MENURUT Matius 13:24-26, nina Jesus, ”Kinirajan surga e banci iandingken ras kalak si nuan benih si mehuli i jumana. Tapi, i bas sada berngi, asum kerina kalak nggo tunduh, iamburken musuhna ku juma e buah sesa. Kenca turah page e dingen kenca rumpah, teridah me sesa ndai.” Piga-piga penulis kurang tek maka perumpaman e tuhu-tuhu terjadi. Tapi menurut buku-buku hukum Romawi si nai, enda banci terjadi.

Sada kamus Pustaka si Badia ngatakenca maka i bas hukum Romawi, kalak si ngamburken benih sesa i juma kalak si deban guna balas dendam ianggap sada kejahaten. Iban hukum e mbuktiken maka perbahanen si bage pernah terjadi. Alastair Kerr, sekalak ahli hukum njelasken maka i bas tahun 533 M, Kaisar Romawi Yustianus nerbitken Digest, eme ringkasen hukum Romawi. I bas buku e pe ituriken kai nina ahli-ahli hukum mulai tahun 100-250 M. Menurut Digest, salah sada ahli hukum, Ulpian, nuriken sada kasus i bas abad peduaken nari. Lit kalak si ngamburken benih sesa i juma kalak si deban gelah hasil peraninna ceda. I bas buku Digest ituriken hak sekalak perjuma-juma secara hukum, eme ndatken sen selaku ganti rugi.

Kejadin si bage pernah terjadi i Kekaisaren Romawi si nai. Enda ncidahken maka kai si ituriken i bas perumpaman Jesus pernah terjadi.