1, 2. (a) Kai bedana arapenta ras arapen kalak si gundari? (b) Kai sibahas kari i bas artikel enda?

MELALA si banci siarapken i bas Jahwe nari. Erjanji Ia maka ipebadiakenNa pagi gelarNa janah ipesehNa peratenNa i surga bage pe i doni. (Matius 6:9, 10) E me si pentingna si man timanta. IjanjikenNa ka kegeluhen si rasa lalap i surga ntah pe i doni. Tuhu-tuhu luar biasa! (Johanes 10:16; 2 Petrus 3:13) Janah sinehen atenta cara Jahwe i bas negu-negu bage pe ndukung umatNa i bas jaman akhir enda.

² Nina Pustaka si Badia maka kiniteken eme ”tek nandangi kai si iarapken”. Ertina kalak si erkiniteken seh kal tekna maka janji Jahwe pasti terjadi. (Heber 11:1) Sebalikna, nterem kalak gundari melala kal sura-surana, tapi la ia tek adi e banci terjadi. Contohna, lit kalak si ersura-sura menang lotre, tapi ia la tek maka ia pasti menang. I bas artikel enda, sibahas kari uga  carana mpepaguh kinitekenta nandangi janji Dibata. Sibahas ka kari kai gunana adi paguh kinitekenta.

3. Engkai kita tek maka janji Dibata pasti terjadi?

³ La lit kalak si nggo erkiniteken tantangna tubuh nari. Gelah banci erkiniteken perlu kita penampat kesah si badia. (Galati 5:22) Kesah si badia banci nampati kita nandai Jahwe. Adi siangkai Ia mada kuasa janah pentar, tek kita maka ngasup Ia nepati kerina janjiNa. Menurut Jahwe, kerina janjiNa e tempa-tempa ”enggo dung!” (Oge Ketangkasen 21:3-6.) Sieteh maka lalap Jahwe nepati janjiNa, Ia Dibata si ”setia kap”. Emaka tek kita nandangi kerina janjiNa kerna wari si pepagi.​—Ulangen 7:9.

4. Umat Dibata si nai erkiniteken nandangi kai?

⁴ I bas Heber pasal 11 ituriken gelar 16 dilaki ras diberu si erkiniteken kal man janji Jahwe. Ituriken ka kerna nterem juak-juak Jahwe si erban meriah ukur Jahwe ’erkiteken ia erkiniteken’. (Heber 11:39) Itimaina ”kesusuren” si ijanjiken Jahwe. Ietehna maka ”kesusuren” e pagi si ngkernepken kerina musuh Dibata ras njadiken doni enda mulihi jadi pardis. (Kejadin 3:15) Janah, erkiniteken kal kalak e maka ipekeke Jahwe nge ia pagi mulihi. Memang, kalak e la pagi nggeluh i surga erkiteken mate ope denga ibuka Jesus arapen e man manusia. (Galati 3:16) Itimaina kegeluhen si rasa lalap i doni.​—Masmur 37:11; Jesaya 26:19; Hosea 13:14, Terjemahan Dunia Baru (NW).

5, 6. Kai si itimai Abraham ras keluargana? Kai si ilakokenna gelah tetap paguh kinitekenna? (Nehen gambar i bas pemena artikel.)

⁵ Heber 11:13 nuriken kerna juak-juak Jahwe si setia, ”Kerina kalak enda mate i bas kiniteken. Kai si ipadanken Dibata la ialokenna, tapi i dauh-dauh nari nggo idahna si e, emaka meriah iakapna. Terang-terang iakuina maka ia kalak perlajang dingen kesilang i doni enda.” Itimai-timaina doni si mbaru janah i bayangkenna nggeluh i je. Salah sadana eme Abraham. Nina Jesus maka Abraham ”ermeriah ukur nimai” arapen e. (Johanes 8:56) Sara, Isak, Jakup, bage pe nterem kalak si debanna nimai Kinirajan ”si nggo irencanaken dingen ipanteki Dibata”, si nandangi merentah i doni.​—Heber 11:8-11.

⁶ Uga Abraham ras keluargana njaga kinitekenna tetap paguh? Terus ipelajarina kerna Jahwe. Maun-maun Dibata ngerana man kalak e arah malekat, pengenehenen, ntah pe nipi. Mungkin, erlajar ka ia arah kalak si setia si ndauh tuan ntah pe arah cataten si nai. La pernah ilupaken Abraham ras keluargana janji Dibata, tapi rusur iukurina. Asilna la ia sangsi maka pasti itepati Dibata janjiNa. Emaka, tetap kalak e  setia man baNa aminna pe ngenanami kiniseran ntah pe isiksa.

7. Kai si ibereken Jahwe guna mpepaguh kinitekenta, janah kai si perlu silakoken?

⁷ Uga carana gelah tetap paguh kinitekenta? Ibereken Jahwe Pustaka guna ngajari kita janjiNa kerna wari si pepagi janah icidahkenNa kai si iperluken gelah banci ermeriah ukur. Erkiteken si e, arus sioge Pustaka tep-tep wari janah sidalanken. (Masmur 1:1-3; oge Perbahanen 17:11.) Ibereken Jahwe ka ”pangan . . . i bas paksana” arah ”juak-juak si tutus dingen pentar”. (Matius 24:45) Bagi juak-juak Dibata si nai, perlu ka rusur sioge kerna janji-janji Dibata janah siukuri. Alu bage, banci kita tetap setia man Dibata janah terus nimai waktuna Kinirajan Dibata merentah i doni.

8. Uga toto banci mpepaguh kinitekenta?

⁸ Kai deba nari si erban kiniteken juak-juak Dibata si nai tetap paguh? Kalak e ertoto mindo penampat Jahwe janah sanga igejapkenna totona ijabap, kinitekena pe reh paguhna. (Nehemia 1:4, 11; Masmur 34:5, 16, 18; Daniel 9:19-21) Bage ka adi sigejapken Jahwe megi totonta janah ibereNa keperlunta i bas waktu si tepat, kinitekenta pe reh paguhna. (Oge 1 Johanes 5:14, 15.) Selain si e, ”pindolah” terus kesah si badia man Jahwe.​—Lukas 11:9, 13.

9. Kai si banci situriken i bas totonta?

⁹ Sanga ertoto, ula ngenca kita mindo kai si iperluken. Melala kal hal luar biasa si nggo ilakoken Jahwe. Emaka, perlu sikataken bujur man baNa janah si puji Ia tep-tep wari. (Masmur 40:6) Umat Jahwe pe notoken turang-seninana i belang-belang doni. Contohna, ’siinget kalak si i bas penjara’. Sitotoken ka ’kalak si muat pimpinen’. Adi sigejapken Jahwe njabap totonta, reh mbagesna kinitekenta janah reh rembakna kita ras Ia.​—Heber 13:3, 7.

10. Ngkai maka nterem kalak banci pang janah tetap setia man Dibata?

¹⁰ I bas Heber pasal 11, nina Paulus ”Erkiteken tek diberu-diberu e man Dibata me maka ipekeke Dibata keluargana i bas si mate nari. Si debanna la nggit ngaloken kebebasen, tapi mate isiksa ia, gelah nggeluh ia mulihi ku bas kegeluhen si terulin.” (Heber 11:35) Nterem si ngadapi percuban janah tetap setia man Dibata erkiteken tek kal ia nandangi kinikeken si ijanjiken Dibata. Ietehna maka i bas wari si pepagi, ipekeke Jahwe ia mulihi guna nggeluh rasa lalap i doni. Perdiateken Nabot ras Sakaria. Kalak e ibenteri alu batu seh asa mate erkiteken matuhi  Dibata. (1 Raja-Raja 21:3, 15; 2 Kronika 24:20, 21) Daniel ibenterken ku guha si isina singa-singa si paksana melihe. Teman-temanna ibenterken ku bas api si gurlah. Padin iakap kalak e mate asangken arus la setia man Jahwe. Erkiniteken kal kalak e maka pasti ibere Jahwe kesah si badia janah nampati ia ngadapi kiniseran.​—Daniel 3:16-18, 20, 28; 6:13, 16, 21-23; Heber 11:33, 34.

11. Percuban kai saja si iadapi nabi-nabi alu megenggeng?

¹¹ Enterem nabi, bagi Mikaya ras Jeremia, itokohi janah ipenjaraken. Si debanna, bagi Elia ’ngongsi ku gurun pasir bage pe ku deleng-deleng, cebuni i bas guha bage pe i bas lubang’. Kerina kalak e megenggeng ngadapi percuban janah tetap setia man Dibata erkiteken ”tek nandangi kai si iarapken”.​—Heber 11:1, 36-38; 1 Raja-Raja 18:13; 22:24-27; Jeremia 20:1, 2; 28:10, 11; 32:2.

12. Ise usihenta si mehulina? Engkai ia banci megenggeng?

¹² Jesus Kristus megenggeng ngadapi percuban si mberatna janah tetap setia man Jahwe. Ngkai ia banci megenggeng? Nina Paulus, ”Tapi erkiteken keriahen si nimai ia, lanai iukurina mela mate i [tiang siksan]. Janah genduari kundul ia arah kemuhen kursi Kinirajan Dibata.” (Heber 12:2, NW) Kenca si e, iiahken Paulus kalak Kristen gelah ’iukurina alu megermet’ usihen Jesus. (Oge Heber 12:3.) Bali bagi Jesus, nterem kalak Kristen i bas abad pemena mate erkiteken ertekad guna setia man Jahwe. Salah sadana e me Antipas. (Ketangkasen 2:13) Kalak enda nggo ngaloken upahna i surga. Tapi, juak-juak Dibata si nggeluh ope denga kalak enda, nimai kegeluhen si rasa lalap i doni. (Heber 11:35) La ndekah kenca Jesus jadi Raja i bas tahun 1914, kalak Kristen si iminaki si nggo mate ipekeke guna nggeluh si rasa lalap i surga janah merentah pagi ras Kristus.​—Ketangkasen 20:4.

13, 14. Percuban kai si iadapi Rudolf Graichen, janah ngkai ia banci tetap setia?

¹³ Jutan juak-juak Dibata ngusih Jesus. Iukurina janji Dibata janah tetap setia paksa ngadapi percuban. Contohna, Rudolf Graichen, si lahir i Jerman i bas tahun 1925. Sanga kitik denga, itama orangtuana gambar-gambar cerita Pustaka i bas rumahna. Nina, ”Lit gambar serigala ras biri-biri, danak-danak ras arimo tultul, anak lembu ras singa—kerinana ersada, anak si kitik denga si negu-negusa.” (Jesaya 11:6-9)  Gambar-gambar e nampati ia ngukuri kerna Pardis, alu bage reh paguhna kinitekenna. Emaka, banci ia tetap setia aminna pe ertahun-tahun ia isiksa Gestapo Nazi, kenca si e isiksa Stasi Komunis i Jerman Timur.

¹⁴ Rudolf megenggeng ngadapi melala percuban. Nandena mate kena tipus i kamp konsentrasi Ravensbrück. Bapana neken dokumen si ngataken maka ia lanai Saksi Jahwe. Tapi ijaga Rudolf kinitekenna tetap paguh. Kenca bebas i bas penjara nari, ia ngelayani selaku pertua keliling. Kenca si e, ia iundang ku Sekolah Gilead janah itugasken ku Cile guna ngelayani mulihi selaku pertua keliling. I je, erjabu ia ras Patsy, sekalak utusen injil. Tapi, setahun kenca si e, mate anakna. Piga-piga waktu kenca si e, mate ka Patsy, usiana 43 tahun denga. Aminna pe bage, Rudolf terus ngelayani Jahwe. Ia nggo metua janah kurang sehat,  tapi tetap denga ia ngelayani jadi perintis biasa ras pertua. Pengalamen geluhna banci ioge i bas Menara Pengawal 1 Agustus 1997, halamen 20-25. ^[1] (Nehen penjelasen tambahen.)

15. Bereken piga-piga contoh kerna turang seninanta si ngelayani Jahwe alu meriah ukur aminna pe isiiksa.

¹⁵ Gundari, turang seninanta ergiah-giah ngelayani Jahwe aminna pe ngadapi peniksan si mberat. Ratusen turang senina ipenjaraken i Eritrea, Singapura, ras Korea Selatan erkiteken itulakna ”make pedang”. (Matius 26:52) Contohna, Isaac, Negede, ras Paulos nggo ipenjaraken i Eritrea lebih 20 tahun dekahna! I je, kalak e iperlakoken alu kejam. La ia banci erjabu, ntah pe ngurus orangtuana. Tapi, tetap ia setia man Jahwe janah kinitekenna tetap paguh. Gundari, penjaga penjara nghamati kalak e. Fotona banci inenndu i bas situs web jw.org. Cirem kalak e aminna pe ngadapi kiniseran.

16. Kai gunana adi paguh kinitekenta?

¹⁶ Teremen juak-juak Jahwe la ipenjaraken ntah pe isiksa alu kejam bagi turang seninanta ndai. Tapi, nterem ngenanami kiniseran erkiteken musil, bencana alam, ntah pe perang. Si debanna ngusih Abraham, Isak, Jakup, ras Musa si la nggit jadi kalak terberita ras bayak gelah banci ngelayani Jahwe alu bulat ukur. Aminna pe bage, kalak enda tetap ermeriah ukur. Ngkai? Erkiteken keleng atena Jahwe janah erkiniteken man janjiNa. Ietehna maka ibereNa pagi kegeluhen si rasa lalap i bas doni si mbaru, si dem alu keadilen man juak-juakNa si setia.​—Oge Masmur 37:5, 7, 9, 29.

17. Uga carana gelah kinitekenndu tetap paguh, janah kai si nandangi sibahas?

¹⁷ I bas artikel enda, nggo siangkai maka kiniteken eme ”tek nandangi kai si iarapken”. Gelah paguh kinitekenta, perlu kita ertoto janah siukuri janji-janji Jahwe. Alu bage banci kita ngasup ngadapi percuban kai pe. I bas artikel seterusna, sibahas kari terbuen kerna kai ertina erkiniteken.