1-3. (a) Kai si arus si lalap siutamaken? (b) Tentangen kai si iadapi kalak si mpelajari cakap si deban, janah penungkunen kai si banci turah? (Nehen gambar i bas pemena artikel.)

GUNDARI, enterem Saksi Jahwe ikut nggenepi nubuat gelah erberita ”man kerina bangsa, suku, cakap ras negara”. (Ketangkasen 14:6) Ikut nge kam mpelajari cakap si deban? Piga-piga ngelayani jadi utusen injil ntah pe erberita i bas daerah si merluken tenaga. Si debanna ka, mulai pulung ku runggun cakap si deban si lit i bas daerahna sendiri.

² Si perlu iutamaken kerina juak-juak Dibata eme hubungen keluargana si rembak ras Jahwe. (Matius 5:3, Terjemahan Dunia Baru [NW]) Banci saja sibuk kal kita, alu bage mesera siakap ngelakoken pelajaren pribadi si mehuli. Tapi kalak si ngelayani i bas runggun cakap si deban buen tentangenna.

³ Kalak si bage perlu mpelajari cakap si mbaru,  tapi perlu ka ipastikenna maka ratur ipelajarina Kata Dibata alu mbages. (1 Korinti 2:10) Uga ia banci ngelakokenca adi kurang iangkaina kai si iajarken i bas runggun? Janah engkai maka orang tua Kristen si ngelayani i bas runggun cakap si deban arus ipastikenna maka kebenaren nggo erdahin i bas pusuh anak-anakna?

4. Kai si banci mbahayaken hubungenta ras Jahwe? Bereken contohna.

⁴ Paksa la banci siangkai ajaren Pustaka si Badia i bas cakap si deban, enda banci mbahayaken hubungenta ras Jahwe. Sanga Nehemia mulih ku Jerusalem, iperdiatekenna lit piga-piga anak-anak la ngangkai cakap Heber. (Oge Nehemia 13:23, 24.) Erkiteken anak-anak e la ngangkai Kata Dibata, lanai ia rembak ras Jahwe.​—Nehemia 8:2, 8.

5, 6. Kai si isadari piga-piga orang tua si ngelayani i bas runggun cakap si deban, janah kai masalahna?

⁵ Isadari piga-piga orang tua Kristen si ngelayani i bas runggun cakap si deban maka hubungen anak-anakna ras Jahwe nggo lemah. Erkiteken kurang iangkai anak-anakna kai si iajarken bas perpulungen, la tersuruh ukurna erban tindaken. Nina Pedro si keluargana pindah Amerika Selatan nari ku Australia, ”Sanga ncakapken hal-hal rohani arus terlibat pusuhta.” ^[1] (Nehen penjelasen tambahen.)—Lukas 24:32.

⁶ Belinen pengaruh ngoge i bas cakapta asangken i bas cakap si deban. Erkiteken mesera kal siakap ngerana i bas cakap si deban, enda banci mbahayaken hubungenta ras Jahwe. Emaka, asum tetap kita semangat i bas runggun cakap si deban, perlu ka sijaga hubungenta ras Jahwe.​—Matius 4:4.

7. Uga carana kalak Babil maksa Daniel iikutina kebudayan ras agamana?

⁷ Sanga Daniel ras temanna itawan i Babil, icubaken kalak Babil maksa kalak e ngaloken kebudayan ras agamana. Iajarina kalak e ”cakap Babil” janah iberena ka gelar Babil. (Daniel 1:3-7) Gelar Daniel iganti alu gelar si lit hubungenna ras Bel, dewa utama kalak Babil. Mungkin iban Raja Nebukadnesar si e gelah Daniel tek maka hebaten nge dewa Babil asangken Dibata Daniel, Jahwe.​—Daniel 4:8.

8. Uga Daniel mpertahanken hubungenna ras Jahwe tetap paguh?

⁸ I Babil, itawarken man Daniel pangan-pangan si ntabeh. Tapi nggo ”itetapken Daniel i bas ukurna” maka la ia nggit ngelanggar undang-undang Dibata. (Daniel 1:8) Erkiteken rajin ipelajarina Kata Dibata i bas cakap Heber, hubungenna ras  Dibata tetap paguh aminna tading i negeri si deban. (Daniel 9:2) Malahen, kira-kira 70 tahun kenca ia reh ku Babil, tetap denga ia itandai alu gelar Heberna, Daniel.​—Daniel 5:13.

9. Kai pengaruh Kata Dibata man penulis Masmur 119?

⁹ Penulis Masmur 119 arus megenggeng sanga anggota kerajan nentang ia. Tapi idatna gegeh i bas Kata Dibata nari, janah enda nampati ia la seri ras kalak si deban. (Masmur 119:23, 61) Terus iukurina Kata Dibata, alu bage mpengaruhi pusuhna.​—Oge Masmur 119:11, 46.

10, 11. (a) Kai si arus jadi tujunnta sanga mpelajari Kata Dibata? (b) Uga gelah banci seh tujunnta? Bereken contohna.

¹⁰ Aminna gia sibuk kal kita erkiteken tanggungjabapta i bas runggun bage pe i bas pendahin, kerina kita perlu pelajaren pribadi ras kebaktin jabu. (Epesus 5:15, 16) Tujunnta ula gelah ngoge ntah pe nikapken komentar saja man perpulungen, tapi terus siukuri Kata Dibata gelah erdahin bas pusuhta janah mpegegehi kinitekenta.

¹¹ Gelah seh tujunta, kita perlu seimbang. Sanga erlajar, ula ngenca siukuri keperlun kalak si deban tapi siukuri ka keperlunta. (Pilipi 1:9, 10) Arus sisadari maka sanga erban persikapen guna erberita, pulung, ntah pe khotbah, banci saja kurang siperdiateken pelajarenna man dirinta. Contohna, amin gia kalak si erdakan arus inanamina lebe kai si itanggerkenna ope denga iberekenna man kalak si deban, tapi gelah banci ia tetap sehat, arus ka alu ratur isikapkenna pangan si sehat man dirina sendiri, labo terjeng ngenanami saja. Bage ka secara rohani, adi atenta paguh hubungenta ras Jahwe, arus sipelajari Pustaka alu ratur. Pelajaren si bage ncukupi keperlun rohaninta.

12, 13. Engkai maka nterem kalak tersampati iakapna erlajar Pustaka i bas cakapna sendiri?

¹² Nterem si ngelayani i bas runggun cakap si deban tersampati kal iakapna erkiteken alu ratur elajar Pustaka ’i bas cakapna’. (Perbahanen 2:8) Janah utusen injil pe ietehna maka gelah tetap paguh secara rohani i bas daerah tugasna, la bias erlajar arah kai si ibegina saja bas perpulungen.

¹³ Alain, si erlajar cakap Persia kira-kira waluh tahun dekahna, ngatakenca, ”Sanga aku erban  persikapen i bas cakap Persia, kuusahaken ngangkai erti cakapna. Erkiteken si e, kai si kuoge banci kena kal kupusuhku. Eme alasenna aku alu ratur erlajar Pustaka bage pe publikasi si deban i bas cakapku.”

14. Kai si arus ipastiken orang tua, janah engkai?

¹⁴ Perlu ipastiken orang tua maka kebenaren nggo erdahin i bas pusuh ras perukuren anakna. Perdiateken Serge ras ndeharana, Muriel, si ngelayani i bas runggun cakap si deban lebih telu tahun dekahna. Mulai iperdiateken kalak e maka anakna, si dilaki si umurna 17 tahun, kurang iakapna riahna erberita ras pulung. Nina Muriel, ”Adi erberita i bas cakapna, eme Prancis, meriah iakapna, tapi adi i bas cakap si deban lesek kal atena.” Nina Serge, ”Sanga ieteh kami keadan si bage ngambati kemajun rohani anak kami, iputusken kami mulih ku runggun kami si mbarenda.”

15. (a) Uga orang tua banci mutusken perlu nge ia mulihken ku runggun si mbarenda ntah lang? (b) Pedah kai si lit i bas Ulangen 6:5-7 man orang tua?

¹⁵ Uga orang tua banci mutusken perlu nge ia pindah mulihi ku runggun si cakapna banci iangkai anakna ntah lang? Si pemena, perlu ipastikenna lit nge waktu ras tenagana ntah lang guna ngajari anakna ngkelengi Jahwe ras ngajari cakap  si mbaru sekaligus. Si peduaken, banci saja isadarina maka anakna la nggit erberita, pulung ntah pe ngelayani i bas daerah si nggunaken cakap si deban. Kenca mpertimbangken dua hal enda, banci saja iputusken orang tua mulihken ku runggun si cakapna iangkai anakna. Kenca si e, adi nggo rembak hubungen anakna ras Jahwe, banci ka iputusken orang tua ngelayani i bas runggun cakap si deban.​—Oge Ulangen 6:5-7.

16, 17. Uga piga-piga orang tua banci ngajari anakna kerna Jahwe?

¹⁶ Lit orang tua si asum ngajari anakna kerna Jahwe i bas cakapna sendiri, ngelayani ka ia i bas runggun ntah pe kelompok cakap si deban. Charles ras telu anakna si umurna antara 9 ku 13 tahun ngelayani i bas kelompok cakap Lingala. Nina, ”Iputusken kami mandu pelajaren Pustaka bage pe kebaktin jabu ras anak-anak i bas cakap kami sendiri. Tapi, iban kami ka erbage latihen guna kegiaten teokratis ras permainen i bas cakap Lingala gelah banci meriah iakapna mpelajari cakap enda.”

¹⁷ Kevin ras dua anakna si umurna lima ras waluh tahun ergabung i bas runggun cakap si deban. Iusahaken Kevin kal ngajarken kebenaren man  anak-anakna erkiteken kurang iangkai anak-anakna e kai si iajarken i bas perpulungen. Nina, ”Aku ras ndeharangku mandu pelajaren Pustaka ras dua anak kami i bas cakap kami sendiri, eme Prancis. Idahi kami ka perpulungen cakap Prancis sebulan sekali. Janah igunaken kami liburen guna ikut kebaktin i bas cakap kami.”

18. (a) Uga Roma 15:1, 2 nampati kam erban keputusen si mehuli guna nampati anak-anak? (b) Saran kai saja si ibereken orang tua si debanna? (Nehen penjelasen tambahen.)

¹⁸ Arus iputusken tep-tep keluarga kai si pentingna man kerohanin anakna. ^[2] (Nehen penjelasen tambahen.) (Galati 6:5) Nina Muriel maka aminna ia ras perbulangenna merhat kal tetap ngelayani i bas runggun cakap si deban, iputuskenna mulihken ku runggun asalna guna mpegegehi hubungen anakna ras Jahwe. (Oge Roma 15:1, 2.) Gundari, igejapken Serge maka keputusen e tepat. Nina, ”Sanga mulai kami mulih ku runggun cakap Prancis, meter kal kemajun rohani anak kami janah dungna iperidiken. Gundari, ia perintis biasa janah nggit ka ia ngelayani mulihi ras kelompok cakap si deban!”

19, 20. Uga banci sicidahken maka kita ngkelengi Kata Dibata?

¹⁹ Kerina kalak ikelengi Jahwe. IberekenNa Pustaka i bas ratusen cakap gelah ”kerina manusia” banci ndatken pemeteh si tepat kerna kebenaren. (1 Timotius 2:4) IetehNa maka kita banci reh rembakna ras Ia adi sioge Pustaka i bas cakap si banci siangkai.

²⁰ Perlu siusahaken gelah tetap rembak ras Jahwe. Erkiteken si e, perlu sipelajari Pustaka alu ratur i bas cakap si banci siangkai. Alu bage, banci ka sisampati keluarganta gelah tetap rembak ras Jahwe janah sicidahken maka tuhu-tuhu siergai Kata Dibata.​—Masmur 119:11.