Nina rasul Paulus, ’Jahwe * eme Dibata sumbul kerina pengapul, si ngapuli kami i bas erbage-bage kiniseran.’ (2 Korinti 1:3, 4) Erkiteken si e, Pustaka mere jaminen man banta maka la lit manusia si la banci isampati Dibata janah la lit perbeben si la banci idungi Bapanta si i surga.

Adi sidat atenta pengapul i bas Dibata nari, arus lit tindakenta. Uga dokter banci nampati kita adi la kita reh ku rumah sakit? Pustaka ngiahken kita, ”Rembakkenlah dirindu ku Dibata, emaka Ia pe ngerembakken DiriNa man bandu.”—Jakup 4:8.

Uga kita banci tek maka Dibata banci rembak ras kita? Si pemena, erkiteken rusur ikatekenNa maka merhat kal Ia nampati kita. (Nehen  kotak.) Janah, si peduaken, erkiteken sieteh lit bukti kerna kalak si dat pengapul i bas Dibata nari—lit i bas jamanta bage pe jaman si nai.

 Gundari nterem kalak ndarami penampat Dibata. Raja Daud pe bage paksa iadapina melala perbeben. Nina man Jahwe, ”Begiken min aku tupung erlebuh mindo penampatNdu.” Uga tanggapen Dibata? Nina Daud ka, ”Ia si nampati ras periah ukurku.”—Masmur 28:2, 7.

Dibata ersura-sura maka Jesus pagi si mereken pengapul. Salah sada tugas si ibereken Dibata man bana, eme ”pepalem kalak si getem pusuhna” ras ’ngapuli kerina kalak si rate ceda’. (Jesaya 61:1, 2) Bagi si nggo inubuatken, Jesus ermediate kal man kalak ”si latih janah beraten”.—Matius 11:28-30.

Jesus ngapuli kalak alu mere pedah si mehuli, alu perbahanen si melias, janah i bas piga-piga kesempaten ipepalemna kalak si sakit. I bas sada paksa, sekalak si gadamen mindo man Jesus, nina, ”Bicara nggit kam, ngasup kap kam pepalem aku.” Mekuah kal ate Jesus emaka jabapna, ”Nggit aku, malemlah kam.” (Markus 1:40, 41) Malem me kalak si gadamen e.

Gundari Anak Dibata la reh ku doni guna mere pengapul man banta sekalak-sekalak. Tapi Bapana, Jahwe, ”Dibata sumbul kerina pengapul” terus nampati kalak si merluken penampat. (2 Korinti 1:3) Perdiateken empat cara uga Dibata mere pengapul.

• Pustaka si Badia. ”Kerina si tersurat i bas Pustaka si Badia isuratken ngajari kita gelah erpengarapen erkiteken kesabaren ras pergegeh si ibereken Pustaka si Badia man banta.”—Roma 15:4.

• Kesah si Badia. La ndekah kenca kematen Jesus, kerina runggun Kristen ngenanami kedamen. Engkai? ’Perpulungen e erkemalangan man Jahwe janah isampati kesah si badia.’ (Perbahanen 9:31) Kesah si badia eme gegeh Dibata. Gegehna seh kal belinna janah banci igunaken Dibata i bas ngapuli kerina kalak.

• Toto. Pedah Pustaka, ”Ula aru atendu kerna kai pe.” Sebalikna, ”Pindolah rusur man BaNa alu pusuh si dem pengataken bujur; kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu.”—Pilipi 4:6, 7.

• Teman-Teman Kristen banci tuhu-tuhu mereken pengapul paksa ngadapi perbeben. Nina Paulus kerna teman-temanna, ”Mbelin kal penampatna man bangku” paksa ”kesusahen ras kiniseran.”—Kolose 4:11; 1 Tesalonika 3:7.

Tapi banci saja kam tersungkun-sungkun uga cara enda banci nampati kam. Mari sipelajari terbagesen kerna pengalamen-pengalamen si nggo isuratken ndai. Bagi kalak e, banci igejapkenndu kata-kata Dibata si mpepalemken pusuh, nina, ’Kuapuli kam, bali ras nande ngapuli anakna.’—Jesaya 66:13.