1, 2. Kai si banci saja iukuri anak nguda, janah kai pedah Pustaka?

IKATAKEN sekalak murid man sekalak turang seninanta si nguda denga i Inggris, ”Mamang ateku ngidah anak bagi kam jagona banci tek adi Dibata e lit.” Sekalak turang seninanta i Jerman nulis, ”Menurut guru i sekolah, cerita kerna tinepa i bas Pustaka si Badia e labo tuhu. Janah iakapna kerina murid tek man evolusi.” Nina sekalak turang seninta si nguda denga i Prancis, ”Guru i sekolahku la iarapna lit denga murid si tek man Pustaka.”

² Gundari, nterem kalak la tek adi Dibata Si Nepa manusia. Adi kam Saksi Jahwe si nguda denga ntah pe paksana erlajar kerna Ia, banci saja pernah kam tersungkun-sungkun uga kam banci mbuktiken maka Ia Si Nepa kita. Isampati Pustaka kita ngukuri kai si paksana sibegi ntah pe sioge. Ibere Dibata kita ’kebeluhen dingen pengertin guna ngkawali kita’. Adi igunakenndu e, banci tulakndu ajaren si salah janah mpegegehi kinitekenndu man Jahwe.—Oge Kuan-kuanen 2:10-12.

3. Kai si nandangi sibahas i bas artikel enda?

³ Gelah paguh kinitekenta man Jahwe, arus tuhu-tuhu sitandai Ia. (1 Timotius 2:4) Emaka, paksa sioge Pustaka ras  publikasinta, ngadilah kentisik, janah ukuri ras antusi kai si paksana sioge. (Matius 13:23) Mari sibahas cara erlajar si bage si banci nampati kita ndatken melala bukti maka Jahwe e me Si Nepa kita janah Pustaka reh i bas Ia nari.—Heber 11:1.

4. Kai si seri i bas kalak si tek man evolusi ras kalak si tek adi Dibata Si Nepa? Maka, kai si perlu silakoken?

⁴ Banci saja lit si ngatakenca, ”Tek aku man evolusi erkiteken ilmuwan ngatakenca adi e benar. Mamang ateku adi tek kam Dibata e lit, padahal ise pe la pernah ngidahsa.” Nterem si bage perukurenna. Memang, la pernah siidah Dibata ntah pe siidah Ia nepa. (Johanes 1:18) Tapi, kalak si tek man evolusi pe, tek ka man kai si la banci iidahna. La lit ilmuwan ntah ise pe pernah ngidah sada jenis makhluk hidup erevolusi, ntah pe salih jadi jenis si debanna. Contohna, ise pe la pernah ngidahsa kera erevolusi jadi manusia. (Jop 38:1, 4) Jadi, perlu sidarami buktina, kenca siukuri mbages-bages, emaka siban kesimpulen. Nterem kalak ipelajarina kai si lit i alam, dungna isadarina maka Dibata e lit. Iangkaina ka maka Ia me Si Nepa kerinana, mbelin kal kuasaNa, janah melala sifatNa si luar biasa.—Roma 1:20.

5. Alat kai si banci nampati kita erlajar terbuen kerna tinepa?

⁵ Sanga siperdiateken ras siukuri kerna alam, sisadari maka kerina itepa alu cara si luar biasa. ’Erkiteken kita tek man Dibata, siangka’ maka lit Si Nepa aminna gia la siidah. Sieteh maka lit sifat-sifatNa si mehuli janah mbages kal kepentarenNa. (Heber 11:3, 27) Banci sipelajari terbuen kerna tinepaNa alu ngoge kai si nggo ipelajari ilmuwan. Piga-piga banci sipelajari i bas video Keajaiban Ciptaan Menyingkapkan Kemuliaan Allah, buku Benarkah Kehidupan Diciptakan?, ras Asal Mula Kehidupan​—Lima Pertanyaan yang Patut Direnungkan, ras buku Apakah Ada Pencipta yang Mempedulikan Anda? I bas majalah Sadarlah! rusur itama wawancara ras ilmuwan bage pe kalak si deban si njelasken engkai kalak e gundari tek maka Dibata e lit. Janah, artikel ”Apakah Ini Dirancang?” njelasken hal-hal si luar biasa i bas rubia-rubia nari, bage pe benda si debanna i bas alam, janah usaha ilmuwan guna ngusihsa.

6. Kai gunana alat riset man bandu?

⁶ Kenca iogena dua buku ndai, sekalak turang seninanta si umurna 19 tahun i bas Amerika Serikat nari ngatakenca, ”Tuhu-tuhu erguna kal buku e. Nggo piga-piga kali kupelajari.” Sekalak turang seninanta i Prancis nulis, ”Mejile kal kuakap artikel ’Apakah Ini Dirancang?’ I bas artikel e, icidahken maka asil rancangen insinyur si jagona pe talu denga ras rancangen si lit i bas alam.” Orang tua sekalak singuda-nguda si umurna 15 tahun i Afrika Selatan ngatakenca, ”Biasana, si pemena ioge anak kami i bas Sadarlah! nari e me artikel  ’Wawancara’.” Kerina publikasi e pe banci nampati kam ngidah bukti maka Si Nepa e lit. Jadi, banci itandaindu janah itulakndu ajaren palsu. Kinitekenndu pe banci seh kal paguhna bagi batang kayu si mbages uratna. Kam pe tetap paguh aminna ientamken angin si meter.—Jeremia 17:5-8.

7. Engkai ate Dibata igunakenndu perukurenndu?

⁷ Salah nge nungkun bagenda, ’Engkai aku arus tek man Pustaka?’ Lang. Ate Jahwe ula min kam tek erkiteken ngikuti jelma si nterem. Tapi, ”selaku mahluk si rukur” igunakenndu min perukurenndu i bas nandai Pustaka, janah ndatken bukti maka buku e tuhu-tuhu rehna i bas Dibata nari. Reh mbagesna pemetehndu kerna Pustaka, reh paguhna kinitekenndu. (Oge Roma 12:1, 2; 1 Timotius 2:4.) Salah sada cara nandai Pustaka eme alu mpelajari topik-topik si khususna atendu ietehndu terbuen.

8, 9. (a) Topik kai saja si meriah iakap kalak mpelajarisa? (b) Kai gunana adi sekalak jelma ngukuri kai siogena?

⁸ Lit si merhat mpelajari nubuat. Si debanna merhat mbandingken cerita Pustaka ras cataten ahli-ahli sejarah, ilmuwan, ntah pe arkeolog. Contohna, perdiateken nubuat si pemena si seh kal pentingna i bas Kejadin 3:15. Enda inubuatken la ndekah kenca Adam ras Hawa nentang Dibata ras caraNa merentah. Jenari, siangkai uga Kinirajan Dibata mbuktiken maka cara Dibata merentah eme si mehulina janah uga Kinirajan e ngkernepken kiniseran. Uga carana ngeriset Kejadin 3:15? Banlah daftar ayat si isina nuriken kerna uga nubuat e pagi terjadi. Kenca si e, darami ndigan ayat-ayat e itulis janah urutken erpalasken waktu. Alu bage, isadarindu maka penulis-penulis Pustaka nggeluh i bas jaman si berbeda tapi kerina kalak e nulis perincin si mperjelas nubuat e. Kam pe banci tek maka kesah si badia si negu-negu kalak e.—2 Petrus 1:21.

⁹ Sekalak turang senina i Jerman nulis, ”Penjelasen kerna Kinirajan Dibata lit i bas tep-tep buku Pustaka, padahal lit kira-kira 40 dilaki si nulissa. Janah nteremen i bas kalak e nari la sitandan.” Sekalak turang senina i Australia mpelajari artikel Menara Pengawal janah ikatakenna maka lit hubungen Paskah ras Kejadin 3:15 bage pe Mesias. ^[1] (Nehen penjelasen tambahen.) Itulisna, ”Artikel e erban aku sadar maka tuhu-tuhu hebat kal Jahwe. Kena kal kupusuhku erkiteken iaturken Jahwe lit Paskah man kalak Israel. Enda nubuat si terjadi bas diri Jesus. Sempat aku ngadi kentisik guna ngukuri maka luar biasa kal kerina e!” Engkai maka bage penggejapenna? Erkiteken iukurina mbages-mbages kai si iogena janah iangkaina. Asilna kinitekenna reh paguhna janah reh rembakna ia ras Jahwe.—Matius 13:23.

10. Uga kejujuren penulis Pustaka erban reh paguhna kinitekenta man Pustaka?

¹⁰ Ukuri ka kejujuren penulis Pustaka si la mbiar nulis kai si benar. Penulis-penulis paksa si e, biasana hal-hal si mehulina ngenca si icatatna kerna bangsa ras peminpinna. Tapi, nabi Jahwe labo ngenca nulis hal-hal si mehuli, tapi si la mehuli si ilakoken bangsa Israel ras raja-rajana pe icatatna. (2 Kronika 16:9, 10; 24:18-22) Janah, icatatna ka kesalahenna ras kesalahen juak-juak Dibata si debanna. (2 Samuel 12:1-14; Markus 14:50) Nina turang seninanta si nguda denga i Inggris,  ”Jarang lit kalak bage jujurna.” Reh tekna kita maka Pustaka i bas Jahwe nari.

11. Uga petunjuk i bas Pustaka erban kita tek maka Pustaka rehna i bas Dibata nari?

¹¹ Adi sekalak jelma nggit itegu-tegu Pustaka, pasti igejapkenna manfaatna. Enda erbanca ia tek maka Pustaka rehna i bas Dibata nari. (Oge Masmur 19:8-12.) Sekalak turang senina si nguda denga i Jepang nulis, ”Erkiteken iikuti keluargangku ajaren Pustaka, kami tuhu-tuhu ermeriah ukur. Kegeluhen kami dame janah dem kekelengen.” Pustaka nampati nterem jelma jadi sadar maka piga-piga hal si itekina la benar. (Masmur 115:3-8) Isampati Pustaka ka kalak si nggit ernalem man Jahwe, Dibata Si Mada Kuasa, janah ijanjikenNa wari si pepagi si terulin. Sebalikna, kalak si la tek man Dibata situhuna njadiken alam jadi dibatana. Lit ka si ngatakenca maka manusia banci erban kegeluhen reh ulina. Tapi seh asa gundari, siidah kalak enda la berhasil ndungi masalah doni enda.—Masmur 146:3, 4.

12, 13. Uga carana erdikusi kerna tinepa ntah pe Pustaka?

¹² Sanga diskusi atenta kerna tinepa ntah pe Pustaka ras kalak si deban, darami lebe kai si itekina. Ingetlah maka piga-piga kalak si tek evolusi tek ka maka Dibata e lit. Menurut kalak e, igunaken Dibata evolusi i bas nepa kerina si nggeluh. Si debanna tek maka evolusi e pasti benar erkiteken iajarken i sekolah. Janah, piga-piga lanai tek man Dibata erkiteken kecewa man agama. Emaka, si pemena, sungkuni kai si iteki kalak e ras kai alasenna ia tek. Kenca si e, begiken jabapenna. Alu bage, banci saja ia nggit megiken kam.—Titus 3:2.

¹³ Uga adi lit si ngatakenca kam motu erkiteken tek adi lit Si Nepa? Alu sopan, pindo ia nuriken uga bena-benana lit kegeluhen adi la lit Si Nepa. Kenca si e, banci sikataken maka mahluk si nggeluh si pemena banci nerusken kegeluhen adi ipebuena dirina. Padahal menurut sekalak profesor kimia, gelah banci reh buena, mahluk si nggeluh silang-langna perlu ia, (1) kuling guna ngkawali dirina, (2) kiningasupen ndatken ras nggunaken gegeh, (3) keterangen guna ngaturken rupa ras pertubuhna, bage pe (4) kiningasupen erban reh buena keterangen e. Nina profesor e ka, ”Mamang kal ate kalak sanga ietehna maka bentuk kegeluhen si sederhana saja pe tuhu-tuhu kal luar biasa.”

14. Penjelasan si sederhana kai si banci igunakenndu sanga erdiskusi kerna tinepa?

¹⁴ Sanga erdiskusi kerna tinepa, banci igunakenndu penjelasen rasul Paulus si sederhana, itulisna, ”Tuhu kerina rumah lit si majekkenca, tapi Dibata nge njadiken kerina si nasa lit.” (Heber 3:4) Sada rumah pasti lit si ngerancangsa ntah pe mbangunsa, terlebih ka mahluk si nggeluh. Banci ka igunakenndu publikasinta. Sekalak turang senina erdiskusi ras sekalak anak perana si la tek man Dibata. Iberena dua buku kerna tinepa. Seminggu kenca si e, nina anak perana e, ”Gundari, tek aku maka Dibata e lit.” Mulai ia erlajar Pustaka janah dungna jadi Saksi Jahwe.

15, 16. Ope denga sijelasken maka Pustaka i bas Dibata nari, kai si perlu silakoken? Janah kai si arus lalap siinget?

¹⁵ Uga adi sekalak jelma la tek man Pustaka? Bagi si nggo ituriken ndai, sungkun lebe kai si itekina, darami ka topik si meriah iakapna mbahassa. (Kuan-kuanen 18:13) Adi meriah iakapna mbahas ilmu  pengetahuan, bereken contoh i bas Pustaka nari si ncidahken maka isina sentudu ras ilmu pengetahuan. Adi meriah iakapna mbahas sejarah, turiken kejadin si icatat i bas buku sejarah janah cidahken maka nggo icatat Pustaka kejadin e ndauh ope denga e terjadi. Piga-piga kalak banci saja nggit megiken adi icidahkenndu ayat si banci nampati kegeluhenna, bagi pedah si lit i bas Khotbah i Uruk.

¹⁶ Ingetlah, la atenta sijabapen. Atenta gelah meriah iakap kalak diskusi ras kita bage pe erlajar kerna Pustaka. Emaka, sungkunlah alu sopan, janah begiken alu mehuli. Jelasken kinitekenndu alu sopan, terutama adi temanndu ngerana tuan asangken kam. Adi iergaindu kalak e, mbelin kemungkinenna kam pe iergaina. Janah banci mamang atena ngidah anak bagi kam ngudana nggo ngukuri kinitekenndu alu mbages. Tapi adi lit atena sijabapen ntah pe nokohi kam ngenca, la perlu ijabapndu.—Kuan-kuanen 26:4.

17, 18. (a) Kai saja si banci mpepaguh kinitekenndu man Pustaka? (b) Kai si nandangi sibahas i bas artikel seterusna?

¹⁷ Banci saja nggo sieteh ajaran dasar Pustaka, tapi e saja la bias erban kinitekennta paguh. Perlu sidarami janah sidatken kebenaren si terbagesen, bali bagi darami erta si terbuni. (Kuan-kuanen 2:3-6) Salah sada cara mpepaguh kinitekennta eme alu ngoge kerina isi Pustaka. Cubakenlah ngoge kerina isina i bas sada tahun. E me si nampati sekalak pertua keliling gelah tetap rembak ras Jahwe sanga ia nguda denga. Nina, ”Salah sada si erbanca aku tek maka Pustaka e kata Dibata eme alu ngogesa bena-benana nari seh ku pendungina. Dungna tuhu-tuhu kuangkai cerita-cerita Pustaka si nggo kueteh kitik-kitik nari.” Gelah iangkaindu bahan si iogendu gunaken ka alat riset si lit i bas cakap ndu, bagi Watchtower Library i bas bentuk DVD, PERPUSTAKAN ONLINE Sora Ermomo, Indeks Publikasi Menara Pengawal, bage pe Panduan Riset untuk Saksi-Saksi Yehuwa.

¹⁸ Orang tua, kam me kalak si tepatna ngajari anakndu kerna Jahwe. Emaka, uga kam banci nampati ia gelah paguh kinitekenna man Jahwe? Artikel seterusna mbahas piga-piga carana.