1, 2. (a) Tentangen kai si iadapi kalak pertandang gundari? (Nehen gambar i bas pemena artikel.) (b) Penginget kai si ibereken rasul Paulus, janah penungkunen kai si nandangi sibahas?

LEBIH 30 tahun si lewat, Osei, si paksa si e lenga jadi Saksi Jahwe, nadingken rumahna i Ghana guna tading i Eropa. ^[1] (Nehen penjelasen tambahen.) Nina, ”Mis kusadari maka nterem kalak la diatena aku. Cuacana pe la cocok bangku. Sanga kutadingken bandara, i je tantangna kugejapken mbergeh, janah mulai aku ngandung.” Erkiteken mesera kal iakap Osei erlajar cakap si mbaru, lebih setahun maka banci datna dahin si mehuli. Selain si e, tedeh kal atena keluargana janah melungun iakapna.

² Ukuri adi kam jadi Osei. Pasti merhat kal kam adi lit kalak si ermediate man bandu. Pasti meriah kal ukurndu adi ialo-alo alu mehuli i Bale Kinirajan la soal kai bangsandu ntah pe warna kulitndu. Pustaka si Badia ngatakenca man kalak Kristen situhu-tuhu gelah  ’ingetna ngalo-ngalo kalak si reh kesilang’. (Heber 13:2) Emaka, mari sibahas penungkunen enda: Uga perasan Jahwe nandangi kalak pertandang? Perlu nge sisesuaiken perasanta nandangi kalak pertandang? Janah, uga kita banci nampati kalak si rehna i bas negara si deban nari gelah meriah iakapna i bas runggunta?

3, 4. Erpalasken Keluaren 23:9, uga ate Dibata perbahanen kalak Israel man kalak pertandang, janah engkai?

³ Kenca ibebasken Jahwe umatNa i bas Mesir nari, iberekenNa Undang-Undang si ngajari kalak e gelah mehuli perbahanenna man kalak pertandang si tading ras ia. (Keluaren 12:38, 49; 22:21) Erkiteken la lalap menukah kegeluhen kalak pertandang, alu perkeleng Jahwe ermediate man kalak e. Contohna, banci ipumahi kalak enda pangan si tading iban kalak si rani.​—Imamat 19:9, 10.

⁴ Kalak Israel labo ngenca iperentahken mehamat man kalak pertandang, tapi ate Jahwe iinget kalak enda min uga nanamna jadi kalak pertandang. (Oge Keluaren 23:9.) Janah, ope denga kalak Israel jadi budak i Mesir, nembeh ate kalak Mesir man kalak e erkiteken la ia seri ras kalak mesir. (Kejadin 43:32; 46:34; Keluaren 1:11-14) Mesera kal kegeluhen kalak Israel selaku kalak pertandang. Ate Jahwe iinget kalak enda min kerna si e janah mehuli man kalak pertandang si tading ras ia.​—Imamat 19:33, 34.

5. Kai si banci nampati kita gelah mehuli man kalak pertandang bagi si ilakoken Jahwe?

⁵ Jahwe lenga berubah. Emaka, adi tandang kalak ku runggunta, arus siinget maka ermediate denga Jahwe man kalak e. (Ulangen 10:17-19; Maleaki 3:5, 6) Ukuri tentangen si iadapi kalak e. Contohna, banci saja la iangkaina cakap si mbaru janah la adil perbahanen kalak man bana. Mari siusahaken nampati ia janah mehuli man bana.​—1 Petrus 3:8.

6, 7. Kai buktina maka kalak Kristen Jahudi si pemena erlajar ngatasi prasangka?

⁶ Kalak Kristen si pemena erusaha ngatasi prasangka si biasa terjadi i bas kalak Jahudi. Sanga Pentakosta tahun 33 M, kalak Kristen Jahudi si tading i Jerusalem melumbar kal man kalak si mbaru si rehna arah negara si deban. (Perbahanen 2:5, 44-47) Enda ncidahken maka iangkai kalak e kai ertina ”melumbar”, eme, nggit ”ngalo-ngalo kalak si reh kesilang”.

⁷ Paksa si e, terjadi perubaten. Jungut-jungut kalak Jahudi si nggunaken cakap Junani erkiteken kalak si  mbalu i bas terpukna iperlakoken alu la adil. (Perbahanen 6:1) Guna ngatasisa, ipilih rasul-rasul pitu dilaki guna mastiken kerina kalak iperlakoken alu adil. Ipilih rasul-rasul dilaki si make gelar Junani, gelah tetap ukur kalak si mbalu e.​—Perbahanen 6:2-6.

8, 9. (a) Penungkunen kai si banci nampati kita gelah meteh lit nge bas kita prasangka ntah lang? (b) Engkai arus sibeneken prasangka? (1 Petrus 1:22)

⁸ Sisadari ntah lang, kerina kita ipengaruhi kebudayanta. (Roma 12:2) Banci saja sibegi tetangga, teman sada dahin, ntah pe teman sekolahta ngataken kai si la mehuli kerna kalak si la seri latar belakangna, suku, ntah pe warna kulitna. Asa nge belinna pengaruh ranan negatif si bage man banta? Uga nge tanggapenta adi lit kalak nokoh-nokohi bangsanta ntah pe kebudayanta?

⁹ Pernah lit prasangka rasul Petrus man kalak si labo Jahudi. Tapi alu manjar-anjar iusahakenna meneken perasan negatif e. (Perbahanen 10:28, 34, 35; Galati 2:11-14) Gundari pe, adi siperdiateken lit prasangka i bas dirinta, arus siusahaken kal menekenca. (Oge 1 Petrus 1:22.) Ingetlah maka kerina kita la serta janah la soal ja nari negaranta, la lit ise pe si metunggung iselamatken. (Roma 3:9, 10, 21-24) Emaka, la banci siakap ulin kita asangken kalak si deban. (1 Korinti 4:7) Perasanta arus bagi Paulus. Ikatakenna man kalak Kristen maka kalak e ’lanai kalak asing ntah pe pertandang’ tapi ’anggota keluarga Dibata’. (Epesus 2:19) Kerina kita arus siusahaken meneken prasangka gelah banci sipakeken manusia si mbaru.​—Kolose 3:10, 11.

10, 11. Uga Boas ngusih perukuren Jahwe nandangi kalak pertandang?

¹⁰ Boas dilaki si setia ngusih perukuren Jahwe nandangi kalak pertandang. Sanga reh Boas ku jumana paksa rani, iperdiatekenna Rut, sekalak diberu pertandang Moab nari. Tutus kal atena erdahin mumahi gandum. Iteruh Undang-Undang Musa, lit hak Rut mumahi. Tapi, Rut tetap mindo ijin mumahi i jumana. Sanga ieteh Boas si e, jengang kal ia. Emaka, ipediatna ia muat gandum terbuen i jumana.​—Oge Rut 2:5-7, 15, 16.

¹¹ Kai si terjadi seterusna ncidahken maka ermediate kal Boas man Rut selaku kalak pertandang. Isuruhna ia ikut ras diberu-diberu si paksana ngemo gelah ula igas-gasi dilaki si erdahin i juma e. Janah, ipastikenna ka gelah ialoken Rut pangan ras inemen, bali bagi si ialoken kalak si erdahin. Mehamat Boas man diberu pertandang si musil enda janah ipegegehina ka ia.​—Rut 2:8-10, 13, 14.

12. Kai pengaruhna adi kita mehuli man kalak pertandang?

¹² Boas mehuli man Rut labo saja erkiteken ia setia man simetuana Naomi, tapi erkiteken nggo ka ilayanina Jahwe. Sanga mehuli Boas man bana,  situhuna ia ngusih kekelengen Jahwe si setia. (Rut 2:12, 20; Kuan-kuanen 19:17) Bage ka gundari, adi kita mehuli, kita banci nampati ”kerina manusia” erlajar kebenaren janah nampati ia nggejapken kekelengen Jahwe.​—1 Timotius 2:3, 4.

13, 14. (a) Engkai maka arus sialo-alo kalak pertandang i Bale Kinirajan? (b) Kai si banci nampati kam gelah meriah iakapndu ngerana ras kalak si la seri kebudayanndu ras ia?

¹³ Banci sicidahken kiniulin man kalak pertandang alu ngalo-ngalo ia i Bale Kinirajan. Kalak pertandang si mbaru denga seh i bas sada negara, banci saja maun-maun mela iakapna janah tading sisada. Erkiteken kebudayan ntah pe status sosialna, banci saja ia la percaya diri. Emaka, arus leben sialo-ngalo ia janah sicidahken kiniulin, bage pe ermediate man bana. Adi lit i bas cakapndu, aplikasi JW Language banci nampati kam erlajar ngataken mejuah-juah i bas cakapna.​—Oge Pilipi 2:3, 4.

¹⁴ Banci saja kurang iakapndu riahna ngerana ras kalak si la seri kebudayanna ras kam. Guna ngatasi perasan si bage, banci ikatakenndu man bana kerna dirindu. Banci saja idahndu kari maka mbue si seri i bas kena asangken si ibayangkenndu. Ingetlah maka tep-tep kebudayan lit kelebihen ras kekurangenna.

15. Uga kita banci ngangkai kalak pertandang paksana erban penyesuaien?

¹⁵ Guna nampati kalak pertandang gelah ialo-alo iakapna bana, cuba  ukurindu, ’Adi aku i negara kalak, uga ateku perbahanen kalak man bangku?’ (Matius 7:12) Sabarlah man kalak pertandang si paksana erban penyesuaien. Tantangna banci saja la siangkai carana rukur ntah pe perbahanenna. Tapi asangken siarapken ia rukur ntah pe perbahanenna bagi kita, madin sialoken saja ia uga litna.​—Oge Roma 15:7.

16, 17. (a) Uga kita banci reh rembakna ras kalak si la seri kebudayanta ras ia? (b) Penampat kai si banci sibereken man kalak pertandang si lit i bas runggunta?

¹⁶ Banci sitandai terbagesen kalak pertandang si lit i bas runggunta ntah pe daerahta adi siusahaken mpelajari kerna negara ras kebudayanna. Enda banci silakoken i bas kebaktin jabu. Cara si deban eme ngundang ia man ku rumahta. Ban Jahwe ”pintun kiniteken nggo talang tuhu-tuhu” man kerina bangsa. Emaka arus siusih Jahwe alu alo-alo kalak pertandang si ”sada kiniteken” ras kita.​—Perbahanen 14:27; Galati 6:10; Jop 31:32.

¹⁷ Sanga sigunaken waktunta ras sada keluarga pertandang, enda banci nampati kita ngangkai bage pe ngergai usaha-usahana i bas erban  penyesuaien ras kebudayanta. Banci siidah maka kalak e perlu isampati mpelajari cakapta. Banci ka sisampati ia ndatken rumah ras pendahin si mehuli. Penampat si bage banci saja erguna kal man turang seninanta.​—Kuan-kuanen 3:27.

18. Uga kalak pertandang banci ngusih Rut?

¹⁸ Pastilah kalak pertandang pe perlu isesuaikenna dirina ras kebudayan si mbaru. Rut usihen si mehuli i bas si enda. Si pemena, iergaina kebiasan negarana si mbaru alu mindo ijin guna mumahi gandum. (Rut 2:7) La iakapna maka kalak si deban arus nampati ia. Si peduaken, mis ikatakenna bujur man kalak si mehuli man bana. (Rut 2:13) Adi kalak pertandang ngusih Rut, turang senina bage pe penduduk setempat banci reh mehamatna man ia.

19. Kai alasenna maka arus mehuli perbahanenta man kalak pertandang?

¹⁹ Meriah kal siakap erkiteken icidahken Jahwe kiniulinNa janah iijinkenNa kerina kalak megi berita si meriah. I bas negarana, banci saja piga-piga kalak pertandang la banci erlajar Pustaka ntah pe pulung ras umat Jahwe. Tapi gundari lit kesempatenna pulung ras kita, emaka arus sisampati ia. Alu bage la iakapna ia bagi kalak pertandang. Banci saja la mbue senta ntah pe la ngasup kita mereken melala penampat, tapi adi mehuli perbahanenta man kalak e, siusih kekelengen Jahwe. Selaku kalak si ’ngusih Dibata’, mari silakoken si mehulina i bas ngalo-ngalo kalak pertandang!​—Epesus 5:1, 2.