1, 2. Engkai maka mehuli patoken peruis Saksi-Saksi Jahwe? (Nehen gambar i bas pemena artikel.)

ILAPORKEN sada koran Belanda kerna peruis peminpin-peminpin gereja i salah sada perpulungen kalak e. Nina, ”Enterem si santai peruisna, khususna sanga musim las.” Tapi, nina koran e ka, ”Saksi-Saksi Jahwe la bage peruisna sanga kebaktin. Dilaki erjas ras erdasi. Diberu make rok si gedang tapi modern. Saksi-Saksi Jahwe rusur ipuji erkiteken peruisna.” Nina Paulus man kalak Kristen kerna peruisna, ’Mehamat dingen mehuli min peruisndu’ selaku juak-juak Dibata. (1 Timotius 2:9, 10) Aminna gia ayat enda man diberu, patoken e banci ka igunaken man dilaki Kristen.

² Patoken peruis si mehuli penting man umat Jahwe. Janah, e penting man Dibata. (Kejadin 3:21) Ikataken Pustaka si Badia alu tangkas maka Jahwe, Penguasa alam semesta, mere patoken kerna peruis man umatNa. Emaka, kerna peruis, ula atenta ngena saja ngenca sibaba tapi si pentingna siukurilah kai si ngena ate Jahwe, Penguasa Si Meganjangna.

3. Kai si banci sipelajari arah Undang-Undang Dibata man kalak Israel kerna cara peruis?

 ³ I bas Undang-Undang Musa, lit aturen si ngelindungi bangsa Israel i bas kegeluhen bangsa i sekelewetna nari si seh kal jahatna. Undang-Undang e ncidahken maka Jahwe la senang nandangi peruis si erbanca lanai terbedaken dilaki ras diberu. I bas jaman gundari, e igelari mode peruis unisex. (Oge Ulangen 22:5.) Arah Undang-Undang e, sieteh la ngena ate Jahwe nandangi gaya peruis si erbanca dilaki teridah bagi diberu, janah diberu bagi dilaki, alu bage mesera mbedakenca si apai dilaki si apai diberu.

4. Kai si banci nampati kalak Kristen erban keputusen si mehuli kerna cara peruis?

⁴ Prinsip Pustaka banci nampati kita erban keputusen si mehuli kerna cara peruis. Prinsip enda banci igunaken la soal ija kita tading, cuaca ntah pe kebudayanna. La siperluken daftar si gedang kerna kai si banci ras si la banci ipake. Prinsip Pustaka ngenca si perlu siikuti, si mereken kebebasen i bas milih paken kai si atenta sipake. Mari sibahas piga-piga prinsip Pustaka si banci nampati kita meteh ”kai si mehuli, kai si ngena ateNa, janah kai si sempurna” sanga milih paken.—Roma 12:1, 2.

5, 6. Kai asilna adi peruisnta sentudu ras prinsip Pustaka?

⁵ Paulus itegu-tegu Dibata sanga nulis prinsip penting i bas 2 Korinti 6:4. (Oge.) Penampilenta ncidahken ise dirinta. Kita inilai jelma si nterem arah penampilenta. (1 Samuel 16:7) Selaku juak-juak Dibata, labo ngenca atenta make uis si ngena atenta. Adi siikuti prinsip Pustaka, la sipake baju si ketat, talang, ntah pe seksi. Ertina, la sipake baju si ncidahken bagin-bagin tubuhnta. Ula sempat lit kalak si mekapes iakapna ntah pe arus itulihkenna ayona i bas kita nari erkiteken cara peruista.

⁶ Adi peruis ras pakenta rapi, bersih, ras sopan, reh bagesna pengergan kalak man banta selaku juak-juak Jahwe, Penguasa Si Meganjangna. Janah banci saja merhat ia nandai Dibatanta Jahwe, tambah pengerganna man organisasinta, janah mbelin kemungkinenna nggit ia megiken beritanta si nelamatken kegeluhen.

7, 8. Ndigan khususna siperdiateken cara peruista?

⁷ Mbelin pengaruh cara peruista man Dibatanta si badia, turang seninanta, ras kalak si lit i bas daerah dinasta. Emaka, cara peruista harus nghamati Jahwe ras beritanta. (Roma 13:8-10) Peruista khususna penting sanga reh ku perpulungen ntah pe erberita. Cara peruista arus ncidahken maka kita nembah Jahwe. (1 Timotius 2:10) Memang, peruis si patut i bas sada daerah banci saja la patut i daerah si deban. Jadi la soal ija kita tading, selaku Saksi Jahwe ula sempat peruista erban sangkut ukur kalak si deban.

⁸ Oge 1 Korinti 10:31. Sanga reh ku kebaktin, peruista arus sopan janah la lebihsa. La banci siusih gaya peruis si la mehuli i bas doni enda. Janah sope ras kenca kebaktin, pakenta ula min santaisa ntah pe sembarangen. Bage ka pe arusna sanga kita masuk ras ndarat hotel nari. Alu bage, banci megah siakap ngataken maka kita Saksi Jahwe. Janah katawari pe kita banci mere kesaksin.

9, 10. Engkai Pilipi 2:4 mpengaruhi cara peruista?

 ⁹ Oge Pilipi 2:4. Engkai arus siukuri pengaruh peruista man turang seninanta? Salah sada alasenna eme erkiteken umat Dibata erusaha kal ngikuti pedah enda, ”Dage, bunuhlah biak-biak doni, umpamana: erlua-lua, erlagu la mehuli, peraten daging.” (Kolose 3:2, 5) Piga-piga turang seninanta nggo itadingkenna kegeluhenna si amoral, tapi banci saja erjuang denga ia ngelawan sura-sura si salah. Adi la kita metenget, peruista banci erban mesera iakapna ndalanken pedah Pustaka ras ngelawan sura-sura si salah e. (1 Korinti 6:9, 10) Tentu la atenta erban reh serana perjuangenna.

¹⁰ Sanga ras turang seninanta, kita ikawali i bas kalak si amoral nari. Cara peruista arus ikut ndukung lingkungen si bersih secara moral, ntah i bas perpulungen bage pe i bas keadan si santai. Memang bebas kita milih pakenta. Tapi, peruista arus erban menukah iakap kalak njaga perukurenna, rananna, ras lagu langkahna tetap bersih i lebe-lebe Dibata. (1 Petrus 1:15, 16) Kekelengen si tuhu-tuhu ”labo mekarus, la ncariken untung man bana saja”.—1 Korinti 13:4, 5.

11, 12. Uga Pengerana 3:1, 17 nampati kita i bas milih paken?

¹¹ Sanga iputusken umat Dibata kai si atena ipakena, ietehna maka ”kerina pendahin ras perbahanen lit waktuna”. (Pengerana 3:1, 17, Terjemahan Dunia Baru [NW]) Cuaca, musim, lingkungen ras keadan banci mpengaruhi kai si atenta sipake. Tapi patoken Jahwe lalap seri.—Maleaki 3:6.

¹² I bas daerah si melas cuacana, la menukah milih paken si patut ras sopan. Adi peruista la ketatsa ntah pe la longgarsa, bagin-bagin kulanta la teridah. Enda erbanca turang seninanta ngergai kita. (Jop 31:1) Selain si e, sanga kita i pantai ntah i kolam renang, paken renangta arus sopan. (Kuan-kuanen 11:2, 20) Aminna gia enterem kalak make paken renang si seksi, arus sipastiken, maka pilihenta muliaken Dibatanta si badia, Jahwe.

13. Engkai pedah i bas 1 Korinti 10:32, 33 perlu sipertimbangken sanga milih paken?

¹³ Lit prinsip si penting si debanna si perlu sipertimbangken. Perlu kita metenget gelah la terganggu pusuh peraten kalak si deban. (Oge 1 Korinti 10:32, 33.) La sipake paken si banci erban sangkut ukur turang seninanta bage pe kalak si la ngelayani Jahwe. Itulis Paulus, ”Tapi sekalak-sekalak kita arus mperdiateken temanta manusia janah ngukuri kai si mereken kiniulin man bana gelah alu bage erteguhna kinitekenna.” Nina ka, ”Sabap Kristus pe labo dirina saja iukurina.” (Roma 15:2, 3) Bagi Jesus, arus pentingen siakap ngelakoken peraten Dibata ras nampati kalak si deban asangken selera pribadinta. Emaka, aminna gia ngena atenta gaya peruis tertentu, la kita nggit makesa adi e erbanca itulak kalak beritanta.

14. Uga orang tua banci mere pelatihen man anak-anakna gelah imuliakenna Dibata alu cara peruisna?

¹⁴ Orang tua Kristen ertanggung jabap ngajari anakna gelah ngikuti prinsip Pustaka. Salah sadana eme arus ipastikenna maka ia ras anak-anakna erban meriah ukur Dibata alu make paken ras erpenampilen si sopan. (Kuan-kuanen 22:6; 27:11) Uga orang tua banci mere pelatihen man anak-anakna gelah nghamati Dibatanta si badia ras patokenNa? Orang tua arus jadi usihen. Alu perkeleng, perlu iajarina anak-anakna ija nukur paken si sopan ras uga cara milihsa. Ula ipilih anak-anak paken erkiteken ngena saja ngenca atena. Tapi si pentingna, perlu ipilihna paken si nghamati Jahwe, Dibata si iwakilina.

15. Kai si arusna jadi patoken sanga erban keputusen si bijaksana?

¹⁵ Pustaka e me patoken si erguna kal man banta i bas erban pilihen si bijaksana si banci nghamati Dibata. Aminna pe bage, lit ka selera pribadinta. Banci saja la seri gaya peruista bage pe kiningasupenta i bas nukur uis ras kalak si deban. Tapi peruista arus lalap rapi, bersih, sopan, la lebihsa, cocok ras keadan bage pe ras inganta tading.

16. Engkai usahanta i bas make paken si mehuli la sia sia?

¹⁶ Memang, ndarami paken si cocok ras sopan la lalap menukah. Melala toko  la ndayaken paken si jarang ipake kalak. Emaka, siperluken terbuen waktu ras usaha i bas ndarami rok, gaun, ras blus si sopan, ntah pe jas ras celana si la ketatsa. Tapi iperdiateken ras iergai turang seninanta kerina usahanta i bas make paken si sopan bage pe mejile man tatapen. Janah banci puas siakap erkiteken simuliaken Bapanta si perkeleng. Enda ergan asangken usaha si enggo siban gelah Dibata imuliaken arah peruista.

17. Kai saja si perlu ipertimbangken sekalak dilaki sanga ibanna atena janggut ras jambangna?

¹⁷ Banci nge dilaki lit janggut ras jambangna? I bas Undang-Undang Musa, dilaki arus lit janggut ras jambangna. Tapi, Undang-Undang e lanai ipake kalak Kristen janah la perlu iikutina. (Imamat 19:27; 21:5; Galati 3:24, 25) I bas piga-piga kebudayan, janggut ras jambang si rapi banci saja ianggap biasa ras terhormat. Enda la erban kalak nulak beritanta. Janah, piga-piga dilaki si enggo itangkuhken lit janggut ras jambangna. Tapi lit ka si la nggit erbanca. (1 Korinti 8:9, 13; 10:32) I bas kebudayan ntah pe ingan si deban, janggut ras jambang ianggap la biasa janah la cocok man perberita. Banci ka ianggap jadi ’pandangen’ janah Dibata pe la imuliaken.—1 Timotius 3:2, 7; Roma 15:1-3.

18, 19. Uga Miha 6:8 nampati kita?

¹⁸ Bujur kal sikataken erkiteken Jahwe la mere daftar si gedang kerna kai si banci ras la banci i bas cara peruis bage pe penampilenta. Sebalikna, bebas kita erban keputusen si masuk akal si erpalasken prinsip Pustaka. Jadi, cara peruista bage pe penampilenta banci ncidahken maka kita juak-juak Dibata si meteruk ukur.—Miha 6:8.

¹⁹ Alu meteruk ukur siakui maka Jahwe Dibata si bersih ras badia. Janah patoken si iberekenNa eme si mehulina man banta. Adi kita meteruk ukur, siikutken patokenNa e i bas kegeluhennta. Alu bage siergai perasan ras pendapat kalak si deban.

20. Uga arusna pengaruh paken ras penampilenta man kalak si deban?

²⁰ Peruista arus ncidahken alu jelas maka kita juak-juak Jahwe. Meganjang kal patoken Jahwe, janah meriah ukurta ngikutkenca. Nterem turang seninanta patut ipuji erkiteken penampilen ras lagu langkahna si mehuli. Asilna, kalak si tutus atena ngaloken berita Pustaka, dungna imuliakenna janah ibanna meriah ukur Jahwe. Adi sipilih paken alu bijaksana, terus simuliaken Pribadi si ”ruisken kiniulin dingen kemulian”.—Masmur 104:1, 2.