1, 2. (a) Masalah kai saja si iadapi kalak gundari, janah kai akibatna? (b) Arapen kai si lit i bas Jesaya 41:10,13?

SEKALAK perintis biasa si erjabu ras sekalak pertua ngatakenca, ”Aminna gia aku tetap sibuk secara rohani, ertahun-tahun dekahna lalap aru ateku. Enda erbanca la aku banci medem, mpengaruhi kesehatenku, mpengaruhi perbahanenku man kalak si deban, janah maun-maun lanai kuakap aku ngasup.”

² Banci nge iangkaindu perasan turang seninanta e? Kita nggeluh i bas doni Setan si jahat. Erkiteken si e, melala sihadapi perbeben. Bagi jangkar si nahan sada kapal, kearunate banci erban kitik ukurta. (Kuan-kuanen 12:25) Engkai maka banci aru ateta? Banci saja ceda atendu erkiteken kalak si ikelengindu mate, mekelek penakitna, ntah pe ngadapi tentangen. Banci jadi, arus kam erbintuas guna ncukupi keperlun keluargandu erkiteken mesera ndarami sen. Dungna, lanai kam ngasup janah lanai meriah ukurndu erkiteken stres. Tapi, teklah kam maka Dibata pasti nampati kam.—Oge Jesaya 41:10, 13.

3, 4. (a) Pustaka nggunaken kata ”tan” i bas nggambarken kai saja? (b) Kai si banci erbanca kote tanta?

³ Rusur igunaken Pustaka si Badia bagin-bagin kula i bas  njelasken erbage sifat ntah pe perbahanen sekalak jelma. Contohna, lit ratusen kali kata tan ipake. Adi Pustaka nuriken kerna tan sekalak jelma ipegegehi, e banci ertina maka kalak e nggo ergiah-giah mulihi, reh paguhna, janah nggo ngasup erdahin. (1 Samuel 23:16, Terjemahan Dunia Baru [NW]; Esra 1:6, NW) Banci ka ertina maka nggo positif perukuren sekalak jelma erkiteken lit arapenna i bas wari si pepagi.

⁴ Maun-maun, igunaken Pustaka kata-kata tan si kote i bas nggambarken kalak si kitik ukurna ntah pe la lit arapenna. (2 Kronika 15:7, NW; Heber 12:12, NW) Banci saja lanai kam ngasup erkiteken stres, latih iakapndu, ntah pe lanai rembak ras Jahwe. Ija banci datndu pengapul? Uga kam banci ergiah-giah janah ngasup megeng-geng bage pe tetap ermeriah ukur?

5. (a) Kai si banci sigejapken paksa lit masalah, tapi kai si perlu siinget? (b) Kai si nandangi si bahas?

⁵ Oge Sepanya 3:16, 17. Paksa lit masalah, ula min kote tanta. Ertina, ula sempat kita mbiar ntah pe kitik ukurta. Bapanta si perkeleng, Jahwe, ngundang kita gelah siampeken kerina kearunatenta man baNa. (1 Petrus 5:7) Jahwe ermediate man banta bali bagi Ia ermediate man bangsa Israel. Nina man kalak e, ”Ula akapndu maka kurangsa gegeh [JAHWE] lako nampati kam.” Katawari pe Jahwe banci nelametken juak-juakNa si setia. (Jesaya 59:1) I bas artikel enda, sibahas telu contoh Pustaka si ncidahken maka Jahwe ersura-sura janah ngasup mpegegehi umatNa guna ngelakoken peratenNa amin gia ngadapi perbeben si mberat. Sipelajari kari uga contoh-contoh e banci mpegegehi kam.

6, 7. Kai si banci sipelajari i bas kemenangen kalak Israel nandangi kalak Amalek?

⁶ La ndekah kenca kalak Israel ibebasken Mesir nari, reh kalak Amalek nerang kalak enda. Ipindo Musa man Josua, dilaki si perpang gelah ipimpinna kalak Israel erperang. Kenca si e, Musa, Harun, ras Hur lawes ku sada uruk si ndeher. Ije nari, banci iidahna daerah perang. Mbiar nge kalak e teluna janah kiam? Lang!

⁷ Iban Musa sada cara si banci erban kalak e menang ngelawan kalak Amalek. Ijemakna tongkat i bas Dibata si benar nari janah iangkatna ku das. Sanga ilakoken Musa e, ibereken Jahwe gegeh man kalak Israel ngelawan kalak Amalek. Tapi, sanga latih iakap Musa janah mulai kote tanna, kalak Amalek mulai menang. Mis reh Harun ras Hur nampati Musa, ”Ibaba Harun ras Hur batu man ingan Musa kundul. Ia duana tedis arah kawes ras kemuhenna ngangkat tan Musa; bage me ibahanna terus ngadi-ngadi ben.” Erkiteken megegeh tan Dibata, kalak Israel menang.—Keluaren 17:8-13.

8. (a) Kai si ilakoken Asa paksa kalak Sudan ngancam Juda? (b) Uga banci siusih Asa?

⁸ Jahwe pe banci nggunaken tanNa si megegeh i bas nampati umatNa sanga jaman Raja Asa. I bas Pustaka, lit ituriken melala pasuken tentara. Tapi, si mbelinna eme Sera i bas Sudan nari, lit 1.000.000 prajuritna si erpengalamen. Jumlah pasuken Sudan menam dua kali buen asangken pasuken Asa. Mbiar nge Asa janah kitik ukurna, ntah pe kote tanna? Lang! Mis ipindo Asa penampat Jahwe. Secara masuk akal, Asa la mungkin menang. ”Tapi  i bas Dibata kai pe banci jadi.” (Matius 19:26) Igunaken Jahwe kuasaNa si mbelin janah ’italukenNa tentera Sudan e i lebe-lebe Asa’ erkiteken ”ia tetap patuh man [JAHWE] i bas gedang-gedang geluhna”.—2 Kronika 14:8-13; 1 Raja-Raja 15:14.

9. (a) Kai nge erbanca maka Nehemia la ngadi mbangun tembok Jerusalem? (b) Uga Jahwe njabap toto Nehemia?

⁹ Sanga Nehemia seh Jerusalem, iidahna musuh i bas negeri si deban nari ngancam kalak Juda, enda me si erbanca ngadi pembangunen tembok Jerusalem. Kota e la lit si ngkawalisa, janah kitik ukur kalak Jahudi. Uga perasan Nehemia? Kitik ka nge ukurna janah kote tanna? Lang! Bagi Musa, Asa, ras juak-juak Jahwe si debanna si setia, Nehemia lalap erpengendes man Jahwe. I bas keadan si e pe, ipindona penampat Jahwe janah totona pe ijabap. Igunaken Dibata ”kuasa” ras ’tanNa si megegeh’ guna mpegegehi kalak Jahudi. (Oge Nehemia 1:10; 2:17-20; 6:9.) Tek nge kam maka Jahwe nggunaken ”kuasa” ras ’tanNa si megegeh’ guna mpegegehi umatNa gundari?

10, 11. (a) Kai si ilakoken Setan gelah kote tanta? (b) Kai si igunaken Jahwe i bas mpegegehi kita? (c) Manfaat kai si ialokenndu i bas pengajaren Jahwe nari?

¹⁰ Tan Iblis pasti la pernah kote. Terus iserangna kita gelah lanai ngelakoken pendahin Kristen. Igunakenna bual, ancamen arah pemerentah, peminpin agama, bage pe kalak murtad nari. Kai tujunna? Lanai atena kita erberita si meriah. Tapi, Jahwe ngasup ras nggit nampati kita, janah iberekenNa kesah si badia guna mpegegehi kita. (1 Kronika 29:12) Arus sipindo kesah si badia gelah banci ngelawan Setan ras donina si jahat. (Masmur 18:39; 1 Korinti 10:13) Bujur ka sikataken erkiteken penampat Pustaka. Ukuri ka uga lalana si nggo sipelajari tep-tep bulan i bas publikasinta nari. Kata-kata i bas Sakaria 8:9, 13 (oge) ipeseh sanga rumah pertoton Jerusalem sangana i bangun mulihi, tapi kata-kata e pe banci nampati kita.

¹¹ Jahwe pe mpegegehi kita arah pengajaren i bas perpulungen, kebaktin, bage pe sekolah-sekolah teokratis. Pengajaren e nampati kita ngelayani Dibata alu perukuren si benar, netapken tujun, ras ngelakoken melala tanggung jabapnta selaku kalak Kristen. (Masmur 119:32) Nggit nge kam datken gegeh i bas pengajaren Jahwe nari?

12. Kai si arus silakoken gelah tetap megegeh?

¹² Isampati Jahwe umatNa naluken kalak Amalek ras Sudan. IberekenNa ka gegeh man Nehemia ras kalak Jahudi guna ndungi pembangunen tembok Jerusalem. Gundari pe, Dibata banci mpegegehi kita gelah terus erberita aminna gia sihadapi kearunate, tentangen, bage pe kalak si nulak beritanta. (1 Petrus 5:10) La ibeneken Jahwe perbebenta alu mujijat. Sebalikna, arus silakoken kewajipenta. Perlu sioge Pustaka tep-tep wari, erban pesikapen ras reh ku perpulungen tep-tep minggu, rusur pelajaren pribadi ras kebaktin jabu, bage pe terus ertoto mindo penampat Jahwe. Ula sempat kita sibuksa si erbanca lanai sigunaken kerina si ibereken Jahwe guna mpegegehi kita. Adi lanai iakapndu kam ergiah-giah ngelakoken si e kerina, pindolah penampat Dibata. Kenca si e, gejapken uga kesah si badia ”erdahin i bas kam gelah kam nggit dingen ngasup ndalanken si  ngena atena”. (Pilipi 2:13) Seterusna, kai si banci ilakokenndu guna mpegegehi tan kalak si deban?

13, 14. (a) Uga sekalak turang senina ipegegehi kenca kematen ndeharana? (b) Uga kita banci mpegegehi kalak si deban?

¹³ Ibere Jahwe man banta turang senina i belang-belang doni si ermediate janah banci mpegegehi kita. Nina Paulus, ’Angkatlah tan si kote, janah pegegehlah tiwen si la ergegeh! Tetaplah kam erdalan i bas dalan si pinter.’ (Heber 12:12, 13) Enterem kalak Kristen i bas abad pemena ndatken penampat ras gegeh i bas turang seninana nari. Gundari pe bage. Perdiateken sada contoh. Sekalak turang senina ceda atena erkiteken mate ndeharana, kenca si e iadapina ka erbage perbeben si deban. Nina, ”Dungna kueteh maka la banci sipilih jenis percuban, digan, ras asa rusurna e reh. Toto ras pelajaren pribadi bali bagi baju pelampung si erban takalku tetap i das lau. Janah, penampat turang senina tuhu-tuhu ngapuli aku. Dungna, sadar aku maka penting kal rembak ras Jahwe ope denga reh perbeben.”

¹⁴ Harun ras Hur mpegegehi Musa alu natang tanna paksa kalak Israel erperang ngelawan kalak Amalek. Gundari, banci ka siukuri uga kita banci ndukung ras nampati kalak si deban. Piga-piga turang seninanta kitik ukurna erkiteken nggo metua, kurang sehat, tentangen keluarga, lungunen, ntah pe kematen kalak  si ikelengina. Banci ka sipegegehi anak muda si rusur itekan ngelakoken kai si salah ntah pe gelah berhasil i doni enda. (1 Tesalonika 3:1-3; 5:11, 14) Ukurilah uga kam banci ncidahken maka kam tuhu-tuhu ermediate man kalak si deban i bas Bale Kinirajan, sanga erberita, man ras-ras, ntah pe nelepon kalak e.

15. Adi kata-katanta positif man turang seninanta, kai asilna?

¹⁵ Banci italuken Asa pasuken Sudan si mbelin. Kenca si e, nabi Asaria mere semangat man bana ras man rayatna alu ngataken, ”Tapi kam arus megegeh dingen ola aru atendu. Lit nge upahndu ndahiken dahinndu.” (2 Kronika 15:7) Asa pe jadi ergiah-giah erban melala perubahen guna mpekena ibadat si benar. Bage ka pe, kata-katandu si positif banci mpebelin pusuh kalak si deban gelah terus ngelayani Jahwe. (Kuan-kuanen 15:23) Janah, ula kam pernah lupa maka kalak si deban banci jadi semangat adi iberekenndu komentar si mpegegehi kiniteken i bas perpulungen.

16. Uga pertua banci ngusih Nehemia? Bereken contoh kerna uga turang senina nggo nampati kam.

¹⁶ Alu penampat Jahwe, Nehemia ras kalak Jahudi jadi semangat mulihi. I bas 52 wari ngenca idungina pembangunen tembok Jerusalem! (Nehemia 2:18; 6:15, 16) Sanga kalak si deban erdahin, Nehemia pe ikut erdahin. (Nehemia 5:16) Gundari, melala pertua ngusih Nehemia alu ikut mbangun, mbersihken ras ngurus Bale Kinirajan. Dilaki-dilaki si perkeleng enda pe mpegegehi turang senina si ’kitik ukurna’ alu ndahi kalak e janah erberita ras ia.—Oge Jesaya 35:3, 4.

17, 18. Sanga siadapi perbeben ntah pe aru ate, kai si banci siteki?

¹⁷ Sanga kita erdahin ras turang seninanta, persadanta reh paguhna. Hubungenta pe banci reh rembakna janah reh tekna kita maka pasu-pasu Kinirajan Dibata pasti terjadi. Adi sipegegehi tan kalak si deban, sisampati ia gelah megeng-geng ngadapi perbeben janah gelah tetap positif perukurenna nandangi wari si pepagi. Selain si e, adi sisampati kalak si deban, tanta pe banci ipegegehi janah banci terus sitatap wari si pepagi.

¹⁸ Adi siukuri uga Jahwe nampati ras ngkawali juak-juakNa si setia i bas jaman si nai, reh paguhna kinitekenta man baNa. Emaka, sanga siadapi perbeben ras aruatenta, ’ola bere tanta kote’! Banci kam tek adi ipindondu penampat Jahwe, tanNa si dem alu kuasa banci mpegegehi kam, alu bage banci inanamindu pasu-pasu Kinirajan si nandangi reh.—Masmur 73:23, 24.