ipersingetina kalak maka iban Dibata pagi banjir si mbelin guna ngkernepken kalak jahat. Banci saja ipebetehkenna ka kai si ikataken Dibata man bana, ”Enggo Kutetapken maka Kusasapken me kerina manusia. Kukernepken ia kerina, erkiteken doni enda nggo dem alu kejahaten . . . Kuban ateKu banjir si mbelin i doni enda,  gelah kernep kerina si nggeluh. Kasa kai si lit enda la banci la mate kerina.” Kenca si e, pasti ijelasken Nuah kai si arus ilakoken gelah selamat, eme ’bengket ku bas kapal’.​—Kejadin 6:13, 17, 18.

8. Kai si ikataken Jakup kerna kiniteken?

⁸ Isuratken Jakup ka kerna kiniteken, mungkin la ndekah kenca itulis Paulus kitab Heber. Nina Jakup, ”Cidahkenlah man bangku kuga banci kalak erkiniteken adi la rikut ras perbahanenna. Aku, kucidahken man bandu kinitekenku arah perbahanenku.” (Jakup 2:18) Menurut Jakup, gelah banci erkiniteken, la bias tek saja. Begu-begu pe tek maka Dibata e lit, tapi la ia erkiniteken man Jahwe. Sebalikna, ilawanna. (Jakup 2:19, 20) Kalak si erkiniteken iusahakenna erban meriah ukur Dibata arah perbahanen si mehuli. E me si ilakoken Abraham. Isuratken Jakup, ”Kuga nai nininta Abraham maka rembak ras Dibata? Arah perbahanenna nge; eme asum ipersembahkenna anakna Ishak i babo batar-batar persembahen. Langa kin iangkaindu? Kinitekenna ras perbahanenna erdahin ras-ras. Kiniteken Abraham jadi serta arah perbahanenna.” Kenca si e, ijelaskenna maka kiniteken si la rikutken perbahanen la lit gunana, nina, ”Bali ras kula la rikut ras kesah mate kap, bage me pe kiniteken la rikut ras perbahanen mate kap.”​—Jakup 2:21-23, 26.

9, 10. Kai ertina erkiniteken man Anak?

⁹ Lebih 30 tahun kenca si e, itulis Johanes Injilna ras telu surat. Bagi penulis Pustaka si debanna, iangkai Johanes erti kiniteken. I bas tulisenna, rusur igunakenna kata Junani si maun-maun iterjemahken ”tek man” i bas cakap Karo.

¹⁰ Contohna, ijelasken Johanes, ”Ise tek man man Anak e ialokenna me kegeluhen si tuhu-tuhu si la erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap iteruh ukumen Dibata.” (Johanes 3:36) Bukti kita erkiniteken man Anak e, arus sipatuhi ia. Arah tulisen Johanes nari, sieteh maka rusur ikataken Jesus adi nggeluh atenta si rasa lalap, arus kita tek man ia ras man Bapana.​—Johanes 3:16; 6:29, 40; 11:25, 26; 14:1, 12.

11. Uga carana ngata bujur man Jahwe erkiteken sitandai kebenaren?

¹¹ Bujur sikataken erkiteken igunaken Jahwe kesah si badia nampati kita ngangkai kebenaren kerna Ia ras anakNa, alu bage erkiniteken kita man baNa. (Oge Lukas 10:21.) Sikataken ka bujur perban arah Jesus si jadi ”Sumbul ras tujun kinitekenta”, banci kita rembak ras Jahwe. (Heber 12:2) Sikataken bujur alu mpegegehi kinitekenta eme alu lalap ertoto bage pe mpelajari Pustaka.​—Epesus 6:18; 1 Petrus 2:2.

12. Adi kita erkiniteken, kai si banci silakoken?

 ¹² Arus terus sicidahken maka tuhu-tuhu kita erkiniteken man janji Jahwe arah perbahanenta. Contohna, terus erberita janah nampati kalak jadi ajar-ajar Jesus. Silakoken ka ’kai si mehuli man kerina manusia, terlebih-lebih man teman-temanta si sada kiniteken’. (Galati 6:10) Janah, siusahaken ’nantangi manusia si male ras kerina kebiasanna’ erkiteken la kita nggit ceda hubungenta ras Jahwe.​—Kolose 3:5, 8-10.

13. Penting nge ”tek man Dibata”? Uga Pustaka njelaskenca, janah engkai?

¹³ Nina Pustaka, ”Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen iberekenNa upah man kalak si ndarami Ia.” (Heber 11:6) Pustaka pe njelasken maka gelah jadi kalak Kristen, si pemena ia arus ”tek man Dibata”. Kiniteken eme bagin i bas ’palasta’ nari. (Heber 6:1) Selain kiniteken, siperluken sifat si penting si debanna gelah terus rembak ras Jahwe.​—Oge 2 Petrus 1:5-7; Judas 20, 21.

14, 15. Pentingen nge kiniteken asangken kekelengen? Jelasken.

¹⁴ Penulis Pustaka rusuren nuriken kiniteken asangken sifat si debanna. Adi bage, kiniteken nge sifat si pentingna?

¹⁵ Ibandingken Paulus kiniteken ras kekelengen. Isuratkenna, ”Aminna gia cukup kinitekenku seh maka ngasup aku mindahken deleng pe, tapi adi la aku erkeleng ate nandangi kalak si deban, sia-sia me aku.” (1 Korinti 13:2) Ikataken Jesus maka ”si pentingna kal i bas kerina Undang-Undang agama” eme ngkelengi Dibata. (Matius 22:35-40) Adi lit kekelengenta, sifat si debanna pe si banci erban meriah ukur Dibata banci lit bas kita. Contohna, Pustaka ngatakenca adi kekelengen e ”tek maka lit si mehuli i bas kerinana”. Jadi, adi lit kekelengen, banci kita tek,  ntah pe erkiniteken, man kerina si ikataken Dibata i bas Pustaka.​—1 Korinti 13:4, 7.

16, 17. Kai si ikataken Pustaka kerna kiniteken ras kekelengen? Sifat si apai si pentingna, janah ngkai?

¹⁶ Kiniteken ras kekelengen seh kal pentingna, janah rusur ras-ras duana ibelasken penulis Pustaka. Nina Paulus, ”Arus sipake kiniteken ras keleng ate jadi ampang-ampang tententa.” (1 Tesalonika 5:8) Isuratken Petrus kerna Jesus, nina, ”Keleng atendu Kristus aminna pe langa idahndu ia. Tek kam man bana amin pe la Ia idahndu.” (1 Petrus 1:8) Nungkun Jakup man turang seninana si iminaki, ”Ipilih Dibata kalak musil i bas doni enda gelah bayak ia i bas kinitekenna. Kalak enda pagi dat bagin ngenanami kemalemen ate i bas Kinirajan si ipadanken Dibata man kalak si erkeleng ate man BaNa?” (Jakup 2:5) Isuratken Johanes maka iperentahken Dibata kita ”tek man anakNa, e me Jesus Kristus janah kita arus sikeleng-kelengen.”​—1 Johanes 3:23.

¹⁷ Tapi isuratken Paulus ka, nina, ’Dage lit telu si tetap arus idalanken, eme: erkiniteken, erpengarapen, erkeleng ate, janah si pentingna i bas si telu e, eme engkelengi.’ (1 Korinti 13:13) I bas wari si pepagi, lanai perlu erkiniteken man janji Dibata kerna doni si mbaru erkiteken nggo terjadi. Sinanami pagi kegeluhen si luar biasa bagi si isuratken Pustaka. Tapi, perlu lalap sikelengi Dibata ras kalak si deban. Janah, kekelengenta terus reh belinna seh rasa lalap.

18, 19. Kai asilna erkiteken umat Dibata erkiniteken gundari, janah ise si metunggung ipuji erkiteken si e?

¹⁸ Umat Jahwe gundari erkiniteken janah ndukung Kinirajan Dibata. Kalak e pe sikeleng-kelengen. Enda banci terjadi erkiteken kesah si badia erdahin i bas kalak e. (Galati 5:22, 23, Terjemahan Dunia Baru [NW]) Kai asilna? Lebih waluh juta turang senina i belang-belang doni ngenanami kedamen janah ersada i bas rungguna. Jelas me, kiniteken ras kekelengen eme sifat si tuhu-tuhu luar biasa.

¹⁹ Persadan enda banci terjadi perban penampat Dibata. Emaka, metunggung Ia ipuji. (Jesaya 55:13) Bujur kal sikataken perban ’nggo kita terkelin, erkiteken erkiniteken’. (Epesus 2:8) Jahwe terus nampati terbuen jelma gelah erkiniteken man baNa. Janah dungna, kerina si pagi tading i doni enda eme kalak si serta, adil, ras ermeriah ukur. Ipujina Jahwe seh rasa lalap!